Commence bann l’etude la Bible devant la porte bann dimoune, ek par telephone

1, 2. Couma nou kapav adapté nou program pou faire enn l’etude avek bann dimoune ki pa gagne le temps?

¹ Dimoune zordi pa gagne le temps. Pourtant, beaucoup interessé avek bann kitsoz spirituel. Couma nou kapav aide zot pou satisfaire zot besoin spirituel? (Mat. 5:3) Beaucoup proclamateur reussi commence enn l’etude la Bible avek bann dimoune soit devant zot la-porte ou-soit par telephone. Eski ou kapav servi sa method-la pou faire plus dan ou ministere?

² Pou nou commence bann l’etude la Bible, nou bizin pré pou montré bann dimoune couma enn l’etude deroulé, n’importe kan nou gagne l’occasion pou faire sa. Couma ek kot-sa nou kapav commence enn l’etude la Bible?

3. Kifer li bon ki nou faire enn l’etude la Bible premier fois mem ki nou joinde enn dimoune, ek couma nou kapav faire sa?

³ Devant la porte bann dimoune: Kan ou joinde enn dimoune ki disposé pou koz lor la Bible, ou kapav zis montré li enn paragraphe ki ou finn preparé a l’avance, par exemple premier paragraphe dan leson 1 dan brochure Ki Bondye Pe Demann Nu?, ek commence enn l’etude. Lire paragraphe-la, examine question sa paragraphe-la, ek discute lor enn ou-soit deux verset la Bible ki cité. Souvent ou kapav faire sa devant la porte bann dimoune dan cinq a dix minute. Si dimoune-la apprecié seki li’nn aprann, prend bann disposition pou examine prochain enn ou deux paragraphe kan ou ré-vinn visite li.—Ou pou trouve bann lezot suggestion lor fason ki kapav commence bann l’etude la Bible direct, dan Ministère du Royaume janvier 2002, page 6.

4. Kan nou pé faire bann nouvelle visite, couma nou kapav commence enn l’etude la Bible devant la porte bann dimoune?

⁴ Nou kapav servi mem method pou commence enn l’etude la Bible kan nou faire enn nouvelle visite. Par exemple, ou kapav presente brochure Ki Bondye Pe Demann Nu?, ouvert leson 2, ek examine paragraphe 1-2 pou montré dimoune-la couma Bondié appelé. Dan ou prochain visite, ou kapav examine paragraphe 3-4 ek montré li seki la Bible dire lor bann qualité ki Jéhovah ena. Enn prochaine fois, ou kapav examine paragraphe 5-6 ek bann zimage ki trouve lor page 5 pou montré li, couma enn l’etude la Bible aide nou pou konn Jéhovah. Ou kapav faire tou sa devant la porte enn dimoune.

5, 6. (a) Kifer kitfois certain dimoune prefere etudié la Bible par telephone? (b) Couma nou kapav propose enn l’etude la Bible par telephone?

⁵ Par telephone: Ena certain dimoune kitfois pou prefere etudié la Bible par telephone plutot ki ou vinn kot zot. Guette sa l’experience-la: Kan li ti pé preché, enn soeur ti joinde enn jeune madame ki ena zenfant ek ki ena enn travail ki prend tou so lé-temps. Soeur-la ti al visite li plusieurs fois, mais jamais li ti reussi joinde madame-la. Alors, soeur-la ti decide pou telephone li. Madame-la finn expliké ki vrai-mem li pa gagne le temps pou koz lor la Bible. Soeur-la finn dire li: “Dan 10 a 15 minute, ou kapav aprann enn nouveau kitsoz, mem par telephone.” Madame-la finn reponn: “Si c’est par telephone, alors mo d’accord !” Bientot soeur-la ti pé dirige enn l’etude la Bible par telephone.

⁶ Eski certain ou bann visite ti pou content etudié la Bible par telephone? Ou kapav dire mem kitsoz ki sa soeur-la finn dire, ou-soit ou kapav dire: “Si ou preferé, nou kapav koz lor la Bible par telephone. Eski sa pou pli bon pou ou?” Kan nou adapté nou program pou etudié la Bible avek situation bann dimoune, nou kapav aide zot pou “trouve connaissance Bondié.”—Prov. 2:5; 1 Cor. 9:23.

Presentation periodik

La Tour de Garde 15 août

“Kan zot perdi enn kikenn ki zot ti content, beaucoup dimoune demann zot-mem ki arrivé kan enn dimoune mort. Eski ou pensé ki li possible pou comprend la mort? [Laisse dimoune-la reponn.] Sa magazine-la explik nou seki la Bible dire lor condition bann dimoune mort. Li aussi koz lor promesse ki Bondié inn faire pou ressucite bann dimoune ki nou ti content ek ki’nn mort.” Lire Jean 5:28, 29.

Réveillez-vous! 22 août

“Eski ou ti koné ki dan le monde entier, le tourisme inn cré plus travail ki tou lezot l’industrie? [Laisse dimoune-la reponn.] Le tourisme finn amenn bann bienfait ek bann problem, toulé-deux. Sa magazine-la discute lor bann l’avantage ek bann desavantage l’industrie touristik modern. Li aussi donne certain conseil pratik pou bann ki voyagé.”

La Tour de Garde 1^er sept.

“Dan le monde zordi, souvent nou tann dimoune dire ki la fidelité li enn qualité ki ena valeur, mais rare nou trouve bann dimoune mette sa en pratik. Eski li pa ti pou pli bon si plus dimoune ti couma sa camarade ki decrire ici-la? [Lire Proverbes 17:17. Apré sa, laisse dimoune-la reponn.] Sa magazine-la koz lor bann bienfait ki ena si nou fidel envers nou famille ek nou bann camarade.”

Réveillez-vous! 8 sept.

“Kitfois ou trouve sa extraordinaire kan ou guette l’harmonie ki existé dan la nature. [Mentionne enn l’exemple ki cité dan lartik-la.] Li bien triste ki nou pa trouve sa qualité coorperation-la entre bann dimoune, pa vrai? [Laisse dimoune-la reponn.] Sa magazine-la explik nou couma Bondié pou amenn la paix ek l’harmonie lor la terre.” Lire Isaie 11:9.