Bann Referans pou Kaye Renion Nou Lavi Kretien ek Nou Minister
6-12 ZANVIE
BANN TREZOR DAN PAROL BONDIE | ZENEZ 1-2
Lektir Labib
(Zenez 1:1-19) O-koumansman, Bondie ti kree lesiel ek later. 2 Later pa ti ena okenn form ek pa ti ena nanye lor la, ek ti ena enn marenwar lor bann fon delo; ek lafors aktif Bondie ti pe ale-vini lor delo. 3 Ek Bondie ti dir: “Ki lalimier aparet.” Lerla, ti ena lalimier. 4 Apre sa Bondie ti trouve ki lalimier ti bon, ek Bondie ti koumans met enn separasion ant lalimier ek nwarte. 5 Li ti apel lalimier, Lizour, me Li ti apel nwarte, Aswar. Ek ti ena enn swar ek enn gramatin, samem premie zour. 6 Lerla Bondie ti dir: “Ki ena enn lespas ant bann delo pou separ zot an de.” 7 Lerla Bondie ti fer enn lespas ant bann delo, ek Li ti separ bann delo ki lao ar bann delo ki anba. Ek samem ki ti arive. 8 Bondie ti apel sa lespas-la Lesiel. Ek ti ena enn swar ek enn gramatin, samem deziem zour. 9 Lerla Bondie ti dir: “Ki bann delo ki anba lesiel rasanble dan enn sel plas, ek ki later sek aparet.” Ek samem ki ti arive. 10 Bondie ti apel later sek, Later, me kot delo ti rasanble, Li ti apel sa, Lamer. Ek Bondie ti trouve ki sa ti bon. 11 Lerla Bondie ti dir: “Ki later prodir lerb, bann plant ki ena lagrin, ek bann pie ki gagn bann frwi ek bann lagrin sakenn dapre zot varyete.” Ek samem ki ti arive. 12 Ek later ti koumans prodir lerb, bann plant ki ena lagrin, bann pie ki donn frwi ki ena lagrin, dapre zot varyete. Lerla, Bondie ti trouve ki sa ti bon. 13 Ek ti ena enn swar ek enn gramatin, samem trwaziem zour. 14 Lerla Bondie ti dir: “Ki ena bann lalimier ki paret dan lesiel, pou separ lizour ek lanwit, ek zot pou servi kouma bann sign pou bann sezon, pou bann zour, ek pou bann lane. 15 Zot pou briye dan lesiel pou ekler later.” Ek samem ki ti arive. 16 Ek Bondie ti fer de gran lalimier, pli gran lalimier-la pou lizour ek pli tipti-la pou lanwit, ek Li ti fer osi bann zetwal. 17 Lerla Bondie ti met zot dan lesiel pou ekler later 18 ek pou eklere pandan lizour ek pandan lanwit ek pou separ lalimier ek nwarte. Lerla Bondie ti trouve ki sa ti bon. 19 Ek ti ena enn swar ek enn gramatin, samem katriem zour.
13-19 ZANVIE
BANN TREZOR DAN PAROL BONDIE | ZENEZ 3-5
Lektir Labib
(Zenez 4:17–5:8) Apre sa, Kain ti gagn bann relasion sexiel avek so fam, so fam ti tom ansint ek ti donn nesans Enok. Lerla, Kain ti konstrir enn lavil ek ti donn lavil-la nom so garson Enok. 18 Plitar, Enok ti vinn papa Irad. Ek Irad ti vinn papa Meouyael, ek Meouyael ti vinn papa Metoushael, ek Metoushael ti vinn papa Lamek. 19 Lamek ti ena de madam. Premie-la ti apel Ada ek deziem-la ti apel Zila. 20 Ada ti donn nesans Zabal. Limem anset bann dimounn ki res anba latant ek ki elve bann troupo. 21 So frer ti apel Zoubal. Limem anset tou bann dimounn ki zwe laarp ek laflit. 22 Zila, li, li ti donn nesans Toubal-Kain, enn forzron ki ti fer tou sort kalite zouti an kwiv ek feray. Ek ser Toubal-Kain ti apel Naama. 23 Apre Lamek ti ekrir sa bann parol-la pou so bann madam Ada ek Zila: “Ekout mo lavwa, zot bann madam Lamek; Ekout seki mo pe dir: Mo’nn touy enn misie parski li’nn bles mwa, wi, enn zenom ki’nn bat mwa. 24 Si bizin vanz Kain 7 fwa, pou Lamek li 77 fwa.” 25 Adan ti regagn bann relasion sexiel avek so fam, ek Ev ti gagn enn garson. Li ti apel li Set parski, kouma li dir, “Bondie finn donn mwa enn lot desandans dan plas Abel, parski Kain ti touy li.” 26 Set osi ti gagn enn garson, ek li ti apel li Enos. Sa lepok-la bann dimounn ti koumans servi nom Zeova.
5 Sa liv-la se zistwar Adan. Kan Bondie ti kree Adan, li ti fer li dan resanblans Bondie. 2 Li ti kree zot mal ek femel. Zour ki Li ti kree zot, Li ti beni zot ek ti apel zot, Imin. 3 Adan ti ena 130 an kan li ti vinn papa enn garson ki resanble li, ek li ti apel li Set. 4 Apre ki li ti vinn papa Set, Adan ti viv 800 an. Ek li ti vinn papa bann garson ek bann tifi. 5 Antou Adan ti viv 930 an, ek apre li’nn mor. 6 Kan Set ti ena 105 an li ti vinn papa Enos. 7 Apre ki li ti vinn papa Enos, Set ti viv 807 an. Ek li ti vinn papa bann garson ek bann tifi. 8 Antou Set ti viv 912 an, ek apre li’nn mor.
20-26 ZANVIE
BANN TREZOR DAN PAROL BONDIE | ZENEZ 6-8
Lektir Labib
(Zenez 6:1-16) Kan bann dimounn ti pe ogmante lor later ek ki zot ti pe gagn bann tifi, 2 lerla bann garson vre Bondie ti koumans remarke ki bann tifi bann zom ti zoli. Alor tou bann tifi ki zot ti swazir, zot ti fer bannla vinn zot madam. 3 Lerla Zeova ti dir: “Mo pa pou toler bann dimounn pou touletan, parski zot fer pese. Akoz sa, zot pou viv 120 an.” 4 Bann Nefilim ti lor later sa lepok-la ek mem apre. Sa lepok-la bann garson vre Bondie ti kontign gagn bann relasion avek bann tifi bann dimounn, ek sa bann tifi-la ti donn nesans bann garson: Zot ti bann zom for ki ti viv lepok lontan, ki bien renome. 5 Alor Zeova ti trouve ki bann dimounn ti pe fer boukou move kitsoz lor later ek ki dan zot leker zot ti touletan pe pans seki move. 6 Zeova ti regrete ki Li ti kree bann dimounn lor later, ek so leker ti fermal. 7 Lerla Zeova ti dir: “Mo pou detrir bann dimounn ki mo’nn kree lor later, bann dimounn ansam avek bann zanimo domestik, bann zanimo ki ranpe, ek bann kreatir ki anvole dan lesiel, parski mo regrete ki mo’nn kree zot.” 8 Me Noe ti gagn faver Zeova. 9 Ala zistwar Noe. Noe ti enn dimounn drwat. Li ti montre ki li san defo parmi bann dimounn ki ti pe viv dan so lepok. Noe ti mars avek vre Bondie. 10 Avek letan Noe ti vinn papa trwa garson: Sem, Kam, ek Zafet. 11 Me Bondie ti trouve ki later finn degrade, ek ki li ti ranpli ar violans. 12 Wi, Bondie ti get later, ek later ti’nn degrade; tou bann dimounn lor later ti pe viv dan enn move fason. 13 Apre sa Bondie ti dir Noe: “Mo finn desid pou detrir tou bann dimounn, parski akoz zot later ranpli ar violans, alor mo pou detrir zot ansam avek later. 14 Fer enn lars pou twa avek dibwa pie larezinn. To pou fer bann kabinn dan lars-la ek to bizin pas goudron lor la andan ek andeor. 15 Ala kouma to pou fer li: Lars-la bizin 300 koude longer, 50 koude larzer, ek 30 koude oter. 16 To pou bizin fer enn lafnet pou gagn lalimier dan lars, enn koude depi so plafon. To bizin met lantre lars sirlekote ek to bizin fer enn premie letaz, enn deziem letaz, ek enn trwaziem letaz.
27 ZANVIE–2 FEVRIYE
BANN TREZOR DAN PAROL BONDIE | ZENEZ 9-11
Lektir Labib
(Zenez 10:6-32) Bann garson Kam ti apel Kous, Mizraim, Pout, ek Kanaan. 7 Bann garson Kous ti apel Seba, Avila, Sabta, Raama, ek Sabteka. Bann garson Raama ti apel Saba ek Dedann. 8 Kous ti vinn papa Nemrod. Limem premie zom ki ti ena enn gran pouvwar lor later. 9 Li ti vinn enn saser pwisan ki ti opoze ar Zeova. Se akoz sa ki ena enn koze ki dir: “Parey kouma Nemrod, enn saser pwisan ki ti opoze ar Zeova.” 10 Bann premie lavil dan so rwayom ti Babel, Erek, Akad, ek Kalne, dan pei Sinear. 11 Li ti kit sa pei-la, li ti al Lasiri ek ti konstrir Niniv, Reobot-Ir, Kala, 12 ek Resenn, ant Niniv ek Kala: Zot ti form enn gran lavil. 13 Mizraim ti vinn papa Loudim, Aanamim, Leyabim, Naftouim, 14 Patrousim, Kaslouim (bann anset bann Filistin), ek Kaftorim. 15 Kanaan ti vinn papa Sidon, so premie garson, ek Ett, 16 ek osi bann Zebizein, bann Amorit, bann Girgasit, 17 bann Ivit, bann Arkit, bann Sinit, 18 bann Arvadit, bann Zemarit, ek bann Amatien. Apre sa, bann fami bann Kananeen finn disperse partou. 19 Teritwar bann Kananeen ti pran depi Sidon ziska Gerar, pre ar Gaza, ziska Sodom, Gomor, Adma, ek Zeboyim, pre ar Laza. 20 Sa se bann garson Kam dapre zot fami ek zot langaz, dapre zot pei ek zot nasionalite. 21 Sem, anset tou bann desandan Eber ek gran frer Zafet, ti gagn osi bann zanfan. 22 Bann garson Sem ti apel Elam, Asour, Arpaksad, Loud, ek Aram. 23 Bann garson Aram ti apel Ouz, Oul, Geter, ek Mas. 24 Arpaksad ti vinn papa Sela, ek Sela ti vinn papa Eber. 25 Eber ti gagn de garson. Enn ti apel Peleg, parski sa lepok-la bann dimounn ti disperse lor later. So frer ti apel Zoktann. 26 Zoktann ti vinn papa Almodad, Selef, Azarmavet, Zera, 27 Adoram, Ouzal, Dikla, 28 Obal, Abimael, Saba, 29 Ofir, Avila, ek Zobab; tou sa bann zom-la ti bann garson Zoktann. 30 Zot teritwar ti pran depi Mesa ziska Sefar, landrwa kot ena bann montagn dan Les. 31 Sa ti bann garson Sem dapre zot fami ek zot langaz, dapre zot pei ek zot nasionalite. 32 Sa ti bann fami bann garson Noe dapre zot fami ek zot nasionalite. Se apartir zot ki bann nasion finn disperse lor later apre Deliz.