Komie Temwin Jéhovah ou kone? Kitfwa ou ena enn vwazin, koleg travay, ouswa kamarad lekol ki Temwin. Ouswa kitfwa enn Temwin finn deza koz Labib avek ou. Me, ki kalite dimounn nou ete vremem, ek kifer nou koz lor nou bann krwayans avek tou dimounn?

Nou parey kouma tou dimounn. Nou sorti dan diferan kiltir ek nou ena diferan nivo sosial. Sertin parmi nou ti pratik enn lot relizion avan, alor ki lezot pa ti krwar an Bondie. Me, avan ki nou’nn vinn enn Temwin, nou tou nou’nn pran letan pou bien examinn bann lansegnman ki ena dan Labib. (Actes 17:11) Nou’nn aksepte seki nou finn aprann, ek lerla nou finn deside personelman pou ador Bondie, Jéhovah.

Nou tir profi kan nou etidie Labib. Kouma tou dimounn, nou’si nou ena nou problem ek nou prop febles. Me kan nou finn esey aplik bann prinsip Labib toulezour, nou finn trouve ki nou lavi finn bien ameliore. (Psaume 128:1, 2) Sa se enn rezon kifer nou fer lezot konn bann bon kitsoz ki nou’nn aprann dan Labib.

Nou viv dapre bann prinsip ki Bondie inn etabli. Se dan Labib ki nou aprann sa bann prinsip-la. Sa bann prinsip-la amelior nou lavi, ed nou pou ena respe pou lezot, ed nou pou vinn bann dimounn ki bon ek onet. Zot ed nou’si pou vinn bann manb lasosiete ki prodiktif ek ki ena enn bon lasante. Zot ankouraz bann manb enn fami pou vinn pros ar zot kamarad ek gard enn bon nivo moral. Ena enn kitsoz ki nou sir, se ki “Bondie pa fer preferans.” Akoz sa pena okenn baryer rasial ni politik ant nou. Nou enn vre fami spiritiel internasional. Nou parey kouma tou dimounn, me ansam nou form enn pep ki pena so segon.​—Actes 4:13; 10:34, 35.

• Kifer bann Temwin Jéhovah zot parey kouma tou dimounn?

• Ki bann prinsip bann Temwin finn aprann kan zot finn etidie Labib?

Boukou dimounn panse ki Temwin Jéhovah se nom enn nouvo relizion. Pourtan, sa fer plis ki 2,700-z-an ki sel vre Bondie apel so bann serviter “mo bann temwin.” (Isaïe 43:10-12) Avan 1931, bann dimounn ti konn nou kouma bann Etidian Labib. Kifer nou finn adopte sa nom Temwin Jéhovah-la?

Sa nom-la montre kisannla nou Bondie. Nom Bondie, Jéhovah, ti aparet plizir milye fwa dan bann ansien maniskri Labib. Boukou tradiksion finn ranplas sa nom-la par bann tit, kouma Segner ouswa Bondie. Pourtan, vre Bondie ti fer Moïse konn Li atraver so nom personel, setadir Jéhovah, kan Li ti dir: “Samem mo nom pou touletan.” (Exode 3:15) Se koumsa ki Li’nn montre ki Li pa parey kouma tou bann fos Bondie. Nou bien fier pou port nom Bondie ki sin!

Sa nom-la dekrir nou mision. Depi lepok Abel, finn ena enn kantite zom ek fam fidel ki finn ena lafwa an Jéhovah ek ki finn rann temwaniaz lor Li. Amezir ki bann siek finn pase, Noé, Abraham, Sara, David, ek lezot ankor finn zwenn ‘sa gran lafoul temwin la.’ (Hébreux 11:4–12:1) Devan lakour, enn kikenn kapav debout temwin pou enn dimounn inosan. Nou osi parey, nou bien deside pou fer konn laverite lor nou Bondie.

Nou pe imit Jésus. Labib apel Jésus “temwin fidel ki dir laverite.” (Révélation 3:14) Jésus limem ti dir ki li ‘ti fer bann dimounn konn nom Bondie’ ek li ti kontign “rann temwaniaz lor laverite” konsernan Bondie. (Jean 17:26; 18:37) Alor, bann vre disip Christ bizin port nom Jéhovah ek fer konn sa nom-la. Se seki bann Temwin Jéhovah pe fer zefor pou fer.

• Kifer bann Etidian Labib finn pran nom “Temwin Jéhovah”?

• Depi komie letan Jéhovah finn ena bann temwin lor later?

• Kisannla pli gran Temwin Jéhovah?

Labib ti anonse ki apre lamor Christ, bann fos ansegnan ti pou leve parmi bann premie Kretien ek ti pou deform laverite ki ena dan Labib. (Actes 20:29, 30) Avek letan, samem ki finn arive. Sa bann fos ansegnan-la finn melanz bann lide ki sorti dan bann relizion payin avek bann lansegnman Jésus. Se koumsa ki enn fos relizion Kretien finn devlope. (2 Timothée 4:3, 4) Alor, kouma nou kapav sir ki nou’nn konpran bien seki Labib ansegne vremem?

Ler inn arive pou Jéhovah fer konn laverite. Jéhovah ti predir ki pandan ‘lepok lafin, vre konesans pou an-abondans.’ (Daniel 12:4) An 1870, enn ti group dimounn ki ti pe rod laverite, ti konpran ki lansegnman boukou Legliz pa ti baze lor Labib. Alor, zot finn koumans fer bann resers pou kone ki vremem Labib ti ansegne dan koumansman, ek Jéhovah inn ed zot pou fer sa.

Bann dimounn sinser ti etidie Labib an profonder. Zordi nou pe servi mem metod ki sa bann Etidian Labib-la ti servi pou etidie: Zot ti examinn Labib size par size. Kan zot ti gagn difikilte pou konpran enn pasaz, zot ti rod lezot verse ki ti kapav explik sa pasaz-la. Enn fwa ki zot finn tom lor enn konklizion ki an-akor avek leres bann Lekritir, zot ti ekrir li. Sa metod-la, setadir les Labib explik li par limem, inn permet zot redekouver laverite lor nom Bondie, lor so Rwayom, so proze pou bann dimounn ek later, kondision bann dimounn mor, ek lesperans lor rezireksion. Zot bann resers inn liber zot ar boukou fos pratik ek krwayans.​—Jean 8:31, 32.

An 1879, bann Etidian Labib inn konpran ki’nn ariv ler pou fer bann dimounn partou lor later konn laverite. Alor, sa mem lane-la, zot inn koumans prodir enn magazinn ki apel Latour Degard Pe Anons Rwayom Jéhovah, an Angle, enn magazinn ki nou ankor pe pibliye. Azordi, nou pe partaz bann verite Biblik avek bann dimounn dan 240 pei ek dan plis ki 750 lang. Zame inn arive ki vre konesans inn vinn an-abondans sa kantite-la kouma zordi!

• Apre lamor Christ, ki’nn ariv laverite ki ena dan Labib?

• Ki finn permet nou redekouver laverite ki ena dan Parol Bondie?

Bondie anvi ki tou dimounn gagn “konesans exakt lor laverite.” (1 Timothée 2:3, 4) Akoz sa, pandan plizir dizenn lane, bann Temwin Jéhovah finn servi, inprim, ek distribie plizir version Labib. Avek letan, nou finn trouve ki nou bizin prodir enn nouvo tradiksion ki pou ed bann dimounn pou gagn sa konesans-la. Ala kifer, an 1950 nou finn koumans distribie Traduction du monde nouveau, an Angle, an plizir volim. Nou finn tradir sa Labib-la dan enn langaz modern, dan enn fason exakt, fidel, ek dan plis ki 130 lang.

Enn Labib ki fasil pou konpran. Bann langaz sanze avek letan. Dan boukou tradiksion Labib, nou trouv bann lexpresion ki pa kler ouswa ki nepli servi zordi, ek ki difisil pou konpran. Anplis, bann dimounn finn dekouver bann ansien maniskri ki pli exakt ek ki pli pros ar bann maniskri orizinal. Gras-a sa, nou finn kapav konpran pli bien bann lang ki finn servi pou ekrir Labib, setadir Ebre, Arameen, Grek.

Enn tradiksion ki fidel ar Parol Bondie. Pou res fidel ar text orizinal, bann tradikter Labib pa finn pran okenn liberte pou sanz Parol Bondie ki inspire. Me, laplipar version Labib pa servi nom Bondie, Jéhovah.

Enn Labib ki donn loner Bondie ki’nn fer ekrir li. (2 Samuel 23:2) Parey kouma nou trouve dan foto anba, nom Jéhovah ti aparet preske 7,000 fwa dan bann pli vie maniskri Labib. Bann tradikter Traduction du monde nouveau finn remet nom Bondie dan plas kot li ti aparet. (Psaume 83:18) Gras-a tou sa bann lane resers la, zordi nou ena enn Labib ki zoli pou lir ek ki anmemtan transmet panse Bondie dan enn fason bien kler. Ki ou ena Traduction du monde nouveau dan ou lang ouswa non, nou ankouraz ou pou pran labitid pou lir Parol Jéhovah sak zour.​—Josué 1:8; Psaume 1:2, 3.

• Kifer nou ti bizin fer enn nouvo tradiksion Labib?

• Si enn kikenn anvi konn volonte Bondie, ki labitid li bizin pran?