Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w13 1/3 p. 8-9
  • La Bible Change Bann Dimoune

Pena video ki disponib pou seki ou finn swazir.

Sori, enn erer inn anpes sa video-la zwe.

  • La Bible Change Bann Dimoune
  • La Tour de Garde pé annonce Royaume Jéhovah—2013
La Tour de Garde pé annonce Royaume Jéhovah—2013
w13 1/3 p. 8-9

LA BIBLE CHANGE BANN DIMOUNE

“Zot ti envie ki mo trouve par mo-mem ki été la verité”

Raconté par Luis Alifonso

  • L’ANNÉE MO’NN NÉ: 1982

  • PAYS KOT MO’NN NÉ: RÉPUBLIQUE DOMINICAINE

  • MO ZISTOIRE: GRANDI DAN ENN FAMILLE MORMON

[Zimage page 8]

MO PASSÉ:

Mo’nn né Saint-Domingue dan République Dominicaine. Nou ti a quatre zenfant ek mo-mem ti pli tipti. Mo bann parent ti bann dimoune bien eduqué ek zot ti envie elevé zot bann zenfant dan enn bon l’environnement. Quatre an avant mo naissance, mo bann parent ti zwenn bann missionnaire Mormon. Mo bann parent ti impressionné ki sa bann jeune homme-la ti bien habillé ek ti ena bann bon maniere. Alors bien vite zot ti decidé ki nou famille ti pou vinn enn parmi bann premier famille lor l’île pou forme partie l’Église de Jésus Christ des saints des derniers jours, ou-soit l’Eglise Mormon.

A mesure ki mo ti grandi, mo ti content bann l’activité ki l’eglise ti organisé ek mo ti apprecié ki bann Mormon ti mette l’accent lor la vie famille ek bann valeur moral. Mo ti fiere ki mo ti enn Mormon ek mo ti ena l’objectif pou vinn enn missionnaire.

Kan mo ti ena 18 an, mo famille ti al vive dan l’États-Unis pou ki mo kapav al dan enn bon l’université. Environ enn an apré, mo ma-tante ek mo tonton, ki ti bann Témoins de Jéhovah, ti vinn visite nou dan Floride. Zot ti invite nou pou assisté ensam avek zot enn l’assemblée ki ti basé lor la Bible. Mo ti impressionné ki tou dimoune autour moi ti pé suive dan la Bible ek ti pé prend bann note. Alors mo ti demann enn plume ek enn papier ek mo ti faire pareil.

Apré l’assemblée, mo ma-tante ek mo tonton ki ti koné ki mo envie vinn enn missionnaire ti dire moi ki zot kapav aide moi pou aprann plus lor la Bible. Mo ti pensé ki sa ti enn bon l’idée parski sa lepok-la mo ti konn plus lor Livre Bann Mormon (en anglais) ki lor la Bible.

COUMA LA BIBLE TI CHANGE MO LA VIE:

Pendant bann conversation Biblik ki nou ti pé gagné lor telephone, touletan mo ma-tante ek mo tonton ti encourage moi pou compare mo bann croyance avek seki la Bible enseigné. Zot ti envie ki mo trouve par mo-mem ki été la verité.

Ti ena beaucoup kitsoz concernant croyance bann Mormon ki mo ti accepté, mais mo pa ti vrai-mem sur ki difference ti ena entre sa bann croyance ek seki ena dan la Bible. Mo ma-tante ti envoye moi Réveillez-vous ! 8 Novembre 1995, enn magazine ki publié par bann Témoins de Jéhovah. Ladan ti ena deux-trois lartik lor croyance bann Mormon. Mo ti etonné pou trouvé ki ti ena beaucoup bann l’enseignement Mormon ki mo pa ti koné. Sa ti encourage moi pou al rod lor site Internet officiel bann Mormon pou guetté si seki Réveillez-vous ! ti dire, ti vrai. Sa ti vrai, ek sa bann fait-la ti confirmé kan mo ti al visite musée bann Mormon dan l’Utah.

Mo ti touletan pensée ki Livre Bann Mormon ek la Bible pa ti contredire zot camarade. Mais kan mo ti commence lire la Bible plus en profondeur, mo ti remarké ki ti ena bann contradiction entre l’enseignement bann Mormon ek seki la Bible dire. Par exemple, dan Ézékiel 18:4, la Bible dire ki nâme mort. Mais selman, dan Livre Bann Mormon, Alma 42:9 dire: “Nâme jamais pou kapav mort.”

En plus ki ti ena bann difference entre doctrine bann Mormon ek la Bible, bann l’idée nationalisme ki bann Mormon ti enseigné ti faire moi pose-mo-mem bann question. Par exemple, bann Mormon enseigné ki jardin Éden ti trouve dan Comté Jackson, dan Missouri, États-Unis. Ek bann prophete sa l’eglise-la dire ki kan “Royaume Bondié pou regné, pavillon l’Amérique pou flotté avek fierté ek sans tache lor poteau la liberté ek droit egal.”

Mo ti pé demann-mo-mem seki bann Mormon enseigné concernant pays kot mo’nn né ek lezot pays. Enn soir mo ti koz lor sa sujet-la avek enn jeune Mormon ki ti telephone moi ek ki ti pé gagne formation pou vinn enn missionnaire. Mo ti demann li franc-franc si li ti pou disposé pou al laguerre kont bann lezot Mormon si so pays ti en guerre avek bannla zot pays. Mo ti etonné kan li ti dire moi oui! Mo ti faire plus recherche lor mo bann croyance ek mo ti aussi koz avek bann chef l’Eglise Mormon. Bannla ti dire moi ki reponse mo bann question zot enn mystere ek ki enn jour mo pou gagne bann reponse-la kan la lumiere pou vinn pli fort.

Parski mo pa ti satisfait avek zot explication, mo’nn prend plus le temps pou examine-mo- mem ek pou guetté kifer mo ti envie vinn enn missionnaire Mormon. Mo ti rann moi compte ki enn parmi bann raison kifer mo ti envie vinn missionnaire c’est parski mo ti envie aide lezot dimoune. Enn lot raison c’est parski bann dimoune ti pou respecté moi. Mais concernant Bondié, mo pa ti vrai-mem konn beaucoup kitsoz lor Li. Mem si dan le passé, plusieurs fois mo ti lire la Bible, mais mo pa ti vrai-mem apprecié so valeur. Mo pa ti konn ditou ki projet Bondié ena pou la terre ou-soit pou bann dimoune.

[Zimage page 9]

KI BENEDICTION MO FINN GAGNÉ:

A travers mo l’etude la Bible avek bann Témoins de Jéhovah, parmi bann kitsoz ki mo finn aprann ena couma Bondié appelé, ki arrive nou kan nou mort, ek ki role Jésus joué dan realisation projet Bondié. Enfin, mo ti pé konn pli bien sa livre extraordinaire-la, ek mo ti content pou partage la verité ki mo ti pé aprann avek lezot. Mo ti touletan koné ki Bondié existé, mais asterla mo kapav koz avek Li dan la priere en tant ki mo pli bon Camarade. Mo’nn baptisé en tant ki Témoins de Jéhovah le 12 Juillet 2004, ek six mois apré mo ti commence preché a plein temps.

Pendant cinq an, mo ti travail dan centre mondial bann Témoins de Jéhovah dan Brooklyn, New York. Sa ti donne moi enn grand la joie pou kapav aidé dan production bann la Bible ek bann publication ki basé lor la Bible ki aide plusieurs million dimoune dan le monde pou gagne bann bienfait. Ek mo encore toujours content pou aide lezot aprann lor Bondié.

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze