La priere ek meditation—Bien necessaire pou bann proclamateur zelé

1. Ki ti aide Jésus pou reste concentré dan so travail principal?

¹ Jésus finn passe la soirée gueri bann dimoune ek tire bann demon. Lendemain, kan so bann disciple ti trouve li, zot ti dire li: “Zot tou pé rod toi,” ek zot ti pé presse li pou contigne faire so bann mirak. Mais selman, Jésus pa ti laisse bannla empeche li reste concentré dan so travail principal: preche la bonne nouvelle. Li ti dire zot: “Anou al enn lot place, dan bann grand village ki pré, pou ki mo kapav preché la-bas aussi, parski c’est pou sa raison-la ki mo finn sorti.” Ki ti aide Jésus garde so l’objectif? Li ti’nn levé boner pou prié ek pou medité. (Marc 1:32-39) Couma la priere ek meditation kapav aide nou aussi pou vinn bann proclamateur zelé?

2. Pou aide nou garde nou zele pou nou ministere, lor ki kitsoz nou kapav medité ki?

² Medite lor ki kitsoz? Jésus ti remarké ki bann dimoune ti “gagne maltraité ek zot ti senti-zot perdi pareil couma bann mouton ki pena berger.” (Mat. 9:36) Pareil, nou kapav reflechi lor ki quantité li important ki bann dimoune tann la bonne nouvelle. Nou kapav pense lor tigit le temps ki resté avant ki la fin vini. (1 Cor. 7:29) Nou kapav medite lor seki Jéhovah finn faire ek lor so bann qualité, lor privilege ki nou ena ki nou enn Témoin de Jéhovah, ek lor bann tresor spirituel ki ena beaucoup valeur ki nou finn aprann dan Parole Bondié ki beaucoup dimoune dan nou territoire toujours pa koné.—Ps. 77:11-13; Is. 43:10-12; Mat. 13:52.

3. Kan eski nou kapav medité?

³ Kan bizin medité? Pareil couma Jésus ti faire, certain leve boner kan pena tapaz. Lezot trouve sa pli bon pou medité a soir avant zot dormi. (Gen. 24:63) Mem avek enn programme bien rempli, nou kapav trouve le temps pou medité. Certain faire sa kan zot pé voyagé dan transport publik. Lezot prend inpé le temps dan zot ler dejeuner pou faire enn meditation sans ki lezot derange zot. Beaucoup remarké ki kan zot medité avant zot al preché, mem pou enn ti moment, sa aide zot preche avek enn pli grand zele ek courage.

4. Kifer nou bizin medité?

⁴ La priere ek meditation pou faire nou ena enn pli grand desir pou servi Jéhovah, pou aide nou considere nou l’adoration pou Bondié couma kitsoz ki pli important dan nou la vie, ek pou renforci nou determination pou contigne preché. Jésus, pli grand Ministre Bondié, ti gagne bann bienfait grace ar meditation, ek pou nou aussi li pareil.