LARTIK KOUVERTIR | ESKI BANN MOR KAPAV REVIV?
Ki Arive Apre Lamor?
“Mo ti panse ena trwa plas kot enn dimounn kapav ale apre lamor: lesiel, lanfer, ouswa pirgatwar. Mo ti kone mo pa sa bon-la pou al dan lesiel, ni sa move-la pou al dan lanfer. Mo pa ti kone vremem ki ena dan pirgatwar. Mwa, zame mo’nn trouv sa lansegnman-la dan Labib, se bann dimounn ki ti pe ansegn sa.”—Lionel.
“Mo ti aprann ki tou dimounn al dan lesiel apre lamor, me mo ti ena bann dout lor la. Mo ti krwar ki tou fini avek lamor, setadir pena okenn lesperans pou bann dimounn mor.”—Fernando.
Eski ou’nn deza demann oumem: ‘Ki arive vremem apre lamor? Eski bann dimounn ki nou kontan ek ki’nn mor pe soufer kit plas? Eski enn zour nou pou retrouv zot? Kouma nou kapav konn sa?’ Anou get seki Labib ansegne lor la. Premierman, anou gete ar ki kitsoz Labib konpar lamor. Apre, nou pou get lesperans ki Parol Bondie, setadir Labib, done.
Dan ki kondision bann mor ete?
SEKI LABIB DIR: “Bann vivan kone zot pou mor, me bann mor pa konn nanye ditou, zot nepli gagn okenn rekonpans, parski zot nepli dan memwar bann dimounn. Tou seki to lame trouv pou fer, fer li avek to lafors, parski pena ni travay, ni plan, ni konesans, ni sazes dan Tom, plas kot to pe ale.”a—Ekleziast 9:5, 10.
Dan enn fason sinp, nou kapav dir ki Tom se plas kot bann dimounn ale kan zot mor; se enn plas ouswa enn kondision sinbolik kot enn dimounn pa konn nanye ek pa kapav fer nanye. Kouma eski Zob, enn zom fidel ti konsider Tom? Zob ti perdi tou so dibien ek tou so bann zanfan dan enn sel zour. Apre sa, li ti gagn bann gro-gro koulou partou lor so lekor ki ti fer li soufer. Li ti sipliy Bondie par sa bann parol-la: “A si to ti kasiet mwa dan Tom [“dan lanfer,” Catholic Douay Version], si to ti kontign kasiet mwa.” (Zob 1:13-19; 2:7; 14:13) Li kler ki pou Zob, Tom pa ti enn lanfer dife, setadir enn plas kot li pou soufer ankor plis. Okontrer, li ti konsider sa kouma enn plas kot li ti pou gagn soulazman.
Ena enn lot fason pou aprann dan ki kondision bann mor ete. Se kan nou examinn seki Labib dir lor wit dimounn ki ti’nn mor, ek apre ti resisite.—Get lankadre “Wit Rezireksion ki Mansione dan Labib.”
Pa mem enn parmi sa wit dimounn-la inn koz lor enn plas kot zot inn konn enn boner extraordiner ouswa kot zot inn soufer. Si sa bann dimounn ki ti resisite la ti al dan enn plas koumsa kan zot ti mor, eski zot pa ti pou rakont sa lezot? Ek eski Bondie pa ti pou fer ekrir sa dan Labib pou ki nou tou nou trouve? Pena okenn plas dan Labib ki koz lor enn kitsoz koumsa. Li kler ki sa wit dimounn-la pa ti ena nanye pou dir lor sa size-la. Kifer? Parski zot pa ti konn nanye, zot ti koumadir dan enn somey profon. Ofet, parfwa Labib konpar lamor ar enn somey. Par exanp, li dir ki David ek Etienn, bann zom fidel “ti dormi dan lamor.”—Zistwar Bann Apot 7:60; 13:36, NW.
Alor, ki lesperans ena pou bann dimounn ki’nn mor? Eski enn zour zot pou leve?
a Dan New World Translation of the Holy Scriptures, inn tradir mo Ebre « shéol » ek mo Grek « hadès » par “Tom.” Sertin version Labib inn tradir sa bann mo-la par “lanfer,” me bann Lekritir pa ansegne ki bann mor al tourmante dan enn lanfer dife.