Eski sa-mem ki Bondié ti envie?
LIRE n’importe ki journal. Guette l’information, ou-soit ecoute radio. Ena enn quantité cas kot nou trouve crime, la guerre, ek terrorisme. Pense inpé bann tracas ki ou-mem ou ena. Kitfois enn maladie ou-soit la mort enn kikenn ki ou content pé fini ou endan. Surement ou ena mem sentiment ki sa dimoune fidel ki ti appel Job-la. Li ti dire ki so la-vie ti “rempli ar difficulté.”—Job 10:15.
Demann ou-mem:
Eski sa-mem ki Bondié ti envie pou moi ek pou tou bann dimoune?
Kot-sa mo kapav gagne l’aide pou faire face ar mo bann problem?
Eski ena l’espoir ki enn jour pou ena la paix lor la terre?
La Bible reponn sa bann question-la.
LA BIBLE ENSEIGNÉ KI BONDIÉ POU AMENN SA BANN CHANGEMENT-LA LOR LA TERRE.
“Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré, ek nepli pou ena douleur. Bann kitsoz avant finn disparette.”—Révélation 21:4
“Seki boiteux pou sauté couma enn cerf.”—Isaïe 35:6
“Lizié bann aveugle pou ouvert.”—Isaïe 35:5
“Tou bann ki dan bann tombe souvenir, pou . . . sorti.”—Jean 5:28, 29
“Okenn habitant pa pou dire: ‘Mo malade.’”—Isaïe 33:24
“Pou ena la grain en abondance lor la terre.”—Psaume 72:16
TIRE PROFIT AR SEKI LA BIBLE ENSEIGNÉ
Pa pensé ki sa bann zimage ki ou fek guetté-la, zot trop joli pou croire. Bondié finn promette nou ki Li pou faire tousala, ek la Bible explik nou couma Li pou faire sa.
Mais la Bible faire plus ki sa: Li montré nou couma nou kapav vive heureux depuis asterla-mem. Pense enn ti-coup bann kitsoz ki tracasse ou: problem l’argent, problem dan famille, enn mauvais la-santé, ou-soit la mort enn dimoune ki ou content. La Bible kapav aide ou pou faire face ar bann problem zordi. Et li amenn enn reconfort parski li reponn bann question couma:
Kifer nou souffert?
Couma eski nou kapav faire face ar bann tracas dan la vie?
Couma eski nou kapav konn plus bonheur dan la famille?
Ki arrive nou kan nou mort?
Eski enn jour nou pou retrouve bann ki nou ti content, mais ki’nn mort?
Couma eski nou kapav sur ki Bondié pou realise so bann promesse pou l’avenir?
Si ou pé lire sa livre-la, sa montré ki ou interessé pou koné seki la Bible enseigné. Sa livre-la pou aide ou. Ou pou remarké ki pou chaque paragraphe, ena bann question en-bas. Plusieurs million dimoune content sa method question-reponse-la, kan zot etudié la Bible avek bann Témoins de Jéhovah. Nou esperé ki ou aussi ou pou apprecié sa method-la. Nou prié ki Bondié beni ou, aster ki ou pou al aprann seki la Bible enseigné vrai-mem!