Bann l’evenement ki’nn annoncé pou nou lepok

LA BIBLE annoncé ki Royaume Bondié pou amenn la paix ek bonheur lor la terre pou touletan. (Daniel 2:44) Dan la priere Notre Père, Jésus inn montré so bann disciple pou prié: “Ki to royaume vini. Ki to volonté faire lor la terre pareil couma dan le ciel.” (Matthieu 6:10) Dan sa prophetie important ki li ti donne so bann disciple lor mont des Oliviers-la, Jésus ti predire bann l’evenement ek bann condition precis ki ti pou ena zis avant ki so Royaume amenn bann changement lor la terre. Tou seki li ti predire forme partie dan enn signe ki tou bann observateur ki ena leker sincere ti pou trouvé dan enn fason bien clair. Dan sa la liste ki mentionné-la, comié ou-mem ou’nn reconette personnellement?

Bann la guerre international. Jésus ti predire: “Nation pou leve kont nation ek royaume kont royaume.” (Matthieu 24:7) Avant premier la guerre mondial en 1914, bann la guerre ti plutot deroulé zis dan certain l’endroit. Premier Guerre mondial pa ti zis plonge bann grand partie la terre dan la guerre mais li ti augmente developpement bann zarme pli terrible ki seki ti existé avant. Par exemple, alors ki bann zom ti’nn fek invente avion, zot ti servi sa pou largue bann bombe lor bann dimoune innocent ki pa ti pé laguerre. Bann nation ti augmente zot production zarme par enn grand quantité ek lerla pli beaucoup dimoune ti mort, plus ki seki bann zom ti kapav pensé avant sa. Environ la moitié sa 65 million soldat ki ti prend part dan la guerre-la ti mort ou-soit ti blessé. Pourtant, toute longue 20^eme siecle, bann la guerre inn touye encore plus dimoune. Pareil couma enn historien ti dire “jamais nou pa pou koné vrai-mem comié” soldat ek comié dimoune innocent ki pa ti pé laguerre inn trouve la mort a cause Deuxieme Guerre mondial. Ek bann la guerre encore pé contigné ziska ler.

La famine partout. Jésus ti predire: “Pa pou ena assez mangé.” (Matthieu 24:7) En 2005, magazine Science ti dire: “Ena 854 million dimoune dan le monde (apepré 14% population) ki touletan mal nourri ou-soit ki passe par bann periode kot zot pa gagne preské ditou mangé.” En 2007, enn rapport ki sorti dan enn section Nations Unies ti dire ki 33 pays pena assez mangé pou nourri zot population. Couma sa kapav arrivé alors ki production cereale pé augmenté? Enn raison, c’est parski pé servi bann la terre ek cereale ki ti kapav nourri bann dimoune, pou produire ethanol pou remplace l’essence. The Witness, enn journal sud-africain dire ki pou rempli tank enn gros quatre-quatre, bizin servi mem quantité cereale ki ti pou assez pou nourri enn dimoune pendant enn an.” Mem dan bann pays developpé, prix mangé ki pé augmenté force beaucoup dimoune pou choisir entre soit acheté mangé soit paye bann lezot necessité la vie, couma par exemple paye bann medecine ou-soit seki zot bizin pou chauffe zot lakaz.

Bann grand tremblement de terre. Jésus ti dire: “Pou ena bann grand tremblement de terre.” (Luc 21:11) Si ou ena l’impression ki zordi pli beaucoup dimoune affecté par bann tremblement de terre ki avant, ou ena raison. En 2007, Rajender Chadha, enn expert indien dan domaine tremblement de terre ti dire: “Enn sel coup, nou pé trouve bann tremblement de terre arrive pli souvent partout lor la terre. Personne pa koné kifer.” En plus, parski population pé augmenté bien vite dan bann l’endroit kot ena bann risk tremblement de terre, pli beaucoup dimoune mort dan sa bann catastrophe-la. En 2004, ti ena enn tremblement de terre dan l’ocean Indien ek sa ti provok enn tsunami. Dapré Centre américain d’études géologique, “dan enn periode preské 500 an kot finn ena bann tremblement de terre, 2004 c’est l’année kot finn ena pli beaucoup dimoune ki finn mort” ek c’est “deuxieme fois dan l’Histoire ki autant dimoune inn mort.”

Bann maladie ki pa facile pou faire disparette. Jésus ti predire: “Pou ena bann l’epidemie.” (Luc 21:11) Dan le monde entier, pli allé bann maladie ki ti existé longtemps ek bann nouveau maladie pé affecté pli beaucoup dimoune. Li pa facile pou trouve bann moyen pou gueri sa bann maladie-la. Par exemple, bann dimoune inn faire bann zeffort lor plan international pou tire malaria net, mais plusieurs fois zot pa finn reussi realise zot l’objectif couma zot ti envie parski sa maladie-la pé contigne vinn pli difficile pou controlé. En plus, bann maladie ki ti existé longtemps ek ki’nn reapparette pé touye bann million dimoune. Par exemple ena tuberculose, ki zordi marche ensam avek SIDA ek lezot nouveau maladie. L’Organisation mondial pou la santé dire: “Zordi enn tiers population mondial affecté par bacterie tuberculose.” Sa l’organisation-la dire aussi ki virus SIDA favorise bann l’epidemie tuberculose dan beaucoup pays. Chaque seconde ki passé, ena enn dimoune ki attrape tuberculose, ek pli allé sa maladie-la pé resisté kont bann medecine. En 2007, en Europe, bann docteur ti trouvé ki enn patient ti gagne tuberculose ek dapré magazine New Scientist sa maladie-la ti “resisté kont tou medecine ki nou ena.”

Bann valeur moral ek social tombe bien bas. Jésus ti dire: “Parski bann pratik ki kont la loi pou augmenté, l’amour beaucoup dimoune pou refroidi.” (Matthieu 24:12) A part seki Jésus ti predire, l’apotre Paul ti annoncé ki bann valeur moral ek social pou tombe bien bas. Li ti decrire bann “dernier jour” difficile ki ti pou ena zis avant ki Royaume Bondié detruire sa systeme-la. Li ti dire: “Bann dimoune pou content zot-mem, zot pou content l’argent, zot pou vantard, zot pou ena l’orgueil, zot pou koz en mal lor lezot ek lor Bondié, zot pou desobeir zot parent, zot pou ingrat, zot pa pou fidele, zot pa pou ena okenn affection naturel, zot pa pou d’accord entre zot-mem, zot pou mette bann fausse accusation lor lezot, zot pa pou konn controle-zot, zot pa pou ena okenn pitié, zot pa pou content seki bien, zot pou traitre, zot pou ena la tête dur, zot pou rempli ar l’orgueil, zot pou plutot content plaisir ki Bondié, zot pou faire coumadir zot attaché ar Bondié, mais zot pou trahir so pouvoir.” (2 Timothée 3:1-5) Eski ou pa’nn remarké ki zordi bann dimoune manifesté sa bann qualité defaut-la plus ki avant?

Jésus ek Paul pa ti donne enn la liste tou bann raison historik, social, ek politik ki responsable pou sa bann condition ki ena dan le monde-la. Mais zot bann prophetie inn annonce dan enn fason exact bann l’evenement ek bann l’attitude ki nou pé trouvé zordi. Ki nou kapav dire lor l’avenir? Prophetie Isaïe ki’nn annoncé dan enn fason precis ki Messie pou vini, decrire aussi bann bon changement ki Royaume Bondié pou amené lor la terre. Anou guette certain sa bann changement-la dan prochain lartik.

[Zimage page 6]

“Nation pou leve kont nation”

[Zimage page 7]

“Pou ena bann l’epidemie”

[Remerciement photo]