“Zot Pa Finn Prend Compte”

KAN ignore bann avertissements, sa kapav éna bann conséquences bien grave.

En 1974, bann habitants la ville Darwin, en Australie, ti pé prépare fête fin d’année, kan zot finn gagne avertissement ki enn cyclone ti pé approché. Mais sa ti faire environ 30 ans ki enn cyclone pa ti’nn ravage Darwin! Alors, pa ti éna okenn raison pou pensé ki sa ti pou arrivé asterlà. C’est séki peut-être bann habitants ti pensé. En tout cas, la plupart parmi zot pa ti pé trouve danger ki ti pé menace zot. Eh bien, par la suite, bann rafales bien violent finn commence enlève toits bann lakaz kot dimoune ti pé réfugié, ek bann murailles finn commence crazé. Lendemain matin, Darwin ti’nn détruire complètement.

Enn volcan ti éclaté en Novembre 1985, dans Colombie. La neige ek glaçon ki’nn fonn, ti provoque enn coulée la boue, ki ti englouti plus ki 20,000 habitants la ville Armero. Eski ti averti bann habitants? Montagne-la ti pé tremblé pendant plusieurs mois. Mais pa pou sa ki bann habitants Armero ti tracassé; pou zot, zot finn habitué ar sa. Bann l’autorité ti gagne avertissement ki volcan-la ti pou éclaté, mais zot pa’nn faire grand-chose pou averti le public. Au contraire, radio ti passe bann annonces pou rassure la population. Ti mem servi bann la-cloches l’église pou encourage bann dimoune pou reste calme. Mais, dans la soirée, ti éna deux explosions spectaculaire. Ki ou ti pou faire, ou? Eski ou ti pou quitte tou ou bann zaffaires ek sauvé allé? Malheureusement, pa beaucoup ki’nn faire sa; et kan zot inn prend conscience, li ti’nn trop tard.

Souvent, bann experts faire bann prévisions exacte ki côté bann tremblements de terre kapav levé. Mais c’est bien rare ki zot kapav prédire moment exacte ki sa kapav arrivé. En 1999, bann tremblements de terre finn touye environ 20,000 dimoune à travers la terre. Beaucoup parmi sa bann victimes-la, ti pensé ki kitfois sa pa ti pou arrive zot.

Couma Ou Prend Bann Avertissements Ki Bondié Limem Pé Donné?

La Bible finn décrire clairement en avance, bann événements ki ti pou marque bann dernier jours. En rapport avec sa, la Bible encourage nou pou prend compte séki ti passé dans “l’époque Noé.” ‘Sa l’époque-la, avant déluge,’ dimoune ti occupé avec zot la-vie toulé-jours, mem si zot ti sûrement tracassé par l’ampleur ki la violence ti prend dans zot l’époque. Mais en séki concerne l’avertissement ki Bondié ti donné par so serviteur Noé, zot pa “[ti] prend compte ziska ki déluge finn vini ek finn balié zot tou.” (Matthieu 24:37-39) Eski ou ti pou prend compte sa avertissement-la? Eski ou pé faire sa zordi?

Et ki ou ti pou faire, supposé ou ti reste dans Sodome, près ar la Mer Rouge, dans l’époque Lot, neveu Abraham? Paysage sa région-la ti coumadire enn paradis, et pa ti manque nanrien dans Sodome. Nanrien pa ti tracasse bann dimoune. Oui, dans l’époque Lot, dimoune “ti pé mangé-boire, acheté-vendé, zot ti pé planté, zot ti pé construire.” Mais, zot ti pé vive dans enn société bien immoral. Eski ou ti pou écoute avertissement Lot, kan li ti condamne bann mauvais pratiques so l’époque? Eski ou ti pou écouté kan li ti dire ou ki Bondié inn décidé pou détruire la ville Sodome? Ou-bien, eski ou ti pou dire ki li pé badiné, pareil couma so bann prétan-gendres ti pensé? Ou-soit peut-être, ou ti pou commence sauvé, mais après, ou ti pou guette derrière pareil couma madame Lot ti faire? Mem si lézot ti ignore sa avertissement-la, kan Lot ti sorti dans Sodome sa jour-la, “enn la-pluie difé ek souffre ti tombé depuis dans le ciel, et ti détruire zot tou.”—Luc 17:28, 29.

Zordi aussi, majorité dimoune pa pé prend compte. Mais sa bann l’exemples-la finn préservé dans Parole Bondié pou averti nou, pou encourage nou pou CONTIGNE VEILLÉ!

[L’encadré/Zimage page 22]

Eski Vrémem Ti Éna enn Déluge lor La Terre

Beaucoup critiques dire Non. Mais la Bible dire Oui.

Jésus Christ limem ti koz lor là, et li ti témoin dans le ciel kan sa ti arrivé.

[L’encadré/Zimage page 23]

Eski Sodome ek Gomorrhe Ti Vrémem Détruire?

Bann recherches archéologique confirme sa.

L’histoire mentionne sa.

Jésus aussi ti confirme sa événement-la, et 14 différent livres la Bible mentionne sa.