Kifer corruption pé contigné?
“Dimoune finn domine dimoune pou zot prop malheur.”—ECCLÉSIASTE 8:9.
SA BANN parole-la decrire bien l’histoire bann gouvernement humain. Zot finn responsable bann grand souffrance ek la misere. Dan tou lepok, bann dimoune ki ena bann bon l’intention ek ki finn essaye etabli enn societé pli juste, pa finn reussi faire sa a cause corruption ek desir pou gagne plus. Kifer? Kifer corruption pé contigné? En general, a cause sa trois mauvais l’influence-la.
1. L’influence peché.
La Bible dire dan enn fason clair ki nou ‘tou nou enba peché.’ (Romains 3:9) Pareil couma enn maladie ki nou finn herité ek ki nou pa kapav gueri, peché “reste” dan nou. Pendant plusieurs millier l’année, peché finn “regne” lor bann dimoune couma enn le roi. So “la loi” pé contigne travail dan nou. A cause tendance ki bann dimoune ena pou faire peché, sa amenn beaucoup pou mette zot prop l’interet en premier. Kitfois aussi, zot priorité c’est pou gagne bann kitsoz materiel ou-soit l’autorité, mem si sa faire lezot di-tort.—Romains 5:21; 7:17, 20, 23, 25.
2. L’influence sa mauvais le monde-la.
Dan le monde kot nou pé vive zordi, bann dimoune envie gagne toujours plus ek zot egoïste. Dan enn l’environnement coumsa, certain trouve difficile pou montré-zot different ar bann dimoune ki autour zot. Zot l’ambition egoïste pousse zot pou rod gagne pouvoir. Zot developpe aussi enn grand desir pou gagne plus l’argent ek bann kitsoz materiel—plus ki zot vrai-mem bizin. Malheureusement, zot pré pou agir dan enn fason malhonnete pou realise sa bann l’objectif-la. Au lieu ki zot resisté kont bann mauvais l’influence, sa bann dimoune-la “suive la foule pou faire seki mauvais.”—Exode 23:2.
3. L’influence Satan le Diable.
Satan, enn creature spirituel ki finn rebelle kont Bondié, pé “mette tou bann dimoune lor la terre entier dan l’erreur.” (Révélation 12:9) Li pé faire tou seki li kapav pou manipule bann dimoune. Li normal ki enn dimoune content pou ena enn certain confort materiel ek assez l’argent pou vive. Mais dan enn fason sournois, Satan kapav exploite sa desir naturel-la ziska ki sa pousse sa dimoune-la pou agir dan enn fason malhonnete.
Eski sa vedir ki nou zis couma bann marionnette dan la main Satan—ki nou obligé obeir li kan li pousse nou pou faire seki li envie? Dan prochain lartik nou pou gagne reponse sa question-la.