Zezi Ena Pouvwar lor Bann Demon

Apre sa moman difisil ki bann disip inn pase lor lamer la, zot retourn a-ter. Me kan zot desann depi zot bato, zot gagn enn lot sok. De zom bien agresif ki posede par bann demon vinn ver Zezi. Toulede sorti dan enn simitier. Bann Levanzil met laksan sirtou lor enn parmi sa de zom-la, kitfwa parski li ti pli violan ek ki li ti posede depi pli lontan.

Sa pov zom-la abitie mars touni ek lanwit-lizour, “li irle dan simitier, lor montagn. Li ti koup-koup limem ar ros.” (Mark 5:5) Li telman sovaz ek violan, ki bann dimounn ti per pou pas par sime ki pre ar simitier. Sertin dimounn inn esey atas li, me sak fwa, li ti ras bann lasenn dan so lame ek so lipie. Personn pa ti ena lafors pou metriz li.

Sa zom-la vinn pre ar Zezi ek tom dan so lipie. Bann demon ki pe kontrol li la, fer li kriye: “Ki to oule ar mwa, Zezi Garson Bondie Treo? . . . [“Fer serman devan Bondie,” NW] mo sipliy twa, pa fatig mwa.” Lerla, Zezi montre ki li ena pouvwar lor bann demon, ek li dir zot: “Twa, move lespri, sort dan sa [“zom,” NW] la.”​—Mark 5:7, 8.

An realite, ena boukou demon lor sa zom-la. Kan Zezi demande: “Kouma to apele?” Li gagn sa repons-la: “Mo apel Lezion, parski nou boukou.” (Mark 5:9, NW.) Sa lepok-la, dan enn lezion Romin ti ena plizir milye solda; alor, sa fer nou konpran ki ena boukou demon ki pe arsel sa zom-la, ek zot pran plezir pou fer li soufer. Zot sipliy Zezi pou ki li pa “avoy zot dan pwi-san-fon [“labim,” NW].” Sirman zot kone seki pou ariv zot biento, zot ek zot sef, Satan.​—Lik 8:31.

Pa tro lwin, ena enn troupo anviron 2,000 koson ki pe manze. Dapre Lalwa, sa bann zanimo-la zot inpir, ek bann Zwif pa ti mem sipoze ena sa bann zanimo-la. Bann demon-la dir: “Avoy nou dan bann koson, permet nou rant dan zot.” (Mark 5:12) Zezi dir zot ale, ek zot rant dan bann koson-la. Lerla, toule 2000 koson galoupe, sot depi enn falez, tom dan lamer, ek zot nwaye.

Kan bann gardien koson trouv sa, zot degaze zot ale, ek zot rakont tou seki’nn arive avek bann dimounn dan lavil ek lakanpagn. Bann dimounn vinn gete ki’nn arive. Kan zot arive, zot trouve ki sa zom ki ti posede la, inn geri, ek ki li pe azir kouma enn dimounn normal. Li ena linz lor li ek li pe asiz devan lipie Zezi!

Bann dimounn ki trouv sa zom-la ouswa ki tann sa nouvel-la, gagn bien per. Kifer? Zot per seki Zezi kapav fer ankor. Alor, zot demann Zezi pou kit zot landrwa. Kan Zezi pe rant dan bato pou ale, zom-la sipliy li pou al avek li. Me Zezi dir li: “Al to lakaz kot to bann fami; rakont zot tou saki Lesegner [“Zeova,” NW] inn fer pou twa, kouma li finn pitie twa.”​—Mark 5:19.

Souvan Zezi demann bann dimounn ki li’nn geri pou pa rakont personn seki li’nn fer, parski li pa anvi ki bann dimounn tir bann fos konklizion lor li akoz bann zistwar ki zot tande. Me dan sa sitiasion-la, sa zom-la li enn prev vivan ki Zezi ena pouvwar, ek zom-la kapav rann temwaniaz ar bann dimounn ki Zezi pa pou reisi zwenn. Ek so temwaniaz kapav osi demanti tou bann mansonz ki bann dimounn kapav rakonte konsernan bann koson ki’nn nwaye. Alor, zom-la ale ek li koumans rakont dan Dekapol seki Zezi inn fer pou li.