Bann Referans pou Kaye Renion Nou Lavi Kretien ek Nou Minister

5-11 FEVRIYE

BANN TREZOR DAN PAROL BONDIE | MATIE 12-13

Rod Bann Perl Spiritiel

nwtsty not pou letid pou Mt 12:20

enn lames ki pe al tengn: Sa lepok-la dan lakaz ti abitie servi enn ti lalanp ki ti fer ar later ek ti ranpli li ar delwil zoliv. Enn lames an lin ti ris delwil-la pou nouri laflam-la. Lexpresion Grek ki servi pou “enn lames ki pe al tengn” kitfwa fer referans ar enn lames ki ti pe fer lafime parski ankor ena labrez me laflam-la pe disparet ouswa inn tengn. Profesi Iz 42:3 ti predir ki kalite konpasion Zezi ti pou ena; zame li ti pou tengn dernie ti lespwar enn dimounn ki ena limilite ek ki abat.

12-18 FEVRIYE

BANN TREZOR DAN PAROL BONDIE | MATIE 14-15

“Nouri Boukou Dimounn Atraver Enn Tigit Dimounn”

nwtsty not pou letid pou Mt 14:21

bann madam ek bann zenn zanfan: Se zis Matie ki mansionn bann madam ek bann zenn zanfan kan koz lor sa mirak-la. Li posib ki kantite dimounn ki’nn nouri atraver sa mirak-la ti plis ki 15,000 dimounn.

Rod Bann Perl Spiritiel

nwtsty not pou letid pou Mt 15:7

ipokrit: Mo Grek ki servi pou hupokritês fer referans ar bann akter Grek (ek plitar bann akter Romin) ki ti zwe dan bann pies teat, ki ti met bann gran mask. Ti’nn fer sa bann gran mask-la pou ogmant volim zot lavwa. Avek letan ti servi sa lexpresion-la dan enn fason sinbolik pou koz lor enn dimounn ki kasiet so bann vre lintansion ouswa so personalite, kan li anbet lezot ouswa zwe enn rol. Isi Zezi apel bann sef relizie Zwif bann “ipokrit.”​—Mt 6:5, 16.

nwtsty not pou letid pou Mt 15:26

bann zanfan . . . bann ti lisien: Dapre Lalwa Mozaik bann lisien ti bann zanimo inpir, souvan Labib servi sa lexpresion-la dan enn sans negatif. (Lv 11:27; Mt 7:6; Fil 3:2; Rev 22:15) Me selman, dapre konversasion ki ena dan levanzil Mark (7:27) ek levanzil Matie, Zezi servi enn form abreze sa lexpresion-la ki vedir “ti lisien” ouswa “lisien lakaz,” ek sa adousi sa konparezon-la. Kitfwa sa montre ki Zezi ti pe servi enn lexpresion zanti pou bann zanimo domestik ki ti ena dan bann lakaz non-Zwif. Kan Zezi konpar bann Izraelit ar “bann zanfan” ek bann non-Zwif ar “bann ti lisien,” li kler ki Zezi ti pe anvi montre ki kitsoz priorite. Dan enn lakaz kot ena bann zanfan ek bann lisien toulede, ti pou nouri bann zanfan avan.

19-25 FEVRIYE

BANN TREZOR DAN PAROL BONDIE | MATIE 16-17

Rod Bann Perl Spiritiel

nwtsty not pou letid pou Mt 16:18

Tomem Pier, ek lor sa ros-la: Mo Grek pétros (ki enn mo maskilin) vedir “enn bout ros; enn ti ros.” Isi servi li kouma enn nom prop (Pier), se nom Grek ki Zezi ti donn Simon. (Zn 1:42) Sa mo-la, an feminin pétra, inn tradir par “ros,” ek li kapav vedir enn soubasman ros, enn falez, ouswa enn gran ros. Nou trouv sa mo Grek-la osi dan Mt 7:24, 25; 27:60; Lk 6:48; 8:6; Rom 9:33; 1Ko 10:4; 1Pi 2:8. Li kler ki Pier pa ti pe konsider limem kouma enn ros lor ki Zezi ti pou konstrir so kongregasion. Kifer? Parski dan 1Pi 2:4-8 li ti ekrir ki Zezi ti sa “ros ki dan kwin ki ena enn gran valer pou fondasion” ki zot ti pe atann la, ek ki Bondie Limem ti swazir. Lapot Pol osi ti fer parey, li ti fer referans ar Zezi kouma “fondman” ek “ros spiritiel.” (1Ko 3:11; 10:4) Li kler ki Zezi ti zwe lor bann mo, avredir li ti pe dir, ‘Twa, ki apel Pier, enn Bout Ros, to finn konpran vre lidantite Kris, “ros,” ki pou servi kouma fondasion pou kongregasion Kretien.’

kongregasion: Se premie fwa ki trouv sa lexpresion Grek ékklêsia. Li sorti dan de mo Grek, ék, ki vedir “andeor,” ek kaléô, ki vedir “apele.” Li fer referans ar enn group dimounn ki’nn apele ouswa ki’nn reini, pou enn lobzektif ouswa aktivite presi. (Get Lexplikasion Bann Mo.) Dan sa kontex-la, Zezi pe predir formasion kongregasion Kretien, kot ena bann Kretien ki ena lesperans pou al dan lesiel, ki kouma “bann ros vivan” ki pe “form enn lakaz spiritiel.” (1Pi 2:4, 5) Souvan servi sa lexpresion Grek-la dan la Septante pou mem lexpresion Ebre “kongregasion,” ki souvan fer referans ar pep Bondie an-antie. (Dt 23:3; 31:30) Dan Zis 7:38, fer referans ar bann Izraelit ki’nn sorti Lezip kouma enn “kongregasion.” Dan mem fason, bann Kretien “ki’nn . . . sorti dan nwarte” ek ki Bondie ‘finn swazir dan lemond’ form “kongregasion Bondie.”​—1Pi 2:9; Zn 15:19; 1Ko 1:2.

nwtsty not pou letid pou Mt 16:19

bann lakle Rwayom ki dan lesiel: Dan Labib, bann ki ti gagn sertin lakle, ki li literal ouswa sinbolik, ti gagn enn sertin lotorite. (1Kr 9:26, 27; Iz 22:20-22) Alor lexpresion “lakle” reprezant lotorite ek responsabilite. Pier ti servi “bann lakle” ki ti donn li pou ouver laport pou bann Zwif (Zis 2:22-41), bann Samaritin (Zis 8:14-17), ek bann non-Zwif (Zis 10:34-38) pou ki zot gagn posibilite gagn lespri Bondie, pou ki zot kapav rant dan Rwayom ki dan lesiel.

26 FEVRIYE–4 MARS

BANN TREZOR DAN PAROL BONDIE | MATIE 18-19

“Fer Atansion, Pa Fer Ni Twa Ni Lezot Tonbe”

nwtsty bann not pou letid pou Mt 18:6, 7

enn ros moulin ki enn bourik fer tourne: Ouswa “enn gro ros moulin.” Lit., “enn bourik so ros moulin.” Sa kalite ros moulin la, ti kitfwa anviron 1.2-1.5 met, li ti telman lour ki se enn bourik ki ti tourn sa.

bann obstak ki fer tonbe: Mo Grek skandalon ki’nn tradir par “obstak ki fer tonbe,” kitfwa fer referans ar enn piez; sertin panse ki li fer referans ar enn baton ki ti met dan enn piez ek lor baton-la ti ena enn labwet. Me li kapav fer referans ar ninport ki obstak ki kapav fer enn kikenn swa riske tonbe, swa vremem tonbe. Dan enn sans sinbolik, li fer referans ar enn aksion ouswa enn sitiasion ki amenn enn dimounn swiv enn move sime, riske tonbe ouswa fer li tonbe lor plan moral, ouswa fer pese. Dan Mt 18:8, 9, verb ki lie ar skandalizô, inn tradir par ‘fer tonbe,’ ti kapav tradir li koumsa osi “vinn enn piez; pous [enn kikenn] fer pese.”

nwtsty miltimedia

Ros Moulin

Ti servi ros moulin pou kraz bann sereal ek pou kraz zoliv pou gagn delwil. Sertin ti ase tipti pou ki kapav tourn li ar lame, me lezot ti telman gro ki ti bizin enn zanimo pou tourn li. Kitfwa se enn gran ros moulin koumsa ki bann Filistin ti fors Samson pou tourne. (Zi 16:21) Se pa zis dan Izrael ki ti abitie servi enn zanimo pou tourn enn moulin, me ti servi sa osi dan Lanpir Romin.

Ros Moulin Lao ek Anba

Kouma nou trouve dan zimaz, ti servi bann zanimo domestik, kouma par exanp enn bourik, pou tourn enn moulin. Ek ti servi sa pou kraz bann sereal ouswa zolive. Ros lao-la kitfwa ti 1.5 met larzer ek li ti tourn lor enn ros ki pli larz.

nwtsty not pou letid pou Mt 18:9

Lazeenn: Sa lexpresion-la sorti dan mo Ebre gé hinnom, ki vedir “vale Inom,” ki ti trouv dan Lwes ek Lesid ansien Zerizalem. (Get sgd-CE seksion 16, map “Jérusalem ek Bann Rezion Alantour.”) Dan lepok Zezi, sa vale-la ti vinn enn plas kot bril bann salte, alor mo “Lazeenn” se enn mo apropriye pou reprezant enn destriksion konplet.

nwtstg Lexplikasion Bann Mo

Lazeenn

Se nom Grek pou Vale Inom, ki trouv dan sid-wes ansien Zerizalem. (Zr 7:31) Dan enn fason profetik, ti koz lor sa landrwa-la kouma enn plas kot ti pou zet bann kadav. (Zr 7:32; 19:6) Pena okenn prev ki ti zet bann zanimo ouswa bann dimounn dan Lazeenn pou bril zot vivan ouswa tourmant zot. Alor, sa plas-la pa kapav reprezant enn landrwa invizib kot dan enn fason literal nam bann dimounn pou tourmante pou touletan dan dife. Okontrer, Zezi ek so bann disip ti servi Lazeenn pou reprezant “deziem lamor,” setadir enn pinision eternel, enn destriksion konplet.​—Rev 20:14; Mt 5:22; 10:28.

nwtsty not pou letid pou Mt 18:10

ki touletan devan mo Papa: Ouswa “get figir mo Papa.” Parski zot kapav vinn devan Bondie Limem, zis bann kreatir spiritiel ki kapav trouv figir Bondie.​—Ex 33:20.

Rod Bann Perl Spiritiel

nwtsty not pou letid pou Mt 18:22

77 fwa: Lit., “swasant-dis fwa set.” Kapav konpran sa lexpresion Grek la kouma swa “70 ek 7” (77 fwa) ouswa “70 miltipliye par 7” (490 fwa). Nou retrouv sa mem lexpresion-la dan la Septante dan Ze 4:24, inn tradir sa lexpresion Ebre la par “77 fwa,” ki soutenir lide “77 fwa.” Ninport ki fason ki konpran li, kan repet sif set savedir “touletan” ouswa “pena limit.” Kan Zezi fer 7 fwa ki Pier inn dir vinn 77, li ti pe dir so bann disip ki fode pa ki zot fixe enn limit lor kantite fwa ki bizin pardone. Me parkont, Talmud Babilonien (Yoma 86b) dir: “Si enn zom fer enn erer premie, deziem ek trwaziem fwa li pou gagn pardon, katriem fwa la li pa pou gagn pardon.”

nwtsty not pou letid pou Mt 19:7

papie divors: Kan Lalwa ti demann enn misie ki ti pe pans pou divorse pou prepar enn dokiman legal ek osi konsilte bann ansien, avredir Lalwa ti donn li letan pou reflesi lor enn desizion bien inportan. Ki lobzektif Lalwa ti ena? Anpes bann misie divorse tro vit ek donn bann madam enn proteksion legal. (Dt 24:1) Me dan lepok Zezi, bann sef relizie ti fer an-sort ki gagn divors fasilman. Enn istorien ki ti viv dan premie siek, Josèphe, ti limem enn Farizien ki’nn divorse, ek ti sigzere ki kapav divorse “pou ninport ki rezon, (ek souvan bann zom ti divorse pou ninport ki rezon).”

nwtsty miltimedia

Papie Divors

Se enn papie divors lane 71 ouswa 72 Nou Lepok, ki’nn ekrir an Arameen. Ti dekouver sa dan kote lenor Vale Murabbaat, enn larivier sek dan Dezer Zide. Lor la inn ekrir ki dan siziem lane revolt bann Zwif, Josèphe, garson Naqsan, ti divors ar Miriam, tifi Yonatan ki ti viv dan lavil Massada.