Faire confiance Jéhovah, Bondié ki controle ‘le temps ek lepok’

“C’est Li-mem ki change bann le temps ek bann lepok, Li tire bann le roi ek Li etabli bann le roi.”​—DAN. 2:21.

COUMA OU POU REPONN?

Couma creation ek realisation bann prophetie montré ki Jéhovah respecté le temps ki Li’nn fixé?

Kan nou aprann ki Jéhovah Li-mem Bondié “bann le temps ek bann lepok,” ki sa pousse nou pou faire?

Kifer calendrier Jéhovah pa controlé par bann l’evenement ki ena dan le monde ek par bann plan ki bann dimoune faire?

1, 2. Ki kitsoz montré ki Jéhovah comprend bien ki été le temps?

BIEN avant ki Li ti crée bann dimoune, Jéhovah ti etabli bann moyen pou calcule le temps. Dan quatrieme jour creation, Bondié ti dire: “Ki bann la lumiere parette dan le ciel pou faire enn separation entre li-jour ek la nuit; zot bizin la couma bann signe pou bann lepok, pou bann jour, ek pou bann l’année.” (Gen. 1:14, 19, 26) C’est seki ti arrivé exactement, en accord avek volonté Jéhovah.

² Bann scientifik encore pé faire bann debat pou comprend ki le temps été vrai-mem. Enn encyclopedie dire: “Le temps, c’est enn parmi bann pli grand mystere dan le monde. Personne pa kapav dire exactement seki li été.” Mais Jéhovah Li, Li bien comprend ki été le temps. Apré tou, c’est Li-mem ki “Createur le ciel . . . , Li ki finn forme la terre ek ki finn faire li.” Jéhovah Li aussi “sa Kikenn ki depuis commencement faire konn la fin, ek depuis bien longtemps avant [faire konn] bann kitsoz ki pankor faire.” (Is. 45:18; 46:10) Pou nou la foi en Jéhovah ek dan so Parole, la Bible, vinn pli fort, anou guetté couma creation ek bann prophetie ki’nn realisé montré ki Jéhovah Li enn Kikenn ki respecté le temps ki Li’nn fixé.

LA CREATION FAIRE NOU ENA LA FOI EN JÉHOVAH

3. Couma nou trouve enn grand precision dan creation?

³ Beaucoup kitsoz ki Jéhovah inn crée, ki zot bien tipti ou-soit zot bien grand, fonctionne avek enn grand precision. Par exemple, bann atome tourne dan enn fason bien regulier. Ena bann reveil special ki marche avek bann atome ek ki donne l’heure exact; zot pa pou faire enn seconde retard, mem apré 80 million l’année. Mouvement bann planete ek bann zetoile aussi bien precis. Kapav predire zot position dan le ciel avek enn grand precision. Sa finn aide beaucoup dimoune pou konn bann saison ek pou koné ki direction pou prend kan zot voyagé. Jéhovah​—Createur sa bann kitsoz-la​—vrai-mem “puissant par la force” ek Li merite ki nou donne Li louange.​—Lire Isaïe 40:26.

4. Couma nou kapav trouve sagesse Jéhovah par bann kitsoz vivant ki bien reglé, ki Li’nn crée?

⁴ Kan nou guette bann kitsoz vivant dan la creation, nou kapav trouvé ki zot inn bien reglé. Beaucoup plante ek zanimo coumadir ena enn reveil en zot-mem. A cause sa, beaucoup zoiseau koné par zot l’instinct kan zot bizin change l’endroit. (Jér. 8:7) Bann dimoune aussi coumadir ena enn reveil en zot, ki en general reglé lor enn cycle 24 heure. Zot lekor koné kan la nuit ek kan li-jour. Kan enn dimoune prend avion pou al dan enn lot pays kot ena enn lot l’heure, kitfois so lekor pou prend plusieurs jour pou reglé sa reveil ki li ena en li-la. Vrai-mem, sa quantité l’exemple bann kitsoz ki’nn bien reglé ki ena dan creation-la, montré puissance ek sagesse sa Bondié ki controle “bann le temps ek bann lepok[-la].” (Lire Psaume 104:24.) Oui, Jéhovah ena enn grand sagesse ek enn grand pouvoir. Nou kapav ena la foi ki Li ena capacité pou realise so volonté!

BANN PROPHETIE KI FINN ACCOMPLI DAN LER, FAIRE NOU ENA LA FOI

5. (a) Ki sel moyen nou kapav konn l’avenir bann dimoune? (b) Kifer Jéhovah kapav annonce bann l’evenement ek kan zot pou arrivé?

⁵ Kan nou guette creation, nou aprann beaucoup lor “bann qualité invisible” ki Jéhovah ena. Selman, ena bann question important ki creation pa reponn, couma par exemple: ki l’avenir reservé pou bann dimoune? (Rom. 1:20) Pou nou gagne reponse sa question-la, nou bizin examine seki Bondié inn revelé dan so Parole, la Bible. Kan nou examine la Bible, nou trouve bann prophetie ki finn touletan realisé exactement dan ler! Jéhovah kapav revele seki pou arrivé parski Li kapav koné exactement seki pou arrivé dan l’avenir. En plus, seki la Bible annoncé arrive exactement dan ler, parski Jéhovah kapav faire bann l’evenement arrivé dapré so projet ek so calendrier.

6. Couma nou koné ki Jéhovah envie nou comprend realisation bann prophetie la Bible?

⁶ Jéhovah envie ki so bann adorateur comprend bann prophetie biblik ek tire profit ar sa. Mem si Bondié pa considere le temps pareil couma nou, kan Li annoncé ki enn l’evenement pou arrivé dan enn moment precis, Li servi enn langage ki nou kapav comprend. (Lire Psaume 90:4.) Par exemple, livre Révélation faire reference ar “quatre ange” ki “ti’nn preparé pou l’heure, jour, mois, ek l’année”​—bann mot ki servi pou indik le temps ek ki nou kapav comprend. (Rév. 9:14, 15) Kan nou guetté couma bann prophetie finn accompli exactement dan ler, sa bizin faire nou ena la foi dan Bondié ki controle “bann le temps ek bann lepok” ek dan so Parole. Anou prend deux-trois l’exemple.

7. Couma realisation prophetie Jérémie concernant Jérusalem ek Juda montré ki Jéhovah respecté le temps ki Li’nn fixé?

⁷ Premierement, anou examine seki ti arrivé dan septieme siecle, avant nou lepok. “Dan quatrieme l’année Yehoïaqim, garson Yoshiya, le roi Juda,” Jéhovah ti annonce enn ‘parole ar Jérémie concernant tou bann dimoune dan Juda.’ (Jér. 25:1) Jéhovah ti annoncé ki Jérusalem ti pou detruire, ek bann Juif ki ti reste Juda ti pou deporté dan Babylone. La-bas, zot ti pou “servi le roi Babylone pendant soixante-dix an.” Bann l’armée babylonien ti detruire Jérusalem en 607 avant nou lepok, ek bann Juif dan Juda ti vrai-mem deporté pou al Babylone. Mais ki ti pou arrivé a la fin 70 an? Jérémie ti annoncé: “Ala seki Jéhovah inn dire: ‘En accord avek realisation soixante-dix an dan Babylone, mo pou occupe zot, ek vrai-mem mo pou realise mo parole envers zot, kan mo pou faire zot ré-vinn dan sa l’endroit-la.’” (Jér. 25:11, 12; 29:10) Sa prophetie-la ti realisé exactement dan ler, en 537 avant nou lepok, apré ki bann Mède ek bann Perse ti delivré bann Juif dan Babylone.

8, 9. Couma bann prophetie Daniel montré ki Jéhovah Li enn Bondié ki controle “bann le temps ek bann lepok”?

⁸ Anou examine enn lot prophetie ki ti concerne peuple Bondié dan le passé. Apepré deux an avant ki bann Juif ti quitte Babylone, Bondié ti annoncé par prophete Daniel ki le Messie ti pou vini 483 an apré ki ti donne l’ordre pou reconstruire Jérusalem. Le roi médo-perse ti donne sa l’ordre-la en 455 avant nou lepok. Exactement 483 an plitar, setadir en l’an 29 nou lepok, Jésus ki ti sorti Nazareth, ti oint ar l’esprit saint kan li ti prend bapteme ek lerla li ti vinn le Messie.a​—Neh. 2:1, 5-8; Dan. 9:24, 25; Luc 3:1, 2, 21, 22.

⁹ Asterla, remark seki la Bible ti annoncé concernant Royaume Bondié. Bann prophetie la Bible ti montré ki Royaume messianik ti pou etabli dan le ciel en 1914. Par exemple, la Bible ti donne “signe” lor presence Jésus, ek ti montré kan Jésus ti pou tire Satan dan le ciel. Sa ti pou amenn bann grand malheur lor la terre. (Mat. 24:3-14; Rév. 12:9, 12) En plus, enn prophetie la Bible faire nou konn date exact​—1914​—kan “le temps fixé bann nation [ti pou] fini” ek kan Royaume Bondié ti pou commence regné dan le ciel.​—Luc 21:24; Dan. 4:10-17.b

10. Ki bann l’evenement ki’nn annoncé pou l’avenir nou sur pou realisé dan moment ki’nn fixé?

¹⁰ Seki pé attann nou dan l’avenir c’est ‘la grande tribulation’ ki Jésus ti annoncé. Apré sa tribulation-la, Jésus pou regné pendant mille an. Pena okenn doute ki sa bann l’evenement-la pou arrivé exactement dan moment ki’nn fixé. Kan Jésus ti lor la terre, Jéhovah ti’nn fini fixé ‘jour ek l’heure’ ki sa bann l’evenement-la pou arrivé.​—Mat. 24:21, 36; Rév. 20:6.

“RÉ-ACHETÉ LE TEMPS KI BIZIN”

11. Parski nou koné ki nou pé vive dan lepok la fin, ki l’effet sa bizin ena lor nou?

¹¹ Kan nou’nn koné ki Royaume Bondié inn commence dirigé ek ki nou pé vive dan “lepok la fin,” ki l’effet sa bizin ena lor nou? (Dan. 12:4) Beaucoup dimoune trouvé ki bann condition dan le monde pé vinn pli pire, pourtant zot pa accepté ki sa bann changement-la pé realise bann prophetie biblik concernant bann dernier jour. Kitfois zot pensé ki enn jour sa le monde-la pou detruire ou-soit zot croire ki dan enn certaine fason, grace a bann zeffort ki bann dimoune pé faire, enn jour pou ena “la paix ek securité.” (1 Thess. 5:3) Mais ki nou kapav dire lor nou? Si nou reconette ki nou pé vive dan la fin bann dernier jour le monde Satan, eski nou pa bizin faire zeffort pou servi le temps ki resté pou servi Bondié ki controle “bann le temps ek bann lepok” ek aide lezot pou aprann konn Li? (2 Tim. 3:1) Nou bizin prend bann bon decision lor fason ki nou servi nou le temps.​—Lire Éphésiens 5:15-17.

12. Ki nou kapav aprann ar seki Jésus ti dire concernant lepok Noé?

¹² Li pa facile pou “ré-acheté le temps ki bizin” dan enn le monde ki rempli ar bann distraction. Jésus ti donne sa l’avertissement-la: “Pareil couma sa ti été dan lepok Noé, coumsa-mem presence Fils de l’homme pou été.” Couma lepok Noé ti été? Jéhovah ti annoncé ki Li ti pou detruire le monde ki ti ena dan sa lepok-la. Dan sa lepok-la, bann mauvais dimoune ti pou noyé dan enn deluge ki ti pou ena lor la terre entier. Noé ti enn “predicateur la justice,” alors avek fidelité li ti annonce message Bondié ar bann dimoune dan so lepok. (Mat. 24:37; 2 Pierre 2:5) Mais zot ti pé “mangé ek boire, bann zom ti pé marié ek ti pé donne bann femme en mariage, . . . ek zot pa ti prend compte, ziska ki deluge ti vini ek ti balié zot tou.” Alors, Jésus ti averti so bann disciple: “Montré ki zot inn paré, parski c’est dan enn l’heure ki zot pa attann, ki Fils de l’homme pé vini.” (Mat. 24:38, 39, 44) Nou bizin imite Noé, pa bann dimoune ki ti vive dan so lepok. Ki pou aide nou pou montré ki nou’nn paré?

13, 14. Pendant ki nou pé attann ki Fils de l’homme vini, ki nou bizin rappel lor Jéhovah ek couma sa pou aide nou servi Li avek fidelité?

¹³ Mem si Fils de l’homme pé vini dan enn l’heure ki nou pa pé attann, nou bizin rappel ki Jéhovah touletan realise so projet dan le temps ki Li’nn fixé. Calendrier Jéhovah pa controlé par bann l’evenement ki ena dan le monde ek par bann plan ki bann dimoune faire. Pou realise so volonté, c’est Jéhovah ki decidé kan bann kitsoz pou arrivé ek ki consequence sa pou ena. (Lire Daniel 2:21.) En realité, Proverbes 21:1 dire nou: “Leker enn le roi, li pareil couma bann ti la riviere de l’eau dan la main Jéhovah. Li dirige sa partout kot Li content.”

¹⁴ Jéhovah kapav controle bann l’evenement pou ki Li realise so projet dan ler ki Li’nn fixé. Beaucoup bann grand changement ki finn ena dan le monde finn realise bann prophetie, surtout bann ki ena enn rapport avek predication la bonne nouvelle ki pé faire partout lor la terre. Pense lor seki ti arrivé kan l’Union soviétique ti tombé ek bann consequence ki ti ena. Bien tigit dimoune ti pou pensé ki enn grand changement politik coumsa ti pou kapav arrivé dan sa vitesse-la. Mais, a cause sa bann changement-la, zordi la bonne nouvelle pé preché dan beaucoup pays kot longtemps pa ti gagne droit preché. Alors, anou faire tou seki nou kapav pou ré-acheté le temps pou servi avek fidelité Bondié “bann le temps ek bann lepok.”

ENA LA FOI KI JÉHOVAH POU REALISE SO PROJET DAN LER KI BIZIN

15. Kan l’organisation faire bann changement, couma nou kapav montré ki nou ena la foi?

¹⁵ Pou nou kapav contigne preché dan bann dernier jour, nou bizin ena la foi ki Jéhovah pou realise so projet dan ler ki bizin. Parski situation le monde pé contigne changé, kitfois nou aussi nou bizin faire certain changement dan fason ki nou preché. L’organisation Jéhovah parfois faire bann changement pou aide nou preche la bonne nouvelle dan enn fason pli efficace. Nou montré ki nou ena la foi dan Bondié “bann le temps ek bann lepok” kan nou soutenir avek tou nou leker sa bann changement-la ek servi avek fidelité enba direction so Garson, “chef congregation.”​—Éph. 5:23.

16. Kifer nou kapav ena la foi ki Jéhovah pou aide nou dan ler ki bizin?

¹⁶ Jéhovah envie ki nou prié Li n’importe ki ler, ek ena enn grand confiance ki Li pou donne nou so “l’aide dan ler ki bizin.” (Héb. 4:16) Eski sa pa montré ki Li content ek Li interessé ar sakenn parmi nou? (Mat. 6:8; 10:29-31) Nou montré ki nou ena la foi en Jéhovah kan nou prié Li regulierement pou demann Li so l’aide ek apré, agir en accord avek nou bann la priere ek direction Bondié. En plus, nou pa blié pou prié pou nou bann compagnon chretien.

17, 18. (a) Ki action bientot Jéhovah pou prend kont so bann l’ennemi? (b) Dan ki piege fodé pa nou tombé?

¹⁷ Asterla, c’est pa ler pou nou “hesité ek mank la foi”; mais c’est ler pou nou vinn puissant par nou la foi. (Rom. 4:20) Bann l’ennemi Bondié​—Satan ek bann ki laisse-zot influencé par li​—pé essaye arrete travail ki Jésus ti donne so bann disciple, parmi ena nou aussi. (Mat. 28:19, 20) Mem si Satan le Diable pé attak nou, nou koné ki Jéhovah Li enn “Bondié vivant, ki enn Sauveur pou tou sorte qualité dimoune, surtout pou bann ki fidele.” Li “koné couma pou delivré bann dimoune ki attaché ar Li, kan zot dan l’epreuve.”​—1 Tim. 4:10; 2 Pierre 2:9.

¹⁸ Bientot, Jéhovah pou detruire sa mauvais systeme-la. Mem si nou pa konn tou bann detail ek ler exact kan sa pou arrivé, nou koné ki Jésus Christ pou detruire bann l’ennemi Bondié ek Jéhovah pou justifié droit ki Li ena pou dirigé, exactement dan ler ki’nn fixé. Alors, nou pou faire enn grand erreur si nou pa prend compte dan ki ‘le temps ek ki lepok’ nou pé vive asterla! Fodé jamais nou tombe dan piege pou croire ki “tou kitsoz pé contigné pareil couma zot ti été depuis commencement la creation.”​—1 Thess. 5:1; 2 Pierre 3:3, 4.

“CONTIGNE ATTANN BONDIÉ”

19, 20. Kifer nou bizin contigne attann Jéhovah?

¹⁹ Kan Jéhovah ti crée bann dimoune, Li ti envie ki zot vive pou touletan pou ki zot contigne aprann konn Li ek bann joli kitsoz ki Li ti crée. Ecclésiaste 3:11 dire: “Tou kitsoz, [Jéhovah] inn faire li joli dan so le temps. Mem l’eternité, Li finn mette dan zot leker, pou ki jamais bann dimoune pa decouvert travail ki vrai Bondié finn faire depuis commencement ziska la fin.”

²⁰ Nou bien content ki Jéhovah jamais finn change so projet pou bann dimoune! (Mal. 3:6) Avek Bondié “pena okenn changement couma dan mouvement l’ombrage.” (Jacq. 1:17) So calendrier pa controlé par bann moyen ki bann dimoune servi pou calcule le temps, couma par exemple, rotation la terre. Jéhovah Li-mem “le Roi eternel.” (1 Tim. 1:17, note) Alors, anou montré ki nou pé “contigne attann Bondié, ki pou sauve [nou].” (Mika 7:7) Oui, ‘prend courage ek faire zot leker vinn fort, zot tou ki pé attann Jéhovah!’​—Ps. 31:24.

[Notes]

[Zimage page 25]

Daniel ti ena la foi dan realisation prophetie ki Jéhovah ti donné

[Zimage page 27]

Eski ou pé bien servi ou le temps pou faire volonté Jéhovah?