Eski ou ti koné?

Kifer ti ena bann dimoune ki change kass dan temple Jérusalem?

▪ Enn tipé avant ki li mort, Jésus ti koz lor enn grand l’injustice ki ti pé passé dan temple. La Bible dire: “Jésus . . . ti pousse tou bann ki ti pé vendé ek acheté dan temple, ek li ti devire enba-la-haut la table bann ki ti pé change kass, ek ti devire banc bann ki ti pé vann pigeon. Ek li ti dire zot: ‘Finn ecrire: “Pou appel mo lakaz enn lakaz la priere,” mais zot, zot pé faire li vinn enn caverne voleur.’”​—Matthieu 21:12, 13.

Dan premier siecle, bann Juif ek bann ki ti converti dan religion juif, ki ti sorti dan beaucoup pays ek la ville ti vinn dan temple Jérusalem. Zot ti amenn avek zot bann piece la monnaie ki servi dan zot pays. Mais pou zot kapav paye taxe ki ti bizin payé chaque l’année pou temple, acheté bann zanimo ki ti offert en sacrifice ek faire bann lezot offrande volontaire, zot ti bizin kass ki ti pé servi dan Jérusalem. Alors, bann ki change kass ti prend sa bann different piece la monnaie-la ek ti donne zot kass ki ti pé servi dan Jérusalem. Mais zot pa ti faire sa gratis, zot ti prend enn la monnaie pou sa. Chaque fois ki ti ena bann fête juif, sa bann dimoune-la ti dresse zot la table dan temple dan enn partie ki ti appel la cour bann gentil.

Kan Jésus ti pé dire ki sa bann dimoune-la ti pé faire temple vinn “enn caverne voleur,” sa montré nou dan enn fason bien clair ki quantité kass ki zot ti pé prend pou zot ti bien exageré.