Prepare bann nouveau pou perseveré malgré l’opposition
1 Satan faire enn zeffort special pou faire bann dimoune ki commence etudié la Bible ek ki “envie reste attaché avek Bondié,” gagne l’opposition. (2 Tim. 3:12) Zot kapav gagne l’opposition avek bann collegue travail, bann camarade lekol, ou-soit avek bann voisin. Sa kapav bien difficile kan prop famille enn nouveau opposé ar li.—Mat. 10:21; Marc 3:21.
2 Ti annoncé ki nou pou gagne l’opposition: Bann nouveau bizin comprend ki zot pou gagne persecution ek ki sa montré ki zot bann vrai disciple Christ. (Jean 15:20) Parfois, nou gagne l’opposition ar certain parski zot inn mal informé lor bann Témoins de Jéhovah. Pa blié ki c’est enn grand la joie pou gagne deshonneur parski nou enn disciple Jésus ek parski nou obeir Bondié. (Actes 5:27-29, 40, 41) Donne bann nouveau l’assurance ki Jéhovah pou soutenir zot avek amour. (Ps. 27:10; Marc 10:29, 30) Kan zot garde zot l’integrité, zot montré ki zot dan coté Jéhovah concernant question souveraineté.—Prov. 27:11.
3 Role connaissance exact: Faire ou etudiant comprend l’importance pou contigne gagne enn connaissance exact malgré bann l’epreuve ki zot kapav gagné. Satan servi l’opposition pou essaye empeche seki zot aprann prend racine dan zot leker. (Prov. 4:23; Luc 8:13) Zot bizin contigne absorbe connaissance exact ki ena dan Parole Bondié pou ki zot kapav bien enraciné dan la foi.—Ps. 1:2, 3; Col. 2:6, 7.
4 L’endurance li necessaire: Dan n’importe ki situation difficile, l’endurance li enn kitsoz important ek sa kapav produire bann bon resultat. (Luc 21:16-19) Kan bann nouveau enduré malgré l’opposition, zot-mem ek lezot tire profit. Zot faire l’experience capacité ki Jéhovah ena pou beni bann ki reste fidele ek ki enduré.—Jacq. 1:12.
5 L’apotre Paul ti gagne la joie kan li ti trouve bann progré ki so bann frere dan Thessalonique ti pé faire. Parmi, ti ena beaucoup ki Paul ti aidé pou konn la verité. Li ti remercié Bondié pou zot. (2 Thess. 1:3-5) Nou aussi nou kapav konn mem la joie ek satisfaction si nou prepare nou bann etudiant la Bible pou faire face ar l’opposition ek pou enduré.