Lasanble “Konn enn Peryod Lape”

1, 2. Ki Sol pe plann pou fer dan Damas?

ENN group zom ariv pre ar Damas. Lor zot figir, to trouve ki plan ki zot pe maniganse, bien pa bon. Zot anvi fors bann disip pou kit zot lakaz. Lerla, zot pou atas bann-la, imilie zot, ek trenn zot Zerizalem, pou pas devan Sanedrin.

² Leader sa group-la apel Sol, ek li deza konplis enn krim.a Pa tro lontan, kan bann fanatik zwif ti avoy ros lor Etienn, enn fidel serviter Zezi, pou touy li, Sol ti pe gete ek ti dakor ar seki bann-la ti pe fer. (Zist. 7:57–8:1) Sol pa zis anvi persekit bann disip Zezi ki res dan Zerizalem, me li anvi osi persekit bann disip Zezi dan lezot landrwa. Sol konsider sekt ki apel “Semin Bondie” kouma enn kitsoz bien degoutan, ek li anvi exterminn li.​—Zist. 9:1, 2; get lankadre “Lotorite ki Sol Ti Ena dan Damas.”

3, 4. (a) Ki ariv Sol? (b) Ki bann kestion nou pou examine?

³ Enn sel kout, Sol trouv enn lalimier ki kas lizie. Bann ki pe vwayaz ansam avek li trouv lalimier-la, me zot res kwak, telman zot gagn sok. Sol vinn aveg ek tom anba. Mem si li pa kapav trouve, Sol tann enn lavwa depi lesiel ki dir: “Sol, Sol, kifer to pe persekit mwa?” Sol gagn sok, ek demande: “Kisann-la to ete Segner?” Repons ki Sol gagne sirman bien etonn li: “Momem Zezi, sa kikenn ki to pe persekite la.”​—Zist. 9:3-5; 22:9.

⁴ Ki nou kapav aprann ar premie kestion ki Zezi poz Sol? Ki bienfe nou pou gagne kan nou pou examinn bann levennman ki’nn arive kan Sol konverti? Ki nou kapav aprann ar fason ki lasanble inn servi peryod lape ki zot inn gagne, apre ki Sol ti vinn enn Kretien?

“Kifer To Pe Persekit Mwa?” (Zist. 9:1-5)

5, 6. Ki nou kapav aprann ar seki Zezi dir Sol?

⁵ Kan Zezi aret Sol lor sime ki al Damas, li pa demann li: “Kifer to pe persekit mo bann disip?” Me li dir: “Kifer to pe persekit mwa?” (Zist. 9:4) Wi, kan bann disip Zezi soufer, Zezi osi soufer.​—Mat. 25:34-40, 45.

⁶ Si to pe gagn persekision parski to krwar dan Zezi, to kapav sir ki Zeova ek Zezi kone ki to pe andire. (Mat. 10:22, 28-31) Kitfwa, Zeova pa pou tir to leprev aster-la. Rapel ki kan Sol ti soutenir lamor Etienn, ek ti trenn bann disip andeor zot lakaz dan Zerizalem, Zezi ti pe trouv tou seki ti pe pase. (Zist. 8:3) Pourtan, dan sa ler-la, Zezi pa’nn fer nanye. Me selman, Zeova ti servi Zezi pou donn Etienn ek bann lezot disip, lafors pou res fidel.

7. Ki to bizin fer pou ki to kapav andire kan to gagn persekision?

⁷ Twa osi, to pou kapav andire kan to gagn persekision, si to fer sa bann kitsoz-la: (1) To determine pou res fidel anver Zeova, ninport ki arive. (2) To demann Zeova so led. (Fil. 4:6, 7) (3) To pa tir vanzans tomem, ek to les tou dan lame Zeova. (Rom. 12:17-21) (4) To ena konfians ki Zeova pou donn twa lafors ki to bizin pou andire, ziska ki li tir to leprev.​—Fil. 4:12, 13.

“Sol, Mo Frer, Lesegner . . . Inn Avoy Mwa” (Zist. 9:6-17)

8, 9. Ki Ananias kitfwa resanti konsernan so mision?

⁸ Apre ki Zezi reponn Sol so kestion, “Kisann-la to ete Segner?” Zezi dir Sol: “Leve ek al dan lavil, ek enn kikenn pou dir twa ki to bizin fer.” (Zist. 9:6) Parski Sol aveg, se bann zom ki avek li ki amenn li Damas. Laba, li gard karem ek priye pandan trwa zour. Pandan sa letan-la, Zezi koz lor Sol avek Ananias, enn disip dan Damas, ‘lor ki tou bann Zwif ki viv laba ti koz an bien.’​—Zist. 22:12.

⁹ Mazinn bann diferan santiman ki Ananias gagne! Sef lasanble, setadir Zezi ki’nn resisite, koz ar li personelman ek donn li enn mision bien spesial. Se vremem enn gran loner, me se osi enn mision ki fer per! Kan Zezi dir li ki li bizin al koz ar Sol, Ananias dir li: “Segner, mo’nn tann boukou dimounn koz lor sa zom-la, konsernan tou ditor ki li’nn fer to bann serviter ki sin dan Zerizalem. Ek isi li’nn gagn lotorite ar bann sef pret pou aret tou bann ki met zot konfians dan to nom.”​—Zist. 9:13, 14.

10. Ki nou aprann ar fason ki Zezi koz avek Ananias?

¹⁰ Kan Ananais dir Zezi kifer li pe gagn traka, Zezi pa fer li okenn repros. Okontrer, Zezi explik li bien ki li bizin fer. Ek Zezi mem donn Ananias loner. Kouma? Zezi explik Ananias kifer li’nn swazir li pou okip sa mision spesial la. Zezi dir Ananias konsernan Sol: “Sa zom-la limem linstriman ki mo’nn swazir pou rann temwaniaz lor mo nom ar bann lezot nasion ek osi ar bann lerwa ek bann Izraelit. Mo pou montre li dan enn fason kler ki kantite li pou bizin soufer pou mo nom.” (Zist. 9:15, 16) Ananias obeir Zezi deswit. Li al get Sol, ek dir li: “Sol, mo frer, Lesegner Zezi, ki ti aparet ar twa lor semin kan to ti pe vini, inn avoy mwa pou ki to kapav retrouv kler ek pou ki to ranpli ar lespri sin.”​—Zist. 9:17.

11, 12. Ki nou kapav aprann kan nou examinn seki’nn arive kan Sol konverti?

¹¹ Ena plizir kitsoz ki nou kapav aprann kan nou examinn seki’nn arive kan Sol konverti. Par exanp, nou aprann ki Zezi diriz travay predikasion, parey kouma li ti promet. (Mat. 28:20) Mem si li pa koz direkteman ar bann dimounn azordi, Zezi diriz travay predikasion gras-a esklav fidel ki li’nn etabli lor so bann domestik. (Mat. 24:45-47) Gras-a direksion ki Komite Santral done, bann proklamater ek bann pionie, rod bann ki anvi aprann plis lor Zezi. Kouma nou’nn trouve dan sapit avan, ena boukou dimounn ki’nn priye Bondie pou gagn so led, ek zis apre zot inn zwenn bann Temwin Zeova.​—Zist. 9:11.

¹² Ananias ti obeir Zezi, ti aksepte mision ki li ti gagne, ek ti gagn benediksion. Eski to obeir komannman pou rann temwaniaz afon, mem si sa mision-la fer twa per? Sertin strese kan zot bizin pres lakaz-lakaz ek koz avek bann etranze. Sertin trouv sa difisil pou fer bann teritwar komersial, pou pres lor sime, par telefonn ouswa par let. Ananias ti sirmont so laper ek ti gagn loner pou ed Sol pou gagn lespri sin.b Li ti reisi so mision parski li ti fer Zezi konfians, ek parski li ti konsider Sol kouma so frer. Nou osi nou kapav sirmont nou bann laper, si nou fer parey kouma Ananias: Nou ena konfians ki Zezi pe diriz predikasion, nou ena konpasion pou bann dimounn, ek nou trouv zot kouma nou bann fitir frer ek ser, mem si zot inpresionn nou.​—Mat. 9:36.

‘Li Koumans Prese Konsernan Zezi’ (Zist. 9:18-30)

13, 14. Si to pe etidie Labib me ki to pankor pran batem, ki to kapav aprann ar lexanp Sol?

¹³ Sol pa tarde pou fer bann sanzman dapre seki li’nn aprann. Apre ki Sol rekoumans trouv kler, li pran batem ek koumans zwenn ansam avek bann disip dan Damas. Me li fer plis ki sa: ‘Deswit li koumans prese dan bann sinagog konsernan Zezi, ek dir ki Zezi limem Garson Bondie.’​—Zist. 9:20.

¹⁴ Si to pe etidie Labib me ki to pankor pran batem, eski twa osi parey kouma Sol, to pa pou tarde pou fer bann sanzman ki bizin dapre seki to pe aprann? Li vre ki Sol ti trouv Zezi fer enn mirak, ek ki sirman sa ti pous li pou azir. Me ena lezot dimounn osi ki ti trouv Zezi fer bann mirak. Par exanp, enn zour, enn group Farizien ti trouv Zezi geri enn misie ki ti monion. Ek boukou Zwif ti kone ki Zezi ti resisit Lazar. Me kanmem sa, laplipar parmi zot pa ti anvi swiv Zezi ek sertin ti mem ayir li. (Mark 3:1-6; Zan 12:9, 10) Me Sol li, ti’nn sanze net. Kifer Sol ti vinn enn disip Zezi alor ki lezot non? Parski li ti ena plis respe pou Bondie ki pou bann zom, ek ki li ti vremem rekonesan ki Zezi ti montre mizerikord anver li. (Fil. 3:8) Si twa osi to fer parey kouma Sol, to pa pou les nanye anpes twa prese, ek anpes twa ranpli bann kondision ki bizin pou pran batem.

15, 16. Ki Sol fer dan bann sinagog, ek kouma bann Zwif dan Damas reazir?

¹⁵ Sey mazinn reaksion lafoul kan zot trouv Sol pe pres lor Zezi dan bann sinagog. Sirman sertin etone, gagn sok, ouswa mem ankoler. Zot demande: “Pa limem sa zom ki dan Zerizalem ti fer ditor bann dimounn ki met zot konfians dan sa nom-la?” (Zist. 9:21) Kan Sol explike kifer li’nn sanz so latitid konsernan Zezi, li “donn bann prev lozik ki Zezi limem Lekris.” (Zist. 9:22) Me selman, bann lexplikasion lozik pa konvink tou dimounn. Zot pa kapav sanz fason panse bann dimounn ki insiste pou swiv zot bann tradision, ouswa sanz bann dimounn ki fier. Me kanmem sa, Sol kontign prese.

¹⁶ Trwa-z-an apre, bann Zwif dan Damas kontign opoz zot ar Sol. Ariv enn ler, zot plann pou touy li. (Zist. 9:23; 2 Kor. 11:32, 33; Gal. 1:13-18) Kan Sol tann koz lor sa plan-la, li kit lavil an kasiet ek les bann dimounn desann li dan enn panie atraver enn trou dan miray lavil. Kan Lik koz lor bann dimounn ki’nn ed Sol pou sove sa swar-la, li apel zot “[Sol] so bann disip.” (Zist. 9:25) Sa montre ki sertin parmi bann ki’nn ekout Sol prese dan Damas, inn sanz zot latitid ek inn vinn bann disip Zezi.

17. (a) Kouma sertin dimounn reazir ar bann verite ki ena dan Labib? (b) Ki to bizin kontign fer, ek kifer?

¹⁷ Kan premie fwa to’nn koz lor bann bon kitsoz ki to’nn aprann dan Labib ar to bann fami, to bann kamarad, ek lezot dimounn, kitfwa to ti pe atann ki tou dimounn ti pou aksepte bann verite ki ena dan Labib, parski zot lozik. Kitfwa sertin parmi zot inn aksepte, alor ki lezot non. Kitfwa osi, bann manb to prop fami, inn tret twa kouma enn lennmi. (Mat. 10:32-38) Me selman, si to kontign amelior twa dan fason ki to rezone lor Labib ek ki to kontign ena enn bon konportman, mem bann ki pa dakor ar twa kapav sanz zot latitid.​—Zist. 17:2; 1 Pier 2:12; 3:1, 2, 7.

18, 19. (a) Ki arive kan Barnabas dibout pou Sol? (b) Kouma nou kapav imit Barnabas ek Sol?

¹⁸ Kan Sol ariv Zerizalem, bann disip pa’le krwar ki aster-la Sol inn vinn enn disip. Me selman, kan Barnabas dibout pou Sol, bann zapot aksepte Sol kouma enn disip, ek li res avek zot pandan enn letan. (Zist. 9:26-28) Mem si Sol res pridan kan li prese, sa pa vedir ki li gagn onte pou koz lor bon nouvel. (Rom. 1:16) Avek boukou kouraz, li prese dan Zerizalem, alor ki se laba mem ki li ti koumans persekit bann disip Zezi Kris. Bann Zwif dan Zerizalem bien ankoler kan zot realize ki sa zom ki zot ti panse pou eliminn bann Kretien la, aster-la inn vinn enn Kretien. Zot anvi touy li. Labib dir ki ‘kan bann frer konn sa, zot amenn Sol Sezare ek zot fer li al Tars.’ (Zist. 9:30) Sol obeir bann frer, parski li konpran ki se Zezi ki pe donn sa direksion-la. Gras-a sa, Sol ek lasanble gagn bann bienfe.

¹⁹ Remarke ki Barnabas pran linisiativ pou ed Sol. Sirman sa finn ede pou ki sa de serviter Zeova la, vinn bann bon kamarad. Eski twa osi, parey kouma Barnabas, to dispoze pou ed bann nouvo dan lasanble? Eski to kapav akonpagn zot dan predikasion, ek ed zot pou vinn bann pli bon Kretien? Si to fer sa, to pou gagn boukou benediksion. Ek si to enn nouvo proklamater, eski twa osi, parey kouma Sol, to aksepte ki lezot ed twa? Kan to travay ansam avek bann proklamater ki ena pli boukou lexperyans, to pou amelior fason ki to prese, to pou gagn plis lazwa, ek to pou gagn bann bon lamitie ki pou dire pou touletan.

‘Boukou Dimounn Koumans Krwar’ (Zist. 9:31-43)

20, 21. Kouma bann serviter Bondie dan lepase ek azordi profit bann “peryod lape”?

²⁰ Apre ki Sol konverti ek ki li kit Zerizalem an sekirite, ‘bann lasanble dan Zide, Galile, ek Samari konn enn peryod lape.’ (Zist. 9:31) Kouma bann disip profit sa peryod lape la? (2 Tim. 4:2) Labib dir ki zot “pe vinn for.” Bann zapot ek bann lezot frer responsab ranforsi lafwa bann disip ek ed lasanble pou “kontign ena enn gran respe pou Zeova” ek pou “gagn konsolasion ar lespri sin.” Par exanp, Pier servi so letan pou ankouraz bann disip dan lavil Lida dan Saronn. So bann zefor permet ki boukou dimounn ki viv dan lezanviron “koumans krwar dan Lesegner.” (Zist. 9:32-35) Olie ki zot galoup deryer bann lobzektif personel, bann disip travay dir pou pran swin sakenn zot kamarad, ek pou pres bon nouvel. Gras-a sa, bann lasanble “kontign ogmante.”

²¹ Dan bann lane 1990, bann Temwin Zeova dan boukou pei finn konn zot osi enn “peryod lape.” Sertin gouvernman ki pandan boukou lane ti pe persekit pep Bondie, finn perdi zot pouvwar enn sel kout. Lerla, dan sertin pei kot ti ena linterdiksion, li ti vinn pli fasil pou prese ek dan lezot pei ti nepli ena linterdiksion. Bann milye Temwin Zeova finn sezi sa lokazion-la pou pres an piblik, ek sa finn permet ki boukou dimounn tann bon nouvel.

22. Kouma to kapav servi bien liberte ki to ena?

²² Eski to pe servi bien liberte ki to ena? Si to pe viv dan enn pei kot to lib pou pratik to relizion, Satan pou pous twa pou servi to letan pou gagn pli boukou kitsoz materyel, olie ki to servi to letan pou servi Zeova. (Mat. 13:22) Alor, pa les Satan anbet twa. Servi bien tou ti peryod lape ki to pe gagne. Konsider zot kouma bann lokazion pou rann temwaniaz afon ek pou ankouraz lasanble. Rapel ki to sitiasion kapav sanze san ki to atann.

23, 24. (a) Ki kitsoz nou kapav aprann ar seki’nn ariv Tabita? (b) Ki nou bizin bien determine pou fer?

²³ Anou get seki’nn ariv enn disip ki apel Tabita, ouswa Dorkas.c Li res Zope, enn lavil ki pa tro lwin ar Lida. Sa ser fidel la servi so letan ek so bann dibien avek sazes, ek li fer “boukou bon aksion ek bann bon kitsoz pou bann pov.” Me selman, enn sel kout li tom malad ek li mor. Bann disip dan Zope ek sirtou bann vev ki li ti ede, bien sagrin pou tann sa. Kan Pier ariv dan lakaz kot inn met lekor Tabita, li fer enn mirak ki okenn bann disip Zezi Kris pa’nn fer. Pier priye ek apre sa, resisit Tabita! Eski to kapav mazinn lazwa sa bann vev-la ek sa bann disip-la, kan Pier kriye zot dan lasam ek montre zot Tabita ki’nn resisite? Sirman, sa bann levennman-la donn zot lafors ki bizin pou bann leprev ki zot pou gagne dan lavenir! Ek ‘sa nouvel-la fane partou dan Zope, ek boukou dimounn koumans krwar dan Lesegner.’​—Zist. 9:36-42.

²⁴ Nou kapav aprann de kitsoz inportan ar seki’nn ariv Tabita. (1) Enn kout nou lavi kapav sanze. Alor, li bien inportan ki tanki nou vivan, nou fer tou seki nou kapav pou ena enn bon repitasion devan Bondie! (Ekle. 7:1) (2) Lesperans rezireksion, li enn kitsoz ki sir. Zeova ti remark tou bann bon kitsoz ki Tabita ti fer, ek Li ti rekonpans li. Alor, si arive nou mor avan Armagedon, Zeova pou rapel bann bon kitsoz ki nou’nn fer ek Li pou resisit nou. (Ebre 6:10) Alor, ki nou pe andir bann “lepok difisil,” ouswa ki nou pe profit “enn peryod lape,” anou kontign rann temwaniaz afon lor Lekris!​—2 Tim. 4:2.