Bann Referans pou Kaye Renion Nou Lavi Kretien ek Nou Minister
7-13 ZANVIE
BANN TREZOR DAN PAROL BONDIE | ZISTWAR BANN APOT 21-22
Rod Bann Perl Spiritiel
nwtsty not pou letid pou Zis 22:16
met to konfians dan so nom pou lav to bann pese: Ouswa “lav to bann pese ek met to konfians dan so nom.” Se pa batem delo ki pou lav pese enn dimounn, me se kan li met so konfians dan nom Zezi. Sa inplik ena lafwa dan Zezi ek montre sa par bann aksion, ki baze lor bann lansegnman Zezi Kris.—Zis 10:43; Zak 2:14, 18.
14-20 ZANVIE
BANN TREZOR DAN PAROL BONDIE | ZISTWAR BANN APOT 23-24
Rod Bann Perl Spiritiel
nwtsty not pou letid pou Zis 23:6
Mo enn Farizien: Sertin dan lasistans ti konn Pol. (Zis 22:5) Kan Pol ti prezant limem kouma garson enn Farizien, sirman bann Farizien dan Sanedrin ti konpran ki Pol ti rekonet ki li ti ena mem leritaz kiltirel ki zot, mem si li ti vinn enn Kretien zele. Li pa ti pe fer li pas pou enn lot kikenn. Me nou bizin konpran dan ki kontex lapot Pol ti dir ki li enn Farizien; li ti asosie li ar bann Farizien plito ki bann Sadisein parski li ti partaz mem krwayans ki bann Farizien lor rezireksion. Kan Pol ti fer sa, li ti poz enn baz kot li ek bann Farizien, ki ti la, ti dakor. Kan li ti koz lor sa polemik-la, li ti espere ki sertin manb Sanedrin ti pou dakor ar so rezonnman, ek so plan ti marse. (Zis 23:7-9) Seki Pol dir isi dan Zis 23:6 li an-akor ar fason ki li ti dekrir limem plitar devan Lerwa Agripa. (Zis 26:5) Ek kan li ti Rom, li ti ekrir bann Kretien dan kongregasion Filip, ek ankor enn fwa Pol ti koz lor so pase antan ki enn Farizien. (Fil 3:5) Li interesan pou trouve kouma Zis 15:5 dekrir bann lezot Kretien ki avan ti bann Farizien.
nwtsty not pou letid pou Zis 24:24
Drizil: Li ti trwaziem ek pli zenn tifi Erod ki mansione dan Zis 12:11, setadir Erod Agripa I. Drizil ti ne ver lan 38 Nou Lepok ek li ti ser Agripa II ek Berenis. (Get lexique « Hérode ».) Gouverner Felix ti so deziem misie. Lerwa Sirien Aziz d’Émèse ti so premie misie, me Drizil ti divors avek li pou marye avek Felix vers lan 54 Nou Lepok; li ti ena apepre 16 an. Li posib ki li ti la kan Pol ti koz avek Felix “lor kimanier bizin viv enn lavi zis, kimanier enn dimoun bizin kontrol limem, ek lor size zizman [“ki pe vini,” NW].” (Zis 24:25) Kan Felix ti les so plas gouverner Festus, li ti les Pol dan prizon pou “gagn faver bann Zwif”; sertin panse ki li ti fer sa pou fer plezir so zenn madam, ki ti enn Zwif.—Zis 24:27.
21-27 ZANVIE
BANN TREZOR DAN PAROL BONDIE | ZISTWAR BANN APOT 25-26
Rod Bann Perl Spiritiel
nwtsty not pou letid pou Zis 26:14
kan to pe kontign lager kont mwa: Lit., “donn koutpie enn baton ki ena enn pwint an metal.” Ti servi sa baton-la pou diriz enn zanimo. (Zi 3:31) Lexpresion “donn koutpie enn baton ki ena enn pwint an metal” se enn proverb dan literatir Grek. Li fer referans ar reaksion enn bef ki teti ek ki donn koutpie pou reziste kan pe pik li avek sa baton-la, ek li fer limem dimal. Sol ti azir parey, avan ki li ti vinn enn Kretien. Kan li ti lager kont bann disip Zezi, ki ti ena soutien Zeova, Pol ti pou fer limem bien dimal. (Konpar ar Zis 5:38, 39; 1Tim 1:13, 14.) Dan Ek 12:11 mansionn “baton ki servi pou diriz zanimo” dan enn fason sinbolik, ek sa fer referans ar bann parol ki enn dimounn saz dir ek ki pous sa dimounn ki pe ekout li la pou aplik enn konsey.
nwt lexplikasion bann mo
Enn Baton ki Ena enn Pwint an Metal. Bann fermie ti servi sa baton-la pou pik enn zanimo pou diriz li. Konpar sa baton-la ar bann parol ki enn dimounn saz dir ek ki pous sa dimounn ki pe ekout li la pou aplik enn bon konsey. Lexpresion “donn koutpie enn baton ki ena enn pwint an metal” ena enn lien ar aksion enn bef ki teti ek ki donn koutpie pou reziste kan pe pik li avek sa baton-la, ek li fer limem dimal.—Zis 26:14; Zi 3:31.
28 ZANVIE–3 FEVRIYE
BANN TREZOR DAN PAROL BONDIE | ZISTWAR BANN APOT 27-28
Rod Bann Perl Spiritiel
nwtsty not pou letid pou Zis 27:9
karem Zour Rekonsiliasion: Ouswa “karem lotonn.” Lit., “karem.” Lexpresion Grek pou “karem” fer referans ar enn sel karem ki ti obligatwar anba Lalwa Mozaik, setadir, karem ki ti fer sak lane pou Zour Rekonsiliasion, ki ti apel Yom Kippour (Ebre, yôm hakkippourim, “zour kouver,” setadir zour ki ti kouver bann pese.) (Lv 16:29-31; 23:26-32; Nb 29:7; get lexique « jour de la Réconciliation ».) An zeneral, bann dimounn konpran lexpresion “fer noumem soufer,” ki servi isi dan kontex Zour Rekonsiliasion, kouma diferan kitsoz ki enn dimounn fer pou priv limem volonterman, ek parmi ena karem. (Lv 16:29, not) Lexpresion “karem” ki servi dan Zis 27:9 soutenir lide ki enn parmi bann kitsoz ki enn dimounn fer pou priv limem volonterman Zour Rekonsiliasion ti inplik karem. Karem Zour Rekonsiliasion ti tom ant lafin Septam ouswa koumansman Oktob.
nwtsty not pou letid pou Zis 28:11
Bann Garson Zeus: Dapre mitolozi Grek ek Romin, “Bann Garson Zeus” (Grek, Dioskouroï) ti apel Castor ek Pollux. Zot ti bann zimo, ek zot ti bann zanfan bondie Zeus (Jupiter) ek Larenn Sparte ki ti apel Léda. Kan bann marin ti an danze lor lamer, zot ti kapav kont lor sa bann zimo-la, parski ti konsider zot kouma protekter bann marin. Sa detay konsernan skilptir ki ena lor lavan bato la ti enn lot prev ki sa liv-la ti ekrir par enn kikenn ki’nn viv bann levennman ki mansione dan sa liv-la.