3^ème Partie: Servi Bann Versets Biblique enn Façon Efficace

Bann l’Études Biblique Ki Faire Nou Étudiants Progressé

1. Kifer nous bizin mette l’accent lor la Bible kan nous pé conduire bann l’études?

¹ Kan nous conduire bann l’études Biblique, nou l’objectif c’est pou faire “bann disciples.” Nous faire sa kan nous aide bann dimoune pou comprend, pou accepté ek applique l’enseignement Biblique dans zot la-vie. (Mat. 28:19, 20; 1 Thess. 2:13) Donc, l’étude-la bizin centré lor la Bible. Au commencement, li bon ki nous montré nou étudiant couma rode bann versets Biblique dans so propre la-Bible. Mais, de nou côté, couma nous kapav servi la Bible pou aide zot progressé lor plan spirituel?

2. Couma eski nous décidé ki versets nous pou lire ek discuté?

² Choisir Bann Versets Ki Nous Pou Lire: Dans ou préparation, guetté ki rapport chaque verset ki cité éna avec point ki pé examiné, ek décidé ki bann versets ou pou lire ek analysé pendant l’étude. En général, li bon ki nous lire bann versets ki montré fondement Biblique nous bann croyances. Pa nécessaire lire bann versets ki donne bann renseignements supplémentaire. Nous bizin prend en considération besoins ek situation chaque étudiant.

3. Kifer li bon nous servi bann questions, ek couma nous kapav faire sa?

³ Servi Bann Questions: Au lieu ki ou explique ou étudiant bann versets-la, ou kapav demann li pou dire ou ki li’nn comprend. C’est avec l’aide bann questions bien réfléchi ki ou kapav encourage li pou faire sa. Si application enn verset li clair, ou kapav demann li couma sa verset-la appuye l’idée ki éna dans paragraphe-la. Mais défois ou pou bizin pose enn question précis, ou-soit enn série questions pou aide étudiant-la arrive à la bonne conclusion. Après ki étudiant-la inn réponn, ou kapav ajoute bann lézot explications si nécessaire.

4. Eski nous bizin explique tous bann détails bann versets ki nous examiné?

⁴ Reste Simple: Enn bon tireur à l’arc souvent bizin zis enn flèche pou réussi touche so cible. Pareillement, enn bon enseignant pa nécessaire koze beaucoup pou explique enn point. Li kapav explique enn kitsoz dans enn façon simple, clair ek précis. Défois, peut-être ou pou bizin faire recherches dans bann publications pou comprend enn verset ek explique li bien. (2 Tim. 2:15) Mais, pendant l’étude, évite essaye explique tou détails dans chaque verset. Explique zis bann détails ki bizin pou faire ressorti point ki ou pé examiné.

5, 6. Couma nous kapav aide bann étudiants pou applique Parole Bondié dans zot la-vie, mais ki nous bizin évité?

⁵ Faire Bann Applications Pratique: Kan li approprié, aide étudiant-la pou trouvé couma bann versets Biblique concerne li personnellement. Par exemple, kan ou pé examine Hébreux 10:24, 25 avec enn étudiant ki pankor assisté réunions, ki ou kapav dire? Ou kapav koze lor enn nou bann réunion ek invite li pou vinn assisté sa réunion-la. Mais pa force li. Laisse Parole Bondié pousse li pou faire bann pas nécessaire pou faire Jéhovah plaisir.—Héb. 4:12.

⁶ Anou rempli nou mission pou faire bann disciples, ek “favorise l’obéissance par la foi” grâce à enn bon utilisation la Bible.—Rom. 16:26.

Présentation Périodiques

La Tour de Garde 15 Nov.

“La plupart parmi nous, nous ti pou content éna enn bon la-santé ek enn long la-vie. Mais, si sa ti possible, eski ou ti pou content vive pou touletan? [Laisse dimoune-la réponn. Après sa lire Jean 17:3.] Sa magazine-la koze lor la vie éternelle ki Bondié promette. Li explique nous aussi couma la-vie pou été kan sa promesse-la pou réalisé.”

Réveillez-vous! 22 Nov.

“Dans sa 20 ans ki’nn passé-la, bann dimoune finn faire beaucoup progrès dans bann traitements contre SIDA, ek zot inn pli comprend sa maladie-la. Mais, malgré sa, éna encore beaucoup dimoune ki mal informé. [Montré l’encadré “Idées reçues,” ek laisse dimoune-la faire enn commentaire.] Sa magazine-la expliqué couma bann parents kapav protège zot zenfants.” Lire Deutéronome 6:6, 7.

La Tour de Garde 1^er Déc.

“Enn kitsoz ki rann bann dimoune différent avec bann zanimaux, c’est ki bann dimoune éna capacité pou reconnaite entre séki bon ek séki pa bon. Mais malheureusement, beaucoup dimoune faire bann mauvais kitsoz. Kifer ou pensé zot faire sa? [Laisse dimoune-la réponn. Après sa, lire Jérémie 17:9 ou-soit Révélation 12:9.] Sa magazine-la explique nous couma nous kapav koné ek faire séki bon.”

Réveillez-vous! 8 Déc.

“Bann progrès en technologie pa’nn change besoin ki tou bann dimoune éna pou faire camarade. Mais, eski ou’nn remarqué ki à cause bann changements dans la société, bann dimoune gagne difficulté pou développe bann bon l’amitié? [Laisse dimoune-la réponn. Après sa, lire Proverbes 18:24.] Sa magazine-la explique nous couma nous kapav faire bann bon camarades ek garde zot l’amitié.”