NOU LAVI KRETIEN

Nouvote dan Renion Lasemenn

Apartir Zanvie 2018, dan renion lasemenn pou fer referans ar bann not pou letid ek bann miltimedia ki baze lor New World Translation of the Holy Scriptures (nwtsty), version letid lor Internet, mem si sa version letid la pa disponib dan to lang. Pena dout ki sa bann ransegnman-la pou amelior preparasion to bann renion. Pli inportan ankor, nou espere ki sa pou fer twa vinn pli pros ar nou Papa ki kontan nou, Zeova!

BANN NOT POU LETID

Bann not pou letid pou ed nou konpran pli bien kiltir, zeografi, ek langaz boukou verse Labib.

Matie 12:20

Enn lames ki pe al tengn: Sa lepok-la dan lakaz ti abitie servi enn ti lalanp ki ti fer ar later ek ti ranpli li ar delwil zoliv. Enn lames an lin ti ris delwil-la pou nouri laflam-la. Lexpresion Grek ki servi pou “enn lames ki pe al tengn” kitfwa fer referans ar enn lames ki ti pe fer lafime parski ankor ena labrez me laflam-la pe disparet ouswa pe tengn. Profesi Izai 42:3 ti predir ki kalite konpasion Zezi ti pou ena; zame li ti pou tengn dernie ti lespwar enn dimounn ki ena limilite ek ki abat.

Matie 26:13

Laverite: Mo Grek, amên, sorti dan Ebre ʼamen, ki vedir “wi, mo dakor,” ouswa “ki sa realize.” Souvan Zezi servi sa lexpresion-la avan ki li dir enn kitsoz, enn promes, ouswa enn profesi pou montre ki sa bien vre ek ki kapav fer sa konfians. Fason ki Zezi ti servi “laverite,” ouswa amen, se enn fason inik ki ti servi sa dan bann levanzil. Kan ti repet li (amên amên), parey kouma nou trouve dan Levanzil Zan, inn tradir seki Zezi ti dir par “vremem, laverite.”—Zn 1:51.

MILTIMEDIA

Bann foto, zimaz, ek bann video ek bann animasion ki pena son montre bann diferan detay ki ena dan Labib.

Betfaze, mont des Oliviers, ek Zerizalem

Sa ti video-la montre enn sime ki pran depi les pou al Zerizalem, depi enn vilaz ki azordi apel et-Tour, kitfwa se samem Betfaze ki mansione dan Labib, pou al lor pwin pli ot lor mont des Oliviers. Betani trouv dan les Betfaze ki lor versan les, mont des Oliviers. Kan Zezi ek so bann disip ti dan Zerizalem, zot ti ena labitid pou pas lanwit dan Betani, ki zordi apel el-Azariyé (Al Eizariya), enn nom Arab ki vedir “Landrwa Lazar.” Pena dout ki Zezi ti res dan lakaz Mart, Mari, ek Lazar. (Mt 21:17; Mk 11:11; Lk 21:37; Zn 11:1) Kan li ti vwayaz depi zot lakaz ziska Zerizalem, kitfwa Zezi ti pran enn sime parey kouma seki nou’nn trouve dan video-la. Le 9 Nizan, lan 33 Nou Lepok, kan Zezi ti mont lor enn zenn bourik depi mont des Oliviers pou al Zerizalem, kitfwa li ti sorti depi Betfaze, ek ti swiv sime ki al Zerizalem.

Sime depi Betani ziska Betfaze
Betfaze
Mont des Oliviers
Vale Sedron
Montagn kot Tanp Ti Ete

Koulou dan enn Lezo Talon

Sa foto-la se enn kopi enn lezo talon enn dimounn ki’nn perse ar enn koulou feray ki ti 11.5 santimet longer. Inn dekouver lezo talon orizinal la an 1968, pandan bann lafouy dan nor Zerizalem, ek ki date dan lepok bann Romin. Sa se enn prev arkeolozik ki ti servi bann koulou kan ti met enn dimounn a-mor lor enn poto dibwa. Kitfwa sa koulou-la li parey ar bann koulou ki bann solda Romin ti servi pou met Zezi Kris lor poto. Ti trouv sa lezo talon-la dan enn bwat an ros, ki apel ossuaire, ladan ti met bann lezo sek enn dimounn ki’nn mor apre ki so lekor ti’nn dekonpoze. Sa montre ki enn dimounn ki ti met a-mor lor enn poto ti kapav gagn enn lanterman.—Mt 27:35.