Parole Jéhovah vivant

PENA chemin ki sa plan-la tombe dan de l’eau. Pou bizin touye tou bann Juif, pa enn sel pou reussi sapé. Dan enn sel jour ki’nn fini fixé d’avance, pou touye tou bann Juif ki vive dan l’empire Perse, depuis l’Inde ziska l’Éthiopie. Ala seki sa dimoune ki’nn faire sa plan-la pensé. Mais ena enn detail bien important ki li’nn blié. Bondié ki dan le ciel kapav delivré so peuple ki Li’nn choisir dan n’importe ki situation desesperé. Livre Esther raconté couma Bondié inn amenn sa delivrance-la.

C’est enn Juif agé ki ti appel Mordekaï ki ti ecrire livre Esther. Sa livre-la couvert enn period apepré 18 an pendant règne le roi perse Assuérus, ou-soit Xerxès 1^er. Sa zistoire-la montré ki bann l’ennemi peuple Bondié ena bann mauvais projet. Mais li montré aussi couma Jéhovah sauve so peuple malgré ki zot dispersé a travers enn grand l’empire. Zordi, sa zistoire-la vrai-mem fortifié la foi le peuple Bondié ki pé rann Li enn service sacré dan 235 pays. En plus, parmi bann personnage ki ena dan livre Esther, ena bann l’exemple ki nou bizin imité ek lezot ki nou bizin rejeté. Vrai-mem “parole Bondié, li vivant ek li puissant.”—Hébreux 4:12.

LA REINE BIZIN FAIRE KITSOZ

(Esther 1:1–5:14)

Le roi Assuérus faire enn grand banquet dan troisieme l’année so règne (493 a.n.l.). La reine Vashti ki bien renommé pou so beauté, perdi faveur le roi ek aussi so position la reine. Parmi tou bann joli vierge ki ena dan pays, c’est enn Juive, Hadassa, ki choisir pou remplace li. Hadassa suive conseil so cousin Mordekaï. Li pa faire koné ki li Juif ek li servi so nom perse, Esther.

Avek le temps, Hamân ki bien orgueilleux, gagne enn bel position, li vinn premier ministre. Li bien en colere a cause Mordekaï refuse pou ‘baissé ek prosterne devant li.’ Alors li faire plan pou touye tou bann Juif ki vive dan l’empire perse. (Esther 3:2) Hamân convaink Assuérus pou soutenir sa projet-la ek li reussi faire li tire enn la-loi pou touye tou bann Juif. Mordekaï mette “enn sac goni, ek aussi la cendre lor li.” (Esther 4:1) Là, Esther bizin faire kitsoz. Li invite le roi ek so premier ministre pou enn banquet privé. Kan zot accepté ek zot vini, Esther ré-invite zot pou enn lot banquet lendemain-mem. Hamân bien content. Mais li en colere parski Mordekaï refuse prosterne devant li. Hamân faire enn plan pou touye Mordekaï avant banquet ki pou ena lendemain.

Reponse pou bann question biblik:

1:3-5—Eski sa banquet-la ti dure 180 jour? Text-la pa dire ki sa banquet-la ti dure tou sa lé-temps-la. Mais li dire ki le roi ti montré bann grand personnage la richesse ek beauté so grand royaume pendant 180 jour. Historien Hérodote mentionne enn rassemblement ki Xerxès ti organisé pou faire plan pou attak la Grèce. Si c’est sa rassemblement-la-mem ki mentionné dan livre Esther, alors li possible ki le roi ti organise sa rassemblement ki ti dure sa quantité jour-la, pou impressionne bann grand personnage ek pou convaink zot ki li kapav attak la Grèce. Dan sa cas-la, li possible ki verset 3 ek 5 mentionne sa banquet sept jour ki ti ena a la fin sa rassemblement ki ti dure 180 jour-la.

1:8—Dan ki sens ‘pa ti force personne concernant l’heure pou boire d’apré la loi?’ Li parette ki dan bann fête coumsa, bann perse ti ena coutume pou encourage sakenn so camarade pou boire enn certain quantité fixe. Mais là, le roi Assuérus ti faire enn exception. Enn livre reference dire: “Zot ti kapav boire quantité ki zot ti envie, tigit ou-soit beaucoup.”

1:10-12—Kifer la reine Vashti ti refuse vinn devant le roi? Certain specialiste pensé ki la reine ti refuse obeir parski li pa ti envie “abaisse-li devant bann invité le roi ki ti sou.” Ou-soit li possible ki sa joli la-reine-la pa ti enn femme ki ti vrai-mem disposé pou soumette. Alors ki la Bible pa dire kifer li’nn agir coumsa, bann zom sage sa lepok-la ti considere l’obeissance enn femme envers so mari couma enn kitsoz important. Zot ti pensé ki mauvais l’exemple Vashti ti pou ena enn l’influence lor bann madame dan bann territoire perse.

2:14-17—Eski Esther ti gagne relation sexuel immoral avek le roi? Non. Sa bann verset-la dire ki gramatin ti retourne bann lezot jeune femme ki ti’nn amenn kot le roi dan deuxieme lakaz, ek là ti ena “gardien bann concubine” ki ti responsable zot. Bann jeune femme ki ti passe la nuit avek le roi ti vinn so bann concubine, ou-soit so bann femme second rang. Mais en seki concerne Esther, pa ti amenn li dan lakaz bann concubine apré ki li ti al guette le roi. Kan ti amenn li devant Assuérus, “le roi ti content [li] plus ki tou bann lezot femme, alors Esther ti beneficié plus so faveur ek l’amour fidel ki tou bann lezot vierge.” (Esther 2:17) Couma li ti beneficié “faveur ek l’amour fidel” Assuérus? Dan mem fason ki li ti’nn gagne faveur lezot. ‘Sa jeune femme-la ti faire Hégaï plaisir, si bien ki li ti beneficié so l’amour fidel.’ (Esther 2:8, 9) Hégaï ti base so l’appreciation zis lor seki li ti trouvé — l’apparence ek bann bon qualité Esther. Au fait, “Esther ti pé contigne beneficié faveur tou bann ki ti pé trouve li.” (Esther 2:15) Le roi aussi ti impressionné kan li ti trouvé couma Esther été, ek lerla li finn content li.

2:16—Kifer ti prend quatre an pou remplace la reine Vashti? Normalement ti prend enn an pou choisir enn la reine. Mais ti prend plus lé-temps parski le roi pa ti là; li ti’nn al laguerre kont la Grèce. Li parette ki pendant sa bann l’année-la, “grand colere le roi . . . ti calmé, ek li ti mazinn Vashti ek seki li ti’nn faire, ek seki ti’nn decidé kont li.”—Esther 2:1-3, 12.

3:2; 5:9—Kifer eski Mordekaï ti refuse prosterne devant Hamân? Bann Israélite ti gagne droit reconette position superieur enn grand personnage ek prosterne devant li. Mais, dan cas Hamân, ti ena plus ki sa ki ti impliké. Hamân ti enn Agaguite, kitfois enn Amaléqite, ek Jéhovah ti’nn fini decidé ki ti pou extermine Amaleq. (Deutéronome 25:19) Pou Mordekaï, si li ti prosterne devant Hamân, sa ti pou montré ki li pa ti fidel envers Jéhovah. Li ti refuse dan enn fason categorik pou faire sa ek li ti faire koné ki li ti enn Juif.—Esther 3:3, 4.

Bann leson pou nou:

2:10, 20; 4:12-16. Esther ti accepté bann l’instruction ek conseil ki enn adorateur Jéhovah ki ti ena beaucoup l’experience, ti donne li. Li pou bon ki nou “obeir tou bann ki dirige [nou] ek soumette ar zot.”—Hébreux 13:17.

2:11; 4:5. Nou bizin ‘pa guette zis nou prop l’interet, mais prend compte aussi l’interet lezot.’—Philippiens 2:4.

2:15. Esther ti montré ki li modeste ek ki li ena maitrise de soi kan li pa ti demann plus bijou ou-soit pli bon linge ki seki Hégaï ti’nn donne li. Pareil couma Sara ki ti vive avant li, c’est ‘seki li ti été endan, dan so leker, kan li ti manifesté enn caractere trankil ek douce” ki ti faire Esther gagne faveur le roi.—1 Pierre 3:4.

2:21-23. Esther ek Mordekaï, zot bann bon l’exemple pou nou parski zot ti “soumette ar bann l’autorité superieur.”—Romains 13:1.

3:4. Dan certain situation, li kitfois pli bon ki nou pa faire konn nou l’identité, pareil couma Esther. Mais ena bann question important kot nou bizin prend position, pareil couma souveraineté Jéhovah ou-soit nou l’integrité. Là, nou bizin pa peur pou faire koné ki nou Témoins de Jéhovah.

4:3. Kan nou faire face ar bann l’epreuve, nou bizin tourne vers Jéhovah dan la priere pou nou gagne la force ek la sagesse.

4:6-8. Mordekaï ti rod enn solution legal kont menace ki ti pese lor bann Juif a cause complot Hamân.—Philippiens 1: 7.

4:14. Confiance ki Mordekaï ti ena en Jéhovah, sa li enn l’exemple pou nou.

4:16. Esther ti mette tou so confiance en Jéhovah, ek li ti faire face avek fidelité ek courage ar enn situation ki ti kapav faire li perdi so la-vie. Li bien important ki nou pa compte lor nou-mem mais ki nou aprann compte lor Jéhovah.

5:6-8. Pou ki li kapav gagne faveur le roi Assuérus, Esther ti invite li pou enn deuxieme banquet. Li ti montré-li prudent. Nou aussi nou bizin faire pareil.—Proverbes 14:15.

SITUATION RENVERSÉ ENN DERRIERE LOT

(Esther 6:1–10:3)

A mesure ki bann l’evenement deroulé, boule viré. Hamân ti’nn faire enn poteau pou pendi Mordekaï, mais c’est li-mem ki pendi lor la, ek Mordekaï ki ti’nn condamné a mort, vinn premier ministre! Ek ki arrive sa plan pou touye tou bann Juif-la? Là aussi boule bizin viré.

Esther ki fidel faire kitsoz encore enn fois. Li riské so la-vie ek presente devant le roi pou supplié li pou trouve enn fason pou empeche sa massacre ki Hamân inn organisé-la. Assuérus koné ki bizin faire. Alors kan sa jour ki ti fixé pou touye tou bann Juif-la arrivé, c’est pa bann Juif mais bann ki pé rod faire zot di-tort ki perdi la vie. Mordekaï decidé ki toulé-l’année pou faire fête Pourim en souvenir sa grand delivrance-la. Mordekaï vinn deuxieme personnage apré le roi Assuérus. Li ‘travail pou di-bien so peuple ek li koz lor la paix ar tou zot descendant.’—Esther 10:3.

Reponse pou bann question biblik:

7:4—Si ti touye tou bann Juif, couma eski sa ti pou cause enn “dommage pou le roi”? Avek tact, Esther ti faire ressorti possibilité pou vann bann Juif couma bann esclave. Par sa li’nn montré ki si ti touye bann Juif, le roi ti pou perdi. Hamân ti’nn promette pou mette 10,000 piece l’argent dan tresor le roi. Mais ti pou kapav gagne plus l’argent si ti vann bann Juif couma bann esclave. En plus si ti faire seki Hamân ti envie, le roi ti pou perdi so la-reine.

7:8—Kifer bann officier la cour ti voile figure Hamân? Zot ti faire sa kitfois pou montré la honte ou-soit aussi sa malheur ki ti pé vinn lor li-la. Dapré enn livre reference, “longtemps ti couvert la tête bann ki ti condamné a mort kan ti pré pou al touye zot.”

8:17—Dan ki fason “beaucoup parmi bann peuple dan pays ti faire zot passe pou bann Juif’? Beaucoup parmi bann Perse ti considere sa nouveau l’ordre ki le roi ti donné-la couma enn signe ki Bondié ti pé donne so faveur bann Juif. Kitfois a cause sa, zot ti commence suive religion juif. C’est sa mem principe-la ki appliké dan realisation enn prophetie ki trouve dan livre Zekaria. Li dire: “Dix zom dan tou langue bann nation pou trappe, oui vrai-mem zot pou trappe rebord linge enn Juif, ek zot pou dire: ‘Nou pou al avek zot parski nou finn tann dire ki Bondié avek zot.’ ”—Zekaria 8:23.

9:10, 15, 16—Kifer bann Juif pa ti prend di-bien zot l’ennemi mem si zot ti gagne droit faire sa? Sa ti montré ki zot ti laguerre pou sap la vie zot peuple mais pa pou vinn riche.

Bann leson pou nou:

6:6-10. “Avant la ruine, ena l’orgueil, ek avant enn mauvais pas, ena enn l’esprit vantard.”—Proverbes 16:18.

7:3, 4. Eski nou faire koné avek courage ki nou bann Témoins de Jéhovah, mem si sa kapav faire nou gagne persecution?

8:3-6. Nou kapav ek nou bizin demann gouvernement ek la cour pou protege-nou kont nou bann l’ennemi.

8:5. Esther finn ena tact pou pa mentionne responsabilité ki le roi ti ena dan l’ordre ki ti donné pou touye tou so peuple. Li pareil pou nou zordi. Nou bizin ena tact kan nou donne temoignage bann grand dimoune ki dan gouvernement.

9:22. Fodé pa nou blié bann dimoune pauvre ki parmi nou.—Galates 2:10.

Jéhovah pou amenn “soulagement ek delivrance”

Mordekaï laisse nou comprend ki li dan projet Jéhovah ki Esther vinn la reine. Kan zot la-vie menacé, bann Juif faire careme ek prié Jéhovah pou gagne so l’aide. La reine presente devant le roi mem si li pa’nn gagne enn l’invitation ek chaque fois, le roi accepté pou ecoute li. Sa mem soir ki Hamân dresse poteau pou Mordekaï, le roi pa gagne sommeil. Tousala confirme seki livre Esther montré nou, setadir ki Jéhovah dirige bann l’evenement dan l’avantage so peuple.

Sa recit interessant ki ena dan livre Esther-la, li bien encourageant pou nou ki pé vive dan “lepok la fin.” (Daniel 12:4) “Dan period final bann jour,” setadir dan period final lepok la fin, Gog de Magog—Satan le Diable—pou lance so dernier l’attak kont peuple Jéhovah. Seki li envie, c’est extermine tou bann vrai adorateur Bondié. Mais pareil couma dan lepok Esther, Jéhovah pou amenn “soulagement ek delivrance” pou bann ki adore li.—Ézékiel 38:16-23; Esther 4:14.

[Zimage, page 6]

Esther ek Mordekaï devant le roi Assuérus