7^eme Partie: Faire la priere kan ou dirige enn l’etude la-Bible

Bann l’etude biblik ki faire nou etudiant progressé

1. (a) Kifer li approprié ki nou faire la priere avant ek apré enn l’etude la Bible? (b) Ki nou bizin faire pou kapav commence faire la priere dan enn l’etude?

¹ Li bien important ki enn etudiant la-Bible gagne benediction Jéhovah pou li faire bann progré. (1 Cor. 3:6) A cause sa, kan nou finn bien etabli enn l’etude la Bible, li approprié ki nou faire enn la-priere avant ek apré l’etude. Souvent nou kapav faire sa premier fois mem si nou faire l’etude avek enn kikenn ki content bann kitsoz spirituel. Parkont avek lezot, kitfois nou pou bizin decidé kan li pou approprié pou commence faire la priere. Ou kapav servi Psaume 25:4, 5 ek 1 Jean 5:14 pou aide etudiant-la trouvé kifer bizin faire la priere, ek aussi servi Jean 15:16 pou explik li kifer li important ki nou prié Jéhovah a travers Jésus Christ.

2. Si enn frere baptisé ou-soit enn proclamateur ki pa baptisé accompagne enn soeur kan li al faire l’etude, kisannla ki pou faire la priere?

² Kisannla bizin faire la priere dan enn l’etude la Bible? Si enn frere baptisé accompagne enn soeur dan enn etude, frere-la pou faire la priere mem si soeur-la pou conduire l’etude avek so la-tête couvert. (1 Cor. 11:5, 10) Parkont, si enn proclamateur ki pa baptisé accompagne enn soeur dan enn l’etude, soeur-la pou faire la priere. Dan sa cas-la, li pou couvert so la-tête kan li pé faire la priere ek aussi kan li pé conduire l’etude.

3. Ki bann kitsoz nou kapav dire dan nou la-priere kan nou pé conduire enn l’etude?

³ Ki nou kapav demandé dan nou la-priere?: Bann la-priere ki nou faire dan enn l’etude, li pa necessaire ki zot longue, mais zot bizin precis. Nou kapav demann Bondié so benediction lor nou l’etude, ek remercié Li pou bann verité ki nou finn aprann, mais apart sa, li bon aussi ki nou donne Jéhovah louange ek la gloire, parski c’est Li-mem ki la Source tou bann l’enseignement. (Is. 54:13) Par nou parole, nou kapav aussi montré ki nou interessé sincerement ar nou etudiant ek ki nou apprecié l’organisation ki Jéhovah pé servi. (1 Thess. 1:2, 3; 2:7, 8) Kan nou demann Jéhovah pou beni bann zeffort ki etudiant-la faire pou mette en pratik seki li aprann, sa pou aide li pou trouve l’importance pou vinn ‘enn kikenn ki pratik la parole.’—Jacq. 1:22.

4. Kan nou faire enn la-priere avant ek apré enn l’etude la Bible, ki bann bienfait nou gagné?

⁴ Ena beaucoup l’avantage kan nou prié. Sa faire nou gagne benediction Bondié. (Luc 11:13) Sa montré ki l’etude Parole Bondié li enn kitsoz bien-bien important. A mesure ki nou etudiant ecoute nou bann la-priere, li aprann couma prié. (Luc 6:40) En plus, kan nou faire la-priere ki sorti dan enn leker ki rempli avek l’amour pou Bondié ek reconnaissance pou so bann qualité extraordinaire, sa kapav aide etudiant-la pou developpe enn relation personnel avek Jéhovah.

Présentation Peryodik

La Tour de Garde 15 mars.

“Dimoune dan le monde entier apprecié l’enseignement Jésus. [Lire citation lor page 3, paragraphe 1.] Mais eski ou pensé ki sa bann l’enseignement-la, par exemple seki nou’nn fek lire dan sa verset-la, zot encore toujours valable zordi? [Lire Matthieu 5:21, 22a. Laisse dimoune-la reponn.] Sa magazine-la examine bann kitsoz ki Jésus ti enseigné ek montré nou couma nou kapav tire profit ar seki li’nn enseigné.”

Réveillez-vous! 22 mars

“Beaucoup dimoune admire bann montagne parski zot joli, mais eski ou ti koné ki bann montagne, bien important pou ki la vie kapav existé lor la terre? [Laisse dimoune-la reponn.] Sa magazine-la dire nou, kifer nou bizin bann montagne ek ki pé arrive zot zordi. Li mentionne aussi couma nou Createur pou sauve sa ressource bien important-la.” Lire Psaume 95:4.

La Tour de Garde 1^er avril

Eski ou’nn deja tann dire ki la Bible ek la science pa d’accord entre zot? [Laisse dimoune-la reponn.] Sa magazine-la examine desaccord ki finn ena pendant bien longtemps entre la science ek la religion. Mais li aussi donne bann preuve pou montré ki la vrai science, li en accord avek la Bible.” Montré page 6-7. Apré lire Ecclésiaste 1:7.

Réveillez-vous! 8 avril

“Couma ou pensé bann parent kapav aide zot zenfant pou evite gagne problem pendant zot l’adolescence, ki enn period difficile? [Laisse dimoune-la reponn. Apré sa, lire Isaïe 48:17, 18.] Sa magazine-la montré couma, kan bann parent applik bann conseil biblik, sa kapav aide zot pou etabli enn bon communication avek zot zenfant ek pou mette bann restriction raisonnable pou zot.”