Eski mariage, ki enn don Bondié, vrai-mem ena valeur pou ou?
“Mo souhaité ki Jéhovah faire zot enn don, ek ki zot trouve enn place trankil pou resté, sakenn dan lakaz so mari.”—RUTH 1:9.
ROD REPONSE SA BANN QUESTION-LA:
Kifer nou kapav dire ki pou bann serviteur Bondié dan le passé, mariage ti ena enn grand valeur?
Couma nou koné ki Jéhovah interessé ar choix ki nou faire pou trouve enn conjoint?
Ki conseil biblik lor mariage ou ena l’intention mette en pratik dan ou la vie?
1. Couma Adam ti reagir kan Jéhovah ti donne li enn madame?
“ENFIN, sannla li lezo mo lezo ek la chair mo la chair. Pou appel li Femme, parski finn tire li dan enn zom.” (Gen. 2:23) Surement Adam, premier zom, ti bien content pou gagne enn madame! Li pa etonnant ki li ti dire enn poeme kan li ti trouve so madame! Apré ki Jéhovah ti faire Adam tombe dan enn profond sommeil, Li ti prend enn so bann cote ek Li ti crée sa joli femme-la. Plitar, Adam ti appel so femme Ève. Bondié ti marié zot. Jéhovah ti servi cote Adam pou crée Ève, alors Adam ek Ève ti bien pli proche ar zot camarade ki n’importe ki mari ek femme zordi.
2. Kifer bann zom ek bann femme attiré ar zot camarade?
2 Dan so grand sagesse, Jéhovah ti crée bann dimoune avek capacité pou manifesté enn l’amour romantik—enn qualité ki attire enn zom ek enn femme vers zot camarade. Enn encyclopedie, The World Book Encyclopedia dire: “Enn zom ek enn femme ki marié, attann pou gagne bann relation sexuel ek aussi ki zot pou touletan attiré dan enn fason romantik, sakenn ar so camarade.” C’est seki finn arrivé plusieurs fois parmi bann serviteur Jéhovah.
ZOT TI RESPECTÉ MARIAGE, ENN DON BONDIÉ
3. Couma Isaac ti gagne enn madame pou marié?
3 Abraham, ki ti enn zom fidele, ti ena enn grand respé pou mariage. Alors, li ti envoye so pli ancien serviteur dan Mésopotamie pou rod enn madame pou Isaac. La priere ki sa serviteur-la ti faire ti amenn bann bon resultat. Rébecca, enn femme ki ti ena la crainte pou Bondié, ti vinn madame Isaac ek li ti forme partie dan disposition ki Jéhovah ti prend pou protege descendance Abraham. (Gen. 22:18; 24:12-14, 67) Apré ki nou’nn guette sa l’exemple-la, fodé pa nou tire conclusion ki enn dimoune—mem si li ena bann bon l’intention—kapav arrange mariage entre deux dimoune alors ki personne pa’nn demann li pou faire sa. Azordi, beaucoup choisir zot conjoint par zot-mem. Bien sur, Bondié pa choisir ar kisannla enn dimoune bizin marié, mais Li pou guide bann chretien dan sa domaine-la ek dan lezot domaine zot la vie, si zot prié Li pou gagne so direction ek laisse l’esprit saint guide zot.—Gal. 5:18, 25.
4, 5. Couma ou koné ki sa Shoulammite-la ek so berger ti ena bann sentiment special pou zot camarade?
4 Enn joli tifi, enn Shoulammite ki ti vive en Israël dan le passé, pa ti envie ki so bann camarade mette pression lor li pou li vinn enn parmi bann femme le roi Salomon. Li ti dire: “Ah bann tifi dan Jérusalem, mo’nn faire zot faire serment pou pa provok l’amour ki en moi avant ki so ler arrivé.” (Chant de S. 8:4) Sa Shoulammite-la ek enn certain berger ti ena bann sentiment special pou zot camarade. Avek humilité, sa tifi-la ti dire: “Mo enn simple fleur safran ki poussé lor la plaine toute longue la cote, enn lys lor bann la plaine pli bas.” Mais berger-la ti reponn: “Couma enn lys parmi bann pikan, coumsa-mem mo compagne été parmi bann tifi”! (Chant de S. 2:1, 2) Zot ti vrai-mem content zot camarade.
5 Parski sa Shoulammite-la ek sa berger-la ti content Bondié avant tou kitsoz, zot mariage ti pou bien solide. Oui sa tifi-la ti dire so berger: “Mette moi couma enn scellé lor to leker, couma enn scellé lor to lé-bras; parski l’amour li fort couma la mort, mo volonté ki to attache zis avek moi, li ferme pareil couma shéol. So bann la braise zot bann la braise difé, la flamme Yah [parski sa sorti kot Li]. Beaucoup de l’eau pa pou kapav teigne l’amour, ni bann grand la-riviere pa pou kapav sarié li allé. Si enn zom donne tou bann kitsoz ki ena valeur dan so lakaz pou l’amour, pena doute ki bann dimoune pou meprise sa.” (Chant de S. 8:6, 7) Eski bann serviteur Bondié pa pou attann zot aussi ki zot conjoint agir pareil ek respecté zot l’engagement?
ENN CHOIX KI ENA L’IMPORTANCE POU BONDIÉ
6, 7. Couma nou koné ki Jéhovah interessé ar choix ki nou faire kan nou pé rod enn conjoint?
6 Jéhovah interessé ar choix ki ou faire kan ou pé rod enn conjoint. Jéhovah ti averti bann Israélite concernant bann habitant ki ti reste dan Canaan. Li ti dire zot: “Fodé pa ki to faire enn l’alliance avek zot par mariage. Fodé pa to marié to tifi ar so garson, ek fodé pa to marié to garson ar so tifi. Parski li pou faire to garson arrete suive moi, ek pena doute ki zot pou servi lezot bondié; ek vrai-mem colere Jéhovah pou enflammé kont zot, ek vrai-mem Li pou detruire toi bien vite.” (Deut. 7:3, 4) Plusieurs siecle apré, pretre Ezra ti dire: “Zot finn montré ki zot infidele kan zot finn faire bann femme etranger vinn reste kot zot, pou faire Israël vinn pli coupable.” (Ezra 10:10) Ek l’apotre Paul ti dire so bann compagnon chretien: “Enn femme li attaché avek so mari tant ki so mari vivant. Mais si so mari mort, li libre pou marié avek n’importe kisannla li envie, mais selman dan le Seigneur.”—1 Cor. 7:39.
7 Si enn serviteur Jéhovah ki baptisé, marié ar enn dimoune ki pa servi Jéhovah, li pou desobeir Bondié. Bann Israélite dan lepok Ezra ti agir dan enn fason infidele kan zot ti faire “bann femme etranger vinn reste kot zot.” Seki la Bible dire bien clair ar kisannla enn chretien bizin marié. Alors li pou bien mauvais ki nou essaye trouve bann excuse pou pa suive bann principe Jéhovah. (Ezra 10:10; 2 Cor. 6:14, 15) Enn chretien ki marié ar enn kikenn ki pa servi Jéhovah, li pa enn bon l’exemple pou lezot ek li montré ki li pa vrai-mem donne valeur mariage, enn don ki Bondié inn faire. Alors, si enn chretien faire sa, li kapav perdi so bann privilege dan congregation. Li pa logik ki li attann ki Jéhovah beni li, mem si li reconette ki li’nn desobeir Jéhovah ek li dire dan so la priere: ‘Jéhovah, mo finn desobeir toi par expré, mais s’il te plait, beni moi kan-mem.’
NOU PAPA KI DAN LE CIEL KONÉ KI PLI BON
8. Expliké kifer nou bizin suive bann conseil ki Bondié inn donné lor mariage.
8 Enn kikenn ki fabrik enn machine koné exactement couma li marché. Si bizin monte machine-la, li kapav donne bann instruction necessaire couma pou faire sa. Ki pou arrivé si nou pa prend compte so bann instruction, ek nou monte machine-la dan nou fason? Sa pou enn catastrophe—machine-la kitfois pa pou mem marché. Li pareil aussi pou mariage, si nou envie ki nou mariage heureux, nou bizin suive bann instruction ki Jéhovah inn donné, parski c’est Li ki’nn crée mariage.
9. Kifer nou kapav dire ki Jéhovah comprend seki enn dimoune ressenti kan li tousel, ek la joie ki kapav gagné dan enn mariage?
9 Jéhovah konn tou seki bizin koné lor bann dimoune ek lor mariage. Li ti crée bann dimoune dan enn fason ki zot ena enn besoin pou gagne relation sexuel pou zot kapav “gagne beaucoup zenfant, [ek] multiplié.” (Gen. 1:28) Bondié comprend seki enn dimoune ressenti kan li senti-li tousel. Couma nou konn sa? Avant ki Li ti crée premier femme, Li ti dire: “Li pa bon ki zom reste tousel. Mo pou faire enn l’aide pou li, enn kikenn ki al bien ar li.” (Gen. 2:18) Jéhovah bien koné aussi ki la joie enn couple kapav gagné dan so mariage.—Lire Proverbes 5:15-18.
10. Couma bann couple kapav faire Jéhovah plaisir mem dan domaine sexuel?
10 A cause Adam, tou dimoune inn herite peché ek l’imperfection, alors zordi pena okenn mariage parfait. Selman, parmi bann serviteur Jéhovah, bann couple kapav konn enn vrai bonheur si zot obeir Parole Bondié. Par exemple, guette conseil bien clair ki Paul ti donné concernant bann relation sexuel dan enn mariage. (Lire 1 Corinthiens 7:1-5.) Dapré la Bible, c’est pa zis pou gagne bann zenfant ki enn couple gagne bann relation sexuel. Zot gagne relation aussi parski zot ena bann besoin affectif ek physik. Mais, bann pratik sexuel ki impur pa faire Bondié plaisir. Dan sa domaine important-la, bann mari ek bann femme chretien manifesté tendresse ek enn vrai l’affection sakenn envers so camarade. Bien sur, zot bizin rejette bann pratik ki Jéhovah detesté.
11. Couma Ruth ti gagne bann benediction parski li ti obeir Jéhovah?
11 Dan enn mariage bizin ena la joie. Fodé pa ki couple-la malheureux ou-soit vive ensam a cause ki a faire. Lakaz enn chretien bizin surtout enn place kot ena trankilité ek la paix. Guette seki ti arrivé ena 3,000 an, kan enn veuve agé ki ti appel Naomi ek so deux belle-fille, Orpa ek Ruth, ki ti veuve zot aussi, ti quitte Moab pou al Juda. Naomi ti suppliye zot pou retourne dan zot peuple. Ruth, ki ti enn Moabite, ti reste attaché ar Naomi ek li ti fidele ar vrai Bondié. Boaz ti dire li ki li pou gagne ‘enn salaire parfait ar Jéhovah, parski li ti rod protection enba So lezel.’ (Ruth 1:9; 2:12) Ruth ti ena enn grand respé pou mariage, enn don ki Bondié inn faire. Li ti marié ar Boaz, ki ti agé ek ki ti enn vrai adorateur Jéhovah. Kan Ruth pou ressuscité lor la terre dan le monde nouveau, li pou content pou aprann ki li ti enn ancetre Jésus Christ. (Mat. 1:1, 5, 6; Luc 3:23, 32) Oui, li ti gagne bann grand benediction parski li ti obeir Jéhovah!
BANN BON CONSEIL POU KI NOU MARIAGE REUSSI
12. Kot-sa enn kikenn kapav trouve bann bon conseil lor mariage?
12 Jéhovah ki’nn crée mariage, dire nou seki nou bizin koné pou ki nou mariage reussi. Pena personne ki konn plus ki Li. La Bible touletan ena raison, alors, sel fason ki enn dimoune kapav donne bann bon conseil lor mariage, c’est kan li touletan base so bann conseil lor bann principe ki ena dan la Bible. Par exemple, Bondié ti inspire l’apotre Paul pou ecrire: “Fodé . . . ki sakenn parmi zot content so madame pareil couma li content li-mem; enn femme li, li bizin ena enn profond respé pou so mari.” (Éph. 5:33) Pena nanyin dan sa conseil biblik-la ki bann chretien mur pa kapav comprend. Mais eski zot pou applik sa conseil-la? Zot pou faire sa si pou zot, mariage ena valeur.a
13. Ki kapav arrivé si enn mari pa applik conseil ki trouve dan 1 Pierre 3:7?
13 Enn mari chretien bizin agir avek amour envers so femme. L’apotre Pierre ti ecrire: “Zot aussi pareil, bann mari, contigne reste ar [zot femme] dapré la connaissance, donne zot l’honneur pareil couma enn recipient pli fragile, enn vase feminin, parski ensam avek bannla, zot aussi, zot pou herite la vie, ki enn faveur ki personne pa merité, pou ki pena nanyin ki blok zot la priere.” (1 Pierre 3:7) Jéhovah kitfois pa pou ecoute la priere enn mari ki pa applik conseil ki Li donné. Condition spirituel toulé-deux conjoint kapav bien affecté ek lerla sa kapav provok enn grand stress, faire zot laguerre, ek koz brite sakenn ar so camarade.
14. Ki l’influence enn femme ki ena l’amour kapav ena lor so famille?
14 Enn femme ki laisse Parole Jéhovah ek l’esprit saint guide li, kapav faire beaucoup pou ki so lakaz vinn enn place kot ena la paix ek bonheur. Li normal pou enn mari ki ena la crainte pou Bondié, content so femme ek protege li lor plan physik ek spirituel. Enn femme chretien envie gagne l’amour so mari, alors, li manifesté bann qualité ki pou faire so mari content li encore plus. Proverbes 14:1 dire: “Enn femme ki vrai-mem sage inn construire so lakaz, mais enn femme ki bete crase li ar so prop la main.” Enn femme ki sage ek ki ena l’amour faire tou pou ki so famille reussi ek heureux. Li montré aussi ki li vrai-mem donne valeur mariage, enn don ki Bondié inn faire.
15. Ki conseil ena dan Éphésiens 5:22-25?
15 Kan bann mari ek bann femme suive l’exemple Jésus dan fason ki li ti agir envers so congregation, zot montré respé pou mariage, sa don ki Bondié inn faire-la. (Lire Éphésiens 5:22-25.) Li enn benediction kan bann conjoint vrai-mem content zot camarade, ena l’humilité entre zot ek pa boudé ek refuse pou koz ar zot camarade, ou-soit kan zot pa laisse bann vilain defaut gate zot mariage!
FODÉ KI PERSONNE PA SEPARE ZOT
16. Kifer certain chretien reste celibataire?
16 Mem si la plupart dimoune decidé pou marié enn jour, certain serviteur Jéhovah reste celibataire parski zot pa trouve enn conjoint ki zot content ou-soit ki ena faveur Jéhovah. Lezot ena don pou reste celibataire, sa permette zot pou consacré-zot plus dan service Jéhovah sans ki zot laisse bann responsabilité ki ena dan mariage distraire zot. Bien sur, enn celibataire bizin respecté bann limite ki Jéhovah inn etabli.—Mat. 19:10-12; 1 Cor. 7:1, 6, 7, 17.
17. (a) Ki bann parole ki Jésus ti dire lor mariage nou bizin garde dan nou l’esprit? (b) Si enn chretien envie gagne conjoint enn lot dimoune, ki li bizin faire sans tardé?
17 Ki nou marié ou-soit celibataire, nou tou nou bizin rappel seki Jésus ti dire: “Eski zot pa finn lire ki celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair’? Oui, zot nepli deux, mais enn sel la chair. Alors, seki Bondié finn mette enba enn sel joug, fodé ki personne pa separe sa.” (Mat. 19:4-6) Li enn peché si nou envie gagne conjoint nou camarade. (Deut. 5:21) Si enn chretien pé commence developpe enn mauvais desir coumsa, li bizin pa tardé pou deracine sa dan so leker, mem si sa kapav faire li souffert beaucoup lor plan affectif parski li finn laisse sa desir egoïste-la developpé. (Mat. 5:27-30) Li bien important ki nou corrige bann pensée coumsa ek ki nou tire sa mauvais desir-la dan nou leker ki traitre.—Jér. 17:9.
18. Ki sentiment ou ena lor mariage, sa don ki Bondié inn faire-la?
18 Mem bann dimoune ki konn enn tigit kitsoz ou-soit pa konn nanyin lor Jéhovah ek lor mariage, ena enn certain respé pou mariage. Alors, nou ki finn voué nou la vie ar Jéhovah, enn “Bondié heureux,” eski nou pa bizin ena encore plus respé pou sa disposition ki Li’nn prend-la? Bien sur! Alors, anou montré par fason ki nou vive, ki mariage ena vrai-mem enn grand valeur pou nou!—1 Tim. 1:11.
[Note]
a Pou gagne plus renseignement lor mariage, guette chapitre 10 ek 11, dan livre “Reste dan l’amour Bondié.”
[L’encadré page 16]
Enn mariage ki pé marche bien honore Jéhovah ek kapav faire zot tou dan la famille heureux
[Zimage page 15]
Ruth ti montré ki li ena respé pou mariage
[Zimage page 17]
Eski ou montré ki mariage vrai-mem ena valeur pou ou?