Bann Leson ki Nou Kapav Aprann ar Profesi Zakob—1^e Parti

1-2. Ki Zakob ti fer kan li ti pre pou mor, ek kifer li ti fer sa? (Get zimaz lor kouvertir.)

KAN Zakob ti bien vie, li ek tou so fami ti sorti Kanaan pou al Lezip. Laba, li ti kontign servi Zeova avek fidelite pandan 17 an. (Zen. 47:28) Zakob ti bien zwaye parski li ti retrouv Zozef, so garson ki li ti bien kontan. Li ti zwaye osi parski li ti ansam ar tou so bann garson. Selman, li ti kone ki li ti pre pou mor. Akoz sa, li ti rasanble so fami pou fer enn renion bien inportan ar zot.—Zen. 49:28.

² Sa lepok-la, kan enn sef fami ti pre pou mor, li ti abitie rasanble tou so fami pou donn zot so bann dernie instriksion. (Iza. 38:1) Dan sa renion-la, kitfwa li ti pou fer so fami kone kisann-la ti pou vinn zot sef apre so lamor.

3. Dapre Zenez 49:1, 2, kifer bann parol Zakob ti bien inportan?

³ Lir Zenez 49:1, 2. Selman, sa renion-la pa ti parey kouma tou bann lezot renion fami. Kifer? Parski Zakob ti enn profet. Dan sa renion-la, Zeova ti servi Zakob pou dir so bann garson bann kitsoz inportan ki ti pou ariv zot ek zot bann desandan. Se pou sa rezon-la ki nou kapav dir ki bann parol ki Zakob ti dir so bann garson ti enn profesi.

4. Ki kitsoz Zakob ti predir, ek ki leson nou kapav aprann ar sa? (Get osi lankadre “Fami Zakob.”)

⁴ Dan sa lartik-la, nou pou gete seki Zakob ti dir kat parmi so bann garson: Ribenn, Simeon, Levi, ek Zida. Ek dan prosin lartik, nou pou gete seki li ti dir so wit lezot garson. Zakob ti predir seki ti pou ariv so bann garson ek zot bann desandan. Avek letan, zot bann desandan ti pou vinn enn gran pep, pep Izrael. Dan sa de lartik-la, nou pou trouve kouma seki ti ariv pep Izrael dan lepase, ti realiz bann parol ki Zakob ti dir. Ek kan nou pou examinn bann parol Zakob, nou pou aprann bann leson inportan ki kapav ed nou pou fer Zeova plezir.

RIBENN

5. Ki privilez Ribenn kitfwa ti panse li ti pou gagne ar so papa?

⁵ Pou koumanse, Zakob ti koz ar Ribenn, ek li ti dir li: “To mo premie-ne.” (Zen. 49:3) Parski li ti premie-ne, Ribenn kitfwa ti panse ki li ti pou gagn de par kan ti pou partaz bann dibien so papa. Kitfwa li ti panse osi ki li ti pou vinn sef tou lafami apre lamor so papa, ek ki so bann desandan osi ti pou gagn sa privilez-la.

6. Kifer Ribenn pa ti gagn leritaz premie-ne? (Zenez 49:3, 4)

⁶ Selman, Ribenn pa ti gagn leritaz premie-ne. (1 Kro. 5:1) Kifer? Parski inpe letan apre lamor Rasel, Ribenn ti gagn bann relasion sexiel ar Bila, Rasel so servant. Rasel ti donn Zakob so servant Bila, pou ki li vinn so madam. (Zen. 35:19, 22) Kifer Ribenn ti gagn bann relasion sexiel ar Bila? Ribenn ti garson Lea, Rasel so ser. Alor, kitfwa li ti gagn relasion ar Bila pou ki Zakob deteste Bila ek kontan Lea plis. Ouswa, kitfwa Ribenn ti interese ar Bila, me li pa ti kontrol so bann dezir sexiel. Me mem si nou pa kone kifer Ribenn ti gagn bann relasion sexiel ar Bila, seki nou kone se ki sa pa ti fer Zeova ek Zakob plezir.—Lir Zenez 49:3, 4.

7. Ki ti ariv Ribenn ek so bann desandan? (Get osi lankadre “Profesi Zakob.”)

⁷ Zakob ti dir Ribenn: “To pa pou pli siperyer.” Sa bann parol-la ti vremem realize parski okenn par dan Labib pa dir ki enn desandan Ribenn ti vinn enn lerwa, enn pret, ouswa enn profet. Me kanmem sa, Zakob ti donn Ribenn enn leritaz, ek Ribenn so fami ti vinn enn gran tribi dan Izrael. (Zozwe 12:6) Anplis, dan bann lezot sitiasion, Ribenn ti montre ki li ti ena bann zoli kalite, ek okenn par dan Labib pa dir ki li ti komet limoralite ankor.—Zen. 37:20-22; 42:37.

8. Ki leson nou kapav aprann ar lexanp Ribenn?

⁸ Ki leson nou aprann? Nou bizin fer zefor pou kontrol nou bann move dezir ek pou rezet limoralite sexiel. Si nou gagn tantasion pou fer enn pese, nou bizin pran letan pou reflesi lor kouma sa pou bles Zeova, nou fami, ek lezot. Nou bizin rapel osi ki “seki enn dimounn pe seme, samem ki li pou rekolte.” (Gal. 6:7) Lexanp Ribenn rapel nou osi ki Zeova Li enn Bondie ki ena mizerikord. Mem si arive nou soufer akoz konsekans bann pese ki nou’nn fer, si nou repanti ek ki nou fer zefor pou fer seki bon, Zeova pou pardonn nou ek Li pou beni nou.

SIMEON EK LEVI

9. Kouma Simeon ek Levi ti desevwar Zakob? (Zenez 49:5-7)

⁹ Lir Zenez 49:5-7. Apre sa, Zakob ti koz ar Simeon ek Levi. Selman, seki li ti dir zot ti montre ki zot ti bien desevwar li. Inpe letan avan, Sikem, enn Kananeen, ti viol Dina, Zakob so tifi. Akoz sa sitiasion-la, li normal ki tou bann garson Zakob ti bien ankoler. Selman, Simeon ek Levi pa ti reisi kontrol zot koler. Zot ti koz manti ar Sikem ek ar so pep, ek zot ti dir bann-la ki si tou zot bann zom ti sirkonsi, ti pou ena lape ant bann-la ek Zakob so fami. Sa bann zom-la ti dakor ek zot ti fer zot sirkonsi. Selman, pandan ki zot ti pe korde ar douler, Simeon ek Levi “ti pran zot lepe ek zot ti rant dan lavil san ki lezot doute ki zot ti vinn fer ek zot ti touy tou bann dimounn ki ti sex maskilin.”—Zen. 34:25-29.

10. Kouma profesi Zakob konsernan Simeon ek Levi ti realize? (Get osi lankadre “Profesi Zakob.”)

¹⁰ Zakob ti bien ankoler ar so de garson parski zot ti touy boukou dimounn. Li ti predir ki zot bann desandan ti pou res inpe partou dan Izrael. Sa profesi-la ti realize plis ki 200 an apre, kan bann Izraelit ti rant dan Later Promiz. Tribi Simeon ti gagn sertin lavil inpe partou dan teritwar Zida. (Zozwe 19:1) Ek tribi Levi ti gagn 48 lavil inpe partou dan Izrael.—Zozwe 21:41.

11. Sit bann bon kitsoz ki tribi Simeon ek Levi ti fer.

¹¹ Bann desandan Simeon ek Levi pa ti fer mem erer ki zot bann anset. Tribi Levi ti servi Zeova avek fidelite. Par exanp, pandan ki Moiz ti lor Montagn Sinai kan Zeova ti donn li Lalwa, boukou Izraelit ti ador stati enn ti bef. Me bann Levit pa ti ador sa zidol-la. Okontrer, zot ti ed Moiz pou touy tou bann ki ti ador sa stati-la. (Ex. 32:26-29) Zeova ti donn tribi Levi enn privilez spesial; bann zom sa tribi-la ti pou servi kouma pret dan Izrael. (Ex. 40:12-15; Nonb 3:11, 12) Ek konsernan tribi Simeon, bann-la ti ed tribi Zida pou lager kont bann Kananeen pou zot gagn bann teritwar dan Later Promiz.—Ziz 1:3, 17.

12. Ki leson nou kapav aprann ar lexanp Simeon ek Levi?

¹² Ki leson nou aprann? Fode zame to les lakoler inflians to bann desizion ek to bann aksion. Si enn kikenn inn fer twa ditor ouswa inn fer ditor enn kikenn ki to kontan, li normal ki to pou ankoler. (Ps. 4:4) Selman, si to dir ouswa fer enn kitsoz ki pou bles li, Zeova pa pou kontan. (Zak 1:20) Kan enn kikenn ki servi Zeova ouswa ki pa servi Zeova, fer nou ditor, nou bizin reazir dan enn fason ki fer Zeova plezir. Sa pou ed nou pou evit dir li ouswa fer li bann kitsoz ki kapav bles li. (Rom. 12:17, 19; 1 Pier 3:9) Ek si to bann paran pe fer bann kitsoz ki Zeova deteste, to pa oblize swiv zot lexanp. Fode pa to panse osi ki to enn ka dezespere ek ki to pa merite ki Zeova beni twa. Zeova pou ed twa pou to fer seki bon, ek si to fer sa, Li pou rekonpans twa.

ZIDA

13. Kifer Zida kitfwa ti trakase kan li ti tann bann parol ki so papa ti dir so bann frer?

¹³ Apre sa, Zakob ti koz ar Zida. Apre ki Zida ti tann bann parol ki Zakob ti dir so bann gran frer, kitfwa li ti koumans trakase. Kifer? Parski li osi, li ti fer bann gro erer. Par exanp, apre ki Simeon ek Levi ti touy bann zom Sikem, Zida ansam avek so bann frer, ti al dan sa lavil-la ek ti pran bann-la zot bann dibien. (Zen. 34:27) Zida ti osi donn enn koudme pou vann Zozef kouma enn esklav ek pou anbet zot papa. (Zen. 37:31-33) Ek apre sa, Zida ti gagn relasion sexiel ar enn madam ki li ti panse ti enn prostitie, alor ki sa madam-la ti so belfi, Tamar.—Zen. 38:15-18.

14. Sit bann bon kitsoz ki Zida ti fer. (Zenez 49:8, 9)

¹⁴ Selman, Zakob ti ena zis bann benediksion ek bann felisitasion pou Zida. (Lir Zenez 49:8, 9.) Zida ti montre ki li ti vremem gagn traka so papa ki ti vinn vie. Ek li ti osi ena boukou konpasion pou so ti frer, Binzamin.—Zen. 44:18, 30-34.

15. Kouma bann benediksion ki Zakob ti anonse pou Zida ti realize?

¹⁵ Zakob ti predir ki Zida ti pou vinn sef lor so bann frer. Selman, sa profesi-la ti koumans realize 200 an apre. Apre ki bann Izraelit ti kit Lezip ek ki zot ti pe marse dan dezer pou al dan Later Promiz, tribi Zida ti mars devan tou bann lezot tribi. (Nonb 10:14) Plizir lane apre, kan bann Izraelit ti bizin lager kont zot bann lennmi pou gagn Later Promiz, Zeova ti avoy tribi Zida an premie pou lager kont bann Kananeen. (Ziz 1:1, 2) Ek David ti premie dan tribi Zida pou vinn lerwa lor Izrael. Ek apre li, ti ena boukou lezot lerwa ki ti sorti dan tribi Zida. Me ena bann lezot fason ankor ki profesi Zakob ti realize konsernan Zida.

16. Kouma profesi ki trouv dan Zenez 49:10 ti realize? (Get osi lankadre “Profesi Zakob.”)

¹⁶ Zakob ti anonse ki enn desandan Zida ti pou diriz tou bann imin ek ki li ti pou dirize pou touletan. (Lir Zenez 49:10 ek not.) Zakob ti apel sa dirizan-la, Silo, ek sa Dirizan-la se Zezi Kris. Konsernan Zezi, enn anz ti dir: “Bondie, Zeova, pou donn li tronn so zanset, David.” (Lik 1:32, 33) Labib servi osi lexpresion “Lion ki sorti dan tribi Zida” pou dekrir Zezi.—Rev. 5:5.

17. Kouma nou kapav swiv lexanp Zeova dan fason ki nou trouv lezot?

¹⁷ Ki leson nou aprann? Zeova ti beni Zida mem si li ti fer bann gro erer. Me kitfwa bann lezot frer Zida ti demann zotmem kifer Zeova ti rekonpans li. Mem si nou pa kone seki zot ti panse dan sa ler-la, nou kone ki Zeova ti trouv bann zoli kalite ki Zida ti ena ek ki Li ti beni li pou sa. Kouma nou kapav swiv lexanp Zeova? Kan enn frer ouswa enn ser gagn enn responsabilite inportan, kitfwa nou kapav demann nou-mem kifer li’nn gagn sa responsabilite-la, sirtou si nou konn so bann defo. Selman, fode pa nou bliye ki Zeova inn trouv bann zoli kalite ki sa dimounn-la ena. Zeova trouv bann zoli kalite ki so bann serviter ena, ek nou osi, nou bizin fer zefor pou fer parey.

18. Kifer nou bizin ena pasians?

¹⁸ Enn lot leson ki nou kapav aprann ar lexanp Zida, se ki nou bizin ena pasians. Zeova touletan tini so bann promes. Selman, Li pa touletan fer sa dan moman ek dan fason ki nou nou panse. Kan Zakob ti beni Zida, se pa deswit ki bann desandan Zida ti vinn bann sef lor Izrael. Selman, zot ti soutenir tou bann ki Zeova ti swazir kouma sef, kouma par exanp, Moiz ki ti enn Levit, Zozwe ki ti enn Efraimit, ek Lerwa Sail ki ti enn Binzaminit. Nou osi, nou bizin soutenir tou bann ki Zeova swazir pou gid nou azordi.—Ebre 6:12.

19. Ki nou’nn aprann ar bann parol ki Zakob ti dir so kat premie garson?

¹⁹ Ki nou’nn aprann ar bann parol ki Zakob ti dir so kat premie garson? Li kler ki “Bondie pa get parey kouma dimounn gete.” (1 Sam. 16:7) Zeova ena boukou pasians ek Li pre pou pardone. Li pa kontan kan nou fer bann move kitsoz, selman Li pa atann ki nou parfe. Li kapav mem beni bann dimounn ki’nn fer bann pese grav dan lepase, si zot vremem repanti ek zot fer seki drwat. Dan prosin lartik, nou pou gete seki Zakob ti dir so wit lezot garson.