Garde zot lizié fixé lor prix ki zot pou gagné

“Mo pé poursuive mo la course vers l’objectif pou gagne prix.”—PHIL. 3:14.

1. Ki prix Bondié ti offert l’apotre Paul?

L’APOTRE Paul, ki ti appel aussi Saul de Tarse, ti sorti dan enn famille bien important. C’est Gamaliel, enn enseignant la Loi ki ti ena enn grand reputation ki ti enseigne li dan religion so bann ancetre. (Actes 22:3) Paul ti ena seki beaucoup ti kapav considere couma enn grand carriere; pourtant, li ti abandonne so religion ek ti vinn enn chretien. Apré sa, li ti attann pou gagne prix la vie eternel ki Bondié ti offert li—setadir pou vinn enn le roi ek enn pretre immortel dan Royaume Bondié ki dan le ciel. Sa Royaume-la pou regne lor la terre ki pou vinn enn paradis.—Mat. 6:10; Rév. 7:4; 20:6.

2, 3. Ki quantité valeur prix ki li ti pou gagné, setadir la vie dan le ciel, ti ena pou Paul?

² Pou montré ki Paul ti considere sa prix-la couma enn kitsoz ki ena enn grand valeur, li ti dire: “Bann kitsoz ki ti bann l’avantage pou moi, mo finn considere zot couma enn perte a cause Christ. Oui vrai-mem, mo considere tou kitsoz couma enn perte parski connaissance lor Christ Jésus, mo Seigneur ena enn grand valeur. A cause li, mo finn accepté perdi tou kitsoz ek mo considere tousala couma enn tas saleté.” (Phil. 3:7, 8) La plupart dimoune considere enn grand position dan le monde, la richesse, enn grand carriere ek la gloire couma bann kitsoz ki important. Mais Paul li, li ti considere tousala couma bann saleté apré ki li finn aprann la verité lor projet ki Jéhovah ena pou bann dimoune.

³ Depuis sa, connaissance ki ena valeur ki Paul ti gagné lor Jéhovah ek Christ, ti vinn kitsoz ki ti pli important pou li. Concernant sa connaissance-la, Jésus ti dire dan enn la priere: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Paul ti ena enn grand desir pou gagne la vie eternel. Nou trouve sa bien dan seki li ti ecrire dan Philippiens 3:14: “Mo pé poursuive mo la course vers l’objectif pou gagne prix, setadir l’appel Bondié pou al la-haut par moyen Christ Jésus.” Oui, so lizié ti fixé lor sa prix ki li ti pou gagné-la, setadir la vie eternel dan le ciel ek pou forme partie dan Royaume Bondié.

Vive pou touletan lor la terre

4, 5. Ki prix ki devant plusieurs million dimoune ki pé faire volonté Bondié zordi?

⁴ Pou la plupart dimoune ki choisir pou faire volonté Bondié, li vaut la peine ki nou travail dur pou gagne sa prix ki Bondié offert nou-la, setadir la vie eternel dan le monde nouveau ki Li’nn promette. (Ps. 37:11, 29) Jésus ti confirmé ki sa l’esperance-la li sur. Li ti dire: “Heureux bann dimoune ki ena enn caractere doux, parski zot pou herite la terre.” (Mat. 5:5) Psaume 2:8 montré nou ki Jésus li-mem li principal heritier la terre, ek pou ena 144,000 dimoune ki pou al regne avek li dan le ciel. (Dan. 7:13, 14, 22, 27) Bann dimoune ki forme partie dan lezot brebis ek ki pou vive lor la terre, pou “herite” la terre ki pou dirigé par Royaume “ki finn preparé pou zot depuis fondation le monde.” (Mat. 25:34, 46) Nou ena l’assurance ki tousala pou realisé parski Bondié ki’nn faire nou sa promesse-la, “pa kapav koz menti.” (Tite 1:2) Josué ti dire bann Israélite: “Dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot. Pena enn sel parole ladan ki pa finn accompli.” (Jos. 23:14) Pareil couma li, nou kapav ena mem confiance ki bann promesse Jéhovah pou realisé.

⁵ La vie dan le monde nouveau ki Bondié pou faire, pa pou pareil couma la vie ki nou pé amené zordi, enn la vie ki pa donne nou satisfaction. La vie pou bien different: pa pou ena la guerre, crime, misere, injustice, maladie ek la mort. Dan le monde nouveau, bann dimoune pou ena enn la santé parfait ek pou vive lor enn la terre transformé en paradis. Sa la vie-la pou donne nou enn grand satisfaction, li pou pli joli ki tou seki nou ti pou kapav revé. Oui, lerla chaque jour pou donne nou enn grand la joie. C’est vrai-mem enn prix extraordinaire ki nou pou gagné!

6, 7. (a) Couma Jésus ti montré seki pou arrivé dan le monde nouveau? (b) Couma mem bann dimoune mort pou kapav commence enn nouveau la vie?

⁶ Kan Jésus ti lor la terre, Bondié ti donne li pouvoir grace a So l’esprit saint ek sa ti permette li montré ki qualité bon kitsoz li pou faire partout lor la terre dan le monde nouveau. Par exemple, Jésus ti dire enn missié marché, alors ki sa missié-la ti paralysé depuis 38 an. La Bible dire nou ki sa missié-la ti marché. (Lire Jean 5:5-9.) Enn lot fois, Jésus ti joinde “enn missié ki ti aveugle depuis so naissance” ek li ti gueri li. Plitar, certain ti demann sa missié-la bann renseignement lor sa Kikenn ki ti’nn gueri li-la, ek li ti reponn: “Depuis lepok longtemps, jamais nou finn tendé ki enn kikenn inn faire enn dimoune ki aveugle depuis so naissance, trouve clair. Si sa missié-la pa ti sorti kot Bondié, li pa ti pou kapav faire nanyin.” (Jean 9:1, 6, 7, 32, 33) Jésus ti kapav faire tousala parski li ti gagne pouvoir ar Bondié. Partout kot li ti allé, Jésus ti “gueri bann ki ti bizin guerison.”—Luc 9:11.

⁷ Jésus pa ti zis ena pouvoir pou gueri bann dimoune malade ek handicapé, li ti kapav aussi ressuscite bann dimoune ki ti’nn mort. Par exemple, enn tifi 12 an ti mort ek sa ti faire so bann parent bien chagrin. Mais Jésus ti dire li: “Jeune fille, mo dire toi: Levé!” Tifi-la ti levé. Eski ou kapav mazinn reaction so bann parent ek lezot ki ti la? (Lire Marc 5:38-42.) Dan le monde nouveau, pou ena enn “la joie extraordinaire” kan bann dimoune pou ressuscité par milliard, parski “pou ena enn resurrection bann dimoune ki juste ek bann dimoune ki pa juste, toulé-deux.” (Actes 24:15; Jean 5:28, 29) Sa bann dimoune-la pou commence enn nouveau depart dan la vie. A partir sa moment-la, zot pou ena possibilité pou vive ek zot pou mem kapav vive pou touletan.

8, 9. (a) Pendant regne mille an Christ, ki pou arrivé ar peché ki nou finn herité ar Adam? (b) Lor ki base pou juge bann dimoune mort?

⁸ Bann ki pou ressuscité pou ena possibilité pou gagne la vie. Bondié pa pou juge zot dapré bann peché ki zot ti’nn faire avant zot mort. (Rom. 6:7) Pendant regne mille an Christ, a mesure ki pou applik bann bienfait so sacrifice lor bann dimoune obeissant ki Royaume Bondié pou dirigé, tigit par tigit sa bann dimoune-la pou vinn parfait ziska ki finalement zot pou delivré net ar tou bann consequence peché Adam. (Rom. 8:21) Jéhovah “pou faire la mort disparette pou touletan, ek vrai-mem Souverain Seigneur Jéhovah pou souye larme lor tou bann figure.” (Is. 25:8) Parole Bondié dire aussi ki pou “ouvert bann rouleau”; sa montré ki bann dimoune ki pou vive dan sa lepok-la, pou gagne bann nouveau l’instruction. (Rév. 20:12) A mesure ki la terre pou transformé en paradis, “bann habitant ki reste lor la terre vrai-mem pou aprann la justice.”—Is. 26:9.

⁹ Pa pou juge bann ressuscité dapré peché ki zot inn herité ar Adam, mais dapré seki zot pou choisir pou faire. Révélation 20:12 dire: “Ti juge bann dimoune mort dapré bann kitsoz ki ti ecrire dan bann rouleau dapré zot bann action,” setadir bann action ki zot pou faire apré zot resurrection. C’est vrai-mem enn l’exemple extraordinaire ki montré la justice Jéhovah, so misericorde ek so l’amour! En plus, bann dimoune “pa pou rappel bann kitsoz [ki’nn faire zot souffert dan sa vié le monde-la], ek sa pa pou vinn dan zot leker.” (Is. 65:17) Avek bann nouveau l’instruction bien encourageant ki zot pou gagné, ek enn la vie rempli ar bann bon kitsoz, zot pou nepli bouleversé par bann mauvais kitsoz ki finn ena dan le passé. Zot pou blié tou bann mauvais l’experience ki zot inn faire. (Rév. 21:4) Sa applik aussi pou ‘la grande foule’ ki pou survive Har-Maguédôn.—Rév. 7:9, 10, 14.

10. (a) Couma la vie pou été dan le monde nouveau? (b) Ki ou kapav faire pou garde ou l’esprit fixé lor prix ki Bondié offert?

¹⁰ Dan le monde nouveau, bann dimoune pou kapav vive sans ki zot tombe malade ek mort. “Okenn habitant pa pou dire: ‘Mo malade.’ ” (Is. 33:24) Finalement, bann habitant le monde nouveau pou levé chaque gramatin avek enn la santé parfait, zot pou impatient pou commence enn nouveau la journée extraordinaire. Zot pou attann avek impatience pou faire enn travail ki pou donne zot satisfaction ek zot pou frequente bann dimoune ki interessé ar zot. Sa qualité la vie-la li vrai-mem enn prix extraordinaire ki zot pou gagné! Kifer ou pa ouvert ou la Bible ek lire bann prophetie ki trouve dan Isaïe 33:24 ek 35:5-7? Kan ou pé lire sa bann passage-la, essaye maziné ki ou pé vive sa. Sa pou aide ou pou garde ou l’esprit fixé lor prix ki Bondié offert.

Certain pa finn garde zot lizié fixé lor sa prix-la

11. Decrire bon commencement ki regne Salomon ti ena.

¹¹ Enn fois ki nou finn aprann concernant sa prix-la, nou bizin travail dur pou garde nou lizié fixé lor la parski li kapav arrivé ki nou blié sa. Par exemple, dan le passé kan Salomon ti vinn le roi en Israël, avek humilité, li ti prié Bondié pou donne li l’intelligence ek discernement pou li kapav juge So peuple couma bizin. (Lire 1 Rois 3:6-12.) Resultat: la Bible dire ki “Bondié ti contigne donne Salomon beaucoup sagesse ek l’intelligence.” Oui, “sagesse ki Salomon ti ena, ti beaucoup pli grand ki sagesse tou bann dimoune ki ti reste dan l’Orient ek tou sagesse dan l’Égypte.”—1 Rois 4:29-32.

12. Ki l’avertissement Jéhovah ti donne bann ki ti pou vinn le roi en Israël?

¹² Selman avant sa, Jéhovah ti donne enn l’avertissement ki concerne n’importe kisannla ki ti pou vinn le roi. Li ti dire ki “fodé pa li augmente quantité cheval ki li ena” ek ki “fodé pa li ena beaucoup madame, pou ki so leker pa detourné.” (Deut. 17:14-17) Si le roi ti augmente so bann cheval, sa ti pou montré ki li ti compte lor la force so l’armée pou protege la nation au lieu lor Jéhovah ki ti protege zot. Ek si li ti ena beaucoup madame, sa ti pou dangereux parski certain parmi zot kitfois ti pou sorti dan bann nation païen ek ti servi bann fausse bondié. Sa bann madame-la ti pou kapav detourne le roi ar vrai l’adoration Jéhovah.

13. Couma Salomon ti blié seki li ti gagné?

¹³ Salomon pa ti prend compte sa bann l’avertissement-la. Au contraire, li ti faire exactement seki Jéhovah ti dire bann le roi pa faire. Li ti faire enn maniere gagne plusieurs millier cheval ek cavalier. (1 Rois 4:26) Finalement, li ti ena aussi 700 femme ek 300 concubine, parmi, beaucoup ti sorti dan bann nation païen ki ti tout autour. Zot ti “detourne so leker pou faire li suive lezot bondié; ek so leker pa ti complet pou Jéhovah.” Salomon ti commence adore bann fausse bondié degoutant ki so bann femme ki sorti dan bann nation païen ti pé adoré. A cause sa, Jéhovah ti dire ki Li “pa pou manké pou rass royaume” ar Salomon.—1 Rois 11:1-6, 11.

14. Ki resultat desobeissance Salomon ek nation Israël inn amené?

¹⁴ Salomon ti nepli fixé so l’esprit lor sa grand privilege ki li ti ena pou represente vrai Bondié-la. Le roi ti implik-li net dan fausse l’adoration. Avek le temps, nation Israël en entier ti vinn apostat ek a cause sa li ti detruire en 607 avant nou lepok. Mem si finalement bann Juif ti retabli vrai l’adoration, plusieurs siecle apré, Jésus ti dire: “Pou rasse royaume Bondié ar zot, ek pou donne sa enn nation ki pou rapporte bann fruit.” C’est seki ti arrivé. Jésus ti dire: “Guetté! Bondié inn abandonne zot lakaz ar zot.” (Mat. 21:43; 23:37, 38) Parski nation Israël pa ti reste fidele, li ti perdi sa grand privilege pou represente vrai Bondié-la. En 70 nou lepok, l’armée romain ti detruire Jérusalem ek so temple, ek beaucoup Juif ki ti resté ti vinn esclave.

15. Cite l’exemple bann zom ki ti nepli fixé zot l’esprit lor seki ti vrai-mem important.

¹⁵ Judas Iscariote ti enn parmi 12 zapotre Jésus. Li ti tann bann l’enseignement extraordinaire ki Jésus ti donné ek ti trouve bann mirak ki li ti faire grace a pouvoir l’esprit saint Bondié. Pourtant, Judas pa ti veille lor so leker. C’est li ki ti pé garde la caisse kot ti ena l’argent Jésus ek so 12 zapotre. Mais, “li ti enn voleur: li ti garde la caisse ek li ti habitué kokin l’argent ki ti pé mette ladan.” (Jean 12:6) Li ti tellement ena enn desir exageré pou gagne l’argent ki finalement li ti complote avek bann chef pretre hypocrite pou trahir Jésus pou 30 piece l’argent. (Mat. 26:14-16) Enn lot dimoune ki pa ti garde so l’esprit fixé lor so privilege ti Démas, ki ti enn compagnon l’apotre Paul. Démas pa ti veille lor so leker. Paul ti dire lor li: “Démas ti abandonne moi parski li ti content sa le monde-la.”—2 Tim. 4:10; lire Proverbes 4:23.

Enn leson pou sakenn parmi nou

16, 17. (a) Sa kikenn ki opposé ar nou-la, ki quantité fort li fort? (b) Ki kapav aide nou pou faire face ar n’importe ki piege ki Satan mette devant nou?

¹⁶ Tou bann serviteur Bondié bizin reflechi bien lor bann l’exemple ki ena dan la Bible, parski la Bible dire nou: “Alors sa bann kitsoz ki ti arrive zot-la ti couma bann l’exemple ek finn ecrire sa pou averti nou, nou ki’nn arrive pré ar la fin sa bann systeme ki existé-la.” (1 Cor. 10:11) Zordi, nou pé vive bann dernier jour sa mauvais le monde-la.—2 Tim. 3:1, 13.

¹⁷ Satan le Diable, “bondié sa systeme-la” koné ki “li ena zis enn tigit le temps-mem.” (2 Cor. 4:4; Rév. 12:12) Li pou faire tou seki li kapav pou piege bann serviteur Jéhovah ek faire zot desobeir bann principe biblik. Satan pé controle sa le monde-la, parmi ena aussi bann moyen ki le monde servi pou fann bann l’information. Selman, peuple Jéhovah ena enn kitsoz ki beaucoup pli puissant—“puissance ki plus ki seki normal.” (2 Cor. 4:7) Nou kapav compte lor sa puissance ki Bondié donne nou-la pou resisté kont n’importe ki piege Satan. Alors, nou encouragé pou prié touletan, avek l’assurance ki Jéhovah pou ‘donne l’esprit saint bann ki demann Li.’—Luc 11:13.

18. Ki l’attitude nou bizin ena concernant sa le monde zordi-la?

¹⁸ Nou gagne aussi enn l’encouragement kan nou koné ki tou systeme Satan bientot pou detruire mais ki bann vrai chretien pou survive. La Bible dire: “Le monde pé al fini ek so desir aussi, mais celui ki faire volonté Bondié, pou reste pou toujours.” (1 Jean 2:17) A cause sa, li pa pou sage ditou si enn serviteur Bondié pensé ki ena kitsoz dan sa le monde-la ki ena plus valeur ki so relation avek Jéhovah! Le monde ki dan pouvoir Satan, li pareil couma enn bateau ki pé coulé. Jéhovah inn donne so bann serviteur fidele, la congregation ki couma enn “bateau sauvetage.” A mesure ki zot pé avance vers le monde nouveau, zot kapav ena confiance dan sa promesse-la: “Bann mauvais dimoune pou detruire, mais bann ki mette zot l’espoir en Jéhovah pou herite la terre.” (Ps. 37:9) Alors, garde ou lizié fixé lor sa prix extraordinaire-la!

Eski ou rappel?

• Couma Paul ti considere sa prix ki ti offert li-la?

• Lor ki base pou juge bann dimoune ki pou vive pou touletan lor la terre?

• Ki conduite sage ou bizin ena asterla?

[Zimage lor page 12, 13]

Eski ou faire vision ki ou pé gagne sa prix-la kan ou lire la Bible?