LESON 2

Fason Koze

2 Korintien 2:17

REZIME: Koz dan enn fason ki sinser ek natirel. Sa pou montre seki to vremem resanti lor sa size-la ek pou bann ki ekout twa.

Lapriyer ek enn bon preparasion. Priye Zeova pou Li ed twa pou pa atir latansion lor twa, me lor mesaz ki to pe prese. Gard bien dan to lespri bann pwin inportan ki to bizin dir. Servi to prop mo pou exprim to bann panse; pa nek resit par-ker bann lexpresion ki ena lor papie.

Si to’nn prevwar pou lir Labib ouswa enn lot piblikasion, konn pasaz-la bien pou ki to lir li dan enn fason kler san tatone. Si to pe lir bann parol ki enn dimounn inn dir, lir li avek santiman, me san ki to exazere.
Koz ar to leker. Reflesi: kifer bann dimounn bizin tann sa mesaz-la? Konsantre to latansion lor zot. Koumsa, fason ki to deboute, bann zes ki to fer, ek bann lexpresion to figir pou montre ki to sinser ek amikal.

Enn konportman natirel pa vedir ki to bizin tro rilax ek tro kool. Pou ki to mesaz res dign, to bizin servi enn langaz ki apropriye ek koz dan enn fason kler, ki fasil pou konpran.
Kontak viziel. Si li pa enn ofans, get dimounn-la dan so lizie. Kan to pe fer enn diskour, pa get lasistans an zeneral, me get enn dimounn alafwa.