Nous Bizin Ou l’Aide

¹ “Merci pou tou séki zot faire pou nous. Ki nous pou faire sans zot?” Sa commentaire-la montré bien reconnaissance ki nous éna pou nou bann anciens ek assistants ministériel. À mesure ki l’organisation Bondié pé contigne grandi, bizin de plus en plus bann frères mûr pou servi dans presque 100,000 congrégations ki éna dans le monde entier. Si ou enn frère baptisé, nous bizin ou l’aide.

² Eski Ou Envie Gagne Plus Responsabilité?: Ki ou bizin faire pou gagne plus responsabilité dans service Jéhovah? (1 Tim. 3:1) D’abord, ou bizin donne enn bon l’exemple dans tou domaines ou la-vie. (1 Tim. 4:12; Tite 2:6-8; 1 Pierre 5:3) Participe pleinement dans la prédication, ek aide lézot pou faire pareil. (2 Tim. 4:5) Intéresse ou sincèrement ar bien-être bann frères ek soeurs. (Rom. 12:13) Vinn enn bon étudiant Parole Bondié ek développe “l’art pou enseigné.” (Tite 1:9; 1 Tim. 4:13) Occupe avec sérieux, bann responsabilités ki bann anciens inn confié ou. (1 Tim. 3:10) Si ou enn chef de famille, ‘dirige ou famille dans enn bon façon.’—1 Tim. 3:4, 5, 12.

³ Enn kikenn ki envie servi couma assistant ministériel ou ancien bizin travail dur ek éna enn l’esprit sacrifice. (1 Tim. 5:17) Donc, avec sa désir pou gagne plus responsabilités-la, faire zeffort pou servi lézot avec humilité. (Mat. 20:25-28; Jean 13:3-5, 12-17) Médite lor l’attitude Timothée, ek essaye imite li. (Phil. 2:20-22) Pareil couma li, faire tou pou ki ou gagne enn bon recommandation grâce à ou bon conduite. (Actes 16:1, 2) À mesure ki ou développe bann qualités spirituel nécessaire pou occupe plus responsabilités ek applique tou bann conseil ki ou gagné, ‘tou dimoune pou trouve bien couma ou pé progressé.’—1 Tim. 4:15.

⁴ Parents, Forme Bann Jeunes pou Aide Lézot: Depuis tipti, bann zenfants kapav aprann aide lézot. Forme zot pou écouté pendant réunions, pou prêché, ek pou éna enn bon conduite dans la Salle du Royaume ek dans l’école. Montré zot pou participé ek trouve la joie pou aide lézot. Zot kapav gagne l’occasion pou faire sa kan zot aidé dans nettoyage la Salle du Royaume, ou-soit kan zot aide bann ki âgés, ek dans lézot façons encore. Donne zot l’occasion pou konn la joie ki gagné kan donné. (Actes 20:35) Sa formation-la kapav aide zot pou vinn bann futurs pionniers, assistants ministériel ek anciens.

4^ème Partie: Bann l’Études Biblique Ki Faire Nou Étudiants Progressé

Forme Bann Étudiants pou Prépare Zot l’Étude

¹ En principe, enn étudiant ki lire à l’avance chapitre ki li pou étudié, ki souligne bann réponses ek réfléchi couma li kapav réponn dans so propre mots, pou progressé rapidement lor plan spirituel. Donc, enn fois ki nou’nn établi enn l’étude, nous kapav prépare enn leçon ensam avec nou étudiant pou montré li couma faire sa préparation-la. Avec la majorité bann étudiants, li pou bon ki nous prépare enn chapitre ou enn leçon en entier.

² Souligne Bann Réponses ek Écrire Bann Notes Dans la Marge: Explique étudiant-la couma trouve bann réponses direct à bann questions. Montré li ou brochure kot ou finn souligne zis bann mots ou-soit bann expressions important. À mesure ki ou examine leçon-la, kitfois li pou envie suive ou l’exemple, c’est à dire souligne zis bann points ki pou aide li rappelle réponse-la. (Luc 6:40) Après sa, demann li pou donne la réponse dans so propre mots. Sa pou permette ou trouvé si vrai-même li’nn bien comprend leçon-la.

³ Li bien important ki sa étudiant-la examine attentivement bann versets la Bible ki pa cité dans paragraphe kan li pé prépare so l’étude. (Actes 17:11) Aide li comprend ki chaque verset ki donné en référence appuye enn l’idée dans paragraphe. Montré li couma prend bann ti notes dans la marge so livre ou-soit so brochure. Faire li comprend ki tou séki li pé aprann, basé lor la Bible. Encourage li pou servi bann versets Biblique ki donné en référence kan li faire bann commentaires pendant l’étude.

⁴ Guette l’Article-la Avant ek Faire Révision Après: Avant ki étudiant-la commence prépare so l’étude à fond, li pou bon ki li gagne enn l’idée lor chapitre ki li pou examiné. Montré li ki li kapav faire sa, si li examine titre chapitre-la, bann sous-titres, ek bann zimages. Explique li ki avant li fini so préparation, li pou bon ki li prend enn ti lé-temps pou révise bann points important. Si éna bann questions révision à la fin, li kapav servi sa pou faire so révision. Sa pou aide li rappelle séki linn aprann.

⁵ Sa formation-la pou aide enn étudiant pou faire bann commentaires intéressant pendant bann réunions. Sa pou aide li développe bann bon l’habitudes pou étudié, bien après ki so l’étude inn terminé.