La bonne nouvelle fané partout

APRÉ ki Paul ti’nn converti, li ti bien envie annonce la bonne nouvelle concernant Royaume Bondié. Sa finn faire li gagne l’opposition, li-mem ki avant ti opposé ar lezot. Sa zapotre bien zelé-la ti faire plusieurs tournée predication. Li’nn voyage longue-longue distance pou faire konn la bonne nouvelle lor Royaume ki pou accompli projet ki Bondié ti ena au commencement pou bann dimoune.

Dan Lystres, pendant so premier tournée predication, Paul ti gueri enn zom ki ti boité depuis so naissance. Bann la foule ti commence dire fort ki Paul ek so compagnon voyage, Barnabas, ti bann bondié. Li ti difficile pou sa deux zom-la reussi empeche sa bann dimoune-la offert zot bann sacrifice. Selman, bann l’ennemi Paul ti influence sa mem la foule-la pou batte Paul coute roche ziska ki zot inn croire ki li’nn mort. Paul ti reussi sapé, ek avek le temps li ti retourne dan sa la ville-la pou fortifié bann disciple par bann parole encourageant.

Certain chretien juif ti dire ki bann non-juif ki’nn vinn croyant ti bizin applik certain point dan la Loi Moïse. Paul ti al Jérusalem pou joinde bann zapotre ek bann ancien pou presente zot sa probleme-la. Apré ki sa bann zom-la ti examine bien bann l’Ecriture ek avek direction l’esprit saint Bondié, zot ti ecrire bann congregation ek finn dire zot rejette l’idolatrie, pa mange di-sang ek bann zanimo touffé, ek rejette fornication. Sa bann avertissement-la ti “bann kitsoz ki necessaire.” Mais mem si zot ti obeir sa bann avertissement-la, sa pa vedir ki zot ti obligé suive la Loi mosaïk en entier.—Actes 15:28, 29.

Pendant so deuxieme tournée predication, Paul ti visite la ville Bérée, ki zordi trouve en Grèce. Bann Juif ki ti reste la-bas ti accepté parole ki Paul ti dire zot, ek zot ti examine bann l’Ecriture toulé-jour pou verifié so l’enseignement. Encore enn fois, a cause l’opposition, Paul ti obligé quitte sa la ville-la, ek sa fois-la li ti al Athènes. Devant enn groupe Athénien ki ti bien eduqué, Paul ti faire enn grand discours ki enn modele pou nou, parski li ti servi tact, bon jugement, ek facilité pou kozé.

Apré enn troisieme tournée predication, Paul ti al Jérusalem. Kan li ti al dan temple, certain Juif ki ti envie touye li, ti commence enn emeute. Bann soldat romain ti intervenir, ek ti pose Paul bann question. Paul ti enn citoyen romain. A cause sa, plitar li’nn presente so defense devant gouverneur romain Félix. Bann Juif pa ti kapav donne okenn preuve pou zot bann accusation kont Paul. Pou empeche enn lot gouverneur romain, Festus, livré li ar bann Juif, Paul ti dire: “Mo faire appel ar César!” Festus finn reponn li: “Devant César to pou allé.”—Actes 25:11, 12.

Ti amenn Paul en Italie par bateau pou li passe devant tribunal. Mais pendant sa voyage-la, bateau ti faire naufrage, ek Paul ti bizin passe l’hiver lor l’île Malte. Kan finalement li ti arrive Rome, li ti reste deux an dan enn lakaz ki ti loué. Mem si bann soldat ti pé veille li, sa zapotre ki ti touletan reste zelé-la ti contigne preche avek tou bann dimoune ki ti visite li concernant Royaume Bondié.

—Basé lor Actes 11:22–28:31.