“Aster Mo Kontan Prese!”

MO PERDI MO LAZWA

Malerezman, kan mo ti vinn enn adolesan, mo lamitie avek Zeova ti koumans gate. Mo bann kamarad lekol ti ena boukou liberte, ek mwa osi mo ti anvi ena sa liberte-la. Bann reg ki mo bann paran ti mete ek bann prinsip Labib ti pe koumans vinn lour pou mwa, ek bann kitsoz spiritiel ti pe koumans vinn enn fardo. Mem si mo pa ti ena okenn dout ki Zeova existe, mo pa ti santi mwa pros ar Li.

Mo pa ti aret prese, me mo ti pe fer mo minimum. Kan mo ti al prese, mo pa ti prepar mwa, alor sa ti bien difisil pou mo koumans ouswa tini enn konversasion. Akoz sa, mo pa ti pe gagn okenn rezilta dan predikasion ek mo ti perdi mo lazwa. Sa ti fer mwa vinn pli negatif. Mo ti pe demann momem, ‘Kouma enn kikenn kapav fer sa sak semenn, sak mwa?’

Kan mo ti ena 17 an, mo ti vremem anvi vinn indepandan. Alor, mo ti ramas mo bann zafer, mo ti kit lakaz, ek mo ti al Lostrali. Sa ti bien difisil pou mo bann paran. Zot ti bien trakase, me zot ti panse ki mo ti pou kontign gard mo bann labitid spiritiel.

Dan Lostrali, mo ti vinn ankor pli feb lor plan spiritiel. Mo ti koumans rat bann renion. Mo ti fer kamarad ar bann zenn ki, parey kouma mwa, ti kontan al renion lavey me so landemin zot ti al bwar ek danse dan bann diskotek. Kan mo pans sa lepok-la, mo realize ki mo ti ena enn lipie dan laverite ek enn lipie dan lemond, ek mo pa ti kone kotsa mo plas ete.

ENN LESON BIEN INPORTAN KI MO PA TI PE ATANN

Apepre de-z-an apre, mo ti zwenn enn ser ki, san ki li realize, ti fer mwa reflesi lor direksion ki mo ti pe donn mo lavi. Mo ti pe res dan enn lakaz avek sink ser selibater, ek nou ti invit responsab sirkonskripsion ek so madam, Tamara, pou vinn res enn semenn kot nou. Pandan ki so mari ti pe okip bann kitsoz lasanble, Tamara ti pas letan avek nou ek nou ti bien riye ansam. Mo ti bien kontan sa lanbians-la. Tamara ti enn ser ki ti ena boukou konpasion ek ti bien fasil pou koz ar li. Mo ti etone ki enn kikenn spiritiel ti kapav osi bien amikal.

Tamara ti enn kikenn ki ti bien antouziast. Li ti kontan laverite ek li ti kontan prese, ek sa ti bien motiv mwa. Li ti ere parski li ti fer so maximum pou Zeova, alor ki mwa mo ti perdi mo lazwa parski mo ti pe fer mo minimum. So latitid pozitif ek so lazwa inn vremem ena enn bon lefe lor mwa. So lexanp inn ed mwa pou reflesi lor enn verite Biblik bien inportan: Zeova anvi ki nou servi Li “dan lazwa” ek ki nou “kriye dan lazwa.”​—Ps. 100:2, NW.

MO REKOUMANS KONTAN PREDIKASION

Mo ti anvi gagn mem lazwa ki Tamara. Me pou gagn sa lazwa-la, mo ti bizin fer bann gran sanzman. Mo pa ti sanze enn kout koumsa, me mo ti koumans fer sa bann sanzman-la tigit par tigit. Mo ti koumans prepar mwa avan mo al prese, ek mo ti fer pionie tanporer detanzantan. Sa ti ed mwa pou vinn pli alez dan predikasion ek pou ena plis konfians an momem. Plis mo ti servi Labib kan mo ti prese, plis mo ti ena lazwa dan mo minister. Bien vit, mo ti koumans fer pionie tanporer toule mwa.

Mo ti koumans vinn pros ar bann frer ek ser diferan laz, ki ti stab dan laverite, ek ki ti kontan servi Zeova. Zot bon lexanp ti ed mwa pou re-examinn mo bann priorite ek pou pran bann bon labitid spiritiel. Deplizanpli, mo ti koumans kontan predikasion, ek finalman mo ti pran servis pionie permanan. Pou premie fwa depi plizir lane, mo ti santi mwa stab dan laverite, mo ti zwaye, ek mo ti santi ki mo ti ena mo plas dan lasanble.

MO GAGN ENN KONPAGNON SERVIS

Enn an plitar, mo ti zwenn Alex, enn frer bien zanti ki ti kontan Zeova ek ki ti kontan prese. Li ti asistan ministeryel ek li ti pe fer pionie depi si-z-an. Alex ti deza al servi dan Malawi, parski ti bizin plis proklamater laba. Li ti travay ansam avek bann misioner ki ti ena enn bon linflians lor li ek ki ti ankouraz li pou kontign met Rwayom Bondie an premie.

Alex ek mwa nou ti marye an 2003, ek nou ankor pe servi Zeova aplintan. Nou finn aprann boukou zoli leson ek Zeova inn bien beni nou.

ZEOVA BENI NOU ANKOR PLIS

An 2009, ti demann nou pou al servi kouma misioner dan Timor-Leste, enn ti lavil dan larsipel Lindonezi. Nou ti etone, extra kontan, ek inpe per anmemtan. Sink mwa plitar, nou ti ariv Dili, kapital sa larsipel-la.

Sa lafektasion-la ti enn gran sanzman pou nou. Nou ti bizin adapte nou ar enn nouvo kiltir, langaz, manze, ek fason viv. Kan nou ti al prese, nou ti zwenn bann dimounn ki ti mizer, ki pa ti ena boukou ledikasion, ek ki ti ena boukou problem. Boukou dimounn ti afekte lor plan fizik ek emosionel akoz violans ek lager.a

Predikasion laba ti extraordiner! Par exanp, enn fwa mo ti zwenn enn tifi ki ti ena 13 an ek ki apel Maria.b Li ti bien tris. So mama ti mor depi de-trwa lane, ek bien rar li ti zwenn so papa. Parey kouma boukou zanfan so laz, Maria pa ti kone ki direksion pou donn so lavi. Mo rapel ki enn fwa li ti plore kan li ti partaz so santiman ar mwa. Mo pa ti pe konpran ki li ti pe dir parski mo pa ti ankor koz bien so lang. Mo ti priye Zeova pou ki Li ed mwa pou ankouraz li. Apre sa, mo ti lir bann verse Labib ankourazan avek li. Avek letan, mo ti remarke kouma laverite ti sanz laparans, latitid, ek lavi Maria. Li ti pran batem, ek azordi li ena boukou letid Labib. Asterla, Maria ena enn gran fami spiritiel ek li kone ki bannla kontan li.

Zeova pe beni predikasion dan Timor-Leste. Mem si sa fer zis di-z-an ki laplipar proklamater laba inn pran batem, boukou pe servi kouma pionie, asistan ministeryel, ek ansien. Ena ki travay dan bann biro tradiksion ek zot ede pou prodir bann piblikasion dan bann lang lokal. Mo bien kontan kan mo tann zot sante pandan bann renion, trouv enn sourir lor zot figir, ek trouv zot grandi lor plan spiritiel.

MO LAVI BIEN ZOLI

Lavi dan Timor-Leste bien diferan ar lavi dan Lostrali, me mo lavi bien zoli. Parfwa, nou ti ser-sere dan enn ti bis ranpli ar dimounn ek ti ena osi bann legim ek pwason sek dan bis-la. Parfwa, nou ti fer bann letid Labib dan bann tipti lakaz bien so ek imid, ek nou ti bizin asiz anba dan later, ek bann poul ti galoupe partou. Me malgre bann difikilte, souvan mo ti dir ar momem, ‘Sa lavi-la extraordiner!’

Mo rekonesan anver mo bann paran ki’nn fer tou seki zot kapav pou ansegn mwa laverite ek pou soutenir mwa, mem si sa ti bien difisil pandan mo ladolesans. Proverb 22:6 aplik bien ar mo sitiasion. Mo papa ek mo mama bien fier kan zot pans mwa ek Alex. Zot kontan ki Zeova pe servi nou. Depi 2016, nou pe servi dan sirkonskripsion dan bann teritwar ki Biro Nasional Lostralazi okipe.

Azordi, mo trouv sa difisil pou krwar ki, enn lepok, mo ti pe trouv sa kouma enn fardo pou prese. Aster mo kontan prese! Mo’nn konpran ki, ninport ki sitiasion arive dan lavi, nou vremem zwaye zis si nou servi Zeova ar tou nou leker. Sa 18 lane ki mwa ek Alex nou pe servi Zeova ansam la, samem bann pli zoli lane mo lavi. Asterla, mo konpran pli bien bann parol ki David ti dir Zeova: “Tou [bann] ki konfie zot ar twa pou gagn to proteksion; zame zot pou fini sante ar sa lazwa la. . . . Bann ki kontan to nom, . . . zot kriye ar lazwa.”​—Ps. 5:11.