Faire face ar trahison enn conjoint

MARGARITA ek so mari, Raúl, ti’nn servi Jéhovah ensam couma serviteur a plein temps pendant plusieurs l’année.a Mais, enn tigit le temps apré naissance zot premier zenfant, Raúl ti commence eloigne-li ar Jéhovah. Finalement, Raúl ti commence amenn enn la vie immoral ek li ti exclu dan congregation. Margarita dire: “Kan tousala ti arrivé, mo ti ena l’impression mo pou mort. Mo leker ti cassé, ek mo pa ti koné ki pou faire.”

Enn tigit le temps apré ki Jane ti marié, so mari ti trahir so confiance ek so l’affection dan enn lot fason. Li ti commence maltraite li physiquement. Jane dire: “Premier fois ki li ti donne moi enn coude poing, mo ti soké, embarrassé, ek humilié. Sa ti vinn enn l’habitude: li ti maltraite moi ek apré li ti suppliye moi pou pardonne li. Mo ti pensé ki en tant ki chretien, sa ti mo devoir pou touletan pardonné ek blié. Mo ti aussi pensé ki li ti pou malhonnete si mo ti koz nou probleme avek lezot dimoune—mem avek bann ancien dan nou congregation. Sa l’habitude pou maltraite moi ek apré demann moi pardon-la ti contigné pendant plusieurs l’année. Pendant tou sa le temps-la, mo ti pé pensé ki bizin ena enn kitsoz ki mo kapav faire pou ki mo mari content moi. Kan finalement li ti quitte moi ek mo tifi, mo ti ena l’impression ki mo pa finn reussi, ki mo ti’nn bizin faire plus ou-soit dire plus ki sa pou sauve mo mariage.”

Pareil couma Margarita ek Jane, kitfois ou pé souffert lor plan affectif, financier ek spirituel parski ou mari finn trahir ou. Ou-soit, kitfois ou enn mari ki pé souffert lor plan affectif ek pé passe par bann l’epreuve parski ou femme finn trompe ou. Pena doute ki nou pé vive dan “bann lepok critik ki difficile pou supporté” couma la Bible ti predire. Sa prophetie-la montré ki pendant “bann dernier jour,” bann relation ki ena dan la famille ti pou passe par bann l’epreuve, kot dan beaucoup cas, l’affection naturel ti pou disparette net. Certain ti pou faire semblant servi Bondié, mais zot bann action ti pou montré le contraire. (2 Tim. 3:1-5) Bann vrai chretien aussi faire face ar sa bann probleme-la; alors, ki kapav aide ou pou enduré si ou conjoint finn trahir ou?

Trouve ou-mem pareil couma Jéhovah trouve ou

Au commencement, ou kapav trouve sa bien dur pou croire ki enn dimoune ki ou content kapav blesse ou autant. Kitfois mem ou kapav commence rann ou-mem responsable pou so mauvais conduite.

Mais rappel, ki mem Jésus ki ti enn zom parfait ti konn enn trahison. Enn dimoune ki li ti content ek ki li ti faire confiance ti trahir li. Avant ki Jésus ti choisir so bann bon camarade, setadir bann zapotre, li ti bien reflechi lor la ek li ti prié. Sa lepok-la toulé 12 ti bann serviteur Jéhovah ki ti kapav faire confiance. Alors, pena doute ki Jésus ti bien chagrin kan Judas “ti vinn enn traite.” (Luc 6:12-16) Pourtant, Jéhovah pa ti rann Jésus responsable pou fason ki Judas finn agir.

Li vrai ki zordi dan enn couple personne pa parfait. Mari ek femme, toulé-deux pou faire bann erreur. Enn psalmiste ti ecrire dan enn fason realiste: “Si to ti veille tou nou bann peché, o Yah, o Jéhovah, kisannla ti pou kapav tini devant toi?” (Ps. 130:3) Pareil couma Jéhovah toulé-deux conjoint bizin disposé pou passe lor l’imperfection zot camarade.—1 Pierre 4:8.

Mais selman, “sakenn pou rann compte pou li-mem devant Bondié.” (Rom. 14:12) Si enn kikenn prend l’habitude pou maltraite so conjoint par so bann parole ek so bann action, c’est sa conjoint coupable-la ki bizin reponn devant Jéhovah. Jéhovah condamne la violence ek bann parole pou insulté lezot. Alors, enn kikenn ki traite so conjoint sans okenn l’amour ek respé coumsa, pena okenn excuse valable. (Ps. 11:5; Éph. 5:33; Col. 3:6-8) En realité, si enn chretien persisté pik bann crise colere sans ki li repenti ek sans ki li montré ki li pou changé, li bizin exclu dan congregation. (Gal. 5:19-21; 2 Jean 9, 10) Fodé pa ki enn conjoint senti-li coupable pou faire bann ancien konn sa bann conduite ki pa chretien-la. Au contraire, Jéhovah ena compassion pou bann ki pé faire face ar sa bann qualité mauvais traitement-la.

Kan enn conjoint commette l’adultere, li pa zis faire peché kont so conjoint ki innocent, mais aussi kont Jéhovah. (Mat. 19:4-9; Héb. 13:4) Si sa conjoint innocent-la inn faire tou pou vive en accord avek bann principe la Bible, fodé pa ki li senti-li coupable parski so conjoint ki finn commette l’adultere finn trahir li.

Rappel ki Jéhovah koné seki ou pé ressenti. Li decrire Li-mem couma enn mari ek enn proprietaire pou nation Israël, ek dan so Parole ena bann passage touchant ki montré la peine ki Li ti ressenti parski nation Israël ti commette l’adultere lor plan spirituel. (Is. 54:5, 6; Jér. 3:1,6-10) Si dan enn certaine fason ou conjoint finn trahir ou, rassure-ou ki Jéhovah trouve bien bann larme ki ou pé versé. (Mal. 2:13, 14) Li koné ki ou bizin reconfort ek encouragement.

Couma Jéhovah donne reconfort

Enn parmi bann moyen ki Jéhovah servi pou donne reconfort, c’est a travers la congregation. Jane ti gagne sa qualité soutien-la. Jane rappel: “Visite surveillant circonscription ti tombe dan enn moment kot mo pa ti senti moi bien lor plan affectif. Li ti koné ki quantité mo ti deprimé parski mo mari ti’nn demann divorce. Li ti prend le temps pou raisonne avek moi lor bann verset la Bible couma 1 Corinthiens 7:15. Bann verset la Bible ek bann parole encourageant ki li ti dire moi, ti aide moi pou nepli senti moi coupable ek ti donne moi la paix l’esprit.”b

Margarita, ki ti cité au commencement, ti aprann aussi ki Jéhovah donne bann l’aide pratik a travers la congregation. Margarita dire: “Kan mo ti rann moi compte ki mo mari pa ti pé repenti, mo ti prend mo bann zenfant ek mo ti al dan enn lot la ville. Kan mo ti arrive la-bas, mo ti reussi trouve deux la chambre pou loué. So lendemain, avek enn grand chagrin, mo ti pé deballe mo bann sac kan enn kikenn inn tape la porte. Mo ti croire mo pou trouve madame proprietaire ki reste zis a coté. Mais avek enn grand surprise, mo ti trouve sa soeur ki ti faire l’etude avek mo mama ek ki ti aide nou famille konn la verité-la. Li pa ti pé attann pou trouve moi ici parski li ti vinn la pou etudié la Bible avek mo proprietaire. Mo ti senti moi tellement soulagé—mo ti nepli kapav controle mo bann l’emotion. Mo ti explik li mo situation ek nou ti ploré ensam. Desuite, li finn faire l’arrangement pou ki nou assisté reunion sa jour-la. La congregation ti accueillir nou, ek bann ancien ti faire bann l’arrangement pratik pou aide moi pou prend soin mo famille lor plan spirituel.”

Couma lezot kapav aidé

En realité, bann membre congregation kapav donne bann l’aide pratik dan different fason. Par exemple, asterla Margarita ti’nn bizin rod travail. Enn famille dan la congregation ti propose pou veille so bann zenfant apré lekol kan li ti bizin.

Margarita raconté: “Seki mo ti vrai-mem apprecié, c’est kan bann frere ek soeur ti propose pou accompagne moi ek mo bann zenfant dan predication.” Par sa bann l’aide pratik-la, bann membre la congregation pé “sarié fardeau sakenn so camarade” ek kan zot pé faire sa zot pé accompli “la loi Christ.”—Gal. 6:2.

Bann ki pé souffert a cause peché lezot, vrai-mem apprecié sa bann qualité l’aide pratik-la. Monique, ki so mari ti abandonne li avek enn dette apepré Rs 450,000 ek quatre zenfant pou elevé, dire: “Mo bann frere ek soeur spirituel ti montré enn grand l’amour envers moi. Mo pa kapav maziné couma mo ti pou faire sans zot l’aide. Mo senti ki Jéhovah ti mette lor mo la route bann pli bon frere ki ena; zot ti faire tou pou mo bann zenfant. Mo finn ena la joie pou trouve mo bann zenfant vinn mur lor plan spirituel grace a sa bann l’aide-la. Si mo ti bizin conseil, bann ancien ti la pou aide moi. Si mo ti bizin enn kikenn pou kozé, zot ti ecoute moi.”—Marc 10:29, 30.

Bien sur, enn vrai camarade pou koné kan fodé ou-soit fodé pa li koz lor enn sujet triste ki pou releve le passé. (Eccl. 3:7) Margarita dire: “La plupart le temps, mo ti content koz avek bann soeur ki dan mo nouveau congregation lor travail predication, nou bann l’etude la Bible, nou bann zenfant—tou sauf mo bann probleme. Mo ti content ki zot respecté choix ki mo ti faire pou pa koz lor le passé ek zot ti aide moi prend enn nouveau depart.”

Resisté kont l’envie pou tire vengeance

Parfois, au lieu ki ou pou senti-ou responsable pou peché ou conjoint, ou kapav en colere ki ou pé souffert a cause so bann erreur. Si sa sentiment-la contigne grandi, li kapav diminué ou determination pou reste fidele ar Jéhovah. Par exemple, ou kapav tenté pou rod bann fason pou tire vengeance ar ou conjoint infidele.

Si ou rann ou compte ki sa bann qualité sentiment-la inn commence prend racine dan ou leker, ou kapav medite lor l’exemple Josué ek Caleb. Sa bann zom fidele-la ti riské zot la vie pou espionne la Terre promise. Bann lezot espion ti mank la foi ek ti pousse le peuple pou desobeir Jéhovah. Certain Israélite ti mem envie envoye Josué ek Caleb coute roche kan zot ti essay encourage la nation pou reste fidele. (Nomb. 13:25–14:10) A cause seki bann Israélite ti faire, Josué ek Caleb aussi ti obligé tourne en rond dan desert pendant 40 an, pa a cause zot prop erreur mais a cause erreur ki bann Israélite ti commette.

Josué ek Caleb pa ti laisse peché zot bann frere faire zot vinn amer mem si bann Israélite ti trompe zot confiance. Zot ti concentré lor zot service pou Jéhovah. Apré 40 an dan desert, zot, ensam avek bann Lévite ti gagne zot recompense: parmi tou bann ki ti faire partie dan sa generation-la, zis zot ki ti reste en vie ek ti kapav rente dan la Terre promise.—Nomb. 14:28-30; Jos. 14:6-12.

Seki ou conjoint infidele inn faire kapav faire ou souffert pendant assez longtemps. Mem apré ki ou mariage inn fini cassé, ou kapav souffert lor plan affectif ek gagne bann probleme financier. Mais selman, pa laisse bann pensé negatif decourage ou. Rappel ki Jéhovah konn pli bien ki n’importe kisannla, couma pou agir avek bann ki par expré ignore so bann principe. Nou trouve sa bien par seki ti arrive bann Israélite ki pa ti montré la foi kan zot ti dan desert.—Héb. 10:30, 31; 13:4.

Ou kapav faire face

Au lieu ki ou laisse bann pensé negatif decourage ou, rempli ou l’esprit avek bann pensé Jéhovah. Jane dire: “Mo ti trouvé ki kan mo ti ecoute bann cassette La Tour de Garde ek Réveillez-vous ! sa ti aide moi pou enduré. Bann reunion aussi ti enn moyen ki ti faire moi vinn pli fort. Kan mo ti bien participé dan bann reunion sa ti aide moi pou pa pense mo bann probleme. La predication ti aide moi dan mem fason. Kan mo ti pé aide lezot pou ena la foi en Jéhovah, mo ti faire mo prop la foi vinn pli solide. Ek kan mo ti prend compte bann etudiant la Bible, sa ti aide moi fixé mo l’esprit lor bann kitsoz pli important.”

Monique, ki nou ti mentioné enn tipé avant, dire: “Kan mo’nn assisté reunion regulierement ek mo’nn participe autant ki mo kapav dan predication, mo finn kapav enduré. Mo famille finn vinn pli proche sakenn ar so camarade ek avek bann membre dan congregation. Mo l’epreuve finn aide moi reconette mo prop faiblesse. Mo finn passe par enn l’epreuve, mais avek l’aide Jéhovah mo pé kapav supporté.”

Ou aussi ou kapav faire face ar sa bann qualité l’epreuve-la. Malgré la peine ki ou kapav ressenti a cause enn trahison, essaye suive conseil inspiré ki Paul ti donné: “Fodé pa nou renoncé pou faire seki bien, parski kan ler arrivé, nou pou recolté si nou pa laisse la fatigue gagne nou.”—Gal. 6:9.

[Notes]

[Zimage page 31]

Bann ki zot conjoint inn abandonne zot apprecié bann ki accompagne zot dan predication