Enn dette ki nou ena envers lezot

¹ L’apotre Paul ti senti ki li ti ena devoir pou al preche avek bann dimoune. Li ti koné ki Jéhovah finn prend bann disposition pou ki tou sorte qualité dimoune kapav sapé grace a di-sang So Garson ki ena enn grand valeur. (1 Tim. 2:3-6) A cause sa Paul ti dire: “Mo doit bann Grec ek bann etrangé toulé-deux, bann ki sage ek bann ki pa sage.” Li ti faire beaucoup zeffort, ek li ti travail dur pou paye sa dette ki li ti ena envers lezot. Couma li ti faire sa? C’est kan li ti partage la bonne nouvelle avek zot.—Rom. 1:14, 15.

² Pareil couma Paul, bann chrétien zordi faire zeffort pou partage la bonne nouvelle avek zot voisin chaque fois zot gagne l’occasion. “La grande tribulation” pé kosté, ek nou pa reste beaucoup lé-temps pou al rod bann dimoune ki sincere. Nou souhaité ki l’amour sincere pou bann dimoune, pousse nou pou faire nou maximum dan sa travail ki kapav sauve zot la-vie-la.—Mat. 24:21; Ézék. 33:8.

³ Paye nou dette: Enn premier fason kot nou kapav joinde bann dimoune c’est kan nou al preche devant zot la-porte. Si dan certain territoire, beaucoup dimoune pa kot zot, nou bizin prend bann note precis, ek revisite zot enn lot fois. Coumsa nou pou kapav joinde pli beaucoup dimoune. (1 Cor. 10:33) Nou kapav aussi joinde dimoune dan bann l’endroit commercial, lor la rue, dan bann jardin, ek aussi par telephone. Li bon nou demann nou-mem, ‘Eski mo pé faire tou seki mo kapav pou saisi tou moyen pou preché ek partage sa message ki kapav faire bann dimoune gagne la vie-la?’—Mat. 10:11.

⁴ Enn soeur pionnier ti senti ki li ena enn grand responsabilité pou preche avek tou bann dimoune dan so territoire. Ti ena enn lakaz, kot bann volet ti touletan fermé, ek jamais personne pa ti là. Mais, enn jour kan sa soeur-la pa ti dan predication, li’nn remark enn l’auto devant sa lakaz-la. Li pa ti’lé rate sa l’occasion-la, alors li’nn al tape la porte. Enn missié finn ouvert, ek zot inn gagne enn conversation. Plitar soeur-la ek so mari finn kapav rann missié-la plusieurs visite. Finalement, missié-la finn accepté enn l’etude la Bible, ek zordi li enn frere. Li vrai-mem reconnaissant ki sa soeur-la ti senti ki li ena enn dette—enn responsabilité pou preche avek lezot.

⁵ La fin bien-bien pré ek c’est asterla ki nou bizin paye nou dette envers nou prochain grace a bann grand zeffort ki nou faire pou preché.—2 Cor. 6:1, 2.

11^eme partie: Aide bann etudiant pou faire bann nouvelle visite

Bann l’etude biblik ki faire nou etudiant progressé

¹ Kan enn etudiant la Bible commence preché, li pou joinde bann dimoune ki interessé avek la bonne nouvelle. Couma eski nou kapav aide sa nouveau proclamateur-la pou faire bann visite efficace, ek developpe l’interet bann dimoune ki li joinde?

² Avredir, preparation enn nouvelle visite commencé pendant nou premier conversation mem avek dimoune-la. Encourage etudiant-la pou montré enn l’interet sincere envers dimoune avek ki li pé kozé. (Phil. 2:4) Tigit par tigit, forme sa nouveau proclamateur-la pou invite bann dimoune exprime-zot, pou ecoute seki zot dire, ek pou note bann kitsoz ki tracasse zot. Kan enn kikenn montré l’interet, faire proclamateur-la note bann renseignement approprié lor sa conversation-la. Servi sa bann renseignement-la pou aide li prepare seki li pou discuté prochaine fois.

³ Couma prepare visite-la: Ré-guette ensam conversation ki etudiant-la ti gagné premier fois avek dimoune-la, ek montré li couma li kapav choisir enn point dan nou message ki pou interesse li. (1 Cor. 9:19-23) Prepare ensam enn presentation simple, avek enn verset la Bible ek aussi enn paragraphe dan enn publication ki kapav servi pou commence enn l’etude. En plus, prepare enn question ki etudiant-la kapav soulevé vers la fin so conversation. Sa pou prepare terrain pou enn prochaine visite. Montré etudiant-la couma li kapav augmente connaissance sa dimoune-la lor la Bible, chaque fois ki li al visite li.

⁴ En plus, li important pou montré etudiant-la enn introduction simple ki li kapav servi kan li pé faire enn nouvelle visite. Apré ki li’nn dire dimoune-la bonjour, li kapav dire: “Mo’nn bien apprecié conversation ki nou ti gagné dernier fois, ek zordi mo’nn retourné pou partage encore seki la Bible dire lor [mentionne sujet-la].” Kitfois ou pou bizin aussi montré li ki li kapav dire si enn lot dimoune ouvert la porte.

⁵ Suive l’interet sans tardé: Encourage etudiant-la pou prend enn bon l’habitude al revisite bann dimoune ki’nn montré l’interet, sans tardé. Kitfois li pou bizin al plusieurs fois avant li reussi joinde sa dimoune-la kot li. Montré li couma prend rendez-vous pou revisite dimoune-la, ek aide li pou comprend l’importance pou respecté sa rendez-vous-la. (Mat. 5:37) Forme li pou ena la bonté, consideration ek respé pou lezot, pendant ki li rod bann dimoune sincere ek li developpe zot l’interet.—Tite 3:2.