LARTIK KOUVERTIR | BANN TEMWIN ZEOVA—KISANNLA ZOT ETE?
Kotsa Nou Gagn Kas pou Nou Bann Aktivite?
Toule lane, nou inprim ek distribie plizir santenn milyon Labib ek bann piblikasion ki baze lor Labib. Partou dan lemond noumem nou konstrir nou bann biro nasional ek nou bann linprimri. Plizir milye kongregasion zwenn ansam dan bann Lasal kot nou fer renion pou ador Bondie. Se bann plas bien sinp me ki anmemtan atiran. Kisannla ki finans tousala?
Tou nou bann aktivite soutenir par bann kontribision volonter. (2 Korintien 9:7) An 1879, dan deziem nimero sa magazinn-la, ti ekrir: “Nou krwar ki se ZEOVA ki soutenir difizion « Le Phare de la Tour de Sion » [nom ki sa magazinn-la ti ena avan]. Ek tanki sa koumsa, zame li pou demann ni li pou sipliy bann zom soutenir li.” Nou touzour pans koumsa.
Bann ki anvi fer kontribision kapav avoy sa direk dan enn nou bann biro nasional ouswa met sa dan bann bwat kontribision ki trouv dan sak Lasal kot nou fer renion. Me zame nou demann ladim, pas laket, ouswa fer pey enn fre pou bann servis ki nou rande ouswa pou nou bann piblikasion. Pa pey nou pou prese, pou ansegne dan kongregasion ouswa pou konstrir bann Lasal kot nou fer renion. Apre tou, Zezi ti dir: “Zot finn gagn gratis, donn gratis.” (Matie 10:8, NW.) Tou bann manb ki dan nou bann biro nasional ek biro mondial, parmi ena bann ki form parti dan Komite Santral bann Temwin Zeova, pa gagn okenn lapey.
“Parey kouma tou zot bann aktivite fer lor enn baz volonter, lorganizasion bann Temwin Zeova finanse par bann donasion volonter. Sakenn deside komie li pou done ek kan li pou fer so ‘donasion.’”—La Cour européenne des droits de l’homme, 2011
Nou servi osi bann donasion pou ed bann viktim enn katastrof. Bann premie Kretien ti kontan fer bann donasion pou soutenir bann ki bizin led. (Romin 15:26) Dan mem fason, nou soutenir bann ki afekte par enn katastrof. Nou rekonstrir zot lakaz ek bann plas kot nou fer renion, nou donn zot manze, linz ek tretman medikal.