Dan nou lorganizasion, pena bann pret ki gagn enn lapey pou seki zot fer. Okontrer, parey kouma dan premie siek, Bondie ti etabli bann sirveyan kalifie pou “pran swin kongregasion Bondie.” (Actes 20:28) Bann ansien zot bann zom ki bien kalifie lor plan spiritiel ki pran latet dan kongregasion ek ki pran swin troupo Bondie, “pa par obligasion, me volonterman devan Bondie; pa parski zot kontan enn profi malonet, me parski zot ena sa gran dezir-la.” (1 Pierre 5:1-3) Ki zot fer pou nou?

Zot pran nou swin ek vey lor nou. Bann ansien protez, gid, ek ed bann manb kongregasion pou ki zot res pros ar Jéhovah. Zot konsian ki Bondie finn konfie zot sa rol inportan la, akoz sa zot pa fer dominer ar nou. Okontrer, zot fer tou pou ki nou santi nou bien ek nou zwaye. (2 Corinthiens 1:24) Parey kouma enn berze pran bien swin sak mouton dan so troupo, bann ansien fer zefor pou esey konn sak manb kongregasion personelman.​—Proverbes 27:23.

Zot montre nou kouma pou fer volonte Bondie. Sak semenn, bann ansien diriz bann renion dan kongregasion pou fortifie nou lafwa. (Actes 15:32) Sa bann zom bien devwe la diriz osi travay predikasion, zot travay avek nou ek form nou dan tou laspe nou minister.

Zot donn nou enn lankourazman personel. Pou ed nou pou vinn pli pros ar Jéhovah, bann ansien vinn vizit nou kot nou ouswa koz avek nou dan Lasal. Zot fer sa parski zot anvi ed nou ek konsol nou atraver Labib.​—Jacques 5:14, 15.

Anplis travay ki zot ena dan kongregasion, laplipar ansien ena zot travay ek zot responsabilite familial ki demann boukou letan ek boukou latansion. Sa bann frer ki travay bien dir la merit nou respe.​—1 Thessaloniciens 5:12, 13.

• Ki rol bann ansien ena dan kongregasion?

• Dan ki fason bann ansien montre enn lintere personel anver nou?

Labib koz lor de group frer ki ena bann responsabilite dan kongregasion​—“bann sirveyan ek bann asistan ministeryel.” (Philippiens 1:1) An zeneral, ena plizir ansien ek asistan ministeryel ki servi dan sak kongregasion. Ki bann asistan ministeryel fer pou ed nou?

Zot ed bann ansien. Bann asistan ministeryel se bann frer spiritiel, ena ki pli zenn ek ena ki pli aze. Se bann frer ki fer zot travay avek serye, ek nou kapav fer zot konfians. Zot fer bann travay inportan me ki bien souvan ena enn rapor avek bann kitsoz materyel ek fason ki bann kitsoz organize dan kongregasion. Koumsa bann ansien kapav konsantre lor zot responsabilite antan ki ansegnan ek berze.

Zot ede dan enn fason pratik. Sertin asistan ministeryel gagn privilez pou akeyir tou bann ki vinn renion. Lezot okip sonorizasion, piblikasion, kont kongregasion, ek teritwar. Zot ede osi pou antretenir Lasal Bann Temwin Jéhovah. Parfwa li kapav arive ki bann ansien demann zot pou ed bann frer ek ser aze. Bann asistan ministeryel dispoze pou fer ninport ki travay ki donn zot, ek sa fer zot gagn respe bann manb kongregasion.​—1 Timothée 3:13.

Antan ki frer zot donn enn bon lexanp. Bann frer gagn privilez pou vinn asistan ministeryel parski zot ena bann zoli kalite. Bann size ki zot fer pandan bann renion, fer nou lafwa vinn pli solid. Kan zot donn enn bon lexanp dan predikasion, zot ed nou pou vinn pli zele. Zot dispoze pou korper avek komite bann ansien, ek sa permet ki ena lazwa ek linite dan kongregasion. (Éphésiens 4:16) Avek letan, zot osi zot kapav kalifie pou servi antan ki ansien.

• Ki bann kalite bann asistan ministeryel bizin ena?

• Kouma bann asistan ministeryel ede pou ki tou mars bien dan kongregasion?

Bann Lekritir Grek Kretien koz souvan lor Barnabas ek lapot Paul, bann sirveyan ki ti vizit bann kongregasion dan premie siek. Kifer zot ti fer sa bann vizit-la? Se parski zot ti ena enn lintere sinser pou zot bann frer spiritiel. Paul ti dir ki li anvi “retourne ek vizit bann frer” pou gete kouma zot ete. Li ti dispoze pou vwayaz plizir santenn kilomet pou li kapav al get zot ek fortifie zot. (Actes 15:36) Se sa dezir-la ki nou bann sirveyan ena zordi.

Zot vinn ankouraz nou. Sak sirveyan sirkonskripsion vizit anviron 20 kongregasion de fwa par an ek li pas enn semenn avek sak kongregasion. Nou kapav tir boukou profi gras-a lexperyans sa bann frer-la, ek si zot marye nou kapav profit osi lexperyans zot madam. Bann sirveyan fer zefor pou konn bann zenn ek bann ki aze, ek zot bien kontan pou akonpagn nou dan predikasion ek dan nou bann letid. Ansam avek bann ansien, zot al vizit bann manb kongregasion pou fortifie zot. Zot fer bann diskour ankourazan dan bann renion ek bann lasanble.​—Actes 15:35.

Zot interese ar tou dimounn. Bann sirveyan sirkonskripsion bien interese avek kondision spiritiel bann kongregasion. Zot fer enn renion avek bann ansien ek bann asistan ministeryel pou analiz progre ki finn fer ek donn zot bann konsey pratik pou asim zot responsabilite kouma bizin. Zot ed bann pionie pou gagn sikse dan zot minister. Zot kontan pou fer konesans bann nouvo ek pou kone ki bann progre zot pe fer dan laverite. Sak sirveyan donn limem volonterman ek ‘travay ansam avek nou pou nou lintere.’ (2 Corinthiens 8:23) Nou bizin imit zot lafwa ek zot latasman pou Bondie.​—Hébreux 13:7.

• Pou ki rezon bann sirveyan sirkonskripsion vizit bann kongregasion?

• Kouma ou kapav profit zot bann vizit?

Kan ena enn katastrof, bann Temwin Jéhovah organiz zot deswit pou ed zot bann frer ki afekte. Sa bann zefor-la montre lamour sinser ki nou ena sakenn pou nou kamarad. (Jean 13:34, 35; 1 Jean 3:17, 18) Dan ki fason nou ede?

Nou fer kontribision. Dan premie siek, kan ti ena enn gran lafaminn dan Judée, bann Kretien dan Antioche ti avoy kas pou ed zot bann frer. (Actes 11:27-30) Zordi osi kan nou aprann ki nou bann frer dan enn sertin pei pe fer fas ar bann difikilte, nou fer bann donasion atraver nou kongregasion pou soutenir bann ki bizin led lor plan materyel.​—2 Corinthiens 8:13-15.

Nou ede dan enn fason pratik. Bann ansien ki trouv dan rezion kot inn gagn enn katastrof, esey kone kot sak manb kongregasion ete. Koumsa zot fer sir ki personn pa manke ek ki zot tou bien. Bann ansien etabli enn komite sekour pou distribie manze, delo prop, linz, enn plas pou reste, ek tretman medikal ki bizin. Boukou Temwin ki ena bann kalifikasion neseser partisip, lor zot prop fre, dan bann sekour ouswa donn enn koudme pou repar bann lakaz ek Lasal Bann Temwin Jéhovah ki’nn andomaze. Linite ki nou ena antan ki enn lorganizasion ek lexperyans ki nou’nn gagne kan nou travay ansam, permet nou mobilize bien vit kan ena bann katastrof. Li vre ki nou ed “nou bann frer dan lafwa,” me kan li posib nou ed osi lezot dimounn, ninport ki relizion zot ete.​—Galates 6:10.

Nou ed zot lor plan spiritiel ek moral. Bann ki’nn viktim enn katastrof bizin sirtou enn rekonfor. Dan sa moman-la, nou kapav gagn kouraz ar Jéhovah, “Bondie ki donn tou konsolasion.” (2 Corinthiens 1:3, 4) Nou partaz bann promes ki ena dan Labib avek bann ki dan dezespwar. Nou donn zot lasirans ki biento Rwayom Bondie pou eliminn tou bann katastrof ki amenn douler ek soufrans.​—Révélation 21:4.

• Kifer bann Temwin kapav mobilize bien vit kan ena bann katastrof?

• Kouma nou kapav rekonfort bann dimounn ki’nn pas par bann katastrof?

Enn tipe avan so lamor, Jésus ti gagn enn konversasion avek kat so bann disip​—Pierre, Jacques, Jean, ek André. Alor ki Jésus ti pe koz lor sign ki ti pou montre so prezans dan bann dernie zour, li ti poz enn kestion bien inportan: “Kisannla ki vremem lesklav fidel ek saz, ki so met finn etabli lor so bann domestik, pou donn zot, zot nouritir dan ler ki bizin?” (Matthieu 24:3, 45; Marc 13:3, 4) Antan ki zot “met,” Jésus ti donn so bann disip lasirans ki li pou swazir bann ki pou kontign donn so bann disip nouritir spiritiel dan lepok lafin. Kisannla sa esklav-la?

Se enn ti group disip Jésus ki’nn swazire par mwayin lespri sin. Sa “esklav[-la]” se Komite Santral bann Temwin Jéhovah. Li donn bann serviter Jéhovah nouritir spiritiel dan ler ki bizin. Nou kont lor sa esklav fidel-la pou kontign donn nou, nou “porsion manze dan ler ki bizin.”​—Luc 12:42.

Li an-sarz fami Bondie. (1 Timothée 3:15) Jésus inn donn sa esklav-la enn gran responsabilite: An-sarz laktivite parti lorganizasion Jéhovah ki lor later. Savedir zot bizin okip so bann dibien materyel, diriz travay predikasion, ek ansegn nou atraver bann kongregasion. Alor, pou donn nou seki nou bizin dan ler ki bizin, “lesklav fidel ek saz” donn nou sa nouritir spiritiel la atraver bann piblikasion ki nou servi dan nou minister, ek atraver program ki prezante dan bann renion ek lasanble.

Sa esklav-la, res fidel ar bann verite Biblik ek li res atase ar so mision ki li ena pou pres bon nouvel. Li saz parski li okip avek sazes bann lintere Christ lor later. (Actes 10:42) Kouma eski Jéhovah pe beni so travay? Nou trouv enn gran ogmantasion parmi pep Bondie ek nou ena nouritir spiritiel an-abondans.​—Isaïe 60:22; 65:13.

• Kisannla Jésus inn swazire pou donn so bann disip nouritir spiritiel?

• Dan ki fason lesklav li fidel ek saz?

Dan premie siek, enn ti group “bann zapot ek bann ansien ki ti Jérusalem,” ti form enn komite santral ki ti pran bann desizion inportan pou tou bann Kretien ki’nn swazire par mwayin lespri sin. (Actes 15:2) Zot ti examinn bann Lekritir ek zot ti les zot dirize par lespri Bondie ek gras-a sa zot tou ti reisi tom dakor lor bann desizion. (Actes 15:25) Azordi nou swiv mem model.

Bondie servi zot pou fer so volonte. Bann frer ki’nn swazire par mwayin lespri sin, ki form parti Komite Santral, ena enn gran lamour pou Parol Bondie. Zot ena osi boukou lexperyans ek zot kone kouma pou tret bann kestion spiritiel ek materyel. Toule semenn zot zwenn pou gete ki bann Temwin dan lemond antie bizin. Parey kouma dan premie siek, Komite Santral donn bann instriksion Biblik, swa atraver bann let, swa atraver bann sirveyan ki vizit bann kongregasion. Sa permet ki ena linite parmi pep Bondie; zot tou ena mem fason panse ek mem fason azir. (Actes 16:4, 5) Komite Santral siperviz preparasion nouritir spiritiel. Li ankouraz zot tou pou donn priorite travay predikasion, ek li siperviz nominasion bann frer ki asim sertin responsabilite.

Li soumet ar direksion lespri Bondie. Komite Santral rod direksion Souverin Liniver, Jéhovah, ek Sef kongregasion, Jésus. (1 Corinthiens 11:3; Éphésiens 5:23) Bann manb Komite Santral pa konsider zot kouma bann sef lepep Bondie. Ansam avek tou bann Kretien ki’nn swazire par mwayin lespri sin, zot “kontign swiv Lannyo [Jésus] ninport kot li ale.” (Révélation 14:4) Komite Santral bien apresie kan nou priye pou zot ek pou travay ki zot pe fer.

• Dan premie siek, kisannla ti form parti komite santral?

• Azordi, kouma Komite Santral rod direksion Bondie?

Béthel, se enn mo Ebre ki vedir “Lakaz Bondie.” (Genèse 28:17, 19, not) Se enn nom apropriye pou dekrir bann batiman ki bann Temwin Jéhovah ena dan lemond antie kot zot diriz ek soutenir travay predikasion. Depi biro mondial dan New York, États-Unis, Komite Santral siperviz travay ki pe fer dan bann biro nasional ki trouv dan boukou pei. Bann ki servi dan sa bann batiman-la zot form lafami Béthel. Parey kouma enn fami viv ek travay ansam, zot manze ek zot etidie Labib ansam dan linite.​—Psaume 133:1.

Enn plas kot sak manb lafami donn zotmem volonterman. Dan sak Béthel, ena bann frer ek ser ki donn tou pou fer volonte Bondie. Zot servi aplintan pou fer bann lintere Rwayom Bondie avanse. (Matthieu 6:33) Personn pa gagn lapey pou seki zot fer, me zot tou ena enn lasam pou reste, zot gagn manze, ek enn ti-kas pou zot bann depans personel. Tou dimounn dan Béthel ena enn responsabilite. Ena travay dan biro, dan lakwizinn, ouswa lasal-a-manze. Ena ki travay dan linprimri, ki fer netwayaz, ki okip linz, ki dan mintenans, ouswa ki travay dan lezot departman.

Enn plas kot tou dimounn bien okipe pou soutenir predikasion Rwayom Bondie. Lobzektif prinsipal sak Béthel se fer enn maximum dimounn tann laverite ki sorti dan Labib. Sa brosir-la, se enn lexanp. Li finn ekrir anba direksion Komite Santral. Apre sa, bann santenn biro tradiksion dan lemond gagn sa bann dokiman-la par computer. Lerla, gras-a bann lapres ki travay extra vit ki trouv dan plizir Béthel, nou inprim zot ek avoy zot dan plis ki 110,000 kongregasion. Pandan sak letap, lafami Béthel soutenir travay pli inportan ki ena pou fer: pres bon nouvel.​—Marc 13:10.

• Kisannla ki travay dan Béthel, ek kouma pran zot swin?

• Ki travay inportan sak Béthel soutenir?

Bann manb lafami Béthel ouswa Biro Nasional, travay dan diferan departman, pou soutenir travay predikasion dan enn ouswa plizir pei. Zot travay dan tradiksion, stor piblikasion, departman odio/video, dan departman kot inprim bann peryodik, relie bann liv, ek lezot kitsoz ankor.

Komite Biro Nasional siperviz tou bann laktivite. Komite Santral donn Komite Biro Nasional responsabilite pou diriz tou travay ki fer dan enn Béthel. Dan sa komite-la kapav ena trwa ouswa plizir ansien ki bien kalifie. Sa komite-la fer Komite Santral konn tou bann progre ki ena dan pei ki anba zot responsabilite, ek osi ninport ki problem ki arive. Sa bann rapor-la ed Komite Santral pou deside lor ki size zot pou koze dan bann prosin piblikasion, renion, ek lasanble. Komite Santral bien souvan avoy so bann reprezantan pou vizit bann diferan Béthel. Zot donn bann frer ki form parti dan Komite Biro Nasional direksion ki bizin pou ki zot kapav fer zot travay bien. (Proverbes 11:14) Pandan sa vizit-la, Béthel organiz enn renion spesial, kot sa reprezantan Biro mondial la fer enn diskour pou ankouraz bann frer ek ser ki res dan sa rezion-la ouswa sa pei-la.

Soutenir bann kongregasion. Bann frer responsab dan biro nasional, donn zot lakor pou formasion bann nouvo kongregasion. Zot diriz osi laktivite bann pionie, bann misioner, ek bann sirveyan sirkonskripsion ki anba zot responsabilite. Zot organiz osi bann lasanble, ek konstriksion bann nouvo Lasal. Zot veye osi ki bann kongregasion gagn bann piblikasion ki zot bizin. Tou travay ki fer dan enn Béthel permet ki travay predikasion fer kouma bizin ek dan lord.​—1 Corinthiens 14:33, 40.

• Kouma bann manb Komite Biro Nasional ed Komite Santral?

• Ki bann diferan responsabilite enn biro nasional?

Pou nou kapav anons “bon nouvel” ar “tou bann nasion, tribi, lang, ek pep,” nou prodir bann piblikasion dan plis ki 750 lang. (Révélation 14:6) Kouma nou reisi fer enn gran travay koumsa? Gras-a enn lekip redakter internasional ek enn group tradikter bien devwe​—tou bann Temwin Jéhovah.

Text orizinal li prepare an Angle. Komite Santral siperviz travay ki Servis Redaksion fer dan biro mondial. Sa departman-la diriz travay tou bann redakter ki servi dan biro mondial ek dan sertin biro nasional bann temwin Jéhovah. Bann redakter sorti dan diferan ras ek kiltir. Alor, sa permet nou ekrir lor diferan size ki tous bann dimounn dan diferan kiltir, koumsa nou bann piblikasion kapav interes bann dimounn dan tou pei.

Nou avoy text-la bann tradikter. Apre ki text-la inn pare ek aprouve, par computer nou avoy text-la bann lekip tradiksion partou lor later. Sa bann lekip-la tradir, verifie, ek koriz text-la. Zot fer zefor pou swazir “bann parol laverite ki exakt” dan zot lang pou transmet sans sa text Angle la.​—Ecclésiaste 12:10.

Travay-la al boukou pli vit gras-a bann computer. Enn computer pa kapav ranplas bann redakter ek bann tradikter. Me selman, zot travay boukou pli vit gras-a bann program lor computer, kouma par exanp bann diksioner ek bann lezot program ki ed zot fer bann resers. Bann Temwin Jéhovah finn kree enn sistem ki apel MEPS (Multilanguage Electronic Phototypesetting System: Sistem Elektronik Fotokonpozision Miltilang) ki permet konpoz bann text dan plizir santenn langaz ek asosie zot avek bann zimaz, ek apre avoy zot pou inprime.

Kifer nou fer sa kantite zefor-la pou prodir bann piblikasion, mem dan sertin lang, ki zis de-trwa milye dimounn koze? Parski se volonte Jéhovah ki “tou sort kalite dimounn sove ek gagn enn konesans exakt lor laverite.”​—1 Timothée 2:3, 4.

• Kouma nou ekrir nou bann piblikasion?

• Kifer nou tradir nou bann piblikasion dan tou sa bann lang-la?

Nou lorganizasion pibliye ek distribie plizir santenn milyon Labib ek lezot piblikasion par an. Tou nou bann piblikasion zot gratis. Nou konstrir ek antretenir Lasal Bann Temwin Jéhovah ek bann Béthel. Nou soutenir bann milye Betelit ek misioner. Nou organiz bann sekour pou bann ki’nn pas par bann katastrof. Alor kitfwa ou pe demann ou, ‘Kot nou gagn kas pou fer tousala?’

Nou pa demann ladim ni nou pas laket. Li vre ki nou travay predikasion kout boukou, malgre sa nou pa demann dimounn kas. Nou deziem nimero Latour Degard, ki dat plis ki san-t-an, ti dir ki nou kone ki se Jéhovah ki soutenir nou ek ki “zame nou pa pou sipliye dimounn pou soutenir nou.” Vremem, zame nou’nn fer li!​—Matthieu 10:8.

Nou travay soutenir par bann kontribision volonter. Boukou dimounn apresie travay ki nou fer pou ansegn Labib ek zot fer bann kontribision pou sa. Avek leker kontan, bann Temwin zot osi zot donn zot letan, zot lafors, zot kas, ek bann lezot kitsoz ki zot ena, pou ki volonte Bondie fer partou lor later. (1 Chroniques 29:9) Dan nou Lasal ek kot nou fer nou lasanble ena bann bwat kontribision. Ninport kisannla ki anvi, kapav met enn ti-kontribision dan sa bann bwat-la. An zeneral, se bann dimounn modes ki kontribie. Zot parey kouma sa vev bien mizer, ki Jésus ti koze la, ki ti met de ti pies larzan dan trezor tanp. (Luc 21:1-4) Alor, ninport kisannla kapav “met enn ti kitsoz dekote” regilierman, koumsa li kapav done parey “kouma li finn deside dan so leker.”​—1 Corinthiens 16:2; 2 Corinthiens 9:7.

Nou ena lasirans ki Jéhovah pou kontign pous bann ki anvi ‘onor Li avek zot bann kitsoz ki ena valer’ pou soutenir travay predikasion, pou ki so volonte kapav akonpli.​—Proverbes 3:9.

• Kifer nou relizion li diferan avek bann lezot relizion?

• Kouma servi bann kontribision volonter?

Se dan Lasal Bann Temwin Jéhovah ki nou kapav gagn lansegnman ki santre lor Rwayom Bondie​—tem Jésus so minister.​—Luc 8:1.

Se bann sant vre ladorasion. Se dan sa bann Lasal-la ki travay predikasion dan landrwa li organize. (Matthieu 24:14) Tou bann Lasal pa mem grander ouswa mem model, me zot tou zot bann batiman bien sinp. Parfwa plizir kongregasion servi mem Lasal. Dan bann lane ki’nn fek pase, nou finn konstrir plizir dizenn milye nouvo Lasal (enn mwayenn sink sak zour) parski kantite proklamater ek kongregasion pe kontign ogmante. Kouma tousala posib?​—Matthieu 19:26.

Gras-a bann kontribision nou kapav konstrir bann Lasal. Nou avoy sa bann kontribision-la biro nasional. Bann kongregasion ki bien bizin enn Lasal ouswa ki pe fer enn renovasion, kapav gagn sa kas-la.

Se bann volonter ki sorti dan diferan lanvironnman ki konstrir sa bann Lasal-la. Nou’nn organiz bann Lekip Konstriksion Lasal Bann Temwin Jéhovah dan boukou pei. Dan sa bann lekip-la ena bann serviter aplintan ek bann volonter. Zot al dan enn kongregasion apre lot, dan enn pei, ek mem dan bann landrwa bien retire. Zot ed bann kongregasion lokal pou konstrir zot Lasal. Dan lezot pei, bann Temwin kalifie finn nome pou siperviz konstriksion ek renovasion bann Lasal dan enn sertin rezion. Mem si ena boukou dimounn bien kalifie ki ede volonterman dan sak konstriksion, se sirtou bann manb kongregasion lokal ki fer pli boukou travay. Tousala li posib gras-a lespri Jéhovah ek tou bann zefor ki so pep pe fer avek tou zot nam.​—Psaume 127:1; Colossiens 3:23.

• Ki lansegnman nou gagne kan nou vinn dan Lasal Bann Temwin Jéhovah?

• Kouma nou konstrir bann Lasal partou dan lemond?

Sak Lasal Bann Temwin Jéhovah port nom Bondie, ki sin. Alor, pou nou se enn privilez pou gard nou Lasal prop, prezantab, ek dan enn bon leta. Anplis, nou kone ki sa li enn parti inportan dan nou ladorasion. Sakenn kapav partisipe.

Nou dispoze pou netwaye apre renion. Se avek lazwa ki bann frer ek ser met enn ti-lord dan Lasal, apre sak renion. Enn fwa par semenn, zot fer enn netwayaz inpe pli afon. Enn ansien ouswa enn asistan ministeryel organiz bann travay, ek bien souvan zot swiv enn ti-lalis bann kitsoz ki bizin fer. An zeneral, bann frer ek ser dispoze pou pas balie, pas mop, ouswa aspirater, anlev lapousier, redres bann sez, netway ek dezinfekte bann twalet, netway bann lafnet ek laglas, devid poubel, ek netway lakour. Omwin enn fwa par an, nou rezerv enn zour pou fer enn netwayaz zeneral. Nou fer nou bann zanfan osi partisipe dan sa bann netwayaz-la, koumsa nou ansegn zot pou ena respe pou plas kot nou ador Jéhovah.​—Ecclésiaste 5:1.

Nou dispoze pou fer bann reparasion. Toule lane, bann frer fer enn verifikasion Lasal an antie, ki li andan ouswa deor. Apre sa verifikasion-la, bann frer fer bann travay mintenans regilierman pou gard Lasal dan enn bon leta, ek koumsa evit bann depans initil. (2 Chroniques 24:13; 34:10) Enn Lasal ki prop, ki dan enn bon leta li enn plas dign pou ador nou Bondie. Kan nou partisip dan sa travay-la, nou montre ki kantite nou kontan Jéhovah ek ki valer plas kot nou ador Li ena pou nou. (Psaume 122:1) Anplis, sa rann enn bon temwaniaz dan landrwa.​—2 Corinthiens 6:3.

• Kifer fode pa nou negliz plas kot nou ador Jéhovah?

• Ki bann dispozision finn pran pou gard nou Lasal prop?

Eski ou ti pou kontan fer bann resers pou ogmant ou konesans lor Labib? Eski ou anvi gagn inpe plis detay lor enn verse Labib, lor enn personaz, enn landrwa, ouswa enn kitsoz ki mansione dan Labib? Eski ou finn deza demann ou si Labib kapav ed ou fer fas ar enn problem personel? Alor, servi bibliotek ki ena dan Lasal Bann Temwin Jéhovah.

Nou gagn bann zouti efikas pou fer resers. Kitfwa, ou pena tou piblikasion ki bann Temwin Jéhovah inn pibliye an Kreol ouswa Franse. Me, dan bibliotek Lasal ena tou bann dernie piblikasion, kitfwa ena mem diferan tradiksion Labib, enn bon diksioner, ek lezot liv referans. Ou lib pou servi sa bibliotek-la avan ek apre bann renion. Si ena enn computer dan Lasal, kitfwa ena Watchtower Library lor la. Dan sa program-la ena enn kantite nou bann piblikasion. Bien fasil pou fer resers lor sa program-la, parski ou zis ena pou tap enn size, enn mo, ouswa enn verse Labib.

Li itil pou bann zelev ki partisip dan renion Nou Lavi Kretien ek Nou Minister. Ou kapav servi bibliotek dan Lasal pou prepar ou devwar. Se responsab renion Nou Lavi Kretien ek Nou Minister ki responsab bibliotek. Li pou veye ki bibliotek-la bien an-ord ek ki ena tou bann dernie piblikasion. Responsab renion Nou Lavi Kretien ek Nou Minister ouswa dimounn ki fer ou letid kapav montre ou kouma fer bann resers. Nou pou pran bien prekosion kan nou servi sa bann liv-la. Nou pa pou ekrir ladan, ni nou pou amenn zot kot nou.

Labib explike ki, pou nou trouv “konesans Bondie” nou bizin dispoze pou rod li parey kouma nou ti pou rod “bann trezor ki finn kasiet.” (Proverbes 2:1-5) Bibliotek Lasal Bann Temwin Jéhovah kapav ed ou pou fer sa.

• Ki ou pou trouve dan bibliotek Lasal Bann Temwin Jéhovah?

• Kisannla kapav ed ou pou bien servi sa bibliotek-la?

Jésus Christ ti dir so bann disip: “Fer ki zot lalimier briye devan bann dimounn, pou ki bannla kapav trouv zot bon travay ek donn laglwar zot Papa ki dan lesiel.” (Matthieu 5:16) Pou nou arive fer sa, nou servi bien bann dernie teknolozi, kouma par exanp Internet. Sit Internet jw.org, se nou sit ofisiel kot ou kapav gagn bann linformasion lor krwayans ek laktivite bann Temwin Jéhovah. Ki ou pou trouve lor sa sit-la?

Repons ki Labib done lor bann kestion ki souvan nou poze. Ou pou kapav gagn repons laplipar kestion inportan ki bann dimounn poze. Par exanp trak Eski Soufrans Pou Arete enn Zour? ek Eski Vremem Bann Ki’nn Mor Kapav Reviv? zot disponib dan plis ki 600 lang lor nou sit. Ou kapav trouv osi Traduction du monde nouveau dan plis ki 130 lang ek enn kantite piblikasion ki pou ed ou konpran Labib, kouma par exanp liv Ki Labib Ansegne Vremem? ek bann dernie nimero Latour Degard ek Réveillez-vous ! Ou kapav swa lir swa ekoute lor Internet swa download enn kantite piblikasion dan bann forma kouma MP3, PDF, ouswa EPUB. Si ou zwenn enn dimounn interese ki koz enn lot lang, ou kapav mem inprim de-trwa paz enn piblikasion dan so prop lang! Ena enn kantite piblikasion dan forma video ki disponib dan langaz sign. Ou kapav download bann lektir Labib avek lefe sonor, bann dram biblik, ek bann zoli lamizik pou ekoute kan ou lib.

Ransegnman lor bann Temwin Jéhovah dan diferan pei. Lor nou sit, ou kapav gagn osi bann dernie nouvel ek bann video clip lor nou travay predikasion ki pe fer dan lemond antie. Ou kapav gagn osi bann ransegnman lor bann levennman ki afekte bann Temwin Jéhovah, ek lor sekour ki nou donn bann ki’nn pas dan enn katastrof. Ou kapav trouv osi dat nou prosin lasanble ek ladres nou bann biro nasional.

Par sa bann mwayin-la, nou pe fer lalimier laverite briye ziska dan bann rezion pli lwin lor later. Bann dimounn ki viv lor tou bann kontinan, mem dan l’Antarctique, al lor nou sit. Nou priye ki “parol Jéhovah kontign fane bien-bien vit” partou lor later, ek ki sa donn Bondie laglwar.​—2 Thessaloniciens 3:1.

• Kouma sit jw.org pe ed boukou dimounn pou konn laverite ki sorti dan Labib?

• Ki bann resers ou ti pou kontan fer lor nou sit Internet?