Eski kikenn tann nou la priere?

“Avant, mo ti ena bann doute ki Bondié existé. Mais kan-mem, parfois mo ti prié. Mo pa ti sur si ti ena enn kikenn ki ti pé ecoute moi, mais mo ti esperé ki ti ena enn kikenn ki ti pé ecouté. Mo ti malheureux ek mo pa ti ena okenn but dan mo la vie. Mo ti peur pou croire dan Bondié parski mo ti pensé ki zis bann dimoune faible ki ti croire dan Bondié.”​—PATRICIA,a IRLANDE.

ESKI ou finn deja ena mem sentiment ki Patricia? Eski ou prié mem si ou pa sur ki Bondié existé? Si oui, alors ou pa tousel. Guette seki sa bann sondage-la montré.

◼ Dapré enn sondage ki ti faire avek 2,200 Anglais, zis 22 pour cent croire ki ena enn Bondié ki’nn crée le monde ek ki ecoute bann la priere. Pourtant, dan sa mem sondage-la, 55 pour cent bann dimoune prié de temps-en-temps.

◼ Enn sondage ki ti faire avek 10,000 dimoune lor quatre continent montré ki, parmi bann dimoune ki dire zot athée, preské 30 pour cent faire la priere.

Kifer zot ena bann doute?

Enn Anglais ki appel Allan dire: “Mo ti habitué dire ki mo pa croire dan Bondié parski mo ti pensé ki bann dimoune finn invente la religion pou controle lezot dimoune ek pou gagne kass. Mo ti dire aussi ki si ti ena enn Bondié, pa ti pou ena tou sa l’injustice-la. Pourtant, parfois mo ti assizé trankil ek mo ti koz avek ‘enn kitsoz.’ Mo ti aussi demann mo-mem: ‘Couma mo’nn arrive la?’”

Chaque dimoune ki ena bann sentiment coumsa, ena so prop raison pou douté si ena enn kikenn ki reponn bann la priere. Dan beaucoup cas, sa bann dimoune-la ena bann doute parski zot pa’nn gagne reponse pou bann question ki zot inn posé, couma par exemple:

◼ Eski ena enn Createur?

◼ Kifer souvent bann religion faire bann mauvais kitsoz?

◼ Kifer Bondié laisse dimoune souffert?

Si ou ti kapav konn reponse sa bann question-la, eski ou ti pou ena plus confiance kan ou faire la priere?

[Note]