Boukou dimounn inn aret al legliz parski laba zot pa gagn ni enn rekonfor spiritiel ni repons pou zot bann kestion. Me alor, ki rezon ou ena pou asiste renion ki bann Temwin Jéhovah organize? Ki bienfe ou pou gagne?

Lazwa pou retrouv ou parmi bann dimounn ki ena lamour ek ki pran kont lezot. Dan premie siek, bann Kretien ti form plizir kongregasion. Zot ti fer bann renion pou ador Bondie, pou etidie Labib, ek ankouraz sakenn so kamarad. (Hébreux 10:24, 25) Kan zot ti zwenn ansam, sa ti kree enn bon latmosfer. Zot ti ena santiman ki zot ti parmi bann vre kamarad​—zot bann frer ek ser spiritiel. (2 Thessaloniciens 1:3; 3 Jean 14) Azordi nou swiv zot lexanp ek nou gagn mem lazwa.

Enn formasion ki pou ed ou aplik bann prinsip Biblik. Parey kouma dan lepok Biblik, bann zom, bann fam, ek bann zanfan zot reini ansam. Bann ansegnan kalifie servi Labib pou ed nou konpran kouma nou kapav aplik bann prinsip Biblik dan nou lavi toulezour. (Deutéronome 31:12; Nehémia 8:8) Nou tou nou kapav exprim nou lafwa ek nou lesperans kan nou partisip dan bann parti kestion-repons ek nou sant bann kantik.​—Hébreux 10:23.

Ou lafwa pou vinn pli for. Lapot Paul ti dir sa bann parol-la bann manb enn kongregasion dan so lepok: “Mo bien anvi trouv zot, . . . pou ki ena enn lesanz lankourazman par lafwa sakenn, par zot lafwa ek mo lafwa toulede.” (Romains 1:11, 12) Kan nou zwenn nou bann frer ek ser spiritiel dan renion regilierman, sa fortifie nou lafwa ek nou determinasion pou viv an-akor avek bann prinsip Biblik.

Eski ou ti pou kontan asiste nou prosin renion ek profit tou sa bann bienfe-la? Nou pou kontan pou trouv ou. Lantre li gratis ek nou pa pas okenn laket.

• Ki lexanp nou swiv pou organiz nou bann renion?

• Ki bienfe nou gagne kan nou asiste bann renion?

Mem si nou bizin fer enn long vwayaz, mars dan labou ouswa dan enn gro lapli, nou dispoze pou fer li pou asiste nou bann renion sak semenn. Kifer bann Temwin Jéhovah zot pre pou fer tou sa zefor-la pou reini ansam avek lezot Kretien, mem si zot bien fatige apre enn long zourne travay, ouswa mem si zot ena problem?

Sa fer nou dibien. “Interes nou sakenn ar nou kamarad.” Se seki lapot Paul ti ankouraz bann manb bann kongregasion pou fer. (Hébreux 10:24) Sa lexpresion-la vedir “pans boukou,” setadir fer zefor pou konn sakenn nou kamarad. Par sa bann parol-la, lapot Paul ti pe ankouraz nou pou pran kont nou kamarad. Kan nou aprann konn bann manb nou kongregasion, nou rann nou kont ki sertin finn reisi fer fas ar bann problem ki nou pe gagne. Sa kapav ed nou pou fer fas ar nou problem.

Nou devlop bann lamitie solid. Bann dimounn ki nou zwenn dan renion, zot pa bann sinp konesans, zot nou bann kamarad. Parfwa, nou pas bann bon moman ansam pou detann nou. Ki lefe sa ena? Nou aprann pou apresie nou kamarad, ek sa ogmant lamour ki nou ena pou zot. Ena enn lamitie solid ki devlope ant nou. Akoz samem nou pa ezite pou ed zot kan zot pas par bann sitiasion difisil. (Proverbes 17:17) Nou montre ki nou tou nou “trakase sakenn pou [nou] kamarad,” kan nou frekant tou dimounn dan kongregasion.​—1 Corinthiens 12:25, 26.

Nou ankouraz ou pou fer kamarad avek bann ki pe fer volonte Bondie. Ou pou trouv sa kalite kamarad-la parmi bann Temwin Jéhovah. Pa les nanye anpes ou frekant nou.

• Kifer li dan nou lintere pou nou reini ansam dan bann renion?

• Kan ou ti pou kontan fer konesans bann manb nou kongregasion?

Dan premie siek, bann Kretien ti sant bann kantik, priye, lir, ek diskit lor bann Lekritir pandan bann renion. Zot pa ti pratik okenn seremoni. (1 Corinthiens 14:26) Se koumsa mem ki nou bann renion deroule.

Enn lansegnman ki baze lor Labib ek ki pratik. Pandan week-end, sak kongregasion reini pou ekout enn diskour Biblik ki dir 30 minit. Sa diskour-la explik nou kouma Labib kapav ed nou dan nou lavi toulezour. Li koz osi lor lepok kot nou pe viv. Nou tou nou ankouraze pou swiv dan nou prop Labib. Apre diskour, ena Letid “Latour Degard” ki dir enn-er-tan. Pandan sa renion-la, bann manb kongregasion kapav partisip dan enn diskision baze lor enn lartik dan edision letid Latour Degard. Sa renion-la ed nou pou aplik bann konsey Labib dan nou lavi. Plis ki 110,000 kongregasion bann Temwin Jéhovah dan lemond antie etidie sa mem lartik-la anmemtan.

Led pou amelior nou kapasite pou ansegne. Nou osi reini enn lapremidi dan lasemenn pou enn renion an trwa parti ki apel Nou Lavi Kretien ek Nou Minister. Sa renion-la baze lor Kaye Renion Nou Lavi Kretien ek Nou Minister ki sorti toule mwa. Premie parti sa renion-la, Bann Trezor dan Parol Bondie, ed nou pou familiariaz nou avek parti Labib ki kongregasion bizin lir alavans. Dan deziem parti, Amelior To Minister, ena bann demonstrasion ki montre nou kouma pou koz lor Labib avek lezot. Enn frer pou donn nou bann konsey ki pou ed nou amelior nou kapasite pou lir ek koze. (1 Timothée 4:13) Dernie parti, Nou Lavi Kretien, examinn bann fason pratik pou aplik bann prinsip Labib dan nou lavi toulezour. Sa inplik enn size partisipasion lasistans ki pou ogmant nou konesans lor Labib.

Kan ou asiste nou bann renion, pena dout ki ou pou inpresione par bon lansegnman Labib ki ou pou gagne.​—Isaïe 54:13.

• Kouma nou bann renion deroule?

• Ki renion ou ti pou kontan asiste?

Lor bann zimaz ki ena dan sa brosir-la, eski ou’nn remarke kouma bann Temwin Jéhovah abiy zot kan zot asiste zot renion? Kifer eski nou vey bien lor fason ki nou abiye ek kwafe?

Par respe pou nou Bondie. Li vre ki Bondie pa get zis nou laparans. (1 Samuel 16:7) Me selman, kan nou rasanble pou ador Li, nou leker pous nou pou ena respe pou Li ek pou nou bann frer ek ser Kretien. Si nou ti ena pou pas devan enn ziz dan lakour, nou ti pou abiy nou bien, par respe pou pozision ki li ena. Li parey osi pou nou. Fason ki nou abiye pandan renion montre respe ki nou ena pou nou Bondie, Jéhovah, ki “Ziz lor later antie,” ek pou landrwa kot nou pe ador Li.​—Genèse 18:25.

Par respe pou bann prinsip ki diriz nou lavi. Labib ankouraz bann Kretien pou abiy “dan enn fason modes ek avek bon sans.” (1 Timothée 2:9, 10) Abiy “dan enn fason modes” vedir evit met bann linz ki kapav atir tro latansion lor nou, kouma par exanp bann linz ki kas lizie, provokan, dekolte, ouswa tro kourt. “Bon sans” pou ed nou swazir bann zoli linz ki pa debraye ouswa extravagan. Me sa bann prinsip-la permet nou kanmem pou abiy dan enn kantite diferan fason dapre nou gou personel. Kan nou abiy bien, avek bon gou sa ‘fer lansegnman nou Sover, vinn pli zoli’ ek sa “donn Bondie laglwar,” san mem ki nou bizin dir enn mo. (Tite 2:10; 1 Pierre 2:12) An realite, kan nou abiy bien pou bann renion, nou kapav sanz fason ki lezot konsider nou ladorasion pou Jéhovah.

Fode pa ki ou labiyman anpes ou vinn dan nou Lasal. Nou pa oblize met bann linz ki ser ouswa lamod. Seki pli inportan se ki nou linz li konvenab, prop, ek prezantab.

• Kifer fason ki nou abiye kan nou ador Bondie li bien inportan?

• Ki bann prinsip ki bizin gid nou lor nou fason abiye ek nou kwafir?

Si ou pe etidie Labib avek enn Temwin Jéhovah, sirman ou fer zefor pou prepar ou avan sak letid. Li bon ki ou fer parey avan ki ou asiste bann renion koumsa pou ou tir maximum profi. Nou gagn bann bon rezilta kan nou ena enn bon program.

Swazir enn bon moman ek enn bon landrwa pou etidie. Kan eski ou pli kapav konsantre? Boner gramatin avan ou koumans ou lazourne, ouswa tar aswar kan ou bann zanfan inn fini dormi? Mem si ou pa kapav etidie pandan lontan, fini deside alavans komie letan ou pou rezerve pou etidie ek pa les nanye kas ou program. Rod enn plas trankil kot pena nanye ki pou distrer ou. Tengn ou radio, ou televizion, ek ou portab. Priye avan ou etidie. Sa pou ed ou bliye bann traka ki ou’nn gagne pandan lazourne ek konsantre lor Parol Bondie.​—Philippiens 4:6, 7.

Soulign bann pwin inportan, ek prepar bann komanter. Avan tou, esey gagn enn lide zeneral lor size-la. Pans lor tit sa lartik-la ouswa sa sapit-la, ek gete ki rapor sak soutit ena avek tem sa size-la. Examinn osi rapor ki bann zimaz ek bann kestion revizion ena avek bann pwin prinsipal. Apre sa, lir sak paragraf, ek rod repons bann kestion ki ena anba. Rod bann verse Labib ki’nn site, lir zot, ek gete ki lien zot ena avek tem sa lartik-la. (Actes 17:11) Kan ou reisi trouv repons kestion-la, soulign bann mo inportan ouswa bann lexpresion dan paragraf ki pou ed ou rapel ou repons pandan renion. Lerla, dan renion, ou kapav lev ou lame pou fer enn ti komanter dan ou prop mo.

Kan ou examinn diferan size sak semenn dan bann renion, an realite ou pe azout bann nouvo perl dan ou “trezor,” setadir ou konesans lor Labib.​—Matthieu 13:51, 52.

• Ki program ou kapav etabli pou prepar bann renion?

• Kouma ou kapav prepar ou pou fer enn komanter dan renion?

Depi lepok lontan, Jéhovah finn touzour anvi ki sak fami pas letan ansam pou fortifie zot relasion avek Li ek vinn pli pros ar zot kamarad. (Deutéronome 6:6, 7) Akoz sa, bann Temwin Jéhovah rezerv enn moman sak semenn pou ador Jéhovah ansam. Dan enn fason relax, zot koz lor bann kitsoz spiritiel ki adapte avek seki zot bizin. Mem si ou res tousel, ou kapav profit sa bon lokazion-la pou pas letan avek Bondie, kan ou etidie lor enn size Biblik ki ou anvi.

Se enn moman pou vinn pros ar Jéhovah. “Vinn pros ar Bondie, ek Li pou vinn pros ar zot.” (Jacques 4:8) Nou konn Jéhovah pli bien kan nou dekouver so personalite ek so bann aksion atraver so Parol, Labib. Enn fason bien sinp pou koumans ou ladorasion an fami se kan ou rezerv inpe letan pou lir Labib ansam, kitfwa ou kapav swiv program lektir pou lasemenn pou renion Nou Lavi Kretien ek Nou Minister. Sak manb lafami kapav lir enn porsion Labib, ek lerla sakenn kapav partaz seki li’nn aprann.

Se enn moman pou vinn pros ar bann manb nou fami. Kan mari ek fam, paran ek zanfan etidie Labib ansam, zot vinn pli pros ar zot kamarad. Sa moman-la bizin enn moman kot zot tou dan lazwa, dan lape, enn moman ki zot tou atann sak semenn. Bann paran kapav swazir bann size ki pou itil, dapre laz zot bann zanfan. Kitfwa zot kapav servi bann lartik ki trouv dan Latour Degard ek Réveillez-vous ! ouswa lor nou sit Internet jw.org. Zot kapav koz lor enn problem ki zot zanfan finn gagne dan lekol ek gete kouma zot kapav fer fas ar sa. Zot kapav get Program Televizion JW (tv.jw.org) ek koz lor la apre. Zot kapav pratik bann kantik ki pou sante dan renion ek pran enn ti-zi ek enn ti-gato apre letid.

Sa bon moman ki zot pase ansam sak semenn pou ador Jéhovah la pou ed zot tou dan lafami pou trouv lazwa pou etidie Parol Bondie. Pena dout ki Jéhovah pou beni zot bann zefor.​—Psaume 1:1-3.

• Kifer nou bizin rezerv letan pou ladorasion an fami?

• Kouma bann paran kapav fer an-sort ki sa moman-la li agreab pou tou bann manb zot fami?

Kifer sa bann dimounn-la paret kontan koumsa? Zot pe asiste enn nou bann lasanble. Parey kouma bann serviter Bondie lepok lontan ti gagn lord pou rasanble trwa fwa par an, nou’si zordi, nou atann avek inpasians kan nou pou rasanble ansam avek plizir kongregasion. (Deutéronome 16:16) Sak lane nou ena trwa lasanble: de lasanble sirkonskripsion ki dir enn zour, ek enn lasanble rezional ki dir trwa zour. Ki bienfe nou gagne kan nou asiste sa bann lasanble-la?

Zot fer nou vinn pli pros avek nou bann frer ek ser. Bann Izraelit ti dan lazwa kan zot ti donn laglwar Jéhovah “dan bann lasanble.” Nou osi nou kontan kan nou ador Jéhovah ansam avek nou bann frer ek ser pandan bann lasanble. (Psaume 26:12, not; 111:1) Sa bann rasanbleman-la donn nou lokazion pou zwenn ek pou pas bann moman avek bann Temwin lezot kongregasion ouswa mem ki sorti dan lezot pei. Nou tou nou res ansam pandan poz midi, seki kree enn bon latmosfer. (Actes 2:42) Pandan sa bann lasanble-la, nou kapav resanti personelman lamour ki rasanble “tou lafami nou bann frer” dan lemond antie.​—1 Pierre 2:17.

Zot ed nou pou progrese lor plan spiritiel. Bann Izraelit ti tir profi osi kan zot ti “konpran bann parol” ki sorti dan bann Lekritir ki bann pret ti explik zot. (Nehémia 8:8, 12) Nou osi nou apresie lansegnman Biblik ki nou gagne dan bann lasanble. Sak program baze lor enn tem Biblik. Atraver bann diskour bien interesan ek bann demonstrasion, nou aprann kouma nou kapav fer volonte Bondie. Antan ki Kretien, nou fer fas ar bann difikilte dan sa lepok difisil kot nou pe viv zordi la. Alor, sa ankouraz nou kan nou tann lexperyans bann frer ek ser ki’nn reisi fer fas ar sa bann difikilte-la. Dan bann lasanble rezional ena bann dram ki baze lor bann zistwar Biblik ki ansegn nou bann leson pratik. Dan sak lasanble, tou bann ki anvi montre ki zot finn ofer Bondie zot lavi kapav pran batem.

• Kifer nou kontan pou asiste nou bann lasanble?

• Ki bienfe ou pou gagne kan ou asiste enn lasanble?

Enn tipe avan li mor, Jésus ti dir: “Sa bon nouvel lor Rwayom la pou prese partou kot dimounn reste lor later kouma enn temwaniaz pou tou bann nasion, ek lerla lafin pou vini.” (Matthieu 24:14) Me kouma nou pou reisi fer sa travay-la dan lemond antie? Se kan nou swiv lexanp ki Jésus inn lese.​—Luc 8:1.

Nou prese lakaz par lakaz. Jésus ti montre so bann disip kouma pou pres bon nouvel lakaz par lakaz. (Matthieu 10:11-13; Actes 5:42; 20:20) Sa bann premie predikater-la ti gagn bann teritwar presi kot zot ti bizin prese. (Matthieu 10:5, 6; 2 Corinthiens 10:13) Zordi osi parey, nou travay predikasion li bien organize, ek sak kongregasion gagn bann teritwar presi kot zot bizin prese. Sa permet nou akonpli mision ki Jésus inn donn nou pou “pres avek bann dimounn ek pou donn temwaniaz afon.”​—Actes 10:42.

Lezot form predikasion. Jésus inn osi donn lexanp kan li’nn pres dan bann plas piblik, kouma par exanp lor enn laplaz ouswa pre kot enn pwi. (Marc 4:1; Jean 4:5-15) Nou’si nou koumans bann konversasion lor Labib ninport kotsa nou ete​—lor semin, dan bann teritwar komersial, dan bann zardin, ouswa par telefonn. Kan nou gagn lokazion, nou rann temwaniaz nou bann vwazin, nou bann koleg travay, nou bann kamarad lekol, ek nou bann fami. Gras-a tou sa bann zefor-la, bann milyon dimounn partou lor later pe kapav tann sa ‘bon nouvel lor delivrans la.’​—Psaume 96:2.

Ar kisannla ou ti pou kontan partaz sa bon nouvel lor Rwayom Bondie la, ek explik li bann bienfe li kapav gagne dan lavenir gras-a sa? Pa gard sa mesaz lespwar la zis pou ou tousel. Fer lezot konn sa pli vit posib!

• Ki “bon nouvel” nou bizin anonse?

• Kouma bann Temwin Jéhovah pe swiv metod ki Jésus ti servi pou prese?

Bien souvan sa mo “pionie” la fer referans ar enn kikenn ki al dekouver bann nouvo teritwar ek ouver enn semin pou lezot swiv. Nou kapav dir ki Jésus ti enn pionie parski Jéhovah ti avoy li lor later pou pres enn mesaz ki donn lavi ek ouver semin pou ki bann dimounn gagn delivrans. (Matthieu 20:28) Zordi, so bann disip pe imit li kan zot pas maximum zot letan pou “fer bann disip.” (Matthieu 28:19, 20) Sertin finn mem kapav pran seki nou apel servis pionie.

Enn pionie li prese aplintan. Tou bann Temwin Jéhovah zot bann proklamater bon nouvel. Me, sertin finn organiz zot pou servi antan ki pionie permanan, ek zot fer 70-z-er sak mwa dan predikasion. Pou zot kapav fer sa, boukou desid pou travay part-time. Sertin gagn osi privilez pou servi antan ki pionie spesial dan bann rezion kot bizin plis proklamater ek zot pas 130-er ouswa plis dan zot servis toule mwa. Bann pionie amenn enn lavi sinp, ek zot ena konfians ki Jéhovah pou donn zot seki zot bizin pou viv. (Matthieu 6:31-33; 1 Timothée 6:6-8) Bann ki pa kapav fer pionie aplintan ena posibilite pou servi kouma pionie tanporer (pionnier auxilliaire) ek pres 30 ouswa 50-er par mwa.

Enn pionie li motive par lamour pou Bondie ek bann dimounn. Parey kouma Jésus, nou rann nou kont ki ena boukou dimounn ki bien bizin konn Bondie. (Marc 6:34) Me, konesans ki nou ena kapav ed zot asterla mem, ek donn zot enn lespwar solid pou lavenir. Lamour pou so prosin motiv enn pionie pou donn tou so letan ek so lenerzi pou ed lezot lor plan spiritiel. (Matthieu 22:39; 1 Thessaloniciens 2:8) An-retour, so lafwa vinn pli for, li vinn pli pros ar Bondie, ek li gagn boukou lazwa.​—Actes 20:35.

• Kouma ou pou dekrir enn pionie?

• Ki kitsoz motiv sertin pou prese aplintan?

Depi bien lontan, bann Temwin Jéhovah finn atas boukou linportans ar linstriksion ki sorti kot Jéhovah. Ena bann lekol spesial pou bann ki pres Rwayom Bondie aplintan, koumsa zot kapav ‘akonpli zot minister afon.’​—2 Timothée 4:5.

Lekol Pionie. Apre ki enn pionie permanan inn fini fer so enn an servis, li kapav asiste enn lekol ki dir sis zour, ki fer dan Lasal Bann Temwin Jéhovah pa tro lwin kot li reste. Lobzektif sa lekol-la se pou ed pionie-la pou vinn pli pros ar Jéhovah, pou vinn pli efikas dan diferan laspe so minister, ek pou kontign so servis.

Lekol pou Bann Evanzelizater Rwayom Bondie. Sa lekol-la dir de mwa. So lobzektif se pou form bann pionie ki ena lexperyans ki dispoze pou kit landrwa kot zot reste pou al ede kot bizin led. Kan zot dir “Ala mo la! Avoy mwa,” an realite zot pe imit Jésus Christ, pli gran Evanzelizater ki’nn vinn lor later pou servi lezot. (Isaïe 6:8; Jean 7:29) Lefe ki zot bizin al res dan enn lot landrwa, kitfwa zot pou bizin adapte ar enn lavi ki boukou pli sinp ki seki zot ti pe amene. Li posib ki kiltir, klima ek kalite manze bien diferan ar seki zot ti abitie. Kitfwa zot pou bizin mem aprann enn nouvo lang. Sa lekol-la ed bann frer-ser selibater ek bann koup marye ki ena ant 23 a 65 an pou devlop bann kalite spiritiel ki zot pou bizin dan zot servis ek bann kapasite ki pou ed zot servi Jéhovah ek so lorganizasion ankor plis.

Lekol Biblik Guiléad. An Ebre mo “Guiléad” vedir “enn pil Temwin.” Depi 1943, Lekol Biblik Guiléad finn avoy plis ki 8,000 diplome antan ki misioner pou donn enn temwaniaz “ziska dan bout later,” ek zot finn gagn bann bon rezilta. (Actes 13:47) Kan bann misioner ti met lipie dan Pérou, pa ti ena okenn kongregasion laba. Asterla ena plis ki 1,000 kongregasion. Kan nou bann misioner ti koumans servi dan Japon, ti ena mwins ki dis Temwin. Me, azordi ena plis ki 200,000 Temwin. Kour Guiléad dir sink mwa ek li inplik enn letid profon lor Parol Bondie. Bann ki servi antan ki pionie spesial, bann misioner ki pankor swiv kour Guiléad, bann ki pe servi dan bann Biro nasional, ouswa bann sirveyan sirkonskripsion, invite pou asiste sa kour bien profon la. Pou ki rezon? Pou stabiliz ek fortifie travay predikasion ki pe fer dan lemond antie.

• Ki lobzektif lekol pionie?

• Lekol pou Bann Evanzelizater Rwayom Bondie finn fer pou kisannla?