Mo Mazinn Zeova dan Tou Mo Bann Desizion

Mo’nn ne le 19 Me 1940, dan lavil Amioûn, dan Liban. De-trwa lane plitar, mo fami ti al res dan lavil Tripoli. Mo’nn grandi dan enn fami stab, ki ti konn Zeova ek ki ti kontan Li. Nou ti a sink zanfan, trwa tifi ek de garson. Momem ti pli zenn parmi zot. Pou mo bann paran, gagn kas pa ti kitsoz ki ti pli inportan dan lavi. Nou priorite ti etidie Labib, asiste bann renion, ek ed lezot pou konn Zeova.

Dan mo lasanble, ti ena plizir frer ek ser ki ti ena lesperans pou al dan lesiel. Enn parmi zot ti apel Michel Aboud. Li ti pe diriz letid-de-liv. Li ti gagn laverite dan New York, ek li ti koumans prese dan Liban an 1921. Mo sirtou rapel kouma li ti ed de zenn ser ki ti fek sorti Lekol Galaad. Sa de ser-la ti apel Anne ek Gwen Beavor. Zot ti vinn mo bann bon kamarad. Plizir lane plitar, mo ti bien kontan kan mo ti zwenn Anne dan Letazini. Inpe letan apre, mo ti zwenn Gwen, ki ti marye ar Wilfred Gooch ek zot toulede ti pe servi dan Betel Langleter.

PREDIKASION DAN LIBAN

Kan mo ti zenn, pa ti ena boukou Temwin dan Liban. Me nou ti bien kontan partaz avek lezot seki nou ti pe aprann dan Labib. Nou ti prese malgre lopozision bann sef relizie. Mo mazinn sirtou de-trwa sitiasion ki ti arive.

Enn zour, mo ser, ki apel Sana, ek mwa, nou ti pe prese dan enn flat. Kan nou ti pe prese, enn pret ti vinn ver nou. Enn kikenn sirman ti fer li kone ki nou ti la. Pret-la ti koumans maltret mo ser. Li ti vinn violan ek li ti pous Sana dan leskalie. Sana ti bien blese. Enn kikenn ti telefonn lapolis. Zot ti vini ek zot ti fer an sort ki Sana gagn led ki li bizin. Zot ti amenn pret-la stasion, ek zot ti trouve ki li ti ena enn fizi ar li. Sef lapolis-la ti dir pret-la: “Ki to ete twa? Enn sef relizie ouswa sef bann bandi?”

Enn lot sitiasion ki mo rapel se kan nou lasanble ti lwe enn bis pou al prese dan enn lavil izole. Nou ti pe pas enn bon moman, ziska ki enn pret ti aprann seki nou ti pe fer ek li ti rasanble enn lafoul dimounn. Zot ti fer brit ar nou. Zot ti mem avoy nou kout ros ek mo papa ti blese. Mo rapel ki mo papa ti ena plin disan lor so figir. Li ti retourn dan bis avek mo mama, ek nou ti swiv zot. Nou ti bien trakase. Me zame mo pou bliye seki mo mama ti dir, kan li ti pe netway mo papa so figir. Li ti dir: “Zeova, silteple, pardonn zot. Zot pa kone ki zot pe fer.”

Enn lot fwa, nou ti al vizit nou bann fami dan landrwa kot nou ti pe reste avan. Kot mo granper, nou ti zwenn enn pret ki ti bien popiler dan landrwa. Pret-la ti kone ki mo bann paran ti bann Temwin Zeova. Mem si mo ti ena si-z-an, li ti pwint so ledwa lor mwa ek li ti dir: “E, kifer to pa batize twa?” Mo ti reponn li ki mo ti ankor enn zanfan ek ki mo ti ena ankor boukou pou aprann lor Labib pou ki mo pran batem, ek ki mo ti bizin ena enn lafwa for. Li pa ti kontan seki mo ti dir li, ek li ti dir mo granper ki mo ti front ar li.

Selman, nou pa ti fer boukou move lexperyans koumsa. An zeneral, bann dimounn ki res Liban zot bien amikal ek zot ena lospitalite. Nou ti gagn boukou bon konversasion avek zot, ek nou ti ena boukou letid Labib.

NOU FAMI DESID POU AL RES DAN ENN LOT PEI

Kan mo ti ankor lekol, enn zenn frer ki ti res Veneziela ti vinn Liban. Li ti asiste renion dan nou lasanble ek li ti vinn bien pros ar mo ser, Wafa. Avek letan, zot inn marye ek zot inn al res Veneziela. Dan so bann let, Wafa ti esey konvink mo papa pou vinn res Veneziela. Li ti fer sa parski li ti bien mank nou. Alafin, li ti reisi konvink nou ek nou ti al res Veneziela!

Nou ti ariv Veneziela an 1953 ek nou ti al res Caracas. Nou ti res pre ar pale prezidan. Kan mo ti zenn, mo ti bien kontan kan mo ti trouv prezidan pase dan so zoli loto. Li pa ti fasil pou mo bann paran adapte ar langaz, kiltir, manze, ek klima sa nouvo pei-la. Zot ti pe koumans adapte ar zot nouvo lavi kan enn maler ti arive.

ENN MALER ARIVE

Mo papa ti tom malad. Sa ti etonn nou, parski li ti touletan enn dimounn for ek an bonn sante. Nou pa rapel kan dernie fwa li ti malad. Inpe apre, bann dokter ti dekouver ki li ti ena enn kanser pankreas, ek li ti fer enn loperasion. Malerezman, li’nn mor enn semenn apre.

Li bien difisil pou explike ki kantite nou ti abat net. Mo ti ena zis 13 an. Nou pa ti atann ki nou papa ti pou mor, ek nou ti panse ki zame nou ti pou ere ankor. Pandan inpe letan, mo mama ti gagn difikilte pou aksepte ki so misie ti nepli la. Selman, nou ti konpran ki lavi bizin kontigne, ek avek led Zeova, nou ti reisi sirmont sa sitiasion-la. Kan mo ti ena 16 an, mo ti gagn mo sertifika kolez ek mo ti vremem anvi ed mo fami lor plan materyel.

Mo ser Sana ti marye ar Rubén Araujo, ki ti fer Lekol Galaad ek ki ti retourn Veneziela. Zot ti desid pou al res New York. Mo fami ti deside ki mo ti bizin al liniversite. Alor, kan mo ti al liniversite, mo ti al res kot mo ser ek mo bo-frer dan New York. Kan mo ti kot zot, zot ti ed mwa pou vinn pros ar Zeova. Anplis, ti ena boukou frer bien spiritiel dan nou lasanble lang Espagnol, dan Brooklyn. De parmi zot ti Milton Henschel ek Frederick Franz, ek mo ti bien apresie zot. Toulede ti pe servi dan Betel Brooklyn.

Kan mo premie lane liniversite ti pre pou fini, mo ti koumans reflesi lor seki mo ti pou fer ar mo lavi. Mo ti lir ek medit lor bann lartik dan Latour Degard ki koz lor bann Kretien ki ena lobzektif pou fer plis pou Zeova. Mo ti trouve kouma bann pionie ek bann Betelit dan mo lasanble ti ere, ek mo ti anvi ere parey kouma zot. Selman, mo pa ti ankor pran batem. Mo ti kone ki mo ti bizin vwe mo lavi ar Zeova, ek samem ki mo ti fer. Mo ti pran batem le 30 Mars 1957.

BANN DESIZION INPORTAN

Apre mo batem, mo ti koumans pans lor servis pionie. Mo ti vremem anvi fer pionie, me mo ti realize ki sa pa ti pou fasil. Mo ti pe demann momem si mo ti pou kapav fer pionie ek al liniversite anmemtan. Alafin, mo ti desid pou aret liniversite, ek mo fami ek mwa nou ti avoy nou kamarad boukou let konsernan mo desizion pou aret liniversite, pou retourn Veneziela pou fer pionie.

Mo ti retourn Caracas an Zin 1957. Ek mo ti trouve ki mo fami ti bizin led lor plan materyel. Zot ti bizin ki enn lot dimounn dan lafami soutenir zot. Ki mo ti kapav fer pou ed zot? Mo ti gagn enn travay dan labank, me mo ti telman anvi fer pionie. An realite, se pou sa rezon-la ki mo ti retourne. Mo ti bien deside pou fer toulede. Pandan plizir lane, mo ti travay full-time dan labank ek mo ti fer pionie anmemtan. Mo ti extra okipe, me mo ti osi extra ere!

Mo ti bien kontan osi kan mo ti zwenn Sylvia, enn zoli ser Alman ki bien kontan Zeova. Inpe apre, nou ti marye. Avek letan, nou ti gagn de zanfan, nou garson, Michel (Mike), ek nou tifi, Samira. Mo ti osi koumans okip mo mama. Li ti vinn res avek nou. Mem si mo ti bizin aret mo servis pionie pou pran swin mo fami, mo ti gard mo lespri pionie. Pandan vakans, souvan Sylvia ek mwa nou ti fer pionie.

ENN LOT DESIZION BIEN INPORTAN

Sa sitiasion ki mo’nn rakonte dan koumansman lartik la, ti arive kan mo bann zanfan ti ankor lekol. Mo bizin rekonet ki mo ti ena enn lavi bien konfortab sa lepok-la. Boukou dimounn ki ti travay dan bann labank ti bien respekte mwa. Me mo ti vremem anvi ki bann dimounn konsider mwa kouma enn serviter Zeova. Mo ti kontign reflesi lor seki mo ti bizin fer pou ki bann dimounn trouv mwa kouma enn serviter Zeova. Alor, mo madam ek mwa nou ti asize ek nou ti koz lor nou sitiasion lor plan materyel. Si mo ti aret travay, mo ti pou gagn mo lump sum. Nou pa ti ena okenn det, alor nou ti trouve ki si nou ti sinplifie nou lavi, nou ti pou ena ase kas pou viv pou inpe letan.

Li pa ti fasil pou pran sa desizion-la, me mo madam ek mo mama ti soutenir mwa. Mo ti pou rekoumans fer pionie. Mo ti extra kontan! Tou ti paret korek pou mo rekoumans fer pionie, me nou ti gagn enn sirpriz!

ENN ZOLI SIRPRIZ!

Enn zour, nou dokter ti anons nou ki Sylvia ti ansint. Sa ti vremem enn sirpriz pou nou! Nou ti bien kontan, me mo ti pans desizion ki mo ti pran. Eski mo ti pou kapav fer pionie? Nou ti aksepte nou sitiasion ek nou ti pre pou akeyir enn nouvo manb dan nou fami. Me mo ti pe touzour demann momem si mo ti pou kapav fer pionie.

Apre ki nou ti koz lor nou sitiasion, nou ti deside ki mo ti pou fer pionie. Nou garson Gabriel inn ne an Avril 1985. Mo ti donn mo demision ek mo ti revinn pionie permanan an Zin 1985. Avek letan, mo ti vinn enn manb Komite Biro Nasional. Me mo ti bizin vwayaz enn distans apepre 80 kilomet, de ouswa trwa fwa par semenn, pou al Betel parski li pa ti trouv dan Caracas.

NOU AL RES ENN LOT LANDRWA

Betel ti trouv dan lavil La Victoria, alor nou ti desid pou al res pli pre ar Betel. Sa ti enn gran desizion! Mo bien apresie bann zefor ki mo fami inn fer ek mo bien rekonesan anver zot. Zot bon latitid inn bien ed mwa. Mo ser, Baha, ti aksepte pou okip mo mama. Mike ti fini marye, me Samira ek Gabriel ti ankor pe res avek nou. Savedir ki zot ti pou bizin kit zot bann kamarad dan Caracas pou al res La Victoria. Anplis, Sylvia ti pou bizin kit enn gran lavil ek adapte li ar enn ti lavil. Nou ti pou bizin res dan enn pli tipti lakaz. Sa ti inplik boukou sanzman pou kit Caracas pou al res La Victoria.

Avek letan, nou sitiasion ti sanze ankor. Gabriel inn marye ek Samira inn al viv enn kote. Apre sa, an 2007, Sylvia ek mwa nou ti gagn linvitasion pou al res Betel. Enn privilez ki nou ankor ena azordi! Nou pli gran garson, Mike, enn ansien ek li pe fer pionie ansam avek so madam, Monica. Gabriel osi enn ansien, ek li pe servi avek so madam, Ambra, dan Litali. Samira enn pionie ek li ede kouma volonter dan Betel.

MO TI POU PRAN MEM DESIZION

Wi, mo finn pran bann gran desizion dan mo lavi. Mo pena okenn regre! Si mo ti regagn lokazion, mo ti pou pran bann mem desizion! Mo vremem apresie bann responsabilite ek bann privilez ki mo’nn gagne dan mo servis pou Zeova. Avek letan, mo’nn konpran ki li bien inportan pou gard enn bon lamitie avek Zeova. Ki nou pran bann ti desizion ouswa bann gran desizion, Li kapav donn nou lape “ki depas tou lintelizans.” (Fil. 4:6, 7) Sylvia ek mwa, nou bien kontan nou servis dan Betel, ek nou kone ki Zeova inn beni bann desizion ki nou’nn pran dan nou lavi, bann desizion ki nou’nn pran kan nou’nn mazinn Zeova.