Kontign Vinn Pli Pros ar Zeova

Gras-a sa letid Labib la, ou finn aprann boukou lor Zeova. Ek tousala inn ed ou pou kontan Zeova ankor plis. Kitfwa sa finn mem pous ou pou donn Li ou lavi ek pou pran batem. Si ou pankor fer li, kitfwa ou pe pans pou fer li biento. Me eski savedir ki apre ou batem ou pou aret vinn pli pros ar Zeova? Non. Toutlong ou lavi ou pou kapav vinn pli pros avek Zeova. Kouma?

1. Kifer ou bizin fer ou lamitie avek Zeova vinn pli for?

Nou bizin fer boukou zefor pou fortifie nou lamitie avek Zeova. Kifer? “Pouki nou pa derape,” setadir ki nou pa al lwin ar Zeova tigit-tigit. (Ebre 2:1) Ki kitsoz kapav ed nou pou res fidel ar Zeova ek kontign servi Li? Nou bizin kontign prese ek trouv bann lezot fason pou fer plis pou Zeova. (Lir Filipien 3:16.) Servi Zeova se samem pli bon kitsoz ki nou kapav fer ar nou lavi!​—Psom 84:10.

2. Ki bann lezot kitsoz ou bizin kontign fer?

Mem si ou letid Labib pe fini asterla, ou lavi antan ki enn Kretien pe kontigne. Labib dir ki nou bizin “abiy [nou] avek enn nouvo natir.” (Efezien 4:23, 24) Amezir ki ou kontign etidie Parol Bondie ek asiste bann renion, ou pou aprann bann nouvo kitsoz lor Zeova ek lor bann zoli kalite ki Li ena. Esey trouv bann fason kouma ou kapav imit Li pli bien. Ek kontign fer bann sanzman ki bizin pou fer Zeova kontan.

3. Kouma Zeova pou ed ou pou vinn pli pros avek Li?

Labib dir: “Bondie . . . pou fini zot formasion, Li pou fer zot vinn solid, Li pou fer zot vinn for, Li pou met zot lor enn fondasion ki solid.” (1 Pier 5:10, NW) Nou tou nou gagn bann tantasion. Me Zeova pou donn nou lafors ki bizin pou ki nou pa tom dan tantasion. (Psom 139:23, 24) Li promet ki Li kapav donn nou dezir ek lafors pou servi Li avek fidelite.​—Lir Filipien 2:13.

ANOU GET INPE PLIS

4. Kontign koz avek ou pli bon Kamarad ek ekout Li

Etidie Labib ek fer lapriyer finn ed ou pou vinn kamarad Zeova. Kouma sa kapav ed ou pou vinn pli pros avek Zeova?

Lir Psom 62:8, ek apre sa, get sa kestion-la ansam:

• Kouma ou kapav amelior ou bann lapriyer pou fer ou lamitie avek Zeova vinn pli for?

Lir Psom 1:2, ek apre sa, get sa kestion-la ansam:

• Kouma ou kapav amelior ou lektir Labib pou fer ou lamitie avek Zeova vinn pli for?

Ki ou kapav fer pou ki ou letid personel vinn pli interesan? Pou gagn de-trwa lide, zwe VIDEO-la, ek apre sa, get sa bann kestion-la ansam:

VIDEO: Amelior To Letid Personel (5:22)

• Ki bann lide dan sa video-la ou ti pou kontan seye?

• Lor ki size ou anvi etidie?

5. Reflesi kouma ou kapav fer plis pou Zeova

Kan ou ena bann lobzektif pou fer plis pou Zeova, sa pou ed ou pou vinn pli pros avek Li. Zwe VIDEO-la, ek apre sa, get sa kestion-la ansam:

VIDEO: Pli Bon Lavi ki Ena (3:31)

• Dapre sa video-la, ki bann bienfe Cameron inn gagne parski li ti ena bann lobzektif?

Pa tou dimounn ki kapav al prese dan enn lot pei. Parkont, nou tou nou kapav ena bann lobzektif ki rezonab. Lir Proverb 21:5, ek apre sa, gete ki bann lobzektif ou kapav ena . . .

• dan lasanble.

• dan predikasion.

Kouma prinsip ki ena dan sa verse-la kapav ed ou pou realiz ou bann lobzektif?

Sertin lobzektif

• Amelior mo bann lapriyer.

• Lir Labib an-antie.

• Esey konn zot tou dan mo lasanble.

• Gagn enn letid.

• Fer pionie tanporer ouswa pionie permanan.

• Si mo enn frer, fer bann zefor pou vinn enn asistan ministeryel.

SEKI NOU’NN APRANN

Kontign fer ou lamitie avek Zeova vinn pli for. Kontign ena bann lobzektif pou fer plis pou Zeova. Lerla, ou pou kapav viv ere pou touletan!

Eski Ou Rapel?

• Kifer ou kapav ena konfians ki Zeova pou ed ou pou servi Li avek fidelite?

• Kouma ou kapav fer ou lamitie avek Zeova vinn pli for?

• Kouma kan ou ena lobzektif pou fer plis pou Zeova, sa pou ed ou pou vinn pli pros avek Li?

DEKOUVER

Ki kitsoz ena plis valer pou Zeova? Ki nou fer enn gran sakrifis enn sel kout pou montre nou fidelite, ouswa ki nou res fidel toutlong nou lavi?

Res Fidel Parey Kouma Abraam (9:20)

Mem bann serviter ki fidel kapav perdi zot lazwa. Gete ki zot kapav fer pou regagn zot lazwa.

Regagn Lazwa Gras-a Letid ek Meditasion (5:25)

Kouma ou kapav realiz ou bann lobzektif pou fer plis pou Zeova?

« Glorifiez votre Créateur en vous fixant des objectifs spirituels » (Latour Degard, 15 Ziliet 2004, an Franse)

Kifer li inportan ki enn Kretien gagn matirite ek kouma ou kapav fer sa?

“Avance vers la maturité​—‘Grand jour Jéhovah bien pré’” (Latour Degard, 1^e Me 2009)