Pa Juge Lezot en Avance​—Eski Li Possible?

“MO ENA enn rêve.” Sa faire cinquante an, depuis le 28 Août 1963, ki Martin Luther King, enn Américain ki ti pé defann bann droit civil ti dire sa bann parole-la dan so discours bien celebre. Li ti servi sa bann parole ki bien capté l’attention-la pou exprime so rêve ou-soit l’espoir ki li ti ena, ki enn jour bann dimoune pou kapav vive dan enn le monde kot pa pou ena okenn discrimination racial. Mem si li ti exprime-li ar enn la foule dan l’États-Unis, bann dimoune dan beaucoup pays finn accepté so bann l’idée.

Trois mois apré discours Martin Luther King, setadir le 20 Novembre 1963, plis ki 100 pays ti adopté Declaration Nations Unies lor l’Elimination Tou Sorte Qualité Discrimination Racial. (en Anglais) Pendant plusieurs dizaine l’année apré, bann pays finn adopté lezot declaration. Mais ki resultat finn gagné pou tou sa bann grand zeffort ki’nn faire-la?

Le 21 Mars 2012, Ban Ki-moon, Secretaire General l’ONU, ti dire ki ena enn quantité disposition important ki’nn mette en place “pou empeche ou-soit elimine racisme, discrimination racial, la haine pou bann etranger ek enn mank tolerance. Malgré sa, racisme ankor pé faire plusieurs million dimoune souffert partout dan le monde.”

Li vrai ki beaucoup pays inn faire certain progré pou lutte kont racisme ek lezot forme discrimination. Mais eski sa bann progré-la inn reussi deracine bann sentiment bien profond ki bann dimoune ena ou-soit sa finn zis empeche zot manifesté sa bann sentiment-la par zot bann action? Certain pensé ki sa bann progré-la pou zis kapav empeche discrimination, mais pa pou kapav elimine bann sentiment ki pousse bann dimoune pou juge lezot en avance. Kifer? Parski discrimination c’est enn action ki nou kapav trouvé ek la loi kapav puni sa action-la. Parkont, juge lezot en avance concerne bann pensée ek sentiment bann dimoune ek sa li pa fasil pou controlé.

Alors, pou ki enn dimoune arrete juge enn lot en avance, li important ki pa zis controle bann action enn dimoune mais aussi bann pensée ek bann sentiment ki sa dimoune-la ena envers lezot ki diferan ar li. Eski vrai-mem kapav faire sa? Si oui, couma? Anou examine deux-trois l’exemple ki pou montré nou ki li possible pou bann dimoune changé ek ki kitsoz kapav aide zot pou faire sa.

LA BIBLE INN AIDE BEAUCOUP POU ARRETE JUGE LEZOT EN AVANCE

Linda: Mo’nn né en Afrique du Sud. Mo ti considere n’importe ki Sud-Africain ki pa ti enn blanc couma enn kikenn inferieur, sans l’education, ek ki pa kapav faire confiance. Pou moi, zot ti zis couma serviteur bann blanc. Mo fason pensé ti pousse moi pou juge lezot en avance ek mo pa ti mem realise sa. Mais kan mo’nn commence etudié la Bible, mo l’attitude inn changé. Mo ti aprann ki “Bondié pa faire preference” ek seki ena dan nou leker pli important ki couleur nou la peau ou-soit langue ki nou kozé. (Actes 10:34, 35; Proverbes 17:3) Philippiens 2:3, dan la Bible, ti aide moi pou comprend ki si mo ti considere tou dimoune couma pli superieur ki moi, mo ti pou kapav arrete juge lezot en avance. Kan mo ti mette en pratik bann principe la Bible, sa inn aide moi pou interesse-moi avek lezot, mem si zot ena lot couleur la peau. Asterla mo’nn liberé ar sa sentiment pou juge lezot en avance-la.

Michael: Mo’nn grandi dan enn l’endroit kot ti ena plis bann Australien blanc ek mo ti developpe bann sentiment bien negatif envers bann Asiatique, surtout bann Chinois. Kan mo ti pé conduire ek ki mo ti trouve enn dimoune ki ti ressemblé enn Asiatique, mo ti pou baisse mo vitre ek mo ti pou criyé: “Retourne dan to pays, Asiatique!” Plitar, kan mo’nn commence etudié la Bible, sa finn aide moi pou trouvé couma Bondié considere bann dimoune. Li content zot n’importe ki pays zot sorti ou-soit n’importe ki l’apparence physik zot ena. Lamour Bondié ti touche moi beaucoup, ek sa ti aide moi pou nepli ena la haine mais plutot pou developpe lamour pou lezot. Li extraordinaire pou konn enn grand changement coumsa. Asterla mo bien content pou frequente bann dimoune lezot pays ek culture. Sa finn ouvert mo l’esprit ek change fason ki mo ti considere lavi. Sa finn aussi faire moi gagne beaucoup la joie.

Sandra: Mo mama sorti dan enn lavil ki appel Umunede, dan l’Etat Delta, dan Nigeria. Parkont, famille mo papa sorti dan l’Etat Edo ek zot koz langue Esan. A cause sa bann diferans-la, mo mama inn passe beaucoup misere ar famille mo papa ziska so lamor. Alors, mo ti faire serment pou pa frequente bann ki koz langue Esan ek pou pa marié avek enn kikenn ki sorti dan l’Etat Edo. Mais kan mo’nn commence etudié la Bible, mo’nn commence trouve bann kitsoz dan enn fason diferan. Si la Bible dire ki Bondié pa faire preference ek ki Li accepté n’importe ki dimoune ki ena la crainte pou Li, alors ki mo été moi pou ena la haine pou bann dimoune parski zot sorti dan enn lot tribu ou-soit zot koz enn lot langue? Mo ti corrige mo fason pensé ek mo ti faire la paix avek famille mo papa. Kan mo finn mette en pratik bann principe la Bible, sa finn rann-moi heureux ek mo’nn gagne la paix l’esprit. Sa finn aussi permette moi pou vive bien avek lezot, n’importe ki culture, race, nationalité zot été ek n’importe ki langue zot kozé. Ek deviné avek kisannla mo’nn marié? Avek enn kikenn ki sorti dan l’Etat Edo ek ki koz langue Esan!

Kifer la Bible inn kapav aide sa bann dimoune-la ek lezot ankor pou surmonte la haine ek bann sentiment negatif ki zot ti ena envers lezot? Parski la Bible c’est Parole Bondié. Li ena pouvoir pou change fason pensé enn dimoune ek so bann sentiment envers lezot. En plis, la Bible montré ki kitsoz ankor pou aide bann dimoune arrete juge lezot en avance, pou touletan.

SEKI ROYAUME BONDIÉ POU FAIRE

Enn connaissance la Bible kapav aide nou pou controle ek deracine bann sentiment bien negatif. Mais pou tire sa probleme-la net bizin elimine deux kitsoz ankor. Premierement, ena peché ek l’imperfection bann dimoune. La Bible dire dan enn fason clair: “Pena okenn dimoune ki pa faire peché.” (1 Rois 8:46) Alors, n’importe ki quantité zeffort nou faire, nou bizin amenn mem la lutte ki l’apotre Paul, ki ti ecrire: “Kan mo envie faire seki bon, c’est plutot seki mauvais ki mo faire.” (Romains 7:21) A cause sa-mem, li arrivé parfois ki nou leker imparfait faire nou ena “bann mauvais raisonnement” ki kapav pousse nou pou juge lezot en avance.​—Marc 7:21.

Deuxiemement, ena l’influence Satan le Diable. La Bible decrire li couma “enn criminel” ek dire ki li “pé mette tou bann dimoune lor later entier dan l’erreur.” (Jean 8:44; Révélation 12:9) Sa faire nou comprend kifer la plupart dimoune juge lezot en avance ek kifer li difisil pou zot elimine bann l’opinion fanatik, discrimination, bann la guerre racial ek lezot forme discrimination couma par exemple, enn mank tolerance lor plan racial, religieux ek social.

Alors, pou ki bann dimoune arrete juge lezot en avance pou touletan, bizin elimine peché, l’imperfection bann dimoune, ek l’influence Satan le Diable. La Bible montré ki c’est Royaume Bondié ki pou faire sa.

Jésus Christ ti enseigne so bann disciple pou prié Bondié coumsa: “Ki to royaume vini. Ki to volonté faire lor later pareil couma dan le ciel.” (Matthieu 6:10) Royaume Bondié c’est moyen ki Bondié pou servi pou tire tou bann l’injustice​—couma par exemple, enn mank tolerance ek juge lezot en avance.

Kan Royaume Bondié pou vini ek pou dirige later, Jésus Christ pou “attache” Satan, setadir pou empeche li influence bann dimoune, pou ki “li pa detourne bann nation.” (Révélation 20:2, 3) Lerla pou ena enn “nouveau later,” setadir enn nouveau societé bann dimoune kot “pou ena la justice.”a​—2 Pierre 3:13.

Bann ki pou vive dan sa societé kot pou ena la justice-la pou vinn parfait, ek zot pou liberé ar peché. (Romains 8:21) En tant ki bann citoyen Royaume Bondié lor later, zot “pa pou faire okenn di-tort ni okenn ravage.” Kifer? “Parski later vrai-mem pou rempli avek connaissance Jéhovah.” (Isaïe 11:9) Sa lepok-la, tou dimoune pou aprann fason agir Jéhovah ek pou imite so bann qualité. Lerla, vrai-mem personne pa pou juge lezot en avance “parski Bondié pa faire preference.”​—Romains 2:11.