Grâce à l’Endurance Nous Gagne Récompense

¹ “Par zot l’endurance, zot pou gagne zot nâmes.” (Luc 21:19) C’est bann paroles ki forme partie dans prophétie ki Jésus ti annoncé concernant “l’époque la fin sa lé-monde-la.” Sa bann paroles-la montré nous clairement ki à cause nous pé garde nou fidélité, nous pou bizin prêt pou faire façe ar beaucoup difficultés. Mais grâce à la force ki Jéhovah donne nous, sakenn parmi nous kapav ‘enduré ziska la fin’ ek “gagne la vie sauve.”—Mat. 24:3, 13; Phil. 4:13.

² Bann persécutions, bann problèmes la santé, bann problèmes financier, ek bann souffrances affectif kapav rann chaque jour bien difficile. Mais, fodé jamais nous blié ki Satan pé essaye casse nou fidélité pou Jéhovah. Chaque jour ki nous reste fidèle à Jéhovah, c’est enn jour de plus ki nou’nn réponn bann accusations Satan. Nous gagne enn grand l’encouragement kan nous koné ki Jéhovah pa blié “bann larmes” ki nous versé kan nous dans bann grand difficultés! Sa bann larmes-la éna valeur devant lizié Jéhovah, ek nou fidélité faire so léker content!—Ps. 56:8; Prov. 27:11.

³ Bann l’Épreuves Raffine Nous: Bann difficultés kapav révélé ki nou la-foi inn affaibli, ou-soit ki nous éna enn défaut couma par exemple l’orgueil, ou-soit nous impatient. C’est vrai ki dé-fois nous envie évite bann épreuves, ou bien arrête zot. Mais au lieu nous rode bann moyens ki pa en accord avec bann principes Biblique pou faire sa, nous bizin suive conseil la Bible ki encourage nous pou “laisse l’endurance faire so travail complètement.” Kifer? Parski kan nous endure bann l’épreuves avec fidélité, sa pou aide nous vinn “complet ek sans défaut dans tou kitsoz.” (Jacq. 1:2-4) L’endurance kapav aide nous développe bann qualités ki éna beaucoup valeur. Nous pou vinn enn kikenn ki raisonnable, ki comprend lézot, ek ki éna miséricorde.—Rom. 12:15.

⁴ Enn la-Foi Ki’nn Passe l’Épreuve: Kan nous faire face ar bann difficultés, nous gagne enn la-foi ki’nn passe l’épreuve ek sa éna beaucoup valeur devant lizié Bondié. (1 Pierre 1:6, 7) Sa qualité la-foi-la équipe nous pou nous reste fidèle devant bann lézot l’épreuves. En plus, nous ressenti l’approbation Bondié, ek sa renforce nou l’espérance ki lerla pou vinn beaucoup plus réel pou nous.—Rom. 5:3-5.

⁵ En Jacques 1:12, disciple Jacques koz lor meilleur récompense ki nous kapav gagné kan nous enduré. Li dire: “Heureux sa kikenn ki contigne enduré-la, parski kan li vinn enn kikenn ki approuvé li pou gagne la couronne de vie.” Donc, anou reste fidèle à Jéhovah, ek garde confiance ki Li pou bien récompense “bann ki contigne content Li.”

Étudiants Progressé 2^ème Partie: Préparation Avant Nous Dirige enn l’Étude Biblique

Bann l’Études Biblique Ki Faire Nou

¹ Si nou’lé enseigné dans enn façon efficace pendant enn l’étude Biblique, nous bizin pa zis examine bann paragraphes ek guette bann versets la Bible ki cité. Nous bizin faire l’étude-la dans enn façon ki touche léker sa étudiant-la. Couma nous pou kapav faire sa? C’est grâce à enn bon préparation ki adapté avec besoin nou étudiant.—Prov. 15:28.

² Couma Faire Sa Préparation-La: D’abord, prié Jéhovah pou sa dimoune-la, ek pou so bann besoins. Demann Jéhovah pou aide ou touche so léker. (Col. 1:9, 10) Pou bien comprend thème enn chapitre, prend le temps pou examine titre chapitre-la ou-soit leçon-la, bann sous-titres, ek bann zimages, si éna. Demann ou-même: “Ki l’objectif principal sa sujet-la?” Sa pou aide ou mette l’accent lor bann points important kan ou pé faire l’étude.

³ Examine chaque paragraphe attentivement. Rode réponse bann questions posé. Souligne zis bann mots ek bann phrases important. Guetté ki rapport éna entre bann versets ki cité ek point principal ki éna dans paragraphe-la, ek décidé ki bann versets ou pou lire pendant l’étude. Kitfois ou pou trouve sa utile pou écrire pensée important sa bann versets-la dans la marge. Étudiant-la bizin trouvé ki tou séki li pé aprann sorti dans la Bible.—1 Thess. 2:13.

⁴ Adapté Leçon-la d’Après Besoin Ou Étudiant: Ensuite, réfléchi couma ou kapav adapté leçon-la d’après besoin ou étudiant. Essaye pensé ki bann questions li kapav posé ek ki bann points li kapav gagne difficulté pou comprend ou-soit pou accepté. Demann ou-même: ‘Ki kitsoz li bizin comprend ou-soit li bizin amélioré pou li kapav progressé lor plan spirituel? Couma eski mo kapav touche so léker?’ Après sa adapté ou l’enseignement d’après so bann besoins. Des fois peut-être ou pou trouvé ki li bon pou prépare enn illustration, enn l’explication, ou-soit enn série question ki pou aide étudiant-la pou comprend enn point ou-soit enn verset. (Neh. 8:8) Mais évite ajoute enn quantité l’information ki pa vrai-même nécessaire pou soutenir thème sa l’étude-la. Enn ti révision à la fin l’étude pou aide étudiant-la pou rappelle bann points important.

⁵ C’est vrai-même enn grand la joie kan nous trouve bann nouveau pé rapporte bann fruits de justice pou glorifié Jéhovah! (Phil. 1:11) Pou aide zot réussi sa l’objectif-la, prépare bien chaque fois ki ou pou dirige enn l’étude Biblique.