“Mo ti envie vinn enn pretre”

MO PASSÉ:

Mo’nn né dan enn ti lavil ki appel Texcoco. Sa lepok-la, la plupart chemin pa ti koltaré ek ti ena la poussiere. Souvent bann dimoune ki ti reste dan bann village alentour ti vinn dan nou lavil ek ti amenn zot bann bourrik chargé ar bann kitsoz pou vendé. Nou ti enn famille bien pauvre. Nou ti a neuf zenfant ek moi mo ti septieme. Pou soigne nou famille, mo papa ti repare bann guarache (bann sandalette). Mais li ti mor kan mo ti ena sept an. Depuis sa, c’est mo mama ki’nn bizin travail dur pou amenn mangé dan lakaz.

Mo grand-pere ti joué violon ek ti chef dan enn l’orchestre ki ti surtout joué bann la musik classik pou l’eglise. Preské tou bann membre mo famille ti joué enn l’instrument. Mo mama ti chanté dan choral l’eglise, ek mo tonton ti enn chanteur l’opera ek ti joué piano. Nou ti bien religieux​—mo ti enn servant dan l’eglise, ek mo ti envie vinn enn missionnaire Catholique. En mem temps, mo ti content guette bann film karaté. Plis mo ti guette sa bann film-la, plis mo ti vinn pli violent.

Mo ti rente dan enn lekol religieux dan Puebla, ki ti couma enn seminer. Mo ti envie vinn enn pretre Catholique. Mais pendant dernier l’année ki mo ti pé etudié, mo ti deçu avek l’Eglise Catholique. Enn jeune lé-soeur ti propose moi pou gagne relation sexuel avek li. Mo pa ti tombe dan sa tentation-la, mais sa situation-la ti commence faire moi ena desir pou marié. En plis, mo ti trouvé ki plusieurs pretre ti amenn enn lavi hypocrite. Finalement, mo ti abandonne mo rêve ek mo ti nepli envie vinn pretre.

Mo ti decidé pou etudié la musik dan Conservatoire National la Musik dan Mexico. Kan mo ti gagne mo diplome, mo’nn marié ek mo madame ek moi nou pa’nn tardé pou gagne quatre zenfant. Pou soigne mo famille, mo ti pé chanté pendant bann la Messe dan l’Eglise Catholique.

Depuis commencement-mem nou ti pé gagne probleme dan nou mariage. Mo madame ek moi ti brite envers nou camarade, surtout parski nou ti jaloux nou camarade. Au commencement, nou ti pé zis dire bann parole blessant, mais apré nou’nn commence tape nou camarade. Finalement, apré 13 an mariage, nou ti decide pou separé ek plitar pou divorcé.

COUMA LA BIBLE INN CHANGE MO LAVI:

Mo ti zwenn bann Témoins de Jéhovah pou premier fois avant ki mo ti separé avek mo madame. Deux Témoins ti tape nou laport ek ti propose pou koz lor la Bible avek nou. Mo ti pensé ki mo ti konn beaucoup kitsoz lor religion, alors mo ti essaye prouve zot ki zot ti ena tort. Mo ti pose zot bann question difisil ki mo ti pensé pena reponse. Mais sa ti etonne moi, parski chaque fois zot ti pé donne moi bann bon reponse ki ti basé lor la Bible. Mo ti commence trouvé ki mo ti konn bien tigit kitsoz. Selman, mo madame ti bien dur avek sa bann Témoins-la, ek moi mo ti bien occupé, alors zot ti nepli vinn visite nou.

Cinq an plitar, kan mo ti pé vive avek enn lot madame, Elvira, mo ti ré-zwenn bann Témoins de Jéhovah. Elvira pa ti opposé ar bann Témoins, alors li ti pli fasil pou moi pou etudié dan enn fason regulier. Mem sa, mo’nn prend plusieurs l’année pou change mo fason vive.

Mais mo ti koné ki si mo ti envie adore Jéhovah avek tou mo leker, mo ti bizin faire bann grand changement. Premierement, mo ti bizin quitte mo travail, setadir arrete chanté dan l’Eglise. Alors, mo ti bizin rod enn lot fason pou gagne mo lavi. (Révélation 18:4) Mo ti bizin aussi marié civil avek Elvira.

Mais, enn parmi bann pli grand changement ki mo ti bizin faire c’est pou aprann controle mo mauvais caractere. Deux verset la Bible ti surtout aide moi pou faire sa: Psaume 11:5, ti montré moi ki Jéhovah detesté violence, ek 1 Pierre 3:7, ti montré moi ki si mo envie ki Jéhovah ecoute mo bann la priere, mo bizin donne mo madame l’honneur. Kan mo’nn medite lor sa bann verset-la ek mo’nn prié pou gagne l’aide Jéhovah, tigit-tigit mo’nn kapav controle mo caractere.

KI BENEDICTION MO FINN GAGNÉ:

Azordi mo ena enn lavi famille ki heureux. Mo pé faire zeffort pou ena enn bon l’entente avek bann garson ki mo’nn gagné avek mo premier madame, ek mo pé essaye aide famille ki mo ena asterla pou contigne ena enn la foi solide.

Kan mo ti zenfant, mo ti envie vinn enn pretre ek mo ti envie aide bann dimoune. Azordi, mo lavi ena vrai-mem enn sens. Pou soigne mo famille, mo enseigne la musik. Oui, mo ena enn grand reconnaissance envers Jéhovah ki’nn ena patience envers moi ek ki’nn donne moi l’occasion pou changé ek vinn enn pli bon dimoune!