Kisannla kapav konn l’avenir?
“Mo-mem Bondié . . . , sa Kikenn ki depuis commencement faire konn la fin, ek depuis bien longtemps avant bann kitsoz ki pankor faire.”—Isaïe 46:9, 10.
DAN sa lepok ki pa stable-la, bann expert dan domaine politik, finance, ek social, etudié l’Histoire ek bann tendance moderne pou essaye predire l’avenir. Certain tellement envie koné ki l’avenir reservé pou zot personnellement ki zot tourne-zot vers l’astrologie ou-soit spiritisme pou trouve bann reponse. Souvent sa bann dimoune-la decouragé avek bann resultat ki zot gagné. Eski li vrai-mem impossible pou koné ki pou arrive sa le monde-la, nou bann famille, ek sakenn parmi nou? Eski ena vrai-mem enn kikenn ki kapav predire l’avenir?
Dan bann parole ki Li ti dire ar prophete Isaïe ek ki cité au commencement sa lartik-la, Bondié Tout-Puissant, Jéhovah, decrire so prop capacité pou predire l’avenir. Par moyen prophete Isaïe, Bondié ti annoncé ki bann Israélite ti pou liberé dan Babylone kot zot ti en captivité ek ki zot ti pou retourne dan zot pays pou reconstruire Jérusalem ek so temple. Ziska ki point sa prophetie-la ti donne bann detail precis? Environ 200 an a l’avance, Isaïe ti faire konn nom sa kikenn ki ti pou prend la ville Babylone-la, setadir Cyrus. En plus, Isaïe ti donne bann detail exact lor plan ki Cyrus ti ena—li ti pou detourne la riviere l’Euphrate, ki ti protege la ville. Isaïe ti predire ki bann grand la porte deux battant ki ti ena dan muraille la ville ti pou reste grand ouvert par negligence, seki ti pou permette Cyrus gagne la victoire facilement.—Isaïe 44:24–45:7.
Comparé ar Bondié, bann dimoune pena pouvoir pou koné ki l’avenir reservé. Le roi Salomon ki ti sage ti ecrire: “Pa faire vantard concernant seki pou arrivé demain, parski to pa koné seki enn jour pou amené.” (Proverbes 27:1) Seki Salomon ti dire encore toujours vrai. Okenn dimoune pa kapav konn l’avenir, mem pa so prop l’avenir. Mais Bondié Li, Li different. Dan ki sens? Li comprend net tou kitsoz ki Li’nn crée, parmi ena nature ek tendance bann dimoune. Si Li envie, Bondié kapav predire exactement couma bann dimoune pou agir lor plan individuel ou-soit en tant ki nation. En plus, so capacité pou controle consequence bann l’evenement pena limite. Kan par moyen so bann prophete, Li annoncé ki enn kitsoz pou arrivé, Li vinn “sa Kikenn ki faire parole so serviteur vinn vrai, ek sa Kikenn ki realise tou seki so bann messager inn annoncé.” (Isaïe 44:26) Zis Jéhovah tousel ki kapav dire sa bann parole-la sans koz menti.
Isaïe ti vive plus ki 700 an avant Jésus, le Messie. Pourtant, Isaïe ti prophetisé concernant Messie ki ti pou vini. Mais surtout a partir 18eme siecle, bann ki critik la Bible inn faire croire ki livre Isaïe fausse. Zot inn dire ki bann prophetie Isaïe pa ti vrai-mem bann prophetie mais ki c’est apré ki bann kitsoz ti fini arrivé ki enn ecrivain ti zis raconte seki ti’nn passé. Eski sa vrai? En 1947, ti decouvert enn copie livre Isaïe ensam avek bann lezot ancien rouleau, dan enn la grotte pré kot la mer Morte. Bann specialiste ti dire ki ti’nn ecrire sa copie-la plus ki cent an avant naissance Messie, setadir Christ. Oui, pena okenn doute, la Bible ti faire konn l’avenir!
Si Isaïe ek lezot ecrivain la Bible ti base zis lor zot prop sagesse, zot pa ti pou kapav predire bann l’evenement ki ti pou arrivé dan l’avenir. En realité, “c’est grace a l’esprit saint ki’nn pousse zot, ki bann dimoune inn dire seki Bondié ti ena pou dire.” (2 Pierre 1:21) Dan bann prochain lartik, nou pou examine certain detail dan la vie Jésus ki Isaïe ti annoncé. Apré nou pou guette bann l’evenement ki Jésus ek so bann disciple ti annoncé pou nou lepok ek aussi pou l’avenir.