Kifer bizin examine la Bible?
Eski ou konn la Bible bien? Jamais pa finn ena enn lot livre ki finn distribué sa quantité-la dan l’Histoire. Bann dimoune dan tou culture finn trouvé ki so message finn donne zot reconfort ek l’espoir. Zot finn trouvé aussi ki bann conseil ki ena ladan zot pratik dan la vie toulé-jour. Mais pourtant, beaucoup dimoune konn bien tigit kitsoz lor la Bible. Ki ou enn kikenn ki religieux ou-soit non, surement ou envie konn plus lor sa livre-la. Sa brochure-la finn faire pou ki ou gagne enn connaissance de base lor la Bible.
AVANT ki ou prend enn la Bible ek ou commence lire, li pou bon ki ou konn deux-trois kitsoz interessant lor sa livre-la. Dan la Bible—ki nou appel aussi bann l’Ecriture sacré—ena 66 livre, ou-soit 66 partie. Li commence avek Genèse ek li fini avek Révélation, ou-soit Apocalypse.
Kisannla ki’nn ecrire la Bible? Sa c’est enn question bien interessant. En realité, c’est 40 zom ki finn ecrire la Bible lor enn periode apepré 1,600 an. Seki extraordinaire, c’est ki sa bann dimoune-la pa finn dire ki c’est zot ki finn ecrire la Bible. Enn parmi zot ti ecrire: “Tou l’Ecriture finn inspiré par Bondié.” (2 Timothée 3:16) Enn lot ti dire: “C’est l’esprit Jéhovah ki ti koz par moi, ek so parole ti lor mo la langue.” (2 Samuel 23:2) Sa bann ecrivain-la ti dire ki c’est Bondié, Jéhovah, Chef Supreme l’univers, ki finn faire ecrire la Bible. Zot faire nou koné ki Bondié envie ki bann dimoune vinn proche ar Li.
Ena enn lot kitsoz bien important encore ki nou bizin koné pou nou bien comprend seki ena dan la Bible. Li ena enn sel theme: Royaume ki trouve dan le ciel, c’est moyen ki Bondié pou servi pou justifié droit ki Li ena pou dirige tou bann dimoune. Lor bann page ki suive, ou pou trouvé couma sa theme-la li parette dan chaque partie la Bible, depuis Genèse ziska Révélation.
Avek sa dan nou l’esprit, asterla anou examine message ki trouve dan livre pli populaire ki ena dan le monde, setadir la Bible.
a Ena enn quantité fason pou ecrire bann date. Dan sa brochure-la, n.l. vedir “nou lepok” ek a.n.l. vedir “avant nou lepok.” Ou pou trouve sa dan enn ti tableau kot ena bann date, enba dan bann page.