Eski sa li vrai-mem malhonnete?

“Faire bann ti changement lor to rapport accident, ek tou pou passe bien.”

“Departement ki occupe taxe pa necessaire konn tou ti detail.”

“Seki important c’est ki fodé pa ki bannla maye toi pé faire sa.”

“Kifer payé kan nou kapav gagne li gratis?”

OU KAPAV tann bann l’expression coumsa kan ou demann bann conseil lor bann question finance. Certain dimoune parette ena “bann solution” interessant pou tou kitsoz. Question ki nou kapav demann nou: eski sa bann solution-la zot vrai-mem honnete?

Azordi, tellement partout dimoune malhonnete, ki souvent zot considere koz menti, goré dan l’examen ek kokin, couma bann moyen ki permette zot evite enn punition, gagne beaucoup kass, ou-soit contigne avancé dan zot la vie. Bann dimoune important dan la societé, souvent donne enn mauvais l’exemple concernant l’honneteté. Dan enn pays l’Europe, bann cas fraude ek detournement l’argent ti augmenté par plus ki 85% entre 2005 ek 2006. Dan sa chiffre-la pa finn compte plusieurs lezot cas malhonnete moins important ki certain dimoune appel bann tipti erreur ou-soit “bann ti peché.” Surement sa pa ti trop etonne bann dimoune ki bann grand compagnie ek bann politicien sa pays-la ti impliké dan enn scandale coumsa, kot zot finn servi bann fausse diplome pou ki zot avancé dan zot carriere.

Malgré ki le monde rempli avek bann dimoune malhonnete, beaucoup dimoune envie faire seki droite. Surement ou enn parmi sa bann dimoune-la. Kitfois parski ou content Bondié, ou envie faire seki droite devant so lizié. (1 Jean 5:3) Kitfois ou ena mem sentiment ki l’apotre Paul, ki ti ecrire: “Nou sur ki nou ena enn conscience droite, a cause nou envie reste honnete dan tou kitsoz.” (Hébreux 13:18) Pou sa raison-la, nou invite ou pou guette certain situation ki kapav tente enn dimoune pou pa “reste honnete dan tou kitsoz.” Nou pou aussi examine bann principe la Bible ki kapav aide nou dan sa bann situation-la.

Kisannla bizin paye bann dommage ki ena dan enn accident?

Enn jour kan li ti pé conduire, enn jeune femme ki appel Lisaa ti tape avek enn lot l’auto. Personne pa ti blessé, mais toulé-deux l’auto ti gagne bann dommage. Dan so pays, bann jeune chauffeur paye enn gros somme l’argent pou l’assurance l’auto, ek sa somme-la augmenté apré chaque accident ki zot faire. Kan sa accident-la ti arrivé, Lisa ti ena so grand cousin, Gregor, avek li dan l’auto, alors enn camarade ti proposé ki dan zot rapport accident zot dire ki c’est Gregor ki ti pé conduire. Coumsa, Lisa pa ti pou bizin paye enn pli gros somme l’argent pou l’assurance. Sa decision-la ti parette enn bon decision. Ki li bizin faire?

Bann compagnie l’assurance servi l’argent ki zot bann client payé pou paye bann lezot client. Alors, si Lisa ecoute conseil so camarade, c’est coumadir li pé oblige bann lezot dimoune ki paye l’assurance pou paye enn pli gros somme l’argent pou so accident. Si li faire sa, li pa pou zis faire enn fausse rapport mais li pou aussi kokin lezot. Mem principe appliké, si enn dimoune faire enn fausse declaration pou augmente somme l’argent ki compagnie l’assurance supposé donne li apré ki li’nn faire enn accident.

Bann sanction ki gouvernement etabli kont bann action malhonnete coumsa kapav empeche nou faire sa. Mais dan Parole Bondié nou trouve enn raison pli important kifer fodé pa nou malhonnete. Enn parmi bann dix commandement dire: “Fodé pa to kokin.” (Exode 20:15) L’apotre Paul ti repete sa commandement-la pou bann chretien kan li ti dire: “Fodé ki enn voleur arrete kokin.” (Éphésiens 4:28) Kan ou obeir Parole Bondié dan bann question ki concerne l’assurance, ou evite faire enn kitsoz ki Bondié condamné. Ou montré aussi ki ou ena l’amour ek respé pou la loi Bondié ek pou lezot dimoune.—Psaume 119:97.

“Rann César bann kitsoz ki pou César”

Peter li enn businessman. So comptable propose li pou demann gouvernement diminué so taxe parski so compagnie finn “acheté” bann l’equipement computer bien cher. Pou bann business couma pou Peter li normal pou acheté bann l’equipement coumsa. Mem si Peter jamais finn acheté sa bann l’equipement-la, ena enn tigit chance ki gouvernement faire bann l’enquete lor enn depense coumsa. Si quantité taxe ki li bizin payé diminué, Peter pou faire enn grand l’economie. Ki li bizin faire? Ki kapav guide li dan so decision?

L’apotre Paul ti dire bann chretien dan so lepok: “Tou dimoune bizin soumette ar bann l’autorité superieur . . . Donne tou dimoune seki bizin donne zot, seki demann taxe, donne li taxe; seki demann enn paiement, donne li paiement.” (Romains 13:1, 7) Bann dimoune ki envie gagne l’approbation Bondié, paye tou taxe ki bann l’autorité demann zot. Dan enn lot coté, si la loi enn pays d’accord pou diminué montant taxe certain dimoune ou-soit certain compagnie, pena nanyin de mal si enn dimoune ki rempli bann condition, demann sa.

Anou guette enn lot situation ki concerne paye taxe. David li employé couma charpentier dan enn compagnie local. Mais so bann camarade ek so bann voisin inn demann li pou faire bann placard ek bann meuble pou zot lakaz, ek li ti faire sa apré so bann ler travail. Zot propose-li enn pli gros la paye comparé ar seki li gagné dan so travail, mais zot dire li pa declare sa la paye-la lor so forme Income Tax. Coumsa personne pa pou garde enn compte concernant travail ki finn faire, ek personne pa pou paye taxe. Beaucoup dimoune d’accord avek sa l’arrangement-la, parski zot tou tire profit. Parski David envie faire Bondié plaisir, couma li pou considere enn travail ki pa finn enregistré?

Mem si kitfois bann l’autorité jamais pa pou maye enn dimoune ki faire sa qualité travail-la, mais selman, li pa pé paye taxe ki gouvernement ena droit demann bann dimoune. Jésus ti donne sa l’ordre-la: “Rann César bann kitsoz ki pou César, mais rann Bondié bann kitsoz ki pou Bondié.” (Matthieu 22:17-21) Jésus ti dire sa bann parole-la bann ki ti pé ecoute li, pou corrige zot fason pensé concernant paye taxe. Bann gouvernement, ki Jésus ti appel César, considere ki zot ena droit gagne l’argent taxe. Alors, bann disciple Christ considere paye tou bann taxe couma enn l’obligation biblik.

Goré dan l’examen

Enn tifi ki appel Marta ek ki al college ti pé prepare li pou compose so dernier l’examen. Pou ki li kapav gagne enn bon travail, li bizin gagne beaucoup point, a cause sa li’nn passe beaucoup le temps pou aprann. Certain so bann camarade zot aussi zot finn prepare-zot—mais dan enn lot fason. Pou gagne beaucoup point, zot pou servi bann calculatrice ki programmé a l’avance, ek bann telephone portable pou goré. Eski Marta bizin faire seki “tou lezot” pé faire pou ki li kapav gagne beaucoup point?

Li’nn vinn tellement normal pou goré dan l’examen, ki beaucoup pensé ki pena nanyin de mal pou faire sa. Zot raisonne coumsa: “L’importance c’est ki fodé pa lezot maye nou pé faire sa.” Mais selman enn raisonnement coumsa li pa bon pou enn chretien. Mem si enn professeur pa remark bann ki pé goré, ena enn kikenn ki trouvé. Jéhovah koné seki nou faire ek Li pou demann nou bann compte. Paul ti ecrire: “Pena okenn creation ki pa visible devant lizié Bondié, mais tou kitsoz au clair ek bien exposé devant lizié sa kikenn ar ki nou bizin rann compte-la.” (Hébreux 4:13) Nou koné ki Bondié pé observe nou parski Li envie ki nou faire seki droite, alors, sa motive nou pou reste honnete kan nou compose l’examen, pa vrai?

Ki ou pou faire?

Lisa, Gregor, Peter, David ek Marta ti considere bann kitsoz ki ti pé arrive zot, couma bann kitsoz bien serieux. Zot ti decidé pou agir dan enn fason honnete ek coumsa zot ti garde enn bon conscience ek ti reste integre lor plan moral. Ki ou pou faire dan bann situation coumsa?

Ou bann collegue travail, camarade lekol, ek bann voisin kitfois pa casse la tête pou koz menti, goré, ou-soit kokin. En realité, zot kapav bouffonne ou pou force ou faire pareil couma zot. Ki kapav aide ou prend enn bon decision mem si lezot faire pression lor ou pou agir dan enn fason malhonnete?

Rappel ki kan nou agir en accord avek volonté Bondié, sa permette nou ena enn bon conscience ek aussi gagne faveur Bondié. Le roi David ti ecrire: “Ah Jéhovah, kisannla to pou invite dan to la tente? Kisannla ki pou reste dan to montagne sacré? Enn dimoune ki marche dan l’integrité ek ki pratik la justice, ek ki dire la verité dan so leker. . . . Enn kikenn ki faire sa bann kitsoz-la jamais li pou tombé.” (Psaume 15:1-5) Enn bon conscience ek enn bon l’amitié avek Bondié ki dan le ciel ena plus valeur ki n’importe ki l’avantage materiel ki nou kapav gagné dan enn fason malhonnete.

[Note]

[L’encadré page 12]

“Fodé ki enn voleur arrete kokin.”

Nou respé pou la loi Bondié ek nou l’amour pou bann dimoune pousse nou pou reste honnete lor bann question l’assurance

[L’encadré page 12]

“Donne tou dimoune seki bizin donne zot, seki demann taxe, donne li taxe.”

Pou gagne faveur Bondié, nou paye tou taxe ki la loi demann nou

[L’encadré page 13]

“Tou kitsoz . . . bien exposé devant lizié sa kikenn ar ki nou bizin rann compte-la.”

Mem si bann professeur kitfois pa pou maye nou pé goré, nou envie reste honnete devant Bondié

[L’encadré page 14]

Bann vol ki “personne pa koné”

Ou camarade finn acheté dernier version enn programme computer, ek ou ti pou content gagne sa. Li propose pou faire enn copie sa programme-la pou ou, coumsa ou pou faire enn l’economie. Eski sa li malhonnete?

Kan bann dimoune ki servi computer, acheté bann programme, zot accepté pou respecté bann condition ki ena dan licence sa programme-la. Sa licence-la kitfois permette sa dimoune ki pé acheté sa programme-la pou installe ek pou servi sa, zis lor enn sel computer. Dan sa cas-la, si enn dimoune faire enn copie sa programme-la pou enn lot dimoune, li pa pé respecté bann reglement ki ena lor sa licence-la ek sa li illegal. (Romains 13:4) Kan li pé copié sa, li pé aussi kokin, parski li pé empeche sa dimoune ki ena copyright lor sa programme-la, gagne l’argent ki li ena droit gagné.—Éphésiens 4:28.

Certain kapav raisonne coumsa: ‘Jamais personne pa pou koné.’ Sa kapav vrai, mais nou bizin rappel sa bann parole Jésus-la: “Alors, tou kitsoz ki zot envie bann dimoune faire pou zot, zot aussi, zot bizin faire pareil pou bannla.” (Matthieu 7:12) Nou tou nou content gagne enn la paye ki nou merité pou travail ki nou faire ek nou envie ki lezot traite nou bann di-bien avek respé. Alors, nou bizin agir pareil envers lezot. Nou pa commette enn vol ki personne pa koné, couma par exemple nou prend enn di-bien intellectuelb ki pa pou nou.—Exode 22:7-9.

[Note]