Bann Referans pou Kaye Renion Nou Lavi Kretien ek Nou Minister
2-8 AVRIL
BANN TREZOR DAN PAROL BONDIE | MATIE 26
“Pak ek Memoryal: Bann Resanblans ek Bann Diferans”
nwtsty miltimedia
Repa Pak
Bann kitsoz inportan ki ti servi pou repa Pak ti: (1) enn agno roti (ti bizin pa kas okenn lezo sa zanimo-la); (2) dipin san levin; ek (3) bann lerb amer. (Ex 12:5, 8; Nb 9:11) Dapre Mishna, bann lerb amer ti kapav fer referans ar leti, lasikore, passerage, endive, ouswa pisanli. Pena dout ki sa ti rapel bann Izraelit zot lesklavaz bien amer dan Lezip. Zezi ti servi dipin san levin pou reprezant so lekor imin ki ti parfe. (Mt 26:26) Ek lapot Pol ti apel Zezi “nou agno Paskal.” (1Ko 5:7) Dan premie siek, ti koumans servi (4) divin pou repa Pak. Zezi ti servi divin pou reprezant so disan, ki li ti pou verse kouma enn sakrifis.—Mt 26:27, 28.
nwtsty not pou letid pou Mt 26:26
reprezant: Mo Grek éstin (literalman vedir “se”) isi inplik “sinboliz; vedir; reprezant.” Sa sinifikasion-la ti kler pou bann zapot, parski dan sa lokazion-la lekor Zezi ki ti parfe ek osi dipin san levin ki zot ti pou manze, ti devan zot. Alor, dipin-la pa ti kapav lekor fizik Zezi. Li interesan pou note ki servi mem mo Grek dan Mt 12:7, ek boukou tradiksion Labib inn tradir li par “vedir.”
nwtsty not pou letid pou Mt 26:28
disan lalians: Nouvo lalians, ant Zeova ek bann Kretien ki ena lesperans pou al dan lesiel, ti rant anviger gras-a sakrifis Zezi. (Eb 8:10) Isi Zezi servi mem lexpresion ki Moiz ti servi kan li ti azir kouma mediater, pou fer lalians Lalwa rant anviger avek Izrael lor Mont Sinai. (Ex 24:8; Eb 9:19-21) Parey kouma disan bann toro ek bann bouk ti valid lalians Lalwa ant Bondie ek nasion Izrael, disan Zezi ti valid nouvo lalians ki Zeova ti pou fer avek Izrael spiritiel. Sa lalians-la ti rant anviger zour Lapantkot 33 Nou Lepok.—Eb 9:14, 15.
Rod Bann Perl Spiritiel
nwtsty not pou letid pou Mt 26:17
Premie zour Fet Dipin San Levin: Fet Dipin San Levin ti koumanse le 15 Nizan, landemin Pak (14 Nizan), ek ti dir set zour. (Get sgd-CE, Seksion 19) Me selman, dan lepok Zezi, Pak ti bien lie ar sa fet-la. Ena fwa, sa wit zour la, ki ti inplik osi le 14 Nizan, ti apel “Fet Dipin San Levin.” (Lk 22:1) Dan sa kontex-la, ti kapav tradir “premie zour” par “zour avan.” (Konpar ar Zan 1:15, 30, kot mo Grek pou “premie” [prôtos] inn tradir par “avan,” avek mem konstriksion fraz, setadir “li ti existe avan [prôtos] mwa.”) Alor, dapre Grek orizinal ek koutim Zwif, sa fer nou panse ki bann disip ti poz Zezi sa kestion-la le 13 Nizan. Pandan lazourne 13 Nizan, bann disip ti fer bann preparasion pou Pak, ki ti selebre “apre ki lanwit ti tonbe” koumansman le 14 Nizan.—Mk 14:16, 17.
nwtsty not pou letid pou Mt 26:39
fer ki sa koup-la pas lwin: Dan Labib, souvan servi mo “koup” pou fer referans ar volonte Bondie konsernan enn dimounn, ouswa “par” ki Bondie donn enn dimounn. Pena dout ki Zezi ti bien trakase konsernan blam ki so lamor ti pou ena lor Bondie. Kifer? Parski li ti pou mor kouma enn blasfemater ek enn rebel. Se sa ki’nn pous li pou priye ki “sa koup-la” pas lwin ar li.
9-15 AVRIL
BANN TREZOR DAN PAROL BONDIE | MATIE 27-28
“Al Fer Bann Disip: Kifer, Kotsa, ek Kouma?”
nwtsty bann not pou letid pou Mt 28:19
fer bann disip: Kapav tradir mo Grek mathêteuô par “ansegne” avek lobzektif pou fer bann zelev ouswa bann disip. (Konpar fason ki’nn servi sa mo-la dan Mt 13:52, kot inn tradir li par “ki’nn ansegn li.”) Bann verb “batiz” ek “ansegn” montre seki sa inplike dan komannman pou “fer bann disip.”
bann dimounn dan tou bann nasion: Sa lexpresion-la literalman vedir “bann nasion,” me kan nou get so kontex, sa lexpresion-la fer referans ar bann dimounn ki sorti dan tou nasion. Parski dan lexpresion batiz zot, mo Grek “zot” se enn pronom maskilin ek li fer referans ar bann dimounn, alor ki lexpresion “bann nasion” an Grek se enn lexpresion zeneral. Komannman pou al ver “bann dimounn dan tou nasion” ti nouvo. Avan minister Zezi, bann Lekritir ti dir ki bann non-Zwif ti kapav vinn dan Izrael si zot ti vini pou servi Zeova. (1Le 8:41-43) Me selman, avek sa komannman-la, Zezi ti donn lord so bann zapot pou al pres ar bann non-Zwif. Sa met laksan lor travay ki ti pou fer dan lemond antie pou fer bann disip.—Mt 10:1, 5-7; Re 7:9.
nwtsty not pou letid pou Mt 28:20
ansegn zot: Mo Grek ki servi pou “ansegne” inplik linstriksion, bann explikasion, montre bann kitsoz atraver bann rezonnman, ek donn bann prev. Ansegn zot pou swiv tou bann komannman ki Zezi ti done ti enn kitsoz ki zot pou bizin kontign fer, sa inplik ansegn seki li’nn ansegne, aplik so lansegnman, ek swiv so lexanp.—Zn 13:17; Ef 4:21; 1Pi 2:21.
Rod Bann Perl Spiritiel
nwtsty bann not pou letid pou Mt 27:51
rido: Sa zoli rido bien dekore la ti separ Parti ki Pli Sin ek Parti ki Sin dan Tanp. Dapre bann tradision Zwif, sa rido bien lour la ti apre 18 met longer, 9 met larzer, ek 7.4 santimet lepeser. Kan Zeova ti desir sa rido-la an de, Li pa ti zis montre ki Li ti ankoler kont bann dimounn ki’nn touy so Garson, me Li ti montre osi ki aster li posib pou rant dan lesiel.—Eb 10:19, 20.
tanp: Mo Grek naos isi fer referans ar batiman santral, kot ti ena Parti ki Sin ek Parti ki Pli Sin.
nwtsty not pou letid pou Mt 28:7
dir so bann disip ki li finn resisite: Sa bann fam-la pa ti selman bann premie disip ki ti kone ki Zezi ti resisite, me zot ti osi gagn lord pou inform bann lezot disip. (Mt 28:2, 5, 7) Dapre tradision Zwif ki pa baze lor bann Lekritir ki Bondie inn inspire, pa kapav aksepte temwaniaz enn fam devan enn lakour. Parkont, bann anz Zeova ti donn bann fam loner kan ti konfie zot sa zoli mision-la.
16-22 AVRIL
BANN TREZOR DAN PAROL BONDIE | MARK 1-2
“To Bann Pese Finn Pardone”
nwtsty not pou letid pou Mk 2:9
Ki pli fasil: Li ti pli fasil pou enn kikenn dir ki li kapav pardonn bann pese, parski pa ti pou bizin enn prev pou soutenir sa deklarasion-la. Me pou dir, Leve . . . ek marse, ti bizin enn mirak ki ti pou montre zot tou dan enn fason kler ki Zezi ena pouvwar pou pardonn bann pese. Seki arive isi ek Iz 33:24 montre lien ki ena ant maladi ek pese.
Rod Bann Perl Spiritiel
nwtsty bann not pou letid pou Mk 1:11
enn lavwa sorti dan lesiel: Se premie lokazion lor trwa dan bann Levanzil kot Zeova koz direkteman ar bann imin.
To mo Garson: Antan ki enn kreatir spiritiel, Zezi ti Garson Bondie. (Zn 3:16) Kan li’nn ne kouma enn imin, Zezi ti enn “garson Bondie” parey kouma Adan ki ti enn zom parfe, ti ete. (Lk 1:35; 3:38) Me selman, seki Bondie ti dir isi montre ki Li ti pe fer plis ki zis dir kisannla Zezi ete. Kan Bondie ti dir sa ek ti devers lespri sin lor Zezi, li kler ki Li ti pe montre ki Zezi ti vinn So Garson spiritiel. Setadir ki Zezi ti “ne ankor enn fwa” avek lesperans pou retourn viv dan lesiel ek ki lespri sin ti swazir li pou vinn Lerwa ek Gran Pret ki Bondie ti swazir.—Zn 3:3-6; 6:51; konpar ar Lk 1:31-33; Eb 2:17; 5:1, 4-10; 7:1-3.
Mo finn aprouv twa: Ouswa “to fer mwa plezir; mo ena enn gran lazwa dan twa.” Servi sa mem lexpresion la dan Mt 12:18, ki sit Iz 42:1 konsernan Lemesi ki Bondie ti promet, ouswa Kris. Kan Bondie ti devers lespri sin ek ti dir sa bann parol la konsernan so Garson, sa ti permet dan enn fason kler pou idantifie Zezi kouma Lemesi ki Bondie ti promet.
nwtsty not pou letid pou Mk 2:28
Segner . . . Saba: Zezi aplik sa lexpresion-la ar limem (Mt 12:8; Lk 6:5), sa montre ki li ti kapav servi Saba pou fer bann travay ki so Papa ki dan lesiel ti donn li pou fer. (Konpar ar Zn 5:19; 10:37, 38.) Pandan Saba, Zezi ti fer sertin parmi so bann pli gran mirak, kouma par exanp, geri bann malad. (Lk 13:10-13; Zn 5:5-9; 9:1-14) Li kler ki sa reprezant kalite soulazman ki li pou amene kan li pou regne, sa pou parey kouma enn repo saba.—Eb 10:1.
23-29 AVRIL
BANN TREZOR DAN PAROL BONDIE | MARK 3-4
“Geri Zour Saba”
nwtsty not pou letid pou Mk 3:5
ankoler ek bien sagrin: Se zis Mark ki rakont reaksion ki Zezi ti ena kan li ti trouve kouma bann sef relizie zot leker ti dir dan sa lokazion-la. (Mt 12:13; Lk 6:10) Pier ti enn dimounn ki pa ti gagn per pou exprim so santiman, ek kitfwa se limem ki’nn dekrir an detay bann santiman Zezi.—Get video “Introdiksion Liv Mark.”
Rod Bann Perl Spiritiel
nwtsty bann not pou letid pou Mk 3:29
blasfeme kont lespri sin: Blasfeme fer referans ar bann parol ki enn dimounn servi pou koz an mal, pou insilte, ouswa dir bann parol grosie kont Bondie ouswa kont bann kitsoz sakre. Lespri sin sorti kot Bondie Limem, alor, kan volonterman nou opoz nou ar li ouswa refiz rekonet seki lespri sin fer, li enn blasfem kont Bondie. Parey kouma Mt 12:24, 28 ek Mk 3:22 montre, bann sef relizie Zwif ti trouv lespri Bondie pe azir lor Zezi kan li ti fer bann mirak; me malgre sa, zot ti dir ki se gras-a Satan Lediab ki li ena sa pouvwar-la.
koupab enn pese eternel: Kitfwa sa fer referans ar enn pese volonter ki ena bann konsekans eternel, setadir lamor san okenn lespwar pou gagn rezireksion; pena okenn sakrifis ki kapav kouver sa kalite pese-la.—Get not pou letid pou blasfeme kont lespri sin pou sa mem verse-la.
NOU LAVI KRETIEN
“Seki Ena Zorey pou Ekoute, Ekoute”
nwtsty not pou letid pou Mk 4:9
Seki ena zorey pou ekoute, ekoute: Avan ki li donn lexanp lor semer, Zezi ti dir: “Ekoute.” (Mk 4:3) Kan li ti fini so lexanp par sa konsey-la, li ti pe montre so bann disip linportans pou ekout bien so konsey. Nou retrouv mem konsey dan Mt 11:15; 13:9, 43; Mk 4:23; Lk 8:8; 14:35; Re 2:7, 11, 17, 29; 3:6, 13, 22; 13:9.
30 AVRIL–6 ME
BANN TREZOR DAN PAROL BONDIE | MARK 5-6
“Zezi Ena Pouvwar pou Resisit Bann ki Nou Kontan Me Ki’nn Mor”
nwtsty not pou letid pou Mk 5:39
pa’nn mor me li pe dormi: Dan Labib, souvan konpar lamor ar somey. (Ps 13:3; Zn 11:11-14; Zis 7:60; 1Ko 7:39; 15:51; 1Tes 4:13) Zezi ti pou resisit sa tifi-la, alor, kitfwa li ti dir sa parski li ti anvi montre ki parey kouma kapav lev bann dimounn ki dan enn gran somey, kapav relev bann dimounn ki’nn mor. Pouvwar ki Zezi ti ena pou resisit sa tifi-la ti sorti kot so Papa, “ki donn lavi bann dimounn mor ek ki koz lor bann kitsoz ki pankor arive koumadir zot inn fini arive.”—Rom 4:17.
Rod Bann Perl Spiritiel
nwtsty not pou letid pou Mk 5:19
rakont zot: Alor ki Zezi ti anpes bann dimounn pou koz lor mirak ki li ti fer (Mk 1:44; 3:12; 7:36), isi li dir sa misie-la al rakont so bann fami ki’nn arive. Kifer? Kitfwa parski bann dimounn ti demann Zezi pou kit sa landrwa-la ek ki li pa ti pou kapav rann zot temwaniaz limem; sa ti pou permet ki demanti bann move rapor ki ti pou ena akoz bann koson ki’nn mor.
nwtsty not pou letid pou Mk 6:11
sakouy later ki anba zot lipie: Kan bann disip ti fer sa aksion-la, zot ti pe montre ki devan Bondie zot pa responsab reaksion bann dimounn ek ki zot les sa zizman-la dan lame Bondie. Nou trouv mem lexpresion dan Mt 10:14; Lk 9:5. Mark ek Lik azout lexpresion kouma enn temwaniaz pou [ouswa, “kont”] zot. Pol ek Barnabas ti aplik sa linstriksion-la dan Antios dan Pisidi (Zis 13:51), ek kan Pol ti fer mem kitsoz dan Korint kan li ti sakouy so linz, li ti azout sa lexplikasion-la: “Zot mem responsab zot prop lamor. Mwa mo inosan.” (Zis 18:6) Sa bann aksion-la ti enn kitsoz ar ki bann disip ti abitie. Dan zot lepok, bann Zwif ki ti bien relizie ti abitie sakouy zot sandalet kan zot ti sorti dan enn pei non-Zwif avan ki zot ti retourn dan teritwar Zwif. Kifer? Pou zot sa lapousier-la ti inpir. Me selman, Zezi ti pe pans enn lot kitsoz kan li ti donn sa bann linstriksion-la so bann disip.