Predication—Enn grand privilege

¹ Chaque jour, plusieurs milliard dimoune lor la terre profite bann disposition ki Jéhovah finn prend pou ki nou kapav vive. (Mat. 5:45) Mais, bien tigit dimoune profite l’occasion pou montré zot reconnaissance envers zot Createur dan enn fason special—kan zot preche la bonne nouvelle lor Royaume Bondié. (Mat. 24:14) Ki quantité valeur sa privilege special-la ena pou ou?

² Predication lor Royaume Bondié honore Jéhovah ek donne l’espoir ek la paix bann dimoune ki desesperé a cause bann kitsoz ki pé arrivé zordi. (Héb. 13:15) Bann ki accepté sa message-la, zot gagne l’espoir pou vive pou touletan. (Jean 17:3) Ki travail profane kapav offert ou enn recompense coumsa? L’apotre Paul ti montré ki li apprecié so ministere par la fason ki li ti accompli sa travail-la. Li ti considere sa couma enn tresor.—Actes 20:20, 21, 24; 2 Cor. 4:1, 7.

³ Montré ki ou content sa grand privilege-la: Enn fason kot nou kapav montré ki privilege predication ena valeur pou nou, c’est kan nou veille bien lor qualité nou service. Eski nou prend le temps ek faire zeffort pou prepare enn presentation ki pou touche leker bann dimoune ki ecoute nou? Eski nou kapav ameliore nou capacité pou servi la Bible ek pou raisonne avek bann dimoune? Eski nou travail nou territoire a fond? Eski nou kapav commence ek dirige enn l’etude la Bible? Pareil couma bann chrétien fidel, dan le passé ek zordi aussi, nou motivé parski nou ena enn bon l’opinion lor nou l’activité, ek nou content sa privilege-la.—Mat. 25:14-23.

⁴ Si nou enn kikenn ki agé, ki ena enn mauvais la-santé, ou-soit ki ena bann lezot difficulté, li encourageant pou koné ki tou bann zeffort ki nou faire pou participe dan ministere, ena vrai-mem beaucoup valeur. Parole Bondié rassure nou ki Jéhovah apprecié bann zeffort ki nou faire pou servi Li, mem bann zeffort ki pourtant lezot kapav trouve bien tigit.—Luc 21:1-4.

⁵ La predication donne nou enn grand satisfaction. Enn soeur ki ena 92 an ti dire: “C’est enn grand bonheur kan mo pense sa 80 l’année ki mo’nn passé dan service pou Bondié, mo pena okenn regret! Si mo ti kapav revive mo la-vie, mo ti pou prend mem chemin, parski en realité, ‘l’amour fidel Bondié, li pli bon ki la vie li-mem.’” (Ps. 63:3) Pareil couma sa soeur-la, anou montré ki nou considere la predication couma enn tresor, enn grand privilege ki Bondié finn donne nou.

12^eme partie: Aide bann etudiant pou commence ek dirige bann l’etude la Bible

Bann l’etude biblik ki faire nou etudiant progressé

¹ Kan nou bann etudiant la Bible commence preché, kitfois zot pa senti-zot capable pou commence ek dirige bann l’etude la Bible, zot-mem. Couma nou kapav aide zot pou cultive enn l’attitude positif lor sa l’aspect important nou ministere-la?—Mat. 24:14; 28:19, 20.

² Kan enn etudiant la Bible rempli bann condition pou vinn enn proclamateur, surement li’nn deja fini commence faire bann devoir dan Lekol ministere theocratik. Kan li prepare ek presente bann devoir, sa donne li enn formation ki pou aide li pou developpe bann capacité necessaire pou vinn enn “zouvrier ki pena nanyin pou honté, ki konn servi parole la verité couma bizin.”—2 Tim. 2:15.

³ Enseigne zot par ou l’exemple: Kan Jésus ti forme so bann disciple, li ti donne zot bann instruction bien clair ek li ti donne zot enn bon l’exemple. Li ti dire: “N’importe kisannla ki gagne enn l’instruction couma bizin, pou vinn pareil couma so enseignant.” (Luc 6:40) Oui, li bien important ki ou suive l’exemple Jésus, ek ou donne enn bon l’exemple dan ou ministere. Kan ou etudiant pou trouve ou l’exemple dan ministere, li pou comprend ki l’objectif bann nouvelle visite, c’est pou commence bann l’etude la Bible.

⁴ Explik etudiant-la ki, kan li propose enn l’etude la Bible, normalement li pa necessaire pou explik en detail fason ki l’etude-la deroulé. Souvent, li pli bon ki nou servi enn ou deux paragraphe dan enn publication ki faire l’etude, pou montré couma sa deroulé. Ou kapav trouve bann suggestion pratik couma faire sa, dan page 8 sa Ministère-la, ek aussi dan Ministère du Royaume janvier 2002, page 6.

⁵ Kan li approprié, invite ou etudiant pou accompagne ou, ou-soit enn lot proclamateur ki ena l’experience, dan bann l’etude la Bible. Li kapav faire enn commentaire lor enn paragraphe ou-soit lor enn text la Bible. Coumsa, kan li observe lezot, etudiant-la pou aprann beaucoup lor fason ki dirige enn l’etude la Bible ki progressé. (Prov. 27:17; 2 Tim. 2:2) Felicite li, ek explik li couma li kapav amelioré.

⁶ Kan forme bann nouveau proclamateur pou vinn bann enseignant Parole Bondié, sa pou aide zot pou faire “bon travail”—setadir pou commence ek pou dirige bann l’etude la Bible, zot-mem. (2 Tim. 3:17) Li vrai-mem enn grand plaisir pou travail ensam avek zot pou donne sa l’invitation-la: “N’importe kisannla ki envie, prend de l’eau la vie sans payé”!—Rév. 22:17.