Bann Referans Kaye Renion Nou Lavi Kretien ek Nou Minister
7-13 ME
BANN TREZOR DAN PAROL BONDIE | MARK 7-8
“Pran To Poto Soufrans ek Kontign Swiv Mwa”
nwtsty not pou letid pou Mk 8:34
li bizin renie limem: Ouswa “li bizin renons tou bann drwa ki li ena lor limem.” Sa montre ki se enn dimounn ki volonterman renie limem net ouswa li abandonn so drwa lor limem ar Bondie. Ti kapav tradir sa lexpresion Grek la par “li bizin dir non ar limem,” sa apropriye parski sa inplik dir non ar so bann dezir personel, so bann lanbision, ouswa so lavantaz. (2Ko 5:14, 15) Mark ti servi sa mem verb Grek la pou dekrir Pier kan li ti renie Zezi.—Mk 14:30, 31, 72.
14-20 ME
BANN TREZOR DAN PAROL BONDIE | MARK 9-10
“Enn Vizion ki Fortifie Lafwa”
nwtsty not pou letid pou Mk 9:7
enn lavwa: Se deziem lokazion lor trwa dan bann Levanzil kot Zeova koz direkteman ar bann imin.—Get bann not pou letid pou Mk 1:11; Zn 12:28.
Rod Bann Perl Spiritiel
nwtsty bann not pou letid pou Mk 10:17, 18
Bon Ansegnan: Li kler ki sa misie-la ti servi lexpresion “Bon Ansegnan” kouma enn tit pou flat Zezi, bann sef relizie ti kontan kan ti donn zot sa kalite loner-la. Mem si Zezi pa ti ena okenn problem ki apel li “Ansegnan” ek “Segner” (Zn 13:13), li ti donn tou loner so Papa.
Personn pa bon, zis Bondie tousel ki bon: Isi Zezi rekonet Zeova kouma referans pli siperyer ki ena lor seki bon, sa Kikenn ki ena drwa pou deside ki kitsoz ki bon ek ki pa bon. Kan Adan ek Ev ti rebel kont Zeova ek ti manz frwi pie konesans bon ek move, zot ti esey pran sa drwa-la. Me Zezi li, avek limilite les so Papa etabli bann lalwa. Bondie finn dir ek montre ki kitsoz ki bon atraver bann komannman ki ena dan so Parol.—Mk 10:19.
NOU LAVI KRETIEN
“Seki Bondie Finn Met Ansam”
nwtsty bann not pou letid pou Mk 10:4
papie divors: Kan Lalwa ti demann enn misie ki ti pe pans pou divorse pou prepar enn dokiman legal ek osi konsilte bann ansien, avredir Lalwa ti donn li letan pou reflesi lor enn desizion bien inportan. Ki lobzektif Lalwa ti ena? Anpes bann misie divors tro vit ek donn bann madam enn proteksion legal. (Dt 24:1) Me dan lepok Zezi, bann sef relizie ti fer an-sort ki gagn divors fasilman. Enn istorien ki ti viv dan premie siek, Josèphe, ti limem enn Farizien ki’nn divorse, ek ti sigzere ki kapav divorse “pou ninport ki rezon, (ek souvan bann zom ti divorse pou ninport ki rezon).”
nwtsty bann not pou letid pou Mk 10:11
divors avek so fam: Ouswa “ranvway so fam”. Pou konpran seki Zezi ti dir isi, nou bizin get osi seki li ti dir lor sa mem size-la dan Mt 19:9, kot ena sa fraz-la “exsepte dan ka limoralite sexiel.” Kan Mark sit seki Zezi inn dir konsernan divors, sa konsern ninport ki rezon pou ki finn gagn divors exsepte si enn konzwin infidel komet “limoralite sexiel” (Grek, pornéïa).
komet ladilter kont li: Isi Zezi rezet enn lansegnman bann Rabin ki ti bien popiler, bann zom ti kapav divors avek zot fam “pou ninport ki rezon.” (Mt 19:3, 9) Sa lide pou komet ladilter kont so fam la ti enn kitsoz ki laplipar bann zwif pa ti kone. Zot bann Rabin ti ansegne ki enn mari zame pa ti pou komet ladilter kont so fam, zis enn fam ki ti kapav infidel. Kan Zezi ti met bann mari anba mem lobligasion moral ki bann fam, Zezi ti donn bann fam dignite ek enn pli gran respe.
21-27 ME
BANN TREZOR DAN PAROL BONDIE | MARK 11-12
“Li Finn Met Pli Boukou ki Tou Lezot Dimounn”
nwtsty bann not pou letid pou Mk 12:41, 42
bann bwat kontribision: Dapre bann vie liv Zwif, bann bwat kontribision, ouswa bann resipian, ti dan form enn tronpet, ouswa enn korn, avek enn tipti louvertir lao. Bann dimounn ti fer bann kontribision pou diferan kitsoz. Kapav trouv sa mem mo Grek la dan Zn 8:20, kot inn tradir li par “trezor.” Sa lexpresion-la kitfwa fer referans ar enn plas dan Lakour Bann Madam. (Get sgd–CE Seksion 15.) Dapre bann liv Rabin, ti met 13 bwat kontribision toutotour bann miray sa lakour-la. Kitfwa dan tanp osi ti ena enn gran bwat kontribision, ek tou bann larzan ki ti gagne dan bann lezot bwat kontribision ti met zot dan sa gran bwat kontribision la.
de ti pies: Lit., “de lepta,” enn mo Grek pliryel pou leptôn, ki vedir enn kitsoz tipti ek fin. Enn leptôn ti enn pies ki ti vo 1/128 denie ek samem pli tipti pies an kwiv ouswa an bronz ki ti pe servi an Izrael.—Get sgd-CE Seksion 18.
ena bien tigit valer: Lit., “ki enn quadrans.” Mo Grek kodrantês (an Latin quadrans) fer referans ar enn pies Romin ki ti an kwiv ouswa an bronz ki ti vo 1/64 denie. Isi Mark ti servi lamone Romin pou explik valer bann pies ki bann Zwif ti abitie servi.—Get sgd-CE Seksion 18.
Rod Bann Perl Spiritiel
nwtsty not pou letid pou Mk 11:17
enn lakaz kot tou bann nasion fer lapriyer: Parmi sa trwa Levanzil ki sit Iz 56:7 la, zis Mark ki’nn azout fraz “pou tou bann nasion [bann dimounn].” (Mt 21:13; Lk 19:46) Tanp Zerizalem ti enn plas kot bann Izraelit ek osi bann etranze ki ti ena lakrint pou Bondie, ti kapav ador Zeova ek priye Li. (1Ler 8:41-43) Zezi ti ena rezon pou kondann bann Zwif ki ti pe fer komers dan tanp, kan zot finn fer li vinn enn kavern voler. Seki zot ti fer ti dekouraz bann dimounn dan tou nasion pou vinn dan lakaz Zeova pou priye Li, seki ti anpes zot gagn lokazion pou konn Li.