Contigne fortifié congregation
“Contigne console-zot entre zot-mem ek fortifié sakenn so camarade.”—1 THESS. 5:11.
1. Ki bann benediction nou gagné parski nou forme partie dan congregation, mais ki bann difficulté nou encore pé gagné?
C’EST vrai-mem enn grand benediction pou forme partie dan congregation chretien. Ou ena bann bon relation avek Jéhovah. Ou compte lor so Parole pou guide ou ek sa protege-ou kont bann mauvais consequence ki ou kapav gagné a cause enn conduite ki kont bann principe biblik. Ou entouré ar bann vrai camarade ki envie ou faire seki bien. Oui, ou gagne beaucoup benediction. Mais la plupart chretien pé bizin lutté a cause tou sorte qualité probleme. Kitfois certain parmi zot bizin l’aide pou comprend bann kitsoz profond ki trouve dan Parole Bondié. Ena lezot ki malade ou-soit ki gagne depression, ou-soit zot pé konn bann consequence mauvais decision ki zot inn prend. Ek nou tou, nou bizin vive dan enn le monde kot bann dimoune pa respecté bann principe Bondié.
2. Ki nou bizin faire kan nou bann frere pé gagne bann probleme, ek kifer?
2 Personne parmi nou pa content pou trouve nou bann frere ek soeur souffert ou-soit pé lutté dan zot la vie. L’apotre Paul ti compare congregation ar enn lekor ek li ti dire ki “si enn membre souffert, tou bann lezot membre souffert ensam avek li.” (1 Cor. 12:12, 26) Dan sa bann situation-la, nou bizin faire tou seki nou kapav pou soutenir nou bann frere ek soeur. Ena plusieurs recit dan la Bible kot bann membre congregation finn aide lezot pou faire face ek pou surmonte zot probleme. Pendant ki nou pou examine sa bann recit-la, reflechi couma ou kapav offert ou l’aide ou aussi dan mem fason. Couma ou kapav aide ou bann frere ek soeur lor plan spirituel ek coumsa fortifié congregation Jéhovah?
“Zot ti amenn li avek zot”
3, 4. Dan ki fason Aquila ek Priscille ti aide Apollos?
3 Kan Apollos ti al reste Éphèse, li ti deja enn evangelisateur bien zelé. Livre Actes dire: “Parski li ti bien zelé grace a l’esprit saint, li ti koz ek li ti enseigne dan enn fason exact bann kitsoz ki ti concerne Jésus, mais li ti konn zis bapteme Jean.” Apollos pa ti koné ki ti ena enn bapteme “au nom du Père, du Fils ek l’esprit saint.” Sa vedir ki surement li ti gagne temoignage soit avek bann disciple Jean le Baptiste ou-soit avek bann disciple Jésus avant Pentecôte l’an 33 n.l. Mem si Apollos ti zelé, ti ena bann kitsoz important ki li pa ti comprend. Couma eski kan li ti frequente bann lezot chretien, sa ti aide li?—Actes 1:4, 5; 18:25; Mat. 28:19.
4 Aquila ek Priscille, enn couple chretien, ti tann Apollos preche avek zele dan synagogue. Zot ti amenn li avek zot, ek zot ti donne li enn l’enseignement pli profond. (Lire Actes 18:24-26.) Sa bon action-la ti montré l’amour ki zot ti ena. Surement ki Aquila ek Priscille ti koz ar Apollos avek tact ek gentillesse, zot pa ti donne li l’impression ki zot ti pé critik li. C’est zis ki li pa ti trop koné couma congregation chretien ti été au commencement. Ek Apollos ti surement reconnaissant envers so bann nouveau camarade ki ti partage sa bann detail important-la avek li. Avek sa l’enseignement-la, Apollos “ti bien aide” so bann frere dan Achaïe ek ti donne enn temoignage bien puissant.—Actes 18:27, 28.
5. Ki l’aide rempli ar l’amour plusieurs millier proclamateur donné, ek ki resultat zot gagné?
5 Zordi, beaucoup dan congregation bien reconnaissant envers bann ki’nn aide zot pou comprend la Bible. Finn ena bann l’amitié durable ki finn formé entre bann etudiant la Bible ek seki’nn faire zot l’etude. Dan la plupart cas, pou aide bann dimoune comprend la verité, nou bizin reserve le temps pou etudié la Bible regulierement avek zot pendant plusieurs mois. Selman, bann proclamateur Royaume Bondié disposé pou faire sa sacrifice-la parski zot reconette ki c’est enn question la vie la mort. (Jean 17:3) C’est vrai-mem enn grand la joie pou trouve bann dimoune comprend la verité, vive en accord avek seki zot aprann, ek servi zot la vie pou faire volonté Jéhovah!
Bann frere “ti rann enn bon temoignage lor li”
6, 7. (a) Kifer Paul ti choisir Timothée pou accompagne li dan so bann voyage? (b) Ki l’aide Timothée ti gagné pou progressé?
6 Kan bann zapotre Paul ek Silas ti visite la ville Lystres pendant zot deuxieme voyage missionnaire, zot ti trouve enn jeune homme ki ti appel Timothée, kitfois li ti ena apepré 20 an. “Bann frere dan Lystres ek dan Iconium ti rann enn bon temoignage lor li.” Eunice, mama Timothée, ek Loïs, so grand-mere, ti bann chretien baptisé, mais so papa pa ti adore Jéhovah. (2 Tim. 1:5) Kitfois Paul ti faire connaissance sa famille-la kan li ti visite sa l’endroit-la premier fois, deux-trois l’année avant. Mais asterla, Paul ti interesse-li plus ar Timothée parski li ti parette enn jeune homme ki ti ena bann qualité special. Alors, avek l’accord college ancien dan l’endroit, Timothée ti vinn assistant Paul dan so l’activité missionnaire.—Lire Actes 16:1-3.
7 Timothée ti ena beaucoup pou aprann ar so compagnon ki ti pli agé ki li. Mais li ti tellement bien progressé ki, avek le temps, c’est avek confiance ki Paul ti envoye li visite bann congregation ek agir couma so representant. Timothée ti passe apepré 15 an avek Paul. Pendant sa le temps-la, sa jeune homme ki pa ti ena l’experience-la ek ki kitfois ti timide, ti’nn progressé pou vinn enn bon ancien.—Phil. 2:19-22; 1 Tim. 1:3.
8, 9. Ki bann membre congregation kapav faire pou encourage bann jeune? Cite enn l’exemple.
8 Zordi dan congregation, ena beaucoup jeune frere ek soeur ki ena possibilité pou developpe bann grand capacité. Si lezot frere ek soeur mur encourage zot ek occupe zot lor plan spirituel, zot kapav ena desir pou servi ek pou accepté bann pli grand responsabilité dan congregation. Guette dan ou congregation! Eski ou trouve certain jeune ki pou kapav rann-zot disponible pareil couma Timothée? Avek ou l’aide ek ou l’encouragement, zot kapav kitfois vinn pionnier, Béthélite, missionnaire, ou-soit surveillant itinerant. Ki ou kapav faire pou aide zot realise sa bann l’objectif-la?
9 Martin, ki membre famille Béthel depuis 20 an, rappel avek reconnaissance l’interet ki enn surveillant circonscription ti montré envers li, kan zot ti preche ensam 30 an avant. Surveillant-la ti koz avek la joie lor so service ki li ti faire dan Béthel kan li ti jeune. Li ti encourage Martin pou guetté si li kapav rann-li disponible pou l’organisation Jéhovah, dan mem fason. Jamais Martin pa’nn blié sa conversation-la; li pensé ki sa finn influence bann choix ki li ti faire plitar. Ki koné ki bon l’influence ou kapav ena lor bann jeune dan ou congregation kan ou koz bann l’objectif spirituel avek zot?
“Koz dan enn fason ki pou encourage bann ki deprimé”
10. Ki Épaphrodite ti ressenti, ek kifer?
10 Épaphrodite ti faire enn longue voyage bien fatigant depuis Philippe ziska Rome. Li ti al visite l’apotre Paul ki ti dan prison a cause so la foi. Bann Philippien ti envoye sa voyageur-la pou represente zot. Épaphrodite pa ti zis donne Paul zot cadeau, mais li ti aussi faire l’arrangement pou reste avek Paul pou faire tou seki li kapav pou aide li dan sa situation difficile-la. Mais kan li ti Rome, Épaphrodite ti tombe malade ek li ti “passe pré ar la mort.” Épaphrodite ti ena sentiment ki li pa ti’nn reussi so mission, a cause sa li ti faire enn depression.—Phil. 2:25-27.
11. (a) Kifer fodé pa nou etonné si certain dan congregation deprimé? (b) Ki Paul ti encourage bann chretien pou faire pou Épaphrodite?
11 Zordi, ena beaucoup pression dan la vie ki faire bann dimoune gagne depression. Dapré bann statistik l’Organisation mondial pou la santé, au moins 1 dimoune lor 5 dan population, kapav gagne depression enn certain moment dan zot la vie. Bann serviteur Jéhovah aussi kapav gagne depression. Parmi bann kitsoz ki faire enn dimoune deprimé c’est bann difficulté pou donne bann membre so famille seki zot bizin, enn mauvais la santé, decouragement a cause so bann faiblesse, ek lezot kitsoz encore. Ki bann Philippien ti kapav faire pou aide Épaphrodite? Paul ti ecrire: “Accueillir li dan le Seigneur avek enn grand la joie, pareil couma zot habitué faire; ek contigne ena enn grand l’estime pou bann zom coumsa, parski a cause travail nou Seigneur, li ti trouve-li bien pré avek la mort, li ti riské so la vie pou rann moi tou bann service ki zot, zot pa ti kapav rann moi parski zot pa ti la.”—Phil. 2:29, 30.
12. Ki kapav encourage bann dimoune ki deprimé?
12 Nou aussi nou bizin encourage nou bann frere ki decouragé ou-soit ki deprimé. Pena doute ki ena bann kitsoz positif ki nou kapav dire concernant zot service pou Jéhovah. Kitfois zot finn faire bann grand changement dan zot la vie pou zot vinn bann chretien ou-soit pou prend service a plein temps. Nou apprecié zot bann zeffort, ek nou kapav donne zot l’assurance ki Jéhovah aussi apprecié sa. Si certain chretien fidele nepli kapav faire tou seki zot ti pé faire avant a cause l’age ou-soit maladie, zot merite kan-mem tou nou respé pou zot bann l’année service. N’importe pou ki raison nou bann frere gagne depression, seki Jéhovah demann tou so bann serviteur fidele c’est: “Koz dan enn fason ki pou encourage bann ki deprimé, soutenir bann ki faible, ena patience avek tou dimoune.”—1 Thess. 5:14.
“Pardonne li avek tou zot leker ek console li”
13, 14. (a) Ki action bien important congregation Corinthe ti prend, ek kifer? (b) Kan ti exclu sa missié-la, ki l’effet sa ti ena?
13 Dan premier siecle, enn missié dan congregation Corinthe ti pé pratik fornication ek pa ti repenti. So conduite ti mette en danger pureté congregation ek ti mem sok bann dimoune ki pa ti dan la verité. Alors, nou comprend kifer Paul ti donne l’ordre pou tire sa missié-la dan congregation.—1 Cor. 5:1, 7, 11-13.
14 Sa discipline-la ti ena enn bon l’effet. Congregation ti protegé kont enn mauvais l’influence ki ti pou kapav gate bann lezot chretien. Sa missié ki ti faire peché-la ti reconette so peché ek ti repenti avek tou so leker. Li ti faire bann action ki ti montré so repentance, ek lor sa base-la, dan deuxieme lettre ki Paul ti ecrire congregation, li ti dire ki bizin reintegré sa missié-la. Selman, pa zis sa ki bann chretien ti bizin faire. Paul ti montré aussi ki bann membre congregation ti bizin “pardonne [sa missié ki ti repenti-la] avek tou zot leker ek console li, pangar ki dan enn certaine fason, li tellement triste ki li perdi courage.”—Lire 2 Corinthiens 2:5-8.
15. Couma nou bizin considere bann ki’nn faire peché mais ki repenti ek ki reintegré dan congregation?
15 Ki nou aprann ar sa recit-la? Sa faire nou la peine kan bizin exclu certain membre congregation. Kitfois zot finn amenn deshonneur lor nom Bondié ek finn gate reputation congregation. Li kapav mem arrivé ki zot finn faire peché kont nou personnellement. Pourtant, kan bann ancien ki forme partie dan enn comité examine cas enn exclu ek zot decidé en accord avek direction Jéhovah ki bizin reintegré sa dimoune ki’nn repenti-la, sa montré ki Jéhovah inn pardonne li. (Mat. 18:17-20) Eski nou aussi nou pa bizin rod imite Jéhovah? Oui, si nou dur ek nou pa pardonné, sa vedir ki nou pé oppose-nou ar Jéhovah. Pou nou kapav favorise la paix ek l’unité dan congregation ek gagne faveur Jéhovah, eski nou pa bizin ‘confirme nou l’amour’ pou bann ki’nn faire peché mais ki repenti avek tou zot leker ek ki reintegré?—Mat. 6:14, 15; Luc 15:7.
“Li enn grand l’aide pou moi”
16. Kifer Marc ti decevoir Paul?
16 Enn lot recit biblik montré ki fodé pa nou nourri bann sentiment negatif kont bann ki pa finn agir couma nou ti pé attann. Par exemple Jean Marc ti decevoir beaucoup l’apotre Paul. Couma? Kan Paul ek Barnabas ti commence zot premier voyage missionnaire, Marc ti accompagne zot pou aide zot. Mais enn certain moment pendant zot voyage ek pou enn raison ki la Bible pa dire, Jean Marc ti quitte zot ek ti retourne kot li. Sa ti tellement agace Paul, ki li pa ti d’accord ki Marc accompagne zot pou enn deuxieme voyage. A cause sa, finn ena enn grand desaccord entre li ek Barnabas.—Lire Actes 13:1-5, 13; 15:37, 38.
17, 18. Couma nou koné ki desaccord ki ti ena entre Paul ek Marc ti reglé, ek ki nou kapav aprann ladan?
17 Mem si Paul ti rejette li, Marc pa ti laisse sa situation-la decourage-li plus ki bizin. Couma nou konn sa? Parski Marc ti contigne so l’activité missionnaire dan enn lot territoire ensam avek Barnabas. (Actes 15:39) Seki Paul ti ecrire lor li deux-trois l’année apré, montré ki li ti fidele ek ki ti kapav faire li confiance. Alors ki Paul ti prisonnier dan Rome, dan enn lettre li ti demann Timothée pou vinn guette li. Dan mem lettre, Paul ti dire: “Prend Marc ek amenn li avek toi, parski li enn grand l’aide pou moi dan mo service.” (2 Tim. 4:11) Oui, Marc ti regagne l’estime Paul.
18 Nou kapav aprann enn leson ladan aussi. Marc ti developpe bann qualité ki ti faire li vinn enn bon missionnaire. Li pa ti baisse lé-bras kan Paul ti rejette li enn premier fois. Li ek Paul toulé-deux ti bann zom spirituel, ek pa ti ena okenn rancune ki ti resté entre zot. Au contraire, plitar Paul ti considere Marc couma enn compagnon bien utile. Alors, kan enn probleme inn fini reglé, pli bon kitsoz ki kapav faire c’est blié tou seki finn passé, ek contigne aide lezot pou progressé dan la verité. Kan nou reconette bann bon qualité ki lezot ena, sa fortifié congregation.
Congregation ek ou
19. Ki l’aide tou bann membre congregation kapav donne sakenn so camarade?
19 Dan sa “bann lepok critik ki difficile pou supporté[-la],” ou bizin l’aide ou bann frere ek soeur dan congregation, ek zot bizin ou l’aide. (2 Tim. 3:1) Kitfois, lor plan personnel, bann chretien pa touletan koné ki zot bizin faire pou reussi reglé bann probleme ki zot pé gagné, mais Jéhovah Li, Li koné. Li kapav servi different membre congregation—parmi ena ou aussi—pou aide lezot pou faire seki bien. (Is. 30:20, 21; 32:1, 2) Alors, faire tou seki ou kapav pou suive conseil ki Paul ti donné! Contigne “console-zot entre zot-mem ek fortifié sakenn so camarade, couma zot pé deja faire.”—1 Thess. 5:11.
Couma ou pou reponn?
• Kifer dan congregation li necessaire ki nou fortifié lezot?
• Ki bann difficulté kitfois ou kapav aide lezot pou surmonté?
• Kifer nou bizin l’aide lezot dan nou congregation?