5 Bondié accepté tou l’adoration​—Eski li vrai?

Seki ou finn deja tendé: “Pareil couma tou la riviere al dan la mer, ena aussi beaucoup different chemin ki amenn vers Bondié. Sakenn bizin rod so prop chemin ki pou amenn li vers Bondié.”

Seki la Bible enseigné: Nou bizin adore Bondié avek tou nou leker, fodé pa ki nou faire semblant ou-soit nou hypocrite. Jésus ti dire bann chef religieux dan so lepok kifer Bondié ti rejette zot: “Isaïe ti ena raison kan li ti prophetise lor zot, bann hypocrite, kan li ti ecrire: ‘Sa peuple-la adore moi zis ar so la bouche, mais so leker bien-bien loin ar moi.’” (Marc 7:6) Mais selman, pou ki Bondié accepté nou l’adoration, li pa assez ki nou sincere.

Jésus ti montré sa dan enn fason bien clair kan li ti devoile defaut principal ki ti ena dan l’adoration ki bann chef religieux ek zot bann partisan ti pé donne Bondié. Li ti applik sa bann parole Bondié-la ar zot: “C’est pou nanyin ki zot contigne adore moi, parski zot enseigne bann commandement dimoune couma bann doctrine.” (Marc 7:7) Zot l’adoration ti dan vide, ou-soit inutile, parski pou zot, bann tradition religieux ti passe avant seki Bondié ti demann zot.

La Bible pa soutenir l’idée ki ena different bon fason pou adore Bondié, au contraire li montré ki ena enn sel bon fason. Matthieu 7:13, 14 dire: “Rente par la porte ki tipti; parski chemin ki al vers destruction, li grand ek large, ek ena beaucoup dimoune ki pé passe par la; mais chemin ki amenn vers la vie, li serré, so la porte tipti, ek zis enn tigit dimoune ki trouve li.”

Couma kan ou konn la verité sa kapav aide ou: Mazinn sa situation-la: pendant plusieurs mois ou finn entraine-ou pou participe dan enn longue la course. Ou-mem ou sorti premier dan sa la course-la, mais bannla dire ki ou’nn disqualifié parski ou pa’nn respecté enn certain reglement ki ou pa mem koné. Ki ou sentiment? Kitfois ou pou pensé ki tou ou bann zeffort dan vide. Eski enn kitsoz coumsa kapav arrivé ar l’adoration ki nou donne Bondié?

Kan l’apotre Paul ti compare nou l’adoration ar enn competition galopé, li ti ecrire: “Si enn dimoune lutté dan bann jeu, li pa pou gagne couronne si li pa lutté dapré bann reglement.” (2 Timothée 2:5) Nou gagne faveur Bondié kan nou adore Li “dapré bann reglement,” setadir, dan fason ki Li, Li accepté. Nou pa kapav choisir nou prop chemin pou al vers Bondié, pareil couma enn athlete pa kapav galope kot li envie ek attann pou sorti premier.

Pou faire Bondié plaisir, fodé pa ki dan nou l’adoration ena bann mensonge lor Li. Jésus ti dire: “Bann vrai adorateur pou adore le Père avek l’esprit ek la verité.” (Jean 4:23) C’est dan so Parole, la Bible, ki nou aprann vrai chemin ki al vers Bondié.​—Jean 17:17.a

[Note]

[L’encadré page 8]

Eski tou bann religion enseigne bann dimoune pou adore Bondié couma Li, Li accepté?