Enn Lettre College central
Cher compagnon Témoins de Jéhovah:
C’est vrai-mem enn la joie pou ecrire zot, nou bann frere ek soeur! Nou ena mem sentiment ki l’apotre Jean, ki ti dire ki li ti “vrai-mem content” so bann compagnon ek ki ti ena la joie pou trouvé ki zot ti “pé marche dan la verité.” (2 Jean 1, 4) Oui, la verité li enn vrai benediction pou nou tou! La verité finn libere nou ar Babylone la Grande ek so bann doctrine ek bann tradition ki deshonore Bondié. Kan nou finn obeir Bondié, sa finn aide nou pou vinn bann dimoune ki ena l’amour, la bonté ek misericorde. Ek la verité permette nou reste pur devant Bondié ek donne nou l’esperance pou vive pou touletan.
Nou reconnaissant aussi ki nou gagne l’esprit saint Jéhovah ki guide nou ek donne nou la force toulé-jour! Nou sur ki dan l’assemblée district “Guidé par l’esprit Bondié” ki nou finn gagné l’année derniere, ou finn bien content pou aprann bann different l’aspect sa don ki Jéhovah donne nou avek amour-la. Alors ki bann condition dan le monde pé vinn pli pire, li bien important ki nou compte lor l’esprit Jéhovah ki bien puissant pou dirige nou dan bann jour difficile ki pé vini.
Nou sur ki ou leker finn touché kan ou’nn lire bann recit bien interessant ki ena dan l’Annuaire lor nou bann frere ki finn endure beaucoup souffrance a cause zot la foi. Ek li extraordinaire kan nou maziné ki beaucoup parmi sa bann serviteur fidele-la ti’nn fek baptisé ou-soit pa ti encore mem baptisé kan bann difficulté ti commencé! Ki quantité nou content zot pou zot fidelité ek position ki zot finn prend pou la justice! Oui, zot bon l’exemple donne nou la force dan nou determination pou contigne reste fidele ar Royaume Bondié, n’importe ki l’epreuve ki nou kapav gagné dan l’avenir.—1 Thess. 1:6-8.
Cher frere ek soeur, nou koné ki ou pé bizin faire face ar beaucoup probleme, couma bann probleme economik ou-soit ou pé bizin lutté pou ou kapav garde ou famille uni dan l’amour. Pou certain parmi zot, li difficile pou participe dan predication ek al reunion regulierement ek fidelement. A cause sa, apré beaucoup discussion ek beaucoup la priere, nou finn faire bann changement dan bann reunion a partir 1er janvier 2009. Nou souhaité ki ou pou profite sa l’arrangement-la pou passe plus le temps dan ou l’etude personnel ek familial.
Dan bann different l’assemblée ki finn ena sa l’année-la, li ti enn grand la joie pou trouve sa quantité dimoune ki finn prend bapteme-la. Parmi, ti ena certain ki ti bien jeune. Parent, nou felicite ou ki ou finn elevé ou zenfant dan enn fason ki zot apprecié la verité ek ki ou finn encourage zot pou voué zot la vie ar Jéhovah dan zot jeunesse. Malgré bann difficulté ki zot gagné dan lekol, sa bann jeune-la finn rempli bann condition pou prend bapteme, ek sa montré ki zot finn gagne enn bon formation dan zot lakaz.—Ps. 128:1-6.
Nou envie aussi mentionne l’augmentation ki finn ena dan bann l’etude biblik, ek nou bann missionnaire ek bann pionnier special ki travail bien dur, finn ena enn grand part ladan. Tou bann membre College central bien apprecié travail bien important ki nou bann frere ek soeur pé faire partout dan le monde kan zot pé dire bann ki ena leker sincere “Vini!” ek bann ki soif zot pou “prend de l’eau la vie sans payé.” (Rév. 22:17) Avek tou nou leker, nou envie accueillir dan la congregation sa 289,678 nouveau frere ek soeur ki finn prend bapteme l’année derniere!
L’apotre Jean ti ecrire: “Le monde pé al fini ek so desir aussi, mais celui ki faire volonté Bondié, pou reste pou toujours.” (1 Jean 2:17) Nou encourage zot pou touletan rappel sa bann parole-la. Li bon aussi ki nou touletan pensé ki sa lepok kot le monde pou ‘al fini-la’ li zis derriere la porte! Li vrai-mem enn bon decision pou faire volonté Bondié vinn enn priorité dan nou la vie ek “contigne veillé.” (Mat. 24:42) Jamais nou pa pou regretté si nou faire sa, ek nou pou recolté bann bienfait l’amour fidele Jéhovah.—Is. 63:7.
Dan l’Annuaire 2009, ena bann recit bien encourageant ki sorti dan different pays. Nou souhaité ki sa bann recit-la pou encourage zot tou pou mette l’interet Royaume Bondié en premier dan zot la vie. Nou envie assure zot ki nou toujours pense zot ek nou mentionne zot dan nou la priere ek ki nou content zot beaucoup. Nou souhaité ki Jéhovah donne zot beaucoup benediction.
Zot bann frere,
College central bann Témoins de Jéhovah