Eski li possible ki nou honnete dan enn le monde kot ena corruption?

MEM si nou imparfait, mem si sa le monde kot nou pé vive-la ek Satan le Diable pé faire beaucoup pression lor nou, nou kapav resisté kont zot l’influence! Couma? Kan nou vinn proche ar Bondié ek kan nou applik bann principe ki ena dan so Parole, la Bible. Sa bann principe-la finn touletan ena bann bon resultat malgré le temps ki’nn passé. Anou guette deux l’exemple.

PRINCIPE LA BIBLE: “Pa prend sa le monde kot ou pé vive-la couma enn modele pou ou conduite.”​—Romains 12:2, Bible de Jérusalem.

Enn l’experience ki’nn arrivé vrai-mem: Guilherme, li enn grand businessman dan Brésil. Li reconette ki li pa facile pou reste honnete dan business. Li dire: “Li bien facile pou enn dimoune ki dan business vinn malhonnete, kitfois a cause pression pou realise bann l’objectif so compagnie, ou-soit pou survive ar competition ki ena dan sa le monde-la. Beaucoup dimoune considere tendance pou prend ek donne bribe couma enn kitsoz normal. Si ou enn dimoune ki commence enn business ek ou bizin controle beaucoup l’argent, li enn defi pou agir dan enn fason honnete.”

Mem sa, Guilherme finn reussi resisté ar pression pou vinn malhonnete. Li dire: “Mem dan enn l’environnement commercial kot tou kitsoz permette, li possible pou reste honnete. Ou bizin ena bann principe moral bien ferme. La Bible finn aide moi pou trouve bann bienfait ki ena kan nou honnete. Enn dimoune ki honnete ena enn conscience clair, enn calme endan li-mem, ek li ena respé pou li-mem. Li kapav ena enn bon l’influence lor bann dimoune ki autour li.”

PRINCIPE LA BIBLE: “Bann dimoune ki envie vinn riche tombe dan tou sorte qualité tentation ek piege. Zot laisse bann desir ki bete ek ki mauvais faire zot tombé ek detruire zot. L’amour pou l’argent faire zot gagne tou sorte qualité probleme.”​—1 Timothée 6:9, 10, Contemporary English Version.

Enn l’experience ki’nn arrivé vrai-mem: André, li proprietaire enn compagnie ki installe bann systeme securité. Enn parmi so bann client c’est enn grand club football. Enn jour, apré enn grand match, André inn al dan l’administration ek finn presente enn la liste bann depense ki li’nn faire. Departement finance ti encore bien occupé pou compte l’argent ki zot ti fek gagné ar bann ticket ki’nn vendé. Ti’nn bien tard, ek sa dimoune ki ti responsable-la ti degazé paye tou bann fournisseur, ek li’nn paye André aussi.

André raconté: “Kan mo ti pé retourne lakaz, mo’nn remarké ki responsable-la inn donne moi l’argent en plus. Mo ti koné ki kitfois jamais li pa ti pou koné kisannla finn gagne l’argent en plus. Mais mo ti koné aussi ki sa pauvre missié-la, li-mem ti pou bizin rembourse kass ki ti manké! Mo ti decidé pou retourné. Mo ti reussi traverse enn la foule supporteur ek retourne l’argent ki mo ti gagné en plus. Responsable-la ti bien etonné. Jamais personne pa finn retourne li kass avant.”

André contigne raconté: “Sa action honnete-la finn faire moi gagne respé sa responsable-la. Depuis ki sa inn arrivé, beaucoup l’année inn passé, ek parmi tou bann compagnie ki ti pé travail avek sa club-la, mo tousel encore ena enn contrat avek zot. Mo bien reconnaissant ki, kan mo’nn applik bann principe moral ki ena dan la Bible, sa finn faire moi gagne enn bon reputation.”

Li encourageant pou koné ki, avek l’aide Bondié, nou kapav resisté kont bann mauvais l’influence. Selman, nou pa pou kapav tire corruption net zis par nou bann zeffort. Bann raison kifer ena corruption trop difficile pou bann dimoune imparfait reglé sa par zot-mem. Alors, eski sa vedir ki corruption jamais pou disparette? Dernier lartik sa serie-la pou montré reponse ki la Bible donné ek ki donne nou courage.