Ador Jéhovah Inplik Osi Sekour Lezot

1, 2. (a) Ki problem bann Kretien dan Judée ti gagne? (b) Dan ki fason zot ti trouv lamour zot bann frer?

NOU an lan 46 N.L., ena enn lafaminn dan Judée. Manze inn vinn rar. Pri bann sereal inn telman ogmante ki bann disip Jésus ki res laba pa kapav aste seki zot bizin. Zot fin, zot bien bizin manze sinon zot pou mor. Me, zot pre pou trouv lame Jéhovah dan enn fason ki okenn disip Jésus pa finn trouve avan. Anou gete ki pou arive.

² Bann Kretien Zwif ek non-Zwif ki res Antioche, an Syrie, bien afekte par soufrans zot bann frer ek ser dan Jérusalem ek Judée. Alor, zot ramas larzan pou ed sa bann frer ek ser la. Apre, zot swazir de frer ki zot kapav fer konfians, Barnabas ek Saul, pou amenn sa don-la ar bann ansien dan kongregasion Jérusalem. (Lir Actes 11:27-30; 12:25.) Mazine ki kantite bann Kretien dan Judée ti bien kontan kan bann Kretien Antioche ti manifeste lamour anver zot!

3. (a) Dan nou lepok, kouma bann serviter Bondie imit bann Kretien Antioche? Donn enn lexanp. (Get osi lankadre “Premie Gran Laktivite Sekour dan Nou Lepok.”) (b) Ki bann kestion nou pou examine dan sa sapit-la?

³ Sa levennman-la inn arive dan premie siek. Se premie levennman ki’nn ekrir dan Labib konsernan led ki bann Kretien inn avoy bann lezot Kretien ki res dan enn lot landrwa dan lemond. Zordi, nou imit lexanp nou bann frer dan Antioche. Kan nou aprann ki nou bann frer dan enn lot landrwa inn afekte par enn katastrof ouswa enn leprev, nou ed zot.a Pou nou konpran kouma nou bann aktivite pou sekour nou bann frer ena enn lien avek nou minister, anou examinn trwa kestion: Kifer nou konsider nou laktivite pou sekour nou bann frer kouma enn minister? Ki bann lobzektif sa laktivite-la ena? Ki bann bienfe nou gagne?

Kifer Bann Laktivite pou Sekour Nou Bann Frer Se enn “Servis Sakre”?

4. Ki Paul ti dir bann Korintien konsernan minister bann Kretien?

⁴ Dan deziem let ki Paul ti ekrir bann Korintien, li ti explike ki minister bann Kretien inplik de laspe inportan. Mem si Paul ti ekrir sa let-la pou bann Kretien ki ti ena lesperans pou al dan lesiel, dan nou lepok, so bann parol aplik ar bann “lezot brebi” osi. (Jean 10:16) Enn laspe nou minister se “minister rekonsiliasion,” setadir, nou laktivite predikasion ek lansegnman. (2 Cor. 5:18-20; 1 Tim. 2:3-6) Enn lot laspe inplik “minister pou bann sin,” ki nou fer an faver nou bann frer ek ser. (2 Cor. 8:4) Dan toulede expresion, “minister rekonsiliasion” ek “minister pou bann sin,” “minister” tradir mo Grek diakonia. Ki savedir?

5. Kifer Paul ti apel bann aktivite pou sekour nou bann frer enn minister?

⁵ Kan Paul ti servi mem mo Grek pou toulede laktivite, li ti montre ki laktivite pou sekour nou bann frer ek ser, li parey avek lezot laktivite ki nou fer dan kongregasion. Avan, li ti dir: “Ena diferan minister, me pourtan ena mem Segner; ek ena diferan laktivite, . . . Me, se . . . mem lespri ki fer tou sa bann aktivite-la.” (1 Cor. 12:4-6, 11) An realite, Paul ti fer enn lien ant diferan minister ki fer dan kongregasion avek “servis sakre.”b (Rom. 12:1, 6-8) Alor, li pa etonan ki Paul ti konsakre enn parti so letan pou “servi bann sin”!​—Rom. 15:25, 26.

6. (a) Parey kouma Paul ti explike, kifer laktivite pou sekour nou bann frer form parti dan nou ladorasion? (b) Dekrir kouma dan nou lepok, nou sekour nou bann frer atraver lemond. (Get lankadre “Kan Ena enn Katastrof,” lor paz 214.)

⁶ Paul ti ed bann Korintien pou konpran ki bann aktivite pou sekour lezot, ti form parti dan zot minister ek zot ladorasion pou Jéhovah. Li ti fer zot konpran ki bann Kretien ed zot bann frer ek ser parski zot “soumet ar bonn nouvel konsernan Christ.” (2 Cor. 9:13) Alor, bann Kretien ed lezot Kretien parski zot anvi met lansegnman Christ an pratik. Paul ti dir ki bann bon aksion ki zot fer an faver zot frer, an realite, se bann fason ki ‘Bondie montre so faver extraordiner, faver ki personn pa merite.’ (2 Cor. 9:14; 1 Pierre 4:10) Led ki nou donn nou bann frer ki dan difikilte inplik osi sekour zot. An rapor avek sa, Latour Degard 1^e Mars 1976, an Franse, ti fer sa komanter-la: “Fode zame nou panse ki Jéhovah ek so Garson, Jésus Christ, pa akord enn gran linportans ar sa kalite servis-la.” Pena dout ki laktivite pou sekour nou bann frer se enn laspe inportan dan nou servis sakre.​—Rom. 12:1, 7; 2 Cor. 8:7; Héb. 13:16.

Bann Lobzektif Bien Kler

7, 8. Ki premie lobzektif nou ena kan nou sekour nou bann frer? Explike.

⁷ Ki bann lobzektif nou ena kan nou sekour nou bann frer? Dan deziem let ki Paul ti ekrir bann Korintien, li ti reponn sa kestion-la. (Lir 2 Corinthiens 9:11-15.) Dan sa bann verse-la, Paul ti met laksan lor trwa lobzektif prinsipal ki nou realize kan nou partisip dan “minister sa servis piblik la,” setadir laktivite pou sekour nou bann frer. Anou examinn sak lobzektif, enn par enn.

⁸ Premierman, donn sekour nou bann frer glorifie Jéhovah. Remarke ki kantite fwa dan sa sink verse ki’nn site dan paragraf avan, Paul atir latansion bann frer lor Jéhovah. Li koz lor “remersiman pou Bondie” ek “remersie Bondie boukou.” (Verse 11 ek 12) Li dir ki bann sekour permet bann Kretien pou donn “Bondie laglwar” ek pou loue ‘faver extraordiner Bondie, faver ki personn pa merite.’ (Verse 13 ek 14) Dan so konklizion, Paul ti dir: “Nou remersie Bondie.”​—Verse 15; 1 Pierre 4:11.

9. Kouma nou laktivite pou sekour nou bann frer kapav sanz latitid bann dimounn? Donn enn lexanp.

⁹ Parey kouma Paul, zordi, kan bann serviter Bondie sekour zot bann frer, zot konsider sa kouma bann lokazion pou donn laglwar Jéhovah ek pou met an pratik so bann lansegnman. (1 Cor. 10:31; Tite 2:10) An realite, kan nou sekour nou bann frer, souvan sa fer bann dimounn aret ena enn lopinion negatif lor Jéhovah ek lor so bann Temwin. Anou pran enn lexanp: Dan enn landrwa kot ti ena enn gran siklonn, enn madam ti ena enn pano lor so laport kot ti ekrir: “Temwin Jéhovah​—Pa Tap Laport.” Me enn zour, li ti trouv bann volonter pe repar enn lakaz ki ti’nn kraze, vizavi ar so lakaz. Pandan plizir zour, li ti obzerv sa bann dimounn bien amikal la, ek apre, li ti sorti pou al koz ar zot pou kone kisannla zot ete. Kan li ti aprann ki zot ti bann Temwin Jéhovah, li ti bien inpresione, ek li ti dir: “Mo finn mal ziz zot.” Ki lefe sa ti ena lor li? Li ti tir sa pano ki ti lor so laport-la.

10, 11. (a) Ki bann lexanp montre ki nou realiz nou deziem lobzektif kan nou sekour nou bann frer? (b) Ki piblikasion ed bann komite sekour? (Get lankadre “Enn Brosir Bien Itil.”)

¹⁰ Deziemman, nou ‘donn nou bann frer ek ser seki zot bizin an-abondans.’ (2 Cor. 9:12a) Nou bien anvi donn nou bann frer seki zot bien bizin ek soulaz zot dan zot soufrans. Kifer? Parski bann manb kongregasion Kretien, zot kouma “enn lekor.” Savedir ki “si enn manb soufer, tou bann lezot manb soufer ansam avek li.” (1 Cor. 12:20, 26) Alor, nou lafeksion ek nou konpasion, pous boukou parmi nou bann frer ek ser pou aret deswit seki zot pe fer, pran zot zouti, ek al dan bann landrwa kot ena bann katastrof pou soulaz zot bann konpagnon. (Jacq. 2:15, 16) Par exanp, apre ki enn tsunami ti afekte Japon an 2011, biro nasional an Amérique ti avoy enn let bann Komite Konstriksion Rezional an Amérique. Li ti demande si “de-trwa frer kalifie” disponib pou ale, pou rekonstrir bann Lasal kot fer renion, laba. Ki repons zot ti gagne? Dan de-trwa semenn, preske 600 volonter ti avoy zot aplikasion​—ek zot ti dakor pou al Japon lor zot prop fre! Biro nasional l’Amérique dir: “Nou ti gagn enn kantite repons.” Kan enn frer dan Japon ti demann enn volonter ki sorti dan enn lot pei kifer li ti vinn ede, volonter-la ti reponn li: “Nou bann frer dan Japon form parti dan ‘nou lekor.’ Nou resanti zot lapenn ek zot soufrans.” Se lespri sakrifis ek lamour ki pous bann volonter pou al sekour zot bann frer mem si parfwa zot riske zot lavi pou fer sa.c​—1 Jean 3:16.

¹¹ Bann dimounn ki pa Temwin osi bien kontan kan zot trouv nou sekour nou bann frer. Par exanp, an 2013, ti ena enn katastrof dan Arkansas, an Amérique. Apre sa, get seki enn lagazet ti dir konsernan rapidite bann Temwin pou vinn ede: “Bann Temwin Jéhovah organiz zot bann volonter telman bien ki zot bien efikas kan zot al ede apre enn katastrof.” Wi, parey kouma lapot Paul ti dir, nou ‘donn nou bann frer seki zot bizin an-abondans.’

12-14. (a) Kifer nou trwaziem lobzektif pou sekour nou bann frer, li bien inportan? (b) Ki bann komanter montre lor linportans pou kontign nou bann aktivite spiritiel?

¹² Trwaziemman, nou ed bann ki’nn afekte pou zot repran zot bann aktivite spiritiel. Kifer sa inportan? Paul ti dir ki bann ki gagn sekour pou “remersie Bondie boukou.” (2 Cor. 9:12b) Pena pli bon fason pou bann ki finn afekte par enn katastrof pou remersie Jéhovah kan zot repran zot bann aktivite spiritiel pli vit posib, pa vre? (Phil. 1:10) Latour Degard 1946, (an Franse) ti dir: “Paul ti dakor . . . pou kolekte larzan parski sa ti pe ed [bann] frer ki ti dan problem pou gagn enn tipe soulazman dan domenn materyel ek pou zot kapav rann temwaniaz dan servis Jéhovah, avek lazwa ek san okenn obstak.” Zordi, nou ena mem lobzektif. Kan nou bann frer rekoumans partisip dan laktivite predikasion, sa pa zis ankouraz bann dimounn ki bien afekte, me sa ankouraz zot osi.​—Lir 2 Corinthiens 1:3, 4.

¹³ Anou get sertin komanter ki bann frer ek ser inn fer. Zot ti rekoumans prese apre enn katastrof ek sa ti fer zot boukou dibien. Enn frer ti dir: “Sa ti enn gran benediksion pou mo fami pou sorti dan predikasion. Kan nou ti esey rekonfort lezot, sa ti fer nou bliye nou bann problem pandan enn ti moman.” Enn ser ti dir: “Kan mo ti konsantre lor bann aktivite spiritiel, mo ti aret pans bann dega ki ti ena otour mwa. Sa ti fer mwa santi mwa an sekirite.” Enn lot ser ti dir: “Alor ki ti ena boukou kitsoz ki nou pa ti kapav kontrole, predikasion ti ed mo fami pou konsantre lor nou lesperans. Kan nou ti koz avek lezot lor nou lesperans dan lemond nouvo, sa ti fer nou konfians ki Bondie pou fer tou kitsoz revinn nouvo, vinn pli solid.”

¹⁴ Asiste renion se enn lot aktivite spiritiel ki nou bann frer ki’nn pas par bann katastrof, bizin repran pli vit posib. Get seki ti ariv Kiyoko, enn ser ki pre pou gagn 60 an. Li ti perdi tou dan enn tsunami, apar linz ki ti ena lor li ek sandalet ki ti ena dan so lipie sa zour-la. Li ti bien dezespere. Lerla, enn ansien ti dir li ki zot pou fer renion dan so loto. Kiyoko dir: “Sa ansien-la, so madam, ek enn lot ser ti rant dan loto. Nou ti fer enn renion bien sinp, me koumadir par enn mirak, mo ti’nn bliye pou enn ti moman ki ti ena enn tsunami. Mo ti resanti enn kalm. Sa renion-la ti montre mwa ki pouvwar konpagni nou bann frer ek ser ena.” Enn ser ki ti asiste renion apre enn katastrof, ti dir: “Sa ti ed mwa pou andire!”​—Rom. 1:11, 12; 12:12.

Sekour Nou Bann Frer Amenn Bann Gran Bienfe

15, 16. (a) Ki bienfe bann Kretien dan Corinthe ek dan lezot landrwa ti pou gagne kan zot ti sekour zot bann frer? (b) Kouma zordi osi nou gagn bann bienfe kan nou sekour nou bann frer?

¹⁵ Kan Paul ti koz lor linportans pou sekour lezot, li ti osi explik bann Korintien ki bann bienfe zot ek lezot Kretien ti pou gagne kan zot pran par dan sa travay-la. Li ti dir: “Bannla [bann Kretien Zwif dan Jérusalem ki ti gagn led] sipliye pou zot ek ena enn gran lafeksion pou zot akoz faver ki personn pa merite ek ki extraordiner, ki Bondie akord zot.” (2 Cor. 9:14) Wi, zenerozite bann Korintien, ti pous bann Kretien Zwif pou priye an faver zot bann frer dan Corinthe, parmi ti ena bann Kretien ki pa ti Zwif, ek sa ti fer zot ena enn pli gran lafeksion pou zot.

¹⁶ Latour Degard 1^e Avril 1946, an Franse, ti aplik seki Paul ti dir ar bann bienfe ki nou gagne kan nou sekour nou bann frer dan nou lepok. Li ti dir: “Kan enn parti pep Bondie fer enn don pou ed enn lot parti, reflesi lor lefe ki sa ena lor zot linite!” Se exakteman seki bann volonter ki sekour zot bann frer, resanti zordi. Enn ansien ki ti al ede apre enn inondasion, ti dir: “Depi ki mo’nn al sekour mo bann frer ek ser, mo’nn santi mwa pli pros ar zot ki avan.” Enn ser ti bien rekonesan kan ki li ti gagn led apre enn katastrof. Li ti dir: “Pena kitsoz ki resanble plis Paradi ki pou ena lor later kouma sa lamour ki ena ant nou la.”​—Lir Proverbes 17:17.

17. (a) Kouma bann parol ki trouv dan Isaïe 41:13 aplik ar nou laktivite sekour? (b) Mansionn sertin lexanp ki montre kouma kan nou sekour nou bann frer, sa donn loner Jéhovah ek fer nou vinn pli pros ar nou bann frer ek ser. (Get osi lankadre “Bann Volonter Atraver Lemond Sekour Lezot.”)

¹⁷ Kan bann volonter vinn dan enn landrwa kot ena enn katastrof, nou bann frer dan sa landrwa-la trouve dan enn fason spesial kouma Bondie realiz promes ki Li’nn fer: “Mwa, Jéhovah to Bondie, mo pe trap to lame drwat bien for, mo dir twa: ‘Pa per. Mo pou ed twa.’” (Is. 41:13) Enn ser ki ti reisi sirviv apre enn katastrof, ti dir: “Mo ti santi mwa dezespere kan mo ti trouv tou sa bann dega-la, me Jéhovah ti avoy so lame [pou ed mwa]. Mo pena mo pou dekrir led ki mo ti gagne avek bann frer.” Apre ki enn katastrof ti detrir zot landrwa, de ansien ti ekrir o-nom zot kongregasion: “Sa tranbleman-de-ter-la ti fer bann dimounn bien soufer, me nou ti trouve kouma Jéhovah ti ed nou par nou bann frer. Nou ti abitie lir bann resi konsernan bann sekour ki nou bann frer done, me la, nou ti trouv sa ar nou lizie.”

Eski Ou Kapav Fer Ou Par?

18. Ki ou kapav fer si ou anvi partisip dan laktivite pou sekour nou bann frer? (Get osi lankadre “Sa Finn Inflians So Lavi.”)

¹⁸ Eski ou ti pou kontan gout lazwa ki gagne pou sekour nou bann frer? Si wi, rapel ki souvan, swazir bann volonter parmi bann ki travay lor konstriksion bann Lasal kot fer renion. Alor, fer bann ansien kone ki ou ti pou kontan ranpli enn form aplikasion. Enn ansien ki ena enn gran lexperyans pou sekour bann frer apre bann katastrof donn sa rapel-la: “Al dan bann landrwa kot finn ena enn katastrof zis si ou finn gagn enn linvitasion ofisiel ar enn Komite Sekour.” Koumsa, sa pou fasilit lorganizasion bann sekour.

19. Kan nou sekour nou bann frer, kouma sa montre ki nou bann vre disip Christ?

¹⁹ Sekour nou bann frer, se vremem enn fason extraordiner pou obeir komannman ki Jésus ti donn nou pou ‘kontan nou kamarad.’ Kan nou manifeste sa lamour-la, nou montre ki nou bann vre disip Christ. (Jean 13:34, 35) Se vremem enn gran benediksion ki zordi nou ena boukou volonter bien dispoze ki donn laglwar Jéhovah kan zot al donn sekour bann fidel sitwayen Rwayom Bondie!